2007-12-17

美國已陷滯脹

　　12月16日，周日。今年油價由1月份50美元一度升至11月接近100美元，估計超過20美元係地緣政治風險。當美國宣布伊朗並冇生產核武器，呢20美元地緣政治風險將從油價中剔除，引發近日油價回落，亦令金價下挫。明年展望美國政府將全力應付次按危機以免其擴散，防止經濟增長放緩演變成衰退，影響明年選舉。今年被睇好資源股，明年將失去魅力。

　　中國眼見美國樓市去年下半年起走下坡引發一連串問題，自然加強宏調力度，阻止樓價進一步上升。內房股近月已大幅回落，相信明年第一季亦缺乏吸引力。展望明年可睇好項目不離內需股同高科技股，明年投資以上述兩大項目為主。

恒指短期或下破上月低點

　　展望短期恒生指數，有機會略為下破11月22日25861點，才再重建上升基礎。本周將出現「冬雪」。高盛、大摩、貝爾斯登分別本周二、周三及周四公布業績，JC Penney's、Macy、沃爾瑪、Lowe's、Targets、Dillard's紛紛警告今年聖誕節零售情況可能並唔理想，因為有15％消費力來自財富效應，今年卻因樓價回落及次按問題出現而消失。由於消費佔美國GDP 72％，加上美國11月份入口價格上升2.7％（或年率11.4％）、生產價格升3.2％（或年率7.2％）、CPI升0.8％（或年率4.3％），意味美國第四季經濟已陷入滯脹。

　　道指出現自2002年10月上升以來最大波動期，企業純利亦出現2002年年初至今首次出現萎縮，擔心全年計道指可能並冇升幅。十二位著名策略員對明年展望皆悲觀，並估計聯儲局將繼續減息，佢地包括高盛Abby Joseph、瑞信Jonathan Morton、花旗、美林、貝爾斯登、JP摩根大通、瑞銀、大摩、德銀、寶盛……，不過，佢地同時認為個別行業及股份仍有出色表現。貝南奇呢名著名直升機師似乎失去吸引力，人們唔再相信佢透過擲銀紙可解決美國次按問題。上周美元升至一個月高位，南非蘭特跌2.8％、瑞郎跌2.2％、澳元跌1.7％、紐元跌1.4％、加元跌1.1％。兩年期債券卻回落，因擔心通脹率惡化。英鎊跌幅更接近2％，因英國房地產價格開始回落，投資者情緒跌至1998年以來低點，11月係負47（10月係負35.3％）。

次按對香港影響微風細雨

　　隆巴特利率拒絕由七年高位回落（雖然至今聯儲局已三次減息及由8月16日起多次注資），三個月期隆巴特利率仍保持4.95厘，係2000年12月以來高水平，甚至較2001年9月11日後更高，睇落央行聯手注資660億美元計劃作用唔大。銀行家估計，與次按有關貸款牽連資金超過3000億美元。明年3月Euribor（歐洲美元利率期貨）仍做4.6厘。隆巴特利率較美國聯邦基金利率高，形成資金由美國流出，不利美國資產。

　　反之，新興市場已較亞洲金融風暴前不同。一、佢地全球GDP佔有率已由1999年20％上升至2006年30％。二、金磚國過去五年每年GDP增長率平均8％；而OECD國家過去五年每年GDP增長率不足2％。三、大部分新興國外貿有盈餘及財政盈餘；而OECD國家除日本外都有貿赤，而且全部都有財赤。四、新興國家出口對美國市場依賴度已降至16％（2001年25％）。唔好再信「美國打噴嚏，全世界傷風」。換言之，美國次按危機影響一定有，但其國際影響力已迅速下降，例如對香港影響只係微風細雨。

小心美樓市第二波回落

　　格蛇又再開口話衰退危機正在增加，並否認2003年6月將利率推低至1厘係引發呢次次按危機元兇，理由係今次房地產泡沫唔係美國獨有，超過兩打以上（二十四個）國家都有房地產泡沫；加上短期利率係無法影響長期利率，真正引發次按危機係銀行界不負責任貸款態度，而唔係聯儲局。Dr. Robert Schiller（史丹福大學經濟學者，2001年出書話科網股泡沫爆破）叫大家小心美國房地產「第二波」回落，估計將由2007年8月跌至2011年，跌幅較大部分人估計更大，時間亦較大部分人估計更長；2006年8月至07年8月只係第一波，跌幅細且成交額萎縮，因為人們仍唔信樓價可以大幅回落。2007年8月起進入第二波，即成交額漸回升，而且樓價跌幅擴大，因為人們開始接受樓價係可以下跌，估計對經濟影響甚於科網股泡沫爆破。

　　紐約雷曼證券分析員Ethan Harris認為，美國樓市回落周期只完成一半，2008年情況只會繼續惡化。CreditSights Inc最樂觀估計，美國樓價2009年才見底。Wexford主席Ron Muhlenkamp話，美國樓市情況惡化速度較大部分人估計快，而且向英國、加拿大甚至德國擴散；英國商業樓交易今年第四季可能只有50億英鎊（去年同期186億英鎊）；美國寫字樓10月份成交亦較去年同期減少70％、零售單位減少50％、工業樓減少24％。

　　歐洲央行荷蘭成員Nout Wellink上周五接受荷蘭一份日報De Volkskrant訪問時認為，全球信貸面對第二波衝擊，擔心較第一波更差！

　　上周一至周三基金面對48.6億美元淨贖回（即賣出扣除買入）。資金仍在退出美股，引發上周五美股大跌。

高盛賭次按惡化由輸變贏

　　 A. Gary Shilling & Co主席上周五接受彭博訪問時認為，美國經濟漸漸進入衰退期，次按危機進一步惡化，聯儲局不應再擔心通脹問題，反而要擔心通縮，因為樓市泡沫爆破後必產生通縮壓力。美國唔同日本，日本通縮唔會出口到別國，但美國通縮壓力會好快擴散到全球。貸款機構正努力收回貸出款項，引發明年信貸進一步收縮，佢地包括Countrywide、Washington Mutual、富國銀行、Wachovia……；金融機構亦正在處理手上CDO，包括花旗、大摩、瑞銀、貝爾斯登、美林……；半官方機構則等候政府注資，如房利美及房貸美……。呢段日子唔係一年半載可以改變，信貸收縮壓力下，美國樓價同股價點樣上升？

　　穆決定將花旗信用降級到Aa3，並考慮將多間金融機構信用降級。睇次按危機仍在不斷惡化。

　　高盛證券賭樓按惡化，至11月30日贏40億美元，抵銷手上因樓按惡化而產生15億到20億美元虧損，功臣係Michael Swenson及Josh Birnbaum，佢地力言次按危機惡化，並獲佢地頭頭Dan Sparks支持，令公司化危為機（贏番40億美元，足夠抵銷手上次按虧損有餘），估計可獲500萬到1500萬美元花紅，由此可見眼光同勇氣幾咁重要。去年1月Swenson開始擔心樓按惡化影響而收集呢方面資料，去年12月獲佢地頭頭支持大量拋空次按證券，不但對沖手上次按而且建立公司呢方面倉位，令佢地今年由輸家變成贏家。金融界其他人風險管理上又上一課。

　　2004、05年超過一百三十萬家庭以ARMs方式借入3890億美元貸款去買樓，去年下半年起開始到期並恢復正常供款，最高潮係明年第二季；去年以ARMs方式再借出超過1000億美元……。控（005）今年2月8日已宣布處理，下半年更公開宣布「整個次按項目係錯，豐向股東保證唔會再發生」，即未來次按市場，豐只會係沽家唔會係買家。去年12月至今已有二十三間次按機構申請破產，最早發明次按花旗集團今年股價回落超過40％；美林、瑞銀、貝爾斯登、New Century陸續出現大撥備。呢次次按問題有幾大、影響有幾深、維持幾耐？鎖你，我老曹木宰羊，只知君子不立危牆之下。次按危機下綠洲邊度？美國人紛紛改國庫券同公用股。至於香港，由於遠離重災區，只要小心謹慎D即可，千祈咪手多多。請記住畢非德教誨──投資第一課係唔蝕本，第二課係記住第一課。

聯儲局政策唔湯唔水

　　次按會否影響美國消費市場？1991╱92年次樓價回落，美國GDP出現一季負增長（軟陸），但冇出現衰退（連續兩季GDP負增長）。2001年「九．一一慘劇」亦只出現一季GDP負增長，冇出現衰退。相信美國明年亦唔會衰退，但唔少地產經紀將會拍烏蠅。聯儲局既要睇住樓市，又要擔心美元價，結果所有政策都係唔湯唔水！