美經濟衰退利好美元
1月30日，周三。恒生指數跌638.11，收23653.69；成交1050.7億元。1月期指以24065點結算；2月期指低水，跌705點，收23620點；3月期指跌731點，收23529點。遠期期指較現貨月低，如商品市場，意味炒後市再跌，唔知上述理論可否用於恒指期貨？今天國企指數更跌4.7％，國壽（2628）跌7.4％、光大控股（165）跌15％。
內地極可能管制煤價
滬深A股跌1.08％，神華能源跌4.8％、平煤天安跌7.7％、金牛能源跌7.9％、鋅業下跌8.2％、國壽跌6.1％。
花旗推介AAC（2018）目標價10元；比亞迪（1211）目標價55元；富士康（2038）目標價19元；聯想（992）目標價7元。花旗認為，各位睇已經公布經濟數據去分析後市，有如睇倒後鏡去車，過去並唔反映未來。近期國際投資者拋售後抽走資金，令港元價弱勢出現，擔心香港經濟由過去五年擴張期進入2008年開始收縮期，即使中國QDII亦救不了香港。花旗提出疑問，當美國經濟進入放緩期，中國可以唔受影響咩？
中國十七省電力供應不足，但中央拒絕煤電聯動，認為必要時會干預煤價。令人擔心內地物價管制在擴大中，為管制電價，極可能亦會管制煤價……。改革開放政策亦出現鐘擺理論，中國經過三十年價格自由化後，去年下半年開始逐步管制物價。
瑞銀認為，2001年美國經濟出現軟陸，當年香港樓價回落24％（同期美元利率下降）。美國經濟2008年亦出現軟陸，到底減息作用大抑或經濟軟陸作用大？瑞銀展望2008年全球股市，認為more downside, modest upside。
BNP百利達認為，踏入鼠年首重保本。各位保本之餘如欲投資，可選以下股份；精電（710）、偉易達（303）、富豪產業信託（1881）、陽光房產（435）、冠君產業（2778）、泓富產業（808）、佐丹奴（709）、ASM太平洋（522）、越秀房托（405）、合和基建（737）、莎莎國際（178）、維他奶（345）、載通（062）、新創建（659）、SCMP集團（583）、滬杭甬高速（576）、江蘇寧滬（177）、電視廣播（511）、電訊盈科（008）、合和實業（054）、香港電燈（006）、中電控股（002）、長江基建（1038）。
Countrywide宣布手上次按貸款不遵守合約比例已升上33.64％（9月係29.08％）。供款延期超過九十天者佔總次按17.25％；物業按揭遲供款者上升7.32％；首按供款遲供者升至5.76％；不遵守合約者升至8.64％。
美息難以重見1厘
去年全年美國被接管住宅單位較2006年增加79％，達一百三十多萬間（2006年七十一萬七千多間）。根據Realty Trac Inc.資料，依家已入紙申請而未被接管住宅單位亦上升75％，達二百二十萬間；即今年情況肯定較舊年惡劣。去年美國有1％住宅單位被接管（2006年0.5％），估計今年有2％住宅單位將被接管。今年將有一百八十萬宗次按貸款面臨重訂息率而加息，加上樓價下跌，今年欲將物業加按已唔容易。去年12月已有二十一萬五千七百四十九間住宅被接管，較2006年同期上升97％，係連續第五個月有超過二十萬間住宅被接管。美國樓市已經從bad轉為worse。
減息能否挽救美國樓市？木宰羊，但減息肯定對美元不利。債券大王格羅斯估計聯邦基金利率好快見2.5厘，但無法見2003年6月1厘水平，佢擔心美元弱勢下長期利率將上升，即今年上半年呈現短期利率下跌、長期利率上升。呢個鐘擺正由2003年6月起向另一方向擺動，請各位穩坐釣魚船。令人擔心係，大量主權基金資金已被綁，請問仲有幾多主權基金繼續接貨？究竟係阿拉伯國家、新加坡、中國官員投資智慧高D，定係美國職業投資者？好快就知道。
殊仔將變成跛腳鴨，因為總統大選漸進入高潮。誰會入主白宮？美國經濟好快會進入「冇人話事」期，你說怎麼辦？
IMF估計，今年美國GDP增長率只有1.5％，全球GDP增長率將降至4.1％。由美國樓價回落引發次按危機，影響正由美國擴散到歐洲十五個歐盟國，估計今年GDP增長率將降至1.6％。日本GDP只有1.5％增長率、中國10％、拉丁美洲4.3％；唯一亮點係非洲，仍有7％升幅，較去年6％好。
七十年代後期，美國聯儲局由商人米勒出任聯儲局主席，一切從商人角度睇問題，令美國七十年代通脹率唔受控制，美元價接近崩潰。當年卡達總統大選前將佢廢，換雪茄伏上台，1980年世人對美元信心重新建立，但無法令卡達連任。
2006年2月殊仔選大學教授貝南奇做聯儲局主席，佢將利率做學術研究。美林北美洲分析員David Rosenberg批評貝南奇連資產通縮可產生信貸危機亦唔知，投資者已做大量Put輪去迎接佢宣布減息。1997年貝南奇及兩位同事曾挑戰1983年James Hamilton理論，指高油價唔係引發1981-82年世界經濟衰退理由，貝南奇認為1980-81年雪茄伏高利率政策先至係主因。1997年利率對經濟影響只係兩派學術之爭，注意人唔多。貝南奇唔認同高油價引發衰退，而係高息，2006年2月上任後佢唔肯再大幅加息去壓抑油價，最近更大幅減息去證明自己理論正確。呢次結果或可證明佢（如果冇衰退）或錯（如果真係衰退），只係全人類都為佢呢次學術研究而付出沉重代價；真係祝君好運（最後一定有答案，但我老曹唔想用自己家財賭呢鋪）。
人人談次按，而忘記二按。去年8月次按危機後，金融機構已唔敢做二按，即去年9月起美國業主已不能再透過將層樓加按提款消費；估計今年二按會繼續凍結落去，冇人知道影響有幾深，相信信用卡呆壞賬危機好快出現。美國FBI已介入調查十四間公司涉及次按問題，查緊有冇非法行為。
1月份美國消費信心87.9（12月修改為90.6），仍然未算太差。
準備迎接熊市確認訊號
投資首重策略，尤其身處高風險環境。美國消費者需求今年肯定轉弱，但影響係點仲未清晰。投資有時需要耐性，有時需要靈活變通，冇一成不變方法。熊市中，出現拋售高潮才入市比較安全，例如1月22日當恒生指數跌穿250天線見21709點時，唔少半桶水分析員大叫「牛熊分界線失守」。技術分析上從來冇牛熊分界線呢回事，我老曹所學係跌穿250天線（外國係200天線）叫做spring（突然跳起），有90％機會第二天出現反彈。
例如去年8月17日恒生指數19386點跌破250天線，D半桶水分析員唔係呱呱叫熊市來臨咩？呢個spring應該入市博反彈。結果恒指由去年8月17日升至10月30日31958點，升幅63.37％，誤信半桶水分析員者，失去一次賺大錢機會。人如果不能從過去失敗中吸取教訓，係冇得救。
1月22日spring不能同去年8月17日次比，因為8月17日係牛spring，呢次極有可能係熊spring。大家會問：兩者都跌穿250天線，點解你老曹咁講？任何分析不能憑直覺，而需要數據（data）支持。2007年8月17日係牛spring理論根據，係當時50天線仍向上，咁情況下，跌穿250天線應可出現強力反彈，升幅十分驚人（因為淡友被挾死）；反之，1月22日係熊spring，理據係50天線由去年12月起已向下垂，雖然同樣可出現反彈，但呢次反彈唔係挾淡倉，而係淡友平倉，勢仍淡方。如恒生指數無力重返50天線（26856點），小心淡友發動第二次攻勢，令250天線第二次失守，到時便唔再係spring，而係淡友攻陷重要防守線，技術上睇極之差。各位宜準備迎接「熊市確認」訊號（即50天線跌穿250天線），後市進一步睇淡。
RSI理論非十年不為功
同新城財經台第一次開show時，我老曹曾講過：唔識游水者浸唔死（因怕死唔會游得太遠），識游水者浸唔死（因熟識水性），浸死通常係半桶水者。換言之，投資市場損失最慘重者，就係D半桶水分析員。整個七十年代我老曹醉心於技術分析，自己亦做過半桶水分析員，包括相信加息睇淡後市、減息睇好後市謬論。移動平均線1973年由我老曹從外國引入香港，初期亦掌握得唔好，經常同森池兄討論甚至爭論，到1983年才真正了解其中竅妙。至於RSI，最先接觸係1978年一位由美國留學歸來朋友，佢用炒金，由於大家都係半桶水，一見超買便拋空、一見超賣便入貨。1979年中，卡達總統唔知宣布乜，令金價出現超賣，我老曹入貨，但金價再跌，我老曹叫止蝕，但係朋友唔肯（因我老曹首次學人炒金，自然搵老行尊帶路），結果金價連跌七個交易天，我老曹5萬元孖展全軍盡墨，從此對RSI有戒心。1979年9月後金價出現嚴重超買，呢位美國留學生建議拋空，我老曹嘗過RSI超賣滋味，早對RSI有戒心，自然話唔制。結果金價回落，又一次被人笑到面黃。1979年10月金價嚴重超買，呢位仁兄又拋空，並講明「唔受我玩」，點知呢次闖大禍，金價1979年11月及12月都處超賣區。最後結果係我呢位從美國學曉RSI歸來朋友，一個斧頭返辦公室將三部電腦劈開洩憤。事後知道佢將老竇留低780萬元遺產（當年可買八層豪宅）此役中輸突，倒欠30萬元。其後陳玉炯教授欲建立TSCI公司，我老曹協助佢製作RSI軟件而重新翻查十年數據，搵到RSI竅門。其後同譚紹興兄提及，佢其他報章曾大力推廣，就係近年各位常用RSI三浪背馳及五浪背馳。1987年香港出現股災後，我老曹用陳玉炯教授所製作RSI做分析，協助自己作決定。今天我老曹完全知道RSI優點同缺點；所謂盡信走勢不如無走勢。
中學時只要勤力讀書，九十分唔難；其後每一分都好難，一百分更難比登天。各位睇三幾本走勢分析書，可以講已能掌握其中90％技術，做個半桶水分析員。但要充分掌握移動平均線理論，或RSI理論非十年不為功，只要工夫深，鐵桿磨成針。業精於勤而疏於戲。各位應了解為何我老曹每天工作十二小時、一星期七天理由。
八十年代我老曹亦曾接觸波浪理論，並同許沂光兄共同研究，自己搞十年仍搞唔清D「extension」（伸延），往往事後才清晰，事前數到亂晒大籠。到1997年因其他事忙，我老曹放棄再追尋落去。到今天為止，我老曹仍搞唔清乜情況下浪5有伸延或冇伸延？連國際級波浪理論大師Robert R. Prechter亦解釋得唔清唔楚，九十年代開始我老曹甚少用波浪理論矣，因為連自己亦搞唔掂。
2003年新學曉投資法係「牛眼投資法」，過去五年成績不俗，但有冇缺陷？木宰羊。
沒有留言:
張貼留言