2008-01-23

極度超賣隨時反彈


　　1月22日，周二。恒生指數跌2061.23，收21757.63；成交1557.57億元。1月期指高水，跌1785點，收21803點。相信周三恒指出現反彈機會好大。雖然標普五百期指跌4.7％，見1263點，但美國今晚宣布減息四分三厘後，美股先跌後喘定。

　　今天恒指跌8.6％、國企指數更下跌11.97％。控（005）跌8.1％、利豐（494）跌7.2％、港交所（388）跌9.9％，中國鋁業（2600）跌15％、紫金（2899）跌14％，中海油（883）跌13％、中石油（857）跌15％，因油價下跌4.3％；六種金屬指數跌3.4％。東方航空（670）跌12％。MSCI亞太指數去年11月至今已跌24％，確認熊市。

250天線唔係牛熊分界線！

　　滬深A股跌7.62％，平安保險、中國國航等近半數指數成分股跌10％跌停板。滬深A股指數收4753.87，極之接近200天線4605.56，如果再跌，呢條200天線便宣布失守【圖】。Stupid mistake係生活一部分，聰明人只犯一次便學乖，愚蠢人卻一錯再錯。歐洲經濟開始感覺到美國經濟增長放緩傳來陣陣寒意，中國投資者唔知感受到未？美國次按風暴已吹到歐洲各商業銀行，中資銀行有冇感冒？未來幾個月歐洲企業及消費者較難從銀行獲得信貸（德國消費信心跌至1992年以來最低）。ING銀行分析員Martin van Vliet認為，寬鬆信貸日子已經結束。周一美國假期，周二亞洲股市進一步下沉，恒生指數跌穿250天線（我老曹再一次強調，250天線唔係牛熊分界線），股市已進入超賣區’至於周三會否再現拋售高潮才轉升，又或250天移動平均數左右出現技術反彈？便唔易事先估計。略破250天線係買入而非拋售訊號，呢點唔好搞錯。

　　2007年10月之前係好時年，2007年11月起情況開始轉壞，不足三個月內恒指跌幅超過一萬點（或三分一），理由係美國經濟可能出現衰退及中國政府一再抽緊銀根。展望2008年中國GDP仍可上升10.4％、香港GDP上升5.4％，恒指跌至22000點以下已物有所值，因美元利率到2008年年中可降至3.25厘，恒生指數有條件19000點到25000點之間上落。瑞銀認為現水平係吸納好時機，建議吸納港交所（388）、中移動（941）、中聯通（762）等。

　　全美第二大銀行美國銀行去年第四季純利2.68億美元，較2006年同期回落95%；本月宣布收購全美最大住宅按揭公司Countrywide Financial Crop.，代價40億美元市值股票，以公司去年虧損27.6億美元（2006年獲利14億美元），完成收購後，美銀可佔全美按揭市場25%。美國銀行股價過去十二個月回落33%，少於花旗跌幅55%，但大於JP摩根大通20%。美國銀行收益20%來自海外（花旗45%、JP摩根大通25%）。

債券持有者應拋售

　　花旗認為，2007年超級大戶共吸納2400億美元新興市場股票，近期只係獲利回吐，主因係美國經濟放緩（估計今年GDP上升1.2％、去年2.4％），一旦拋售完成，又再陽光普照。

　　路透社估計，標普五百去年第四季純利出現負10.9％增長，今年上半年純利增長率進一步回落。

　　今年12月聯邦基金利率期貨已見2.88厘；十年期債券孳息率已回落至3.77厘，係2004年3月至今最低。今年3月美指數75.7，代表美元未來2、3月仲會回落。兩年期債息已跌至2.33厘，係2004年8月以來最低，每次兩年期債券息率低於2.5厘，代表債券價格上升日子結束，相信呢次亦唔例外，債券持有者又到應拋售水平。去年9月開始三次減息並未改變美國經濟大方向，今次減息0.75厘都唔例外，但可支持美股進入一次大反彈。如無意外，股市另一次反彈好快出現。加拿大亦減息0.25厘。

　　估計歐洲央行維持4厘（2008年12月利率期貨成3.935厘），明年6月利率期貨3.74厘，代表下一次減息明年才出現。

　　英鎊仍有減息空間，估計今年內逐步回落到4.25厘。

　　金價見915.9美元才回落，London Bullion Market Association估計，今年平均金價862.33美元，較去年平均價652.38美元為高；今年超過50％以上機會見1000美元。配合美元弱勢及利率向下，可利用每次回落吸納黃金。

　　日圓亦由105.62（2005年5月至今最高）回落，估計可見106.5日圓兌1美元。

熊市唔代表只跌不升

　　日經平均指數下跌5.65％，見12573點；標普五百期指回落4.8％。標普五百指數由去年10月至今跌幅超過20％，確認熊市；歐洲道瓊斯Stoxx 600指數周一下跌5.7％，由高處下跌至今亦達20％，確認熊市。熊市唔代表只跌不升（一如牛市唔係只升不跌）。熊市反彈往往超賣區出現。

　　高盛估計，今年美國第一季GDP增長率極細，第二及第三季GDP出現少於1％負增長，第四季上升0.5％；即今年第二及第三季美國經濟將出現衰退。估計未來三至六個月美元將見1.51兌1歐羅，未來十二個月美元見1.4兌1歐羅，即美元今年第二季或第三季見底。

　　美國領先指標連跌三個月（10月、11月及12月），顯示美國經濟進入放緩期。美國CEO信心指數第四季跌至39點（第三季44點），係2001年11月以來最低，代表美國大企業CEO亦開始擔心衰退。

道氏理論通訊作者Richard Russell（佢去年11月21日發出美股熊市訊號），話呢隻熊係一隻憤怒灰熊（angry bear），殺傷力好大，絕對唔係中國熊貓，而係美國大灰熊，並已咬住投資者咽喉唔放。不但美股係咁，而且向全球股市擴散。

　　Fullermoney作者David Fuller話，一年前次按危機已浮現，但投資者唔加理會，結果次按危機漸漸擴大。今天已改變企業、消費者及投資者心態開始恐慌性拋售。次按問題短期癱瘓西方銀行系統，即使各主權基金願意recapitalization亦需時間。佢估計，呢次次按及合成CDO總虧損可達4000億美元，相等於美國GDP（14萬億美元）2.8％。美國所有住宅市值58.6萬億美元，如樓價回落10％係5.86萬億美元，相當於美國GDP 41.8％。政府力量相對於次按危機及樓價調整，其實好渺小，1500億美元相等於次按虧損35％或樓價跌幅2.58％。危機最終一定會過去，一如泰國芭堤雅海嘯，只係過後面目全非。

　　Brewin Dolphin證券分析員Mike Lenhoff認為，全球股市已進入超賣區，股票漸漸重返物有所值水平。佢認為，牛市並未完結，只係另一次整固期。

　　瑞信策略員及豐銀行策略員亦認為，現水平可以考慮投資美股，減持歐洲股市，對新興市場抱中立態度。

　　BCA Research建議投資者債市獲利回吐，以及小心中國經濟增長減慢。

　　Gavekal仍審慎睇好油價，並同意油價進入危險區域，以及小心中國A股。德國銀行Michael Lewis仍睇好農產品。

　　上述都係世界級知名分析員，意見肯定有參考價值。

白宮聯儲局齊阻經濟休克

　　參考1990至91年及2000至02年美國兩次經濟軟陸，1990年2月至10月亞洲股市指數（唔包括日本）回落40％；2000年2月至2001年9月亞洲股市指數（唔包括日本）回落53％。假設美國經濟2008年出現軟陸，亞洲區股市跌幅有幾大？1990年次亞洲股市O跌至十倍，2001年次亞洲區股市O跌至十一點五倍，依家亞洲區股市平均O十四點七倍，即係仲有一定下跌空間。何況近年亞洲股市指數已加入中國同印度，印度股市去年12月O二十八點七倍才開始回落，恒生國企H股去年10月O高達三十八倍。

　　經濟歷史學家Charles Kindleberger形容，金融市場分為三部曲：「Manias, Panics, Crashes」。去年下半年股市進入狂熱期，依家開始恐慌性拋售。如政府及財金官員處理得唔好便會進入崩潰期；如政府及財金官員有智慧，則可阻止崩潰出現。例如2002年格蛇便成功阻止崩潰出現，至於貝南奇有冇咁智慧？經過一天假期後，美國聯儲局主席、財長及白宮官員齊齊腦震盪，應諗到方法去阻止美國經濟出現休克。是耶非耶？周三港股開市前便知道。

　　貝南奇三十年前畢業於麻省理工大學，並開始閱讀佛利民諾貝爾得獎論文。佢最令人注目文章係點樣防止通縮恐慌（deflationary panics），上述恐慌可能因股市大跌而引發，又或聯儲局失策而造成。佢過去研究就係點樣防止類似1930年代大蕭條情況今天美國出現。佢剛接任聯儲局主席2006年2月，佢批評格林斯平談話官式化。佢上任快兩年，人人感覺佢信心不足，亦未能預見房地產斷供所引發次按危機。佢開出藥方未見成效，但亦得承認貝南奇所面對困難較格蛇任內十八年任何時間都大。貝南奇面對情況有如七十年代前聯儲局主席伯恩斯，如今衰退2008年出現，將負起令共和黨總統選舉中大敗責任（雖然未必關佢事）。過去十二個月美國CPI已上升至4.3％，大大拋離貝南奇目標通脹率；不過核心通脹仍然唔高，相信唔會出現七十年代式通脹。同雪茄伏唔同，八十年代列根剛上台，佢可以唔理會經濟出現衰退所帶來影響，全力打擊通脹。

貝南奇政治壓力不輕

　　依家聯儲局面對兩大威脅：一、貸款者（銀行及投資者）謹慎令短期信貸收緊，聯儲局已透過貼現窗去應付，至今成績唔係太好。二、2001年起格蛇逐步將利率降至1厘造成過度借貸，去抵銷科網泡沫所造成傷害，結果樓價一升再升，因ARM（Adjustable rate-mortgages）以聯邦基金利率為準。未來聯儲局再唔能夠將利率降至1厘，即ARM一旦到期，供樓利率便上調；加上貝南奇決定利率方面太民主，即公開市場委員每人都有發言權，而非格蛇時代接近一言堂。去年10月一個成員對貝南奇減息投反對票，12月又有人認為貝南奇減息幅度不足，民主反令市場失去方向。

　　唔係任何事都可透過民主方案去解決，三十年代聯儲局主席亦犯相同錯誤，就係對黃金態度民主；羅斯福上台後立法提升金價及禁止黃金美國流通，才解決問題。作為企業領導層，應迅速回應市場，而非作風民主或唔民主。過去格蛇便迅速回應市場，事後解釋可以好玄（冇人知道佢在乜）。

　　1970年伯恩斯面對美國通脹率達6％，但係尼克遜壓力下（美國黑人越南大量死亡，仍唔肯增加鈔票供應？），令七十年代通脹率最後失控。恐怕貝南奇亦面對相同政治壓力而作出妥協，唔似雪茄伏及格蛇，因唔畀飛士任何人而出名。貝南奇獲委任前，冇人諗到美國情況會咁惡劣，家仲兩面受敵，包括經濟增長放緩兼通脹率則上升，去年升幅達4.1％。貝南奇仲係一派學者作風，真係急死人！