2008年1月13日 星期日

2008-01-14

貝南奇登上直升機

  1月13日,周日。是日同港交所(388)推廣期權市場,反應熱烈。日經平均指數已跌至二十六個月前低位(2005年11月),2008年至今已下跌7.8%;歐洲股市亦跌至十三個月內低點,今年再跌5%;美股連去年8月低點亦失守。恒生指數有中國因素支持,表現仍唔算差,26500點仍未失守(下一支持係2007年8月低點)。展望2008年相信係上落市,去年8月低點到去年10月高點之間上落機會最大。 

 貝南奇開始擔心美國經濟(後知後覺都好過唔知唔覺),1月29日同30日應更積極地減息,不利美元利黃金。

資本家死都要搵銀

  上周六台灣立委選舉,一百一十三個席位中,國民黨取得八十一席,民進黨只得二十七席,較事前估計更加一面倒,睇3月份總統選舉改朝易代已無可避免。2001年起至今台灣GDP年增長率只有3.5%至6.2%(九十年代雖然台股回落,GDP增長率最差一年都有4.6%),選民其實好現實。記得1978年內地官員來港游說香港財團投資廣州,我老曹亦有份參加,佢地不斷話共產主義較資本主義好,我老曹頂嘴話:一般人只知「有飯吃就係好主義,冇飯吃就係壞主義」。港人天天見內地人偷渡來港,你地叫香港財主佬為共產黨而回國投資?信你至奇。此話一出,來港游說官員自己亦流眼淚。同樣理由,2003年7月1日點解五十萬港人上街?除反對二十三條外,就係因為白眉董管治下香港因佢好心做壞事,搞到香港經濟六年不振,樓價回落65%……。今年3月民進黨可能下台理由就係台灣經濟搞唔好,阿扁限制台商到大陸投資、拒絕三通政策,忘記資本家特性:共產黨欲製繩吊死資本家,資本家們仍會爭取製繩合約!作為資本家,哪裏有錢賺,便往哪裏跑,哪怕要殺頭。相信今年美國共和黨亦失勢,理由係2000年至今布殊搞唔好經濟。美股連跌三星期,AT&T、美國運通、Tiffany更大跌,代表連美國有錢佬亦開始面對經濟壓力,減少消費。AT&T上周跌6.6%、美國運通跌10%、Tiffany更跌13%。標普五百公司進入公布去年第四季業績期,恐怕失望者多驚喜者少。

  由於估計本月底將減息半厘,令美元連跌三星期,係去年11月以來最長一次下跌。高盛估計,未來三至六個月將見1歐羅兌1.51美元,修正之前睇1.43美元分析。英鎊見1.9484美元,瑞銀估三個月內見1.93美元。我老曹手上英鎊至今仍未兌為其他外幣,幾個星期內已唔見8%,真係幾傷。去年上半年我老曹已力主沽出英國物業,但當地經紀仍睇好,建議較市價高2%掛牌;我老曹因唔倫敦而同意經紀咁做,結果掛三個月仍搵唔到買家,年中改為以市價沽出仍然缺乏買家,第三季改為較市價低2%才搵到買家,但要聖誕節前才收齊資金,而英鎊已再跌7%,即以港元計收益減少14%(樓價跌7%、英鎊貶7%),此乃自己唔定主意教訓,明明係睇淡,仲相信可賣高2%。我老曹十間英國物業已賣掉九間,餘下一間,相信2008年更加難賣出。物業市場必須大多數人睇好時出貨,一旦睇淡者多,便只有賤價而沽。呢點乃我老曹投資物業心得。

  去年中國外貿盈餘上升50%,至2620億美元;歐盟取代美國,成為中國最大出口市場,去年上升29.2%,美國只升14%,相信係最高盈餘一年。今年起中國外貿盈餘將收窄,因出口增長率只有21.7%、入口增長率25.7%(上述趨勢去年10月開始),原因包括人民幣升值12%(2005年中起計),估計今年再升10%,令入口價更便宜;反之出口價則上升;加上2007年7月1日起出口退稅減少及入口稅下降。

  內地春節前,部分基金由「封」轉「開」,估計吸收300億元人民幣新資金,繼續支持A股。依家內地流行炒農林牧漁股及煤炭股,反而金融股、銀行股走勢相對疲軟。A股亦炒個別發展。

  去年內地利率調高六次,商業銀行存款準備金率上調十次;加上出台「房貸新政」,繼二十四號文件、三十九號禁令等對房價進行調控後,2008年1月7日國務院辦公廳再下發「國務院關於促進節約用地通知」,即2008年三號文件,矛頭指向二三線城市,由嚴控城市用地規模、合理確定各項建設建築密度、容積率、綠地率,嚴格按國家標準進行各項市政基礎設施及生態綠化建設,嚴禁規劃建設脫離實際需要寬馬路、大廣場及綠化帶,都係直指二三線城市地方政府過去一直大搞城市建設、大修馬路、大修廣場、大建綠化帶。

  實際上,大量二三線城市仍係縣級,諗諗成為城市甚至國際大都市,以上海、北京為藍本,奉行「土地生財」政策,以大量出售土地去增加財政收入,直接以土地交換建設城市費,已被國務院下令禁止。

  三號文件要求土地如閑置滿兩年,便無償收回,重新安排使用;土地閑置滿一年不足兩年,抽土地閑置費為土地價20%,以打擊大量囤積土地等升值。地價看漲預期下,開發商大量囤地、圈地,並紛紛湧入二三線城市。2008年三號文件就係針對上述行為。今年6月底前各省、市及自治區必須將閑置土地清理處置情況向國務院作專題報告。分析家估計,如今年上半年樓價仲唔肯回落,7月份將有更嚴格措施出台。睇國務院已向樓價打出重拳,唔知內房股點樣接招?

中國擴大內需抵銷入口下降

  美指數自2002年2月至今已下跌23%,睇美元仍須進一步貶值。資產價格泡沫係令美國產生巨大貿赤理由,隨美國資產價格泡沫爆破,相信貿赤亦日漸減少。去年個人消費佔美國GDP 72%,而家庭負債已相等於稅後收入133%,隨樓價回落,消費減少無可避免。中國政府正加快擴大內需去抵銷美國入口增長減少影響,A股前景如何?便睇內需增幅係咪夠快而定。

  《巴隆氏》周刊調查所得,至今只有50%美國銀行收緊樓按、約25%美國銀行收緊主要按揭;擔心2008年年底、09年年初才係按揭最緊期。估計美國經濟未來出現硬陸機會係3%。廉價石油、廉價資源時代早已離我們而去,美元話事時代亦開始結束,中國、印度、俄羅斯影響力在上升;全球經濟進入此消彼長期。

  周日我老曹同港交所講期權買賣。去年美國期權十分熱賣,香港相較失色,相信今年香港期權市場可熱起來,並非因為我老曹推介,而係市場環境已改變,股市由全面睇好轉為「兩面睇」。今年香港股市環境應類似去年美股,應有利期權市場發展。期權吸引力在於升市有得食,跌市一樣有得食,而唔同於股票或窩輪升市有得食、跌市冇得食(散戶一般好少參與拋空)。天時、地利、人和,令2008年成為香港拓展期權好時年。

  股市繼續失去動力。上周歐洲股市無一不跌【圖一】;亞洲區少數上升股市有馬來西亞及印尼,其餘亦一無是處【圖二】。分析員開始唔避忌用「衰退」二字去形容美國往後經濟。美林及高盛認為,美國正走入衰退,easy money時代結束;加上全球經濟已分裂成為「haves」及「have nots」兩大階層(並非香港獨有),財富過分集中小部分人手中後遺症漸漸浮現。天下無不散之筵席,2002年開始經濟復甦期似乎the party is over!上月美國貿赤又升10%,至630億美元,主因係油價高企。1992年開始科網潮2000年結束,2002年起信貸泡沫2008年結束?未來兩年如人民幣再升15%(即共升30%),已符合美國國會要求,各位信唔信美國貿赤從此消失?美國人儲蓄率由1980年佔稅後收入12%下降至2006年上半年負2%,去年已回升至0.25%。如未來回升至十年前水平5%,即個人消費只佔GDP 65%(而非家72%),對全球經濟影響係點?

軟陸還是衰退有排拗

  衰退(recession)呢個字最先由《經濟學人》1929年採用;三十年代後期,經濟學家及政治家希望為衰退呢個字定義,其後由美國經濟研究局決定,大部分人都同意,即GDP如果連續兩季負增長才叫做衰退。至於GDP只出現一季負增長,曾九十年代出現,叫做軟陸。至於個別行業,過去十七年美國曾出現連續五季負增長,過去二十五年曾出現連續七季負增長,上述只叫行業性衰退,而非整體經濟衰退。

  至於滯脹(stagflation),乃指CPI升幅大於GDP升幅,例如最近美國情況;反之,中國CPI升幅雖然大,但GDP升幅更大,因此唔算滯脹。

  2008年美國經濟到底會軟陸抑或衰退?仍有排拗。

  美國1%人口(年收入36萬美元以上)畀全國39%稅,或5%人口(年收入14.5萬美元以上)畀全國60%稅。上述不但反映美國貧富懸殊,同時反映稅收基礎狹窄。一旦民主黨上台後向富人徵多D稅,分分鐘得不償失(5%高收入人口收入可能迅速下降)。

  當供樓者無力供款,銀行會接管佢物業;當信用卡貸款者無力還錢,銀行往往搵間財務公司替佢還卡數,然後再借錢畀佢,結果無力還卡數貸款者除欠財務公司貸款外,仲可以繼續消費及借卡數。

  去年次按危機由美國樓按者無力供款而引發;今年無力供樓人士開始唔還卡數,理由係財務公司唔肯再借錢。點解?因層樓唔再供落去,令佢地失去refinance能力(即將層樓按上按);信貸泡沫爆破開始影響信用卡貸款業務。去年首五個月信用卡無力還款者較2006年同期升3.7%、延遲還款者升30%;到去年11月信用卡無力還款者較2006年同期上升11.3%(10月份升8.5%)。信用卡貸款數字唔細,約8500億美元(據Business Week文章指出),相信今年情況繼續惡化,而且速度加快。

  2002年起經濟復甦係建基於美國信貸泛濫,上述泛濫令能源及原材料價格狂升,去年8月起係咪進入爆破期?我老曹投資策略早已由去年11月起改為「以守為攻」。去年年底我老曹一再被問及2008年投資策略係點,亦唔知點答。雖然我老曹唔信2008年美國進入衰退,但放緩甚至軟陸機會好大,美股一次較大調整由去年10月底開始,但並非世界末日,情況有如長期睡眠不足者,近日起床有D唔舒服感覺,休息一下應該冇事。至於低潮何時出現?事後才知道。

  道指今年1月9日低點12501點,較去年8月16日低點12517點更低,代表去年8月至今貝南奇努力已付諸流水。上周不但AT&T、美國運通、Tiffany股價下跌,麥當勞亦跌6.6%,2003年5月以來最大跌幅;P&G及Best Buy亦下跌。Countrywide再跌1.42美元,見6.33美元。美國銀行宣布準備以40億美元作收購,以免次按危機擴散。摩通可能亦需要收購美國最大儲蓄及貸款機構Washington Mutual。

美股熊已現

  除月底可能減息半厘外,財長保爾森宣布可能推出前財長挽救經濟計劃,現已提交國會,如獲通過,1月28日將由殊仔宣布「Plunge Protection Team」,即向美國家庭派出支票。上述計劃1987年股災後制訂,當美國經濟面對衰退時,政府可向美國家庭派出支票以應付財政困難。貝南奇已開始坐上直升機,估計好快就向美國家庭擲銀紙挽救經濟矣。

  花旗又再到處搵支持者,阿瓦利德王子(已持有花旗)及中國主權基金聽講有興趣投資20億美元,不過花旗需要80億到100億美元先至夠頂。

  上周五道指跌246.79,收12606點,跌市漸向消費股擴散。由於擔心出現衰退,連油價亦回落91美仙,見92.8美元。前財長森瑪斯上周四宣布美國陷入衰退機會已超過50%。美國同時面對通脹上升或通縮威脅,金價上升,股市已出現熊市象。

  許多人以為加息、減息可令樓價升降,事實並唔係咁。樓價升降主要反映經濟狀況。例如2001年1月至03年6月唔係減息咩?本港樓價卻下跌;2004年6月至07年上半年唔係加息咩?但樓價卻上升。

  習非成是,去年9月減息的而且確係推高樓價,因炒家相信減息可推高樓價。經濟繁榮期,第一次、第二次甚至第三次減息的確可推高樓價(理性預期);如今年1月底再減息,呢次能否再推高樓價?各位或會發現,減息後本港樓價2月份卻唔升,理由係經濟利淡因素漸漸浮現。

  股市係經濟晴雨計,因此同樓價關係更大。股市往往跑經濟之前,樓價卻落後於經濟。例如2003年4月恒生指數上升,2003年9月樓價才上升,兩者相差五個月;1997年8月恒生指數回落,1998年1月本港樓價才下調,兩者相差四個月。換言之,樓價落後於恒指升降四至五個月。

沒有留言:

張貼留言