2008年1月3日 星期四

01/04/2008

08係炒家年

  1月3日,周四。恒生指數跌673.24,收26885.28;成交901.42億元。1月期指仲係高水,跌642點,收27026點。工商銀行(1398)回落6.3%,係2006年10月以來最大單日跌幅;建行(939)跌5.5%,見6.15元。中移動(941)跌2.6%,因發改委表示1月下旬召開削減國內手機漫遊費公開聽證會。東方航空(670)跌11%,因國航(753)將投票反對淡馬錫入股東航,南方航空(1055)跌3.6%、國泰航空(293)跌3.1%,因油價大升。

  香港玩具協會主席召開新聞發布會,宣布擔心今年開始實施新勞動法將令內地工廠生產成本上升15%。

  高盛建議2008年加強持有電訊股,並估計2008年投資市場回報只有10%,而非2007年投資回報35%。高盛同時睇好網通(906)、中移動及中聯通(762),尤其係網通。

減息只能收窄調整幅度

  大摩叫大家小心美國經濟增長率放緩影響,消費信心、非農業職位增減等數據每次公布都令人不安。2008年前路肯定十分難行,企業面對邊際利潤收窄,甚至科技項目亦因需求增長放緩而面對頂頭風。

  花旗認為2008年亞洲區經濟仍可保持高增長但股市最少偏高20-25%,一次調整已屬必要。

  UBS認為,經過近日調整,以P/BV同全球比較,亞洲區仍偏高14%。由於估計2008年恒生指數成分股純利升幅只有8.4%,國企股純利升幅只有26.6%,上述已引發11月同12月外資拋售,估計1月份仲會減持,直至調整完成為止。

  2003年開始復甦,令依家面對較大下跌風險,2007年第四季開始減息只能令調整幅度收窄,而非阻止調整出現,雖並未衰退,但放緩已無可避免。

  成熟牛市同唔成熟牛市最大分別係:成熟牛市出現大波動係因資深投資者減持,股份流入普通投資者手中,形成一段時間大波動。唔成熟牛市因冇資深投資者減持,因此股價繼續狂升,直至後勁不繼為止。

  BNP百富勤認為,依家係時候同大型國企、紅籌股如中移動、國壽(2628)、平安保險(2318)、中國電信(728)、招行(3968)、國美(493)、李寧(2331)、恒安國際(1044)、聯華超市(980)、錦江酒店(2006)等講拜拜,改為投資中型企業例如百麗國際(1880)、新宇亨得利(3389)、中國動向(3818)。百麗佔內地女士鞋市場9%,以中、高檔為主,計劃今年增加一千間零售店;新宇亨得利內地出售名牌手表及珠寶,相信2015年中國呢方面消費將超過日本同美國;中國動向從事運動服裝業,係奧運概念股,並計劃2008年將Kappa品牌零售店增加至二千二百間。

  花旗估計,人民幣一年內將見6.76兌1美元,其他銀行估計升幅10%,以避免歐洲方面指摘(因2007年人民幣兌歐羅貶值8.29%)。

  油價由1998年12月10日10.72美元一桶上升至今,一度升穿100美元,主因係墨西哥幾個石油出口港因天氣惡劣而關閉;加上尼日利亞石油工業港哈科特受襲。今天油價103美元相等於1980年38美元高位,如油價停留100美元以上,汽油價遲早升上4美元一加侖。根據美國經濟學家Paul Ashworth分析,上述汽油價消費者好抗拒,可能令需求大減。歐洲方面好一D,因歐羅升值及歐洲汽油稅高,油價企於100美元,歐洲汽油零售價加幅唔大。如美國汽油價停留4美元一加侖,估計美國消費者開支增長率將由第一季原先估計4%下降至第二季1.4%,由此可見油價100美元一桶威力。

  金價升穿1980年高位850美元。金價2007年升幅超過30%,係1979年以來最大升幅一年。金價後市估計可見871美元。

  玉米現價4.55美元一蒲式耳,高盛估計2008年可再升29%,係商品中最吸引項目。1974年因蘇聯失收,玉米價格曾見7.8美元,今天4.55美元相等於1974年2美元購買力,仍極之抵買。

  美國農業部估計,大豆2007至08年庫存量估計只有四十七萬三千百萬噸(上年度係六十一萬一千百萬噸),較上年度減少23%,係玉米以外第二項有吸引力投資。

  2008年農產品價格將進一步上升,上海期金1月9日開始交易,孖展7%,唔排除金價短期1月9日見頂。

  2008年首兩天恒生指數下跌。What worked in 2007, works in 2008,就係揀股唔炒市。一、買強勢股而非弱勢股。二、行業向上時,連最差股份亦有一定升幅;當行業向下時,最好股份升幅亦有限。例如高盛業績一流,但2007年股價只升15%。三、低O股未來升幅未必及得上高O股,2007年思科便跑輸蘋果及Google。四、唔好盲目跟隨大行推介,例如去年美國銀行大手吸納Countrywide,已證明係愚蠢行為。五、唔好參與daytrade,除非你知道內幕消息(但上述係犯法行為)。六、唔好留戀高息股,買股票目的係賺價唔係收息。七、唔好忘記風險管理,記住自己可以輸幾多,而非贏幾多。八、趨勢才係最好朋友,唔係走勢。

  美元利率2006年中見頂,其後股市波幅(VIX)擴大。根據過去經驗,較大波幅可維持到利率見頂後二點五年,即2008年美股波幅仍將甚大。波幅擴大通常亦係牛轉熊訊號,例如1999及2000年美股波幅亦甚大。2007年下半年開始波幅不斷擴大,係咪代表美股已由牛轉熊?

  2008年標普五百指數平均O只有十四點八倍(估計純利上升7.2%),代表未來美股下跌幅度亦唔會好大。換言之,2008年風險與機會同時存在。相信2008年係for traders only。衍生工具(例如窩輪)可能較股票更安全!由於股市波幅大,利用窩輪可以用小本贏大錢。如只動用全部投資資金10%去玩輪,往往較用70%資金投資股票更安全。

  長發達日子由1967年開始、1997年結束,1997年8月以後就係trader而非投資者才可以賺到大錢日子。1997年8月至今恒指升幅不足一倍,但波幅卻好大。高賣低買?何時買、何時賣?變得十分重要。揀行業較睇大市更加重要。而窩輪需要利用鐘擺作用(由一個極端走向另一極端)去產生爆炸性利潤。1月13日本報將與港交所合辦「國企期貨期權08年投資新機遇」,就係教大家如何利用窩輪。情況有如暴雨過後河水高漲一旦缺堤所引發現象。例如去年8月回落,9月同10月上升、11月回落,都係缺堤現象。點樣事前評估、建立倉位?點樣利用Put或Call?點樣追尋Volatility、利用鐘擺現象從中獲利?係另一種牛眼投資法。但初入行者不宜,因為唔識止蝕離場,而玩輪目的係點樣最短時間內賺最多錢,又或止蝕離場。

美中產階級滾水淥豬腸

  2008年美國經濟已陷入滯脹【圖】,銀行過度借貸、消費者過分消費,依家通脹主要集中能源同食物項目;加上資產升值潮已結束,中產階級處境有如滾水淥豬腸(兩頭縮)。正常投資行為已不管用,所以被迫從事高啤打(beta)系數項目,例如利用利差交易股衍生工具,利用高槓桿比率去進行桿跳。上述方法我老曹報章上好少講,因為對初級投資者不宜,以免走火入魔。

  華爾街設計CDO(Collateralized Debt Obligations)將美國樓價大幅推高,2006年下半年樓價止升回落,令CDO問題浮現。人類貪念係希望自己蚊年double後再double,結果引發housing bubble,帶來大量trouble。面對家環境,只能抱兩種心態:一、君子不立危牆之下,避開走人!可惜存款只有三厘息。二、點樣利用波幅獲利?周三聯儲局又再注資140億美元入美國銀行體系,睇次按危機仍在惡化。上一次美國樓價1989年見頂後,一直回落到1997年年初,跌幅20%(扣除CPI升幅,跌幅26%);呢次樓價2006年第三季見頂,係咪一樣要七年時間去消化?其次,呢次係一次變相OECD國家金融機構大擠提。各國央行及美國聯儲局大量注資後,擠提現象消失,但唔代表問題解決。過去利用資金泛濫而產生過度槓桿作用,經歷呢次次按危機後,會否進入收斂期?銀行與銀行之間會否一如過往咁,願意借錢畀對方?

  我老曹唔相信2008年美國經濟會陷入衰退,但唔排除道指會回落,此乃美元利率必須下降理由。通貨膨脹正在蠶食打工仔購買力,最終令消費增長率下降。上述情況可令企業純利升幅放緩甚至倒退;2008年美元利率估計可見3.5厘。恒生指數上阻力係2007年10月30日31958點,下支持係11月22日25861點,如25861點失守,才可進一步睇淡。

內部消費成中國經濟新引擎

  中國滬深三百指數由2005年年中開始上升,已出現泡沫性格。任何泡沫爆破前上升,日子可以好長,升幅可以好大。例如香港樓市泡沫由1984年7月至97年第三季(共十三年);美國TMT股泡沫由1982年8月開始,2000年3月結束,長達十八年;日經平均指數由1974年10月開始到1989年12月,亦長達十五年。更何況近年中國政府已嚴加控制信貸,因此2007年10月滬深A股可能只係一個幾重要頂,未來向上日子仍十分長。香港又點?1997年樓市泡沫爆破後,調整期到2003年8月才結束。未來港股同滬深A股關係愈來愈密切,因此2007年11月起港股只係進入整固期,一段日子後港股將追隨滬深A股而創新高。11月起回落相信係整固多於大牛市結束。

  2008年中國已落實改革開放三十年,有如1981年香港。1950年代香港由出口帶動製造業,經濟達到高峰,隨之而來係內部消費帶動型經濟(因受主權談判影響,到1984年7月才開始)。依家受油價高企、原材料價格飛升、勞工成本上升及人民幣升值影響,中國由出口帶動製造業經濟繁榮期係咪已2007年10月達到高潮?要事後才知道。11月份鋼鐵產品出口跌至十四個月內低點,證明取消出口退稅、引入出口附加稅影響已立竿見影。鋁錠呢類低附加值產品11月份出口只及2006年11月一半,上述情況亦出現銅產品上。中國2007年下半年起低附加值產品出口能力大幅下降,只有高附加值產品出口仍然理想。內部消費漸成為經濟發展新引擎,最終將成為推動經濟向上主流(一如1984年7月至97年8月香港)。

沒有留言:

張貼留言