2008-01-25

中美利差進入倒掛期

　　1月24日，周四。恒生指數最高見24966.17，完成跌市最細反彈後，收市23539.27，跌550.9；成交1423.9億元。1月期指高水，跌575點，收23640點。

　　今天建設銀行（939）跌2.4％、中石油（857）跌3.2％、中海油（883）跌3.8％、平安保險（2318）跌4.1％、東方航空（670）跌9.1％。中煤能源（1898）升3.7％，因發行A股集資256.7億元人民幣；東方海外（316）升3.6％，因第四季收益上升27％。

　　滬深A股上升1.05％。中國遠洋漲停，因去年獲利上升84％；神華升6％，但江銅跌9.2％。油價下跌令石油股睇淡，期銅下跌令江銅股價下跌。

全球熱錢未來續湧中國

　　貝南奇2006年2月上台時努力推行黃金歲月，依家正面對大灰熊威脅，一唔小心便會死於熊掌之下。由於美國已確認熊市，令人擔心香港牛熊共舞日子唔會長。

　　上世紀八十至九十年代，美國出現兩次由房產市場回落所引發經濟衰退。聯儲局分別減息7厘多及5厘多，並用三至五年時間才走出經濟衰退低谷。呢次美國樓價回落由2006年4月算起，至今只減息1.75厘，相較上兩次幅度仍未足夠，時間上亦未足兩年，仍須再減息，但相信樓價會進一步滑落。美元進一步弱化係可以預期事，歐羅亦強不起來，只有人民幣成為升值項目，令中國對外出口難度加大，而中國出口同製造業則面對下調風險。

　　次按危機引發信心下降，令美國流動性下降。流動性主要係逐利資金，全球找尋有利可圖項目，未來全球資金將進一步流向中國，令中國流動過剩局面進一步惡化，因中美利差進入倒掛期（人民幣利率高於美元利率）。美國一年期利率3.0837厘，人民幣4.0583厘。熱錢流入中國，不但可享受人民幣未來一年升值8-10％，而且可賺利差1厘！

　　1990至95年香港及東南亞面對美指數回落20％，形成資金湧向香港及東南亞，帶動股市興旺，1997年卻因大量資金離開而引發危機。2001年至今美元貶值超過20％，大量資金流向香港、東南亞及中國，已造成流動性過剩。2008年美元繼續貶值及減息，將有更多資金流向中國（香港反見資金流出，因此恒生指數去年11月起大跌）。中國人行已一再收緊存款準備金率及加息去對抗資金流入。呢次美元一下子再減息0.75厘，中國將面對更大量美元流入。人行點應付？

恒指完成最小反彈幅度

　　恒生指數完成最小反彈幅度（前跌幅30％左右），投資者已等唔切月底再減息半厘，又再大手拋售（雖然芝加哥期貨市場合約有80％估1月30日減息半厘）。利差交易引發拋售美元買澳元，但美國為支持資產市場價格（股市及樓市），大量供應資金兼減息，卻引發利差交易平倉，資金從另一個窗口又流走了。

　　1966至82年（上一次滯脹期）共有三次主要大跌市，即1968至70年跌36％、1973至74年跌48％、1980至82年跌27％，兩個較小幅度跌市就1976至78年跌19％及1980年跌17%。1968至80年都係寬鬆貨幣政策時代。

　　如扣除通脹，1966至82年美股實際跌幅達70％。上述情況2001年又再開始，2000至02年道指跌幅37％。去年10月道指見14198點，較2000年4月11425點表面上睇高24％，但如以歐羅計仍低37％。去年10月起相信美股進入第二次回落期，至今已回落18％。

　　1966至82年道指經歷三次大跌、兩次小跌後，牛市才1982年下半年誕生。2000年4月美股牛市死亡，至今只有一次大跌；2002年10月至07年10月只係超級大熊市內另一小牛市（扣除美元貶值，美股根本冇出現牛市）。

　　1967至82年香港由暴動中復甦過來，到工業社會結束轉型為內需帶動，反而受惠於美國寬鬆貨幣政策。2000年至今香港經濟已相當成熟，變成追隨美股升降，無法做到1966至82年與美股兩不相干。

　　最近美國又再大幅減息。同2001至07年唔同，段日子歐羅區經濟仍好，可維持合理利率；依家意大利、西班牙、葡萄牙、希臘經濟都已陷入衰退，歐洲央行抗拒減息能力漸弱，今年歐羅再唔係避難所，黃金成為資金最後避難所！10月開始乾貨輪指數（DRYS）跌幅甚大，航運股前景令人擔心【圖】。乾貨輪指數回落，代表原材料價格進入回落期。換言之，呢次金價上升非因通脹，而係因為資金要搵避難所。

　　當歐美國家經濟放緩，中印兩國工業將面對過剩危機，因為兩國產品皆有賴歐美消費者吸納，其中又以中國壓力較大，因人民幣升值及工資大幅上升。內地廠家邊際利潤漸漸消失；港商珠三角一帶為六千萬工人提供就業，面對壓力好大。

　　目前召開「2008年軍民融合商務年會」上，國防科工委體制改革司司長吳風來及政策法規司司長張嘉浩發言指出，未來五年內將完成股份制改造，融資近1000億元人民幣，另向資本市場集資500億元人民幣。

　　今年1月香港股市都算幾癲。受美國經濟可能陷入衰退言論影響，今年1月股市可以話跌日子多、升日子少。衰退本來係經濟老化後必然現象，冇乜大不了，只係依家人人怕「老」，因此諗盡方法阻止衰退出現。

　　國際貿易所產生不平衡，遲早出現調整，係咪去年10月已開始就唔肯定。問題係各位係咪已做好準備去保護自己財產？美國經濟即使可避免衰退，亦必須出現一次軟陸。美林分析員David Rosenberg認為，美國正步向1980年衰退以來最惡劣一次調整，而且較1990-91年及2000至01年次更嚴重，減息只能阻慢下跌momentum，而非改變方向。樓價回落壓力最終將擴散到整個經濟。樓價及股價回落，令美國人財富蒸發掉6萬億美元市值；加上嬰兒潮步入退休期，令呢次美國樓價調整期拉長。估計今年美國GDP只上升0.8％、2009年1％。新屋建造今年底將再減少30％，至七十萬間，係1980年以來最低。估計今年企業純利將減少15％，並令失業率升至6％。
通街股神如今不再

　　隨按揭保險公司出事，房利美及房貸美亦面臨危機。私人公司做樓按係樓價80％，但房利美卻可接受100％樓按，只要供樓者買保險便可；90-100％樓按涉及金額2270億美元，樓價一下跌便成為負資產。由於首20％有保險公司擔保，過去並冇問題，但樓按保險公司出事，呢2270億美元樓按貸款便變得十分危險，而房利美只有399億美元股東資金咁多……。會否引發骨牌效應？雷曼兄弟分析員Bruce Harting認為唔使咁驚也，但其他對沖基金經理卻比較上悲觀，其中Trident Investment ManagementNandu Narayanan認為，唔少按揭保險公司已唔可能生存落去，而影響美國兩大半官方樓按公司。

　　小心！我地已進入為生存而戰，唔似2007年10月前通街都係「股神」。今天仲要股票市場生存者，必須：一、小心求證；二、深入分析；三、立即行動。不但學曉點樣保障自己投資組合唔受攻擊，同時要努力找尋機會，利用每次反彈去減持，做一個股市戰士而非被淘汰者。唔好相信「Everything is going to be OK!」論。培養自己危機意識，做個真正投資專家，而非乜股神（股神只供人膜拜，早已升上神壇）。美股去年11月已進入熊市，道氏理論權威Richard Russell早已發出「熊市訊號」。香港經濟背靠中國，能否同美國兩不相干（decouple）？我老曹仍質疑上述諗法。五年擴展期已完成，出現短暫收縮期好正常。減息從來只係止痛餅，而非治病良藥，只可紓緩痛楚，而非醫治病情。所以有第一次減息係出貨訊號理論（通常減息到第三次後，效果已十分有限）。

美股未脫離危險期

　　投資已唔係一種嗜好，而係影響你下半世財務budget。投資唔係得閒才處理項目，而係每天必須花十五分鐘正視問題。一、投資之前請做資料研究。二、決定大量投入之前請牛刀小試。三、租你需要屋，唔好買。因買樓係一項投資，將需要同投資分開。買樓係投資，租樓係需要。買樓應由投資角度睇，租樓應由實際需要角度出發。唔好因需要而買樓，應從升值潛力角度去決定何時買樓。

　　去年10月有100％投資股票者，唯一解釋係「賭博」（gamble），連「投機」（speculate）都唔係，因無機可投。

　　港股早已進入冷熱空氣相交，造成大量風風雨雨。風高浪急時有人可一演身手，亦有人暈其大浪，完全睇你點睇。

　　新興國家人口佔全球85％，全球化環境下亦漸漸富起來，相信有足夠能力應付美國GDP增長率放緩，而保持自己國家GDP繼續增長。其中最大新興工業國係中國，而香港已成為中國一部分，能否借助中國因素減少受美國影響？上述因素係美股出現熊市、香港仲係牛熊爭霸理由。

　　1月29、30日美國有80％機會再減息半厘，貝南奇大量消耗彈藥去阻止衰退出現，能否成功？暫時美股仍未脫離危險期。走勢上唔似去年8月17日美股跌穿200天線係單日轉向，呢次美股12月已出現死亡交叉（50天線跌穿200天線），進入另一個派發區域。股票繼續由強者手中流向弱者手中，要扭轉咁劣勢，唔係減幾次息便搞掂者也。