覆巢之下無完卵
1月6日，周日。點解2008年一開始就咁令人沮喪？雖然明知聯儲局1月30日將減息0.25厘，但美國經濟衰退機會已接近60％，情況愈來愈似1990年，甚至更差。2008年香港則同1990年唔同，當年香港經濟正步入過熱期，2008年出現經濟過熱唔再係香港而係中國，香港則陷入冰火兩重天兩難局面。2008年點樣找到overlooked and undervalued股份同大家分享，將係極大挑戰。投資就係將你資本去冒險，你可能因此而有所損失，但千萬不可全軍盡墨，永遠記住保本較增值更重要。由於美國樓市走下坡，我老曹對2008年原材料股冇多大好感。1990年原材料股平均跌幅27％，相信2008年原材料股下跌空間唔細，何況本港上市原材料股大部分股價已偏高。豺狼先生門口嗥叫，屋內小豬似乎仲未曉驚。上周恒生指數係世界上少數仍能上升指數之一，2008年港人係全球對前景最樂觀地區之一。到底係港人特別聰明、全球人太愚蠢，抑或係……？理財唔係講玩事，係好嚴肅行為。2008年港人呢方面係咪太輕率？
白蟻永遠唔止一隻
上月唔少人要求我老曹預測2008年經濟。我老曹不但擔心今年次按危機惡化，亦擔心油價同金價創新高，甚至擔心今年恒指唔易升破去年高點32000點。不過，我老曹唔相信2008年美國經濟會出現衰退，至於滯脹早已肯定。2008年第一個星期過去，我老曹愈來愈肯定上述分析正確；相信美國同英國樓價今年將進一步下滑，令次按危機繼續惡化。1989至97年美國樓價回落24％才開始回升；上一次美國樓價調整期長達七年。呢次又如何？當你屋內搵到第一隻白蟻時便得小心，因為屋內永遠唔止一隻白蟻咁少。次按危機亦一樣，當第一隻SIV出事，又點會只得一單咁少？聯儲局一再減息兼注資有冇用？各位不妨睇睇1990年至今日本銀行做法。
上周五道指已跌至上升軌支持位，如進一步下跌，去年8月16日與11月26日（12724點）所形成上升軌便守唔住。咁「醜陋」股市內做stock picks變成極高難度動作。上周五道指下跌256點或1.96％，見12800點，理由係勞工部公布12月份失業率由11月份4.7％升至5％，平均工資卻上升0.4％。美元價回落，即2002年至今如你財富（以港元計）升幅少於40％，其實係蝕本而唔係賺錢，請唔好被數字遊戲呃你。如美國再減息，只會令美元再貶值而已。上周五細價股指數羅素二千跌3.1％、納指跌3.8％，係2001年9月17日以來最大跌幅。英特爾跌8％，見22.67美元，因摩根大通將其降級。上周美股表現，令細價股同科技股作為股市避難所想法受到挑戰，唔通覆巢之下真係無完卵？
小心金價出現狂升
1929年華爾街危機後，美國政府對銀行監管十分嚴，以免重演1920事件。2001年CDO大量出現，而銀行可以唔將佢地列入資產負債表，即唔受銀監處監管，令2001至06年OECD國家住宅物業貸款增加25萬億美元；加上聯儲局將短期利率由2001年6.5厘降至2003年1厘，透過ARM（Adjustable-Rate Mortgages）鼓勵供唔起樓人都買樓，2001至06年美國借錢買樓仲易過借火！分析家指出，情況較1920年代美國更甚。最莫名其土地堂係，信貸評估機構畀唔少CDO「三A」信貸評級，令本來唔做CDO金融機構都向市場購入CDO。有人認為，2001年第四季開始美國經濟繁榮其實係由濫發CDO及ARM引發，透過刺激樓價上升令消費者增加消費，而消費佔美國GDP 72％……，2007年8月係美夢破碎開始。
透過信貸膨脹令資產升值唔係叫做創富，而係製造資產泡沫。今天不但美國樓價有泡沫，OPEC行為亦令油價出現泡沫。1967至80年美元以每天20億至30億速度由美國流出海外，形成呢段日子美國資產未有上升，但全球卻面對美元泛濫。2001年唔同，美國創造出來美元被其他國家賺去後，又迅速回流美國購買美元資產，引發美國資產通脹。呢個遊戲亦有時而盡，當中國同產油國停止將賺番美元購買美國債券，而日本人亦唔再以1厘息借日圓去4厘以上息率美國債券賺取息差時，則全球對美元信心勢將動搖。金價由2000年7月31日252.8美元到上周五升穿1980年1月31日高位850美元後，理論上可由850美元再升多597.2美元（量度升幅），即最高可見1447.2美元。小心2008年金價出現狂升！
2008年對投資者而言肯定唔係一個Happy New Year。油價升破100美元，金價創新高，美國經濟衰退機會又升至60％；加上12月份美國失業率上升，2008年第一個星期股市的確令人需要深呼吸。投資者點樣面對新一年？
聽講由新城財經台、《信報》及港交所聯手主辦「國企期貨期權?08年投資新機遇」反應熱烈，雖然講座門票已全部派出，但有多個資訊展覽及投資工作坊由其他人主講，歡迎大家免費入場。1月13日上午11時至下午5時灣仔會展中心共有十二個工作坊（每個約三十分鐘），各位可以全部聽晒，亦可以揀其中聽參加。呢個工作坊以先到先得方式入座。期貨及期指推出後，並未如窩輪普及，可能係一般人認識仍不足。港交所希望透過呢次投資工作坊使更多人了解期貨及期權操作，令香港投資市場多元化。期權係可以控制風險投資工具，主要分認購（Call）及認沽（Put）兩種，因此升市可以買認購期權，跌市可以買認沽期權，即無論升市或跌市都有得玩，唔似窩輪只炒單邊市咁高風險。香港期權市場設有莊家制度，唔使擔心冇人接貨。至於點樣巧妙地運用期權上落市搵食？留番1月13日台上至同大家講。
由2001年開始西方國家信貸膨脹，到2007年8月起進入萎縮期。例如蘇富比股價由2003至07年升幅超過600％，大量資金流入拍賣市場，令垃圾都可以漲價，可見全球資金泛濫程度。但去年第四季金融股如花旗銀行、美林證券股價下跌，代表資金泛濫開始進入退潮期。過去大量CDO金融市場內賣來賣去，從不按市價入賬，只係以算術模式（mathematical models）入賬，所謂「marked to model」對行外人而言太深奧難明。去年11月國際會計師公會要求上述項目按市價入賬不然只會畀極低評估值，令各大金融機構須急急腳處理。上述CDO市場流通量一向不足，唔少所謂市價一下子回落25％亦難搵到買家，令銀行間亦拒借款畀對方，credit crunch立即出現，聯儲局與各國央行聯手注資才阻止。但係D CDO點入賬？花旗決定列入資產負債表內，成為銀行借貸一部分，如此一來又涉及銀行資金充足比率問題，即銀行要擴大股本……。去年英國Northern Rock銀行更出現擠提，英國財相被迫宣布由英倫銀行無限量支持，才令擠提停止。2001年透過發行CDO及ARM產生信貸膨脹，形成西方國家樓市泡沫，因人民幣、港元與美元掛及聯繫，所以亦同時影響中國及香港。由於香港1990至97年已試過一次，呢回有一定免疫能力；2003年4月及9月香港股市、樓價上升至今仍唔算好癲；反而中國卻係初嘗禁果，自然好High！雖然人行已為樓市、股市潑冷水，奈何仍熱火朝天。上月內地食品價格以18％速度上升，豬肉價更大升54％，中央政府開始擔心社會不安，但又能做D乜？1972年已故美國總統尼克遜曾宣布價格管制一年，一年後解凍，價格卻升得更癲。1980年雪茄伏將美元利率推高至22厘，引發1981至82年經濟衰退。據熊彼德「創造中的破壞」理論：經濟不斷創新，創新過程中又不斷造成破壞，連政府也管不了。
金磚國調整係加入機會
1989年六四事件，加上柏林圍牆倒下，令資本主義制度橫掃全球，成為推動全球經濟向前力量。舊有工業生產國如日本及亞洲四小龍地位受到新興工業國挑戰，其中又以四大金磚國（BRIC）成為資金新方向。1990年起日本作為工業大國地位一落千丈，亞洲四小龍製造業亦迅速移向中國。其中最徹底係香港，接近放棄本土工業，轉型到服務業；南韓及台灣走向高新科技，其中又以南韓較成功；新加坡亦步香港後塵，但冇香港咁徹底。高盛估計，2015年中國GDP將超過日本，2041年後過埋美國，成為全球最大經濟實體。印度將2032年超過日本，成為全球第二大經濟實體。四十年內金磚國GDP將超過七大工業國（OECD）；二十年內金磚國內將有二億人口人均收入超過1.5萬美元，相等於整個西歐（法國、德國、意大利同英國加起來）。戰後意大利、法國、英國工業走向沒落，地位被日本及亞洲四小龍取代；今天日本同亞洲四小龍工業地位又被新興工業國（尤其中國同印度）取代。上述報告唔係2007年寫成，而係2003年，過去五年已證明正確，相信未來二十年亦都正確。成長過程中難免出現困難，但長遠睇仍樂觀。以周期睇，2008年係四大金磚國進入青黃不接期，經濟可能出現短期調整，但不應退出，反而係進入四大金磚國良好機會。
近月大陸宏調，緊縮內地房地產開發商銀根，加速房地產開發整合；反之，港資房地產商因銀彈充足，趁勢進軍內地。例如新地（016）透過發行新股，計劃三到五年內地投資比重由過去佔總資產10％上升到30％，單單2008年便計劃投資700億元人民幣，除一級城市外，亦延伸到二、三線城市；去年12月與富力（2777）、合景泰富（1813）聯手投入廣州大型項目獵德村後，再以31.1億元取得成都金融中心標誌性地塊。九倉（004）亦透過供股集資，以加強投資內地。
1月3日國務院發布「開放實施企業所得稅優惠政策通知」，所有非生產性企業唔再享受所得稅優惠，即2008年起所有外資企業如非從事生產性業務者，稅率由15％一步到位調整到25％。全國有十三個保稅區，區內企業一直交15％稅率，過去以為有五年過渡期，即每年只增加3％。依家才知道只有生產性企業2008年才加稅3％（以後每年加3％，至25％止），非生產性企業2008年便要交25％稅。最受影響係物流倉儲業，其次係貿易公司，分布上海、深圳、天津等保稅區部分企業將一下子面對稅率增加10個百分點，一片叫苦連天。
全聚德成全球最貴飲食股
去年12月底新一批五百八十九種商品加工貿易禁止類目錄公布，引發珠三角一帶企業隱性倒閉，估計過農曆新年後，將有過萬間企業顯性倒閉或外遷。深圳台商協會會長黃明智已向國家部委反映，以確定下一步政策思路。
去年下半年出口退稅取消，加工限制目錄出台，加上企業稅率大幅提升，政策不但來得太快，而且太突然。如再加上最近新勞動法，外資企業認為要轉型都要時間循序漸進，企業才可適應。依家不足半年便有咁多政策一齊來，珠三角企業已出現關閉及撤離潮，其中又以港資及台資受害最深。香港駐粵經濟貿易辦事處主任梁百忍預言，唔少企業打算過完春節就摺埋，亦有人再觀望多半年。
北京填鴨都識飛？上述成為內地笑話。全聚德由去年12月7日每股39元到上周五收市78.56元，短短一個月上升超過一倍，如以發行價計更上升六倍。北京填鴨每隻賣78元，依家一股全聚德已值78.56元。全聚德2007年估計獲利5748萬元，較2006年上升1.45％或每股獲利41仙，O高達一百九十一倍，相信係全球最貴飲食股。
一年前冇人知道伊利諾州參議員奧巴馬係乜水，但上周佢卻艾奧瓦州初選中獲37.6％支持；反而一直被視為大熱門希拉莉只獲29.5％支持率，排名第三。去年4月美國政治評論員已預言希拉莉無法贏出，理由係她予人太硬淨感覺，充滿想報復心態、冷酷及精於計算，可以講佢形象並唔討好選民。美國人仍不能忘記佢曾聘請私家偵探調查克仔桃色事件，以及炒白宮Travel Office職員時冷酷無情。無論中外社會，對出色能幹女性都唔公平，人們傾向同情類似戴安娜皇妃女性，因為佢充滿同情心卻被丈夫拋棄；社會上並唔同情D能冷靜處事、丈夫偷情可以派私家偵探收集丈夫桃色事件證據女強人。奧巴馬如能勝出，代表美國人既唔喜歡殊仔亦唔喜歡希拉莉，意味人心思變。但最終美國人係咪真係唔介意自己總統係黑人？換言之，2008年美國政治不明朗因素增加，對股市不利。美國股市會否出現自1987年以來最差一個大選年？希拉莉點樣fight back？奧巴馬點樣保持自己優勢？共和黨又點樣應付？都成為2008年有趣焦點，不妨拭目以待。
沒有留言:
張貼留言