2008-05-26

資金開始撤離油市

　　5月25日，周日。今年乾貨輪指數已升70％、原油價升40％，中國發電廠動力煤存量已降至八天。中國84％發電機由煤推動，平均每十天運送煤一次。大地震後，中國唔少運力被抽調去運送物資到四川省救災，令動力煤運送告急；加上夏天將至，依家只有希望未來日子唔會出現大停電。國際油價一度升上135美元一桶，令內地油價倒掛現象嚴重，汽油供應會否出現短缺？

地震加快四川人口大轉移

　　油價同食物價上升，到底係供求因素，定係投機炒賣？2003年只有130億美元投資商品指數基金；今年3月底上升二十倍，至2600億美元。換言之，過去五年大量資金流入商品期貨活動，即使唔係推高商品價格主力，起碼亦係引發較大波動理由。係咪同1980年一樣？冇人可以回答。例如伊朗以每周14萬美元租金租用油輪用作儲存原油，呢類行動通常準備戰爭前才做，依家卻用作賺油價。

　　地震之後，更多農民湧向大城市，令重慶、成都面對大移民潮，估計每年有超過五十萬農民湧向重慶及成都，情況較1978至80年香港更嚴重（三年內來自內地非法移民五十萬）！兩大城市未來房地產需求十分大（過去三十年深圳亦只係面對每年四十萬人口湧入），估計十年內成都及重慶人口將增加50％，2020年成都及重慶樓價恐怕直追今天北京同上海。並唔係災難提供商機，而係地震加快四川人口大轉移。我老曹誠意向各位推介成都、重慶擁有大量土地公司。

　　美國4月份二手樓出售較3月份減少1％，只有年率四百八十九萬間（3月份四百九十四萬間）。中等樓4月份售價202300美元一間，較去年同期跌8％，但較3月份200100美元微升2200美元。存貨量升10.5％，至四百五十五萬間，相等於十一點二個月銷售數字（3月份係十個月）。中西部最差，銷售減少6％；東北部好D，銷售只減少4.4％；最好係西部，銷售上升6.4％；南部冇變化。

　　美國豪宅（500萬美元或以上）過去兩季售價下降10-15％，估計未來十二個月再跌10％。買賣500萬美元以上物業家庭，財富通常都超過1000萬美元到2000萬美元左右，佢地並唔缺乏現金，豪宅跌價理由係受股市影響及心態改變。呢類買家大部分自金融業，去年第四季起呢類買家大量消失，此乃美國一般豪宅跌價理由。反而超豪宅（5000萬美元或以上）似乎毫無影響，理由係賣家唔急於出售，價錢自然企硬。

　　美國樓價下跌、全球油價上升，加上四川地震，消息都幾令人沮喪；再加上大銀行及大證券行為次按撥備……5月肯定唔係一個開心月份。雷曼兄弟Ed Morse係石油大淡友，佢估計新美國總統上任後（即2009年初），油價可見80美元。高盛證券Murti在2005年曾預測油價可見100美元，如今已實現，依家更預測2009年將見200美元。荷蘭蜆殼石油認為，油價唔係由短缺推高，而係由於投機情緒，今年第一季全球石油產量上升2.5％，而消耗只升2％，即每天產量大於消耗一百五十萬桶；油公司預測未來油價可見100美元一桶！家情況有D似1980年金價或2000年科網股。1973－74年石油危機後油價狂升，美國耗油量曾一度減少13％，令油價1976年急跌。不過依家點睇？過去七星期油價上升35％，而且愈來愈多人加入睇好行列，繼續推高短期油價。但彭博報道，未平倉合約上周減少8.1％，至一百三十六萬張；價格卻升2.6％，代表淡友在平倉，意味資金開始撤離油市。至於我老曹早已決定冇眼睇矣。

　　又一星期，油價又一新高紀錄；美國漸進入駕駛季節。面對樓價股價回落而汽油價食品價上升，美國人點反應？如6月份消費信心進一步下跌，肯定損害美國第三季GDP。今年首季流入期貨市場資金達550億美元，或超過10億美元一天，可見今年首季投機性資金流入商品市場情況。出現上述情況理由相當複雜及富爭議性，包括生物燃料計劃推高食物價格，而且中印經濟大幅增長令新中產階級人數大升。

　　滬深股市流通值上周市值76788億元人民幣，較一周前減少5.96％；總市值227200億元人民幣，減少4.46％。上海股市流通值54546億元，減少5.8％；深圳股市流通值22242億元，減少6.3％。上海股市總市值183224億元，減少3.8％；深圳總市值43976億元，減少6％。內地負財富效應正發揮影響力。技術上睇，本周滬深A股仍會再下跌，因電訊業開始重組。

　　高油價引發美股回落，上周五道指跌145.99，見12479點；上周道指共跌3.9％。聯儲局承認美國經濟在放緩，但其已失去再減息能力，令愈來愈多人加入Sell in May行列。航空股、汽車股大幅回落，銀行股亦唔見得出色。

乾貨船加租有因

　　今年乾貨船租指數急升理由有三：一、中國對入口鋼鐵砂需求及煤需求急升。二、信貸危機令大量新船訂單取消。三、中國四川地震。波羅的海乾貨輪指數由今年1月29日5615點升至最近11800點，上升110％！內地煤供應不足，已令三十二部發電機關閉，依家存煤只夠八天燃燒量（美國係五十五天）。奧運漸近，中國對煤需求急升，更何況需要大量焦煤煉鋼（四川需要重建）及其他煤去生產水泥。中國過去係產煤大國，煤長期供過於求；到2007年變成淨入口國，動力煤、焦煤（煉鋼用）及普通煤（生產水泥用）需求都十分大。四川大地震令交通網絡受嚴重破壞，不但重建需要大量水泥及鋼鐵，同時令四川資源運唔出去，進一步依賴海上乾貨輪供應原材料。今天最大乾貨輪日租已升至20萬美元，年初只係9萬美元（2004年8000美元），更謠傳將升上30萬美元一天！

　　次按危機原來只係穆投資服務公司電腦模式出錯，畀大量衍生產品3A評級，結果令投資呢類衍生產品人士損失超過60％！去年初穆高級職員才發現，因此將呢類3A級債券信用大量降級……。如上述報道屬實，此乃本世紀最大「黑色幽默」！

　　金融股由去年10月底開始急速回落到今年3月後，形成敏感三角形，令人擔心係呢個敏感三角形有可能破底，引發另一場拋售。標普銀行分類指數（BIX）所形成敏感三角形至今未能打破下降通道，3月低點可能守唔住。金融股一向有「股市脊梁」之稱，如果金融股守唔住3月低點，後市便幾麻煩。

　　歐羅出現已有十年，係歐洲經濟及貨幣同盟最偉大成就，由多國共用單一貨幣，歷史上係創舉；唔少人預測2025年歐羅將取代美元，成為全球最流通貨幣！各位可能忘記德國歐羅中所扮演角色。歐洲央行主席特里謝4月底發言指出，1998年至今歐羅區生產力平均每年只升1.2％，美國卻每年上升2.1％。歐羅區生產力增長率唔及美國，不但冇價上反映出來，美國寬鬆貨幣政策下，反令歐羅價日升。而以購買力計，2006年英國人均購買力相等於美國人79.7％、法國73.7％、德國71.6％、意大利69.4％，但英鎊兌美元2006至07年表現強勢。

不惑之年才理解風險管理奧妙　　歐羅至今仍係地區性貨幣。根據國際結算銀行資料，全球外交易2001年美元佔90.3％，2007年仍佔86.3％。歐洲出口方面，根據歐洲央行資料，出口到非洲少於25％以歐羅報價，出口到日本、印度、南韓、馬來西亞、泰國更少於6％；反之，美國產品出口99％以美元報價、入口93％以美元報價。英國、瑞士、瑞典及丹麥似乎並唔積極持有歐羅貨幣。

　　Citadel投資集團主腦Ken Griffin批評，金融市場內太多剛離開大學而缺乏經驗後生仔。呢批三十歲未夠年輕人將投資當成玩電子遊戲機，佢地分分鐘處理數十億美元投資而面不改容，因佢地知識來自大學而非來自市場，結果闖大禍，引發呢場次按危機。因佢地過分強調「I」（investment）而忽略「R」（risk management），大牛市中表現自然出色，一旦面對調整市便損失慘重。

　　畢非德最近Wharton School of Business亦對住D大學生講：「People continue to do foolish things, no matter what the regulation is.」我老曹主張年輕人要博，問題在於應否將咁巨大金額交由佢地作決定?!由於監管上根本唔可能限制年輕人去博，而風險管理通常要到四十歲才明白其中奧妙，因此好公司應該既有二十九歲或以下年輕人打前鋒，亦有四十歲以上中年人打後先至穩健。