2008-05-15

資本主義最崇高精神

　　5月14日，周三。恒生指數低開，因內地股市回升，全日只跌19.29，收25533.48；但成交只有679億元。5月期指升10點，收25460點。中石化（386）跌2.2％，成7.49元；電視廣播（511）早段升11％，見48.35元，下午停牌，因有報道話大陸投資者入股。永隆（096）升3％，見145.5元，報道指5 月中可公布買家誰屬；伍氏家族共佔永隆53％股權。

資本主義醜陋但唔壞

　　滬深三百指數升3.22％，收3975.78。醫藥股、水泥股、鋼鐵股大升，銀行股及金融股回落，電訊、石油及電力股亦全線下跌。大摩認為，地震對港股及A股影響應該好細。東方證券研究所副所長鄧宏光認為，地震之後，年內加息似乎唔再可能。國泰君安農業分析師秦軍話，四川係第三大肉類生產省（第一大豬肉供應省），地震之後全國肉價再走高機會存在。睇嚟分析界意見都幾紛紜。

　　5月12日四川汶川發生七點八級地震，真係人間悲劇，內地公司紛紛解囊賑災，發揮資本主義最崇高精神──即成功者回饋社會，又感到人間有溫暖。歷史早已證明，資本家較共產主義者更關心下層社會（全球捐助大部分來自資本家，而非信奉共產主義者）！

　　資本主義制度並非完美制度，佢首先承認人性係醜惡，因此需要法律去規範，才可達致公平競爭環境，再以道德理由去吸引成功資本家回饋社會。三十年改革開放政策後嘅中國，大家都睇見內地成功資本家回饋社會嘅行為。誰說資本家係醜陋嘅？只要政府嚴格執法去對付無良資本家，以維護公平競爭環境，資本家成功後便紛紛回饋社會。資本主義雖然醜陋（ugly），但並唔壞（bad）。

　　大摩認為，雖然中國CPI短期展望欠佳，但相信今年下半年將進入退潮。2005年7月開始嘅人民幣升值，不但未能阻止外資流入，反而加快資金進入中國市場。一旦美元滙價穩定，可減慢人民幣升值速度，反令資金流入中國速度減慢，因此建議減持東方航空（670）、南方航空（1055）、國航（753）及華晨汽車（1114）；亦建議減持內房股如世茂（813）、雅居樂（3383）、碧桂園（2007）；其次係思捷環球（330），因80％收益來自歐洲，而裕元（551）約有24％收益來自歐洲。至於受惠股應係中國外運（598），因48％收入係美元；冠捷科技（903）77％收入來自出口；比亞迪（1211）46％來自美元收益。

　　瑞銀推介青島啤酒（168），因中國已係全球最大啤酒消耗國，去年消耗三百八十一億公升啤酒，並繼續以每年6.2％嘅速度上升；今天中國人消耗啤酒量仍只及美國人三分一。內地啤酒市場最大銷量係雪花啤，佔整個市場18％；其次就係青島，佔13％；反觀外國大品牌則佔據大部分市場。換言之，華潤旗下雪花品牌與青島啤，未來市場佔有率可進一步上升，即每年銷量升幅應大於6.2％呢個平均數。

　　花旗叫大家要小心：去年10月至今年3月香港M減少4220億元或6.6％（如只計港元M則減少5300億元或14.2％），估計呢段日子有3340億港元轉為外幣流走咗，上述因素令恒生指數回落三分一，以及令恒生國企指數回落47％。銀行對股票經紀貸款由去年9月底嘅1390億元下降至今年3月底180億港元，證明呢段日子有大量資金由股票市場流走。最近一次美元減息四分一厘，但港元唔減息。從資金流向睇，相信3月18日至5月5日恒指由20572點升上26387點只係大跌市後嘅反彈，其後隨住中國及海外市場消息而升升跌跌，日後將跟隨個別公司業績公布而作調整，並建議減持東方航空、南方航空同國航。

　　瑞銀認為，內地存款保證金率如超過17％（依家16.5％），對信貸市場有較大影響，因內地存款增長率達18％、貸款增長率13.5％。不過，內地經濟已漸漸感受到存款保證金率上升嘅壓力。地震之後水泥股被炒起，瑞銀認為係過度反應。

　　麥格理認為，熊市已經形成，最惡劣日子並未過去，响美國經濟走向低增長大前提下，亞洲區股市現價唔可以話便宜。

　　美國聯儲局計劃改變過去格蛇嘅作風（即任由資產泡沫膨脹、爆破，只喺爆破後才出手挽救），改為响資產泡沫形成時已出手刺破！上述策略講就易做就難。例如家吓面對油價泡沫，貝南奇又可以做D乜？美國過去二百五十年發展史，都係泡沫一個接一個形成、爆破，响過程中大部分投資者損失慘重，但孕育出今天嘅美國大企業。

　　我老曹1967年到社會做事至今四十年，亦見到香港出現唔少泡沫形成、爆破，喺過程中雖有唔少投資者損失慘重，同時孕育出今天香港嘅大企業；反之，喺泡沫形成初期已刺破它，政府過分干預市場，反而不妙。資本主義精神：成功者上天堂，失敗者下地獄！

高油價迫使美國人節約用油　　

油價升穿120美元以後，已見到美國人首次節約用油；反之，中國及印尼等國家政府人為地壓低零售汽油價，未見減省情況出現。印尼政府補貼今年已達120億美元，相信好快頂唔順。中國政府則唔批准石油股加汽油價，令中石油（857）、中石化等一邊賺錢一邊蝕本，相信最終亦要接受市場價，到時全球油價才可止升回落。

　　周二貝南奇承認依家金融市場動盪只係減少咗，而非恢復正常。去年8月至今，响各國央行努力協助下，已減輕銀行及大投資機構所面對嘅信貸萎縮，家陣總算平靜下來，部分已見改善，但未返回正常，例如倫敦同業拆放利率仍然偏高。去年8月至今各國央行嘅行動，係咪已阻止一次1930年代式經濟蕭條出現，抑或走上九十年代日本銀行之路？雖然日本經濟避免陷入蕭條，但過去十八年日本經濟卻係半死不活，情況有如高血壓患者，如不改變生活習慣，到爆血管後才急救，便醫番都殘廢。日本、台灣就係現成例子。香港1997年第三季經濟亦爆咗血管，2003年下半年嘅自由行、CEPA等因素，叫做醫番好香港經濟，不過亦走上貧富兩極化，1997年前香港經濟繁榮人人共享嘅情況再冇出現。

　　見人所未見（See what others don't see），搵出群眾曲解嘅項目。例如1997年7月1日香港特區政府推出八萬五房屋政策，以及2003年9月嘅孫九招。利用群眾盲點進出物業市場者，依家已賺到盤滿缽滿。

不吃眼前虧非君子

　　今天油價同食物價格仍在上升，但價格已偏離長期趨勢（三十八年來）25-30％。River front Investment Group嘅Rod Smyth認為，未來五年美國CPI每年升幅只有3％，而非一般人估計嘅6％。該集團另一分析員Michael Jones更直接了當，話眼前商品價格已偏高，宜減持資源股而非增持。上述言論同羅傑斯背道而馳，你信邊個？群眾往往由一個極端走向另一極端，不然油價亦無法喺十年內上升十二倍，依家油價已偏離長期趨勢40％。趨勢係你嘅朋友（The trend is your friend）。趨勢形成時加入，趨勢結束後退出。大部分趨勢可維持三年、五年或七年，趨勢一旦有七年歷史時便得小心，雖然部分趨勢可維持十一年、十三年、十七年甚至十九年，只係比較上少（上述數字都係質數）。

　　好多人以為賺大錢必須冒高風險（富向險中求），事實剛剛相反，風險與報酬並唔係常常掛鈎，而係要明白「價值」所在。例如2001年美國開始減息時持有黃金、資源股、澳元及加元，當年上述投資風險唔大；近日美元減息周期已近尾聲，今天投資黃金、資源股、澳元及加元未來報酬有幾多？由2002年至今美元已下跌七年（各位仲記得七隻肥牛嘅故事咩？），今天資產淨值1元嘅工業股，市價只賣0.5元，你買入後可能再跌至0.35元而吃咗眼前虧，只要捱過困難期，或遲或早佢又會返回合理價值1元或以上。如以0.5元買入，日後可獲利 100％；如能喺0.35元買入、獲利200％。唔少人話君子不吃眼前虧，我老曹經驗係不吃眼前虧者非君子！

　　美國細價股指數羅素二千指數技術上睇走勢已出現復甦訊號，今天叫人留意細價股，似乎同一般人想法背馳。閣下又點睇？

　　次按危機出現，對造船業而言係打擊，因大量造船訂單被取消，估計數目達二百五十艘，或佔10％總訂單量。過去基於未來新船供應量達二千五百六十一艘，而認為未來三年運費可下跌56％；今年卻因訂單大量被取消而須重新評估。彭博乾貨船租指數今年已急升到五個月高點，只較去年11月13日高點略低7.3％，波羅的海乾貨輪指數亦因在建乾貨輪減少21％而急升；再加上鋼材價格今年1月至今上升47％，令去年第四季一度睇淡嘅航運股今年升幅好大。世事變化之大於兹可見。