2008-05-23

滯脹係未來最大威脅

　　5月22日，周四。恒生指數跌417.17，收25043.12；成交811億元。期指低水，跌472點，收24958點。中石化（386）跌3.2％，收7.33元；南方航空（1055）挫6％，收4.4元；國泰航空（293）跌2.2％，收15.16元；華潤創業（291）跌2.6％，收26元；東方航空（670）跌5.6％，成3.22元。

　　內地政府否認下月放寬汽油價管制，亦唔會取消原油稅（此稅自2006年3月生效，一旦油價高於80美元便須額外抽稅）。

油股創新高航空航運股齊挫　　滬深三百指數跌1.89％，收3711.44。中國遠洋跌6.9％、中海發展跌4.8％，因船運所需嘅燃料周三漲價4.1％，至617.5美元一噸。國航跌4.4％、南方航空跌4.4％、東方航空跌4.1％，國際油價今年已上升50％。海螺水泥跌5.6％、平安保險跌3.4％。

　　印尼宣布汽油零售價升33％，至6000盧布一公升；柴油升28％，到5500盧布一公斤，因減少政府補貼。

　　馬來西亞7月份起亦減少燃油補貼，減少政府財政赤字到只佔GDP 3.1％。

　　台灣馬英九上台後，宣布6月2日增加電費燃料價，不過對貧窮家庭則提供補貼。

　　日本方面認為，油價升上200美元一桶嘅機會存在。

　　人民幣創兩個月內最大升幅，收6.943兌1美元，即一個月內升值0.66％，估計今年內可再升值6％或以上。

　　奧運距離開幕只有七十八天。最出名嘅建築物係國家體育館（俗稱鳥巢），共花五年時間興建，可容納九萬一千人，佔地二十五萬八千平方米，可收集雨水後循環再用；另有一千一百二十四塊太陽能板作為動力能源，推動五個泵利用雨水作降溫；奧運村嘅熱水供應亦來自太陽能。奧運開幕時，全球或會驚訝中國响環保方面已經咁先進，各位可發現北京奧運係一個綠色奧運，好多先進環保技術已用於奧運建築物上，證明中國再唔係一個科技落後國家。

港次季GDP增長料放緩

　　中國製造業正面對成本上升壓力，令邊際利潤下降，內銷方面亦開始感受到A股回落所產生嘅負財富效應。今年首季香港GDP仍升7.1％（去年第四季升6.9％），主因來自服務中國嘅需求上升，支撑住整個香港GDP增長率；其次係港元追隨美元貶值，結果亦加強香港對外競爭力。

　　不過，4月份中國出口增長率只有10.4％。如中國第二季出口增長率放緩，香港GDP亦勢受影響，即香港第二季GDP增長率未必能保持7.1％升幅。

　　1995年日本神戶地震死亡人數六千五百人，損失相等於日本GDP 2.5％（約2000億美元）。神戶係日本工業重鎮，其後迅速重建，反而幫助日本1995至97年嘅GDP增長率（估計1.2％一年），因此有人相信四川地震後不但唔會減慢中國GDP增長率，反而會加快GDP增長率。不過，同神戶唔同，四川以農業為主唔係工業，死亡人數估計高達五萬，地震影響面積亦較神戶嗰次大好多，中國政府財力亦較1995年時嘅日本政府為弱。1995年前日本經濟早由高峰期下滑；中國唔同，2007年經濟係過熱，正利用貨幣政策去冷卻經濟。我老曹睇唔到兩者相同之處。

　　未來六個月全球最大威脅係滯脹，即美國、歐洲及日本三大經濟體系維持低GDP增長率，但通脹率仍高。四大金磚國GDP增長率放緩，通脹壓力進一步上升。食物及能源價格上升帶動其他產品售價上揚，但同1970年代唔同。1970年代全球仲係美元天下，依家美元响全球所佔百分比已大大下降，歐羅、日圓甚至人民幣所佔百分比在提升。1970年代係二分天下（自由經濟與共產主義制度），依家已合而為一（都係行自由經濟制度）。今天只出現此消彼長局面（美國、歐洲同日本停滯不前，四金磚國仍保持高GDP增長）；香港幸運之處係已逐步減少對歐美嘅依賴，而增加同中國聯繫。2003至07年香港經濟繁榮係受惠於中國因素。

　　2008年唔係1978年，唔好以為未來一年係1979年。油價會否升至150美元一桶甚至200美元一桶？冇人可預測。1978年世界經濟仍一片繁榮，但2008年美國經濟在放緩中，甚至四金磚國GDP增長率亦在下降。

　　點樣把1萬元喺七年內變成100萬元？答案係每年搵出double本金嘅機會，上述方法話難唔難，話易亦唔易，似唔可能但並非做唔到。2007年有幾多股份股價升幅大於100％？2008年至今情況比較困難D，但3月至5月亦有唔少股份升幅達50％。只要响未來日子再來一次，一樣可以喺2008年內 double your money！

　　大部分人响繁榮期賺錢，其實衰退期一樣有賺錢機會。例如去年8月至今外滙、金價及油價。油價已升上133.17美元一桶，喺不足五十二個星期內升幅超過一倍。

　　美國航空宣布減少航班及每件行李收15美元去補貼油價上升，並決定大裁員，令美國航空嘅控股公司AMR股價下跌24.2％；聯合航空嘅控股公司UAL跌 29.5％，達美航空跌16.4％；全球航空股都下跌。國際金融研究所（代表三百多間大企業）要求恢復舊會計制度，即手上投資唔使以市值入賬，可以入貨價入賬。

　　新會計制度令金融機構去年須撥備3000億美元而集資2600億美元，今年須進一步撥備及集資（反之，香港企業喺新會計制度下，銀行旗下物業及地產公司嘅投資物業經重估而令去年純利大幅上升，企業純利亦有唔少來自資產重估升值）。信用評估公司穆廸股價下跌15.9％，雷曼兄弟跌 5.8％，大摩跌4.3％，花旗跌4.8％；分析員唔信可恢復舊會計制度。

　　OECD估計，食物價格未來十年都將高價牛皮。小麥價（扣除通脹）估計可升2％、大米升1％、玉米升15％、植物油升33％。食物價格自1975年回落到2004年，跌咗足足三十年，回升些少亦好應該。

　　今天印度工資較中國低，計劃大舉進軍製造業，相信可令唔少勞工密集嘅工業由中國移去印度，全球出現另一次製造業搬家。

巨擘睇唔清趨勢必被取代

　　世事常變，變幻才是永恒。响改變過程中，唔少機會被創造，唔少財產亦消失，我地只能適應潮流，以變應變，不能一成不變。舊事物漸淘汰，新事物漸出現。四川汶川地震更係因為地殼劇變，人在劇變中係幾咁渺小及無助。1960年代IBM因睇唔到PC時代來臨，响電腦市場嘅壟斷地位被微軟取代（PC軟件供應商）。蘭克斯洛亦睇唔到小型影印機嘅威力，今天影印機市場已被日本品牌嘅小型影印機佔據。Sears睇唔到中國廉價產品嘅吸引力，百貨業地位被沃爾瑪百貨公司取代。如唔睇清大方向，無論企業或投資者，都遲早被市場淘汰出局。1970年我老曹首次接觸電腦，嗰架IBM 360成個衣櫃咁大；到今天，市面上已出現掌上電腦。

　　1978年鄧小平嘅改革開放政策，响中國造成翻天覆地嘅改變；上述乃大趨勢。其他小趨勢例如2002年起美元滙價回落，黃金及原材料股上升……。去年10月港股直通車不能開出，以及滬深三百A股泡沫爆破，每一個趨勢形成都帶來機會，每一個趨勢結束都帶來破壞。例如呢次次按危機對銀行及大證券行股價造成破壞，人民幣升值則對內地工業股所造成壓力。

歐美及中印經濟此消彼長

　　未來新趨勢如人口老化、二元社會（20╱80）嘅形成、歐美同中印經濟此消彼長……。數以億計嘅消費者响中、印市場出現；反之，歐美消費者開始進入節衣縮食期，因人口步入老年期，一如九十年代日本。次按危機下，衍生金融產品市場係咪進入萎縮期？互聯網公司未來五年會否合併成為更大企業，誰收購誰？有冇新互聯網企業出現？石油危機下，有冇新能源出現？生物工程方面，有冇突破性發展？恒生指數會否5月5日完成熊市二期反彈進入上落市？

　　一切都在改變，2008年下半年又如何？暫時睇唔到大方向，投資者仍在炒個別發展。

　　浙江玻璃（739）、邦盟滙駿（8158）停牌。