救災重建在在需財
5月20日，周二。恒生指數跌572.77，收25169.46；成交827.99億元。5月期指低水，跌575點，收25096點。國企指數跌2.7％，收13973點。交通銀行（3328）跌3.3％，收10.58元；建設銀行（939）跌3.1％，收6.85元；中移動（941）跌2.9％，收130.7元；中國電信（728）跌2.9％，收5.37元；中國石化（386）跌4.4％，收7.26元。
地震令部分村莊永久消失
亞洲水泥（743）掛牌較招股價升38％，收6.83元。域高金融（8340）掛牌升36％，收34仙。
花旗推介安徽海螺水泥（914），估計今年每股獲利2.678元人民幣，升73.7％，O二十三點四倍，目標價87元。中信泰富（267）今年每股獲利2.39元，升5.3仙，O十四點七倍，目標價42.15元。永恩國際（210）今年每股獲利29仙，升23.9％，O十六點三倍，目標價5.7元。
滬深三百指數跌5.19％，收3710.82。周一納斯特上市中國網絡遊戲股大跌，例如完美時空跌12.75％，收27.31元；巨人下跌8.65％，收14.25元；網易跌6.2％、盛大跌5.63％。
前期表現強勢醫藥生物板塊今天在內地亦下跌，例如北海國發、金陵藥業、現代製藥等二十隻股份跌停。有色金屬、食品及飲料股亦出現頗大跌幅。
政府報告呢次地震共有五百四十萬間房屋被破壞、二千一百四十萬間房屋有損毀；死亡人數超過四萬，有一千二百四十萬人口須重新安置（其中五百萬已永久失去家園）。雖然已收到捐款達125.2億元人民幣（數字雖然好大，但相對虧損數字未及十分之一）；直接損失數字達1500億元人民幣。重災區範圍超過十萬平方公里。何況地震之後，一場暴雨可引發山泥傾瀉，令到災場環境進一步惡化，恐怕有D村莊將永久消失。未來重建工作最少要四至六年，救災行動真係任重道遠，在在需財。
山西省政府5月20日宣布，大中城市、縣城及鄉鎮新建、改建五百所中小學校校舍實施新規定，最低使用壽命須五十年以上，大門、廊道、樓梯須符合有關標準及要求，有利防災及安全疏散。所有項目學校都要統一掛牌，將項目負責人、施工隊伍名稱、設計單位列出，接受社會監督。內地建築條例開始收緊，此乃好事，其他省市又點？
3月18日至5月5日恒指由20572點回升到26387點，根據過去經驗，應該係熊市二期反彈，反彈幅度最小係前跌幅31.8％，一般可反彈前跌幅50％（例如呢一次），最強力反彈可以係前跌幅61.8％。情況有如爆血管後，一般病人可恢復爆血管前50％功能，但希望完全恢復機會渺茫。換言之，恒指32000點唔會係不久將來事。
好多事情，事後我地都希望冇發生過。例如5月12日四川汶川市八級大地震，又例如去年10月港股直通車計劃公布……。可惜我地冇改變過去能力，事情發生就係發生，事實永遠係事實，無法改變。我老曹亦希望牛市未死或新牛市今年3月18日已誕生，但愈來愈多證據顯示上述諗法係錯。聯儲局只係成功阻止金融市場溶解（meltdown），卻冇將佢方向改變。十三億中國人捐獻，只能減少四川災民苦，卻無法消除四川災民痛！災後罪過感（例如點解自己生存、家人死亡？）、災後損失、善後工作（超過一千二百萬災民需要政府及我地支持）及未來五至七年重建工作，都唔係嗌口號可以解決，而係需要切切實實地重新規劃、檢討（點解唐山大地震之後，我地學校建設仍然冇加入防震結構？），絕不能聽天由命。
同投資一樣，第一次錯失人人都會犯，第二次錯失後如果仲唔檢討就冇得救。災情過後應回復理性分析，以及諗辦法阻止同類事件再發生！不然唐山之後係汶川，然後又……。未來中國仍有七點八級甚至以上大地震，但希望唔會再出現有六千八百間學校倒塌情況。學校、醫院等公眾建築物應有抵抗十級地震結構，現代科技完全做得到，雖然建築成本將上升15％到20％，但係值得。例如地基上加入強力彈簧，或利用沉箱做地基工程、建築物內用鋼架支等。今天中國唔係需要「加油」，而係要加強執行建築物條例能力，做好防震措施。
資源股及能源股敬而遠之
講番股市。美國房產價格由1983年開始上升，到2006年7月共上升二十三年，各位認為調整可以兩年內完成咩（2006年7月至08年5月）？2002年10月到07年10月道指牛市，熊市五個月內已完成？又或者一個2007年9月市值681萬億美元CDO及CDS衍生金融工具市場（國際結算銀行數字），又可以八個月內完成de-leverage？3月18日當50天線跌穿250天線確認牛市死亡（上述訊號作用唔大，因為出現得太遲），投資界唔係一度極度悲觀，而忘記熊市二期係反彈市咩？今年5月5日樂觀者指數首次重返50％以上（3月18日係30.9％）；反之，悲觀者指數卻急跌至29.9％（3月18日44.7％，首次較2002年10月更多，真係好了傷痕忘了痛）。3月18日投資情緒太悲觀令股市反彈，5月5日似乎又太樂觀D。
近日創新高有道瓊斯鋼鐵股指數及煤礦股指數。我老曹認為今天鋼鐵價、油價及煤價受投機資金推動大於出現短缺，我老曹立場係早已敬而遠之，因為呢類資源股同能源股已出現七年大牛市，而我老曹一向唔喜歡飲「牛尾湯」。
近期美股納指更完成前跌幅61.8％最大反彈幅度；反而羅素二千指數（細價股指數）卻未能完成前跌幅50％反彈（係股市中最弱一環）。再參考道指住房建築指數（因最先回落）今年1月見底反彈前跌幅50％後，2月至今係上落市，本周MACD更出現出貨訊號。道指住房建築指數早2005年5月見頂（較樓價早一年見頂），至今每次反彈皆不足前跌幅50％，然後指數又再創新低，今年1月低點只及2005年5月高點20％。至於道瓊斯銀行股指數年初至今形成敏感三角形，最終破上破下便木宰羊。
美國國會剛通過削減農業補貼計劃，等候殊仔畫個龜便生效。農業補貼將削減至個人75萬美元年收入（夫婦150萬美元），舊法例係125萬美元（夫婦250萬美元）；但殊仔要求係只補貼個人收入20萬美元以下農夫。美國年收入150萬美元農民家庭仍獲政府補貼，係咪好荒謬？呢類人大部分只擁有農場，自己則住大城市豪宅，卻每年享受52億美元政府補貼。新農業補貼計劃生效後，到底有幾多農莊會種農作物而減少用草地養馬？
溫和衰退有益經濟
至於歐盟每年農產品補貼高達750億美元法案，卻要到2013年才到期。7月份法國將出任歐盟呢方面主席，法國希望補貼唔再係產品而係種植區，此改變亦可刺激農產品產量。但英國認為，補貼政策令好多冇效率農莊存在，而上述支出佔歐盟每年財政支出40％，十分浪費，因為2003年協議生效前，冇人諗到人類會面對食物價格狂升，而將補貼視為保存歐洲「鄉村風味」代價。
至於殊仔要求沙地增產，數字亦少得可憐，只係要求每日增產三十萬桶，而沙地國王居然唔答應！
高盛估計，今年下半年油價將見141美元一桶，並推介煤礦股。但願其預測落空，否則整個經濟將受好大打擊。
花旗分析員Prashant Bhatia降低雷曼兄弟、高盛、大摩第二季純利展望，即睇淡美國金融股前景。
畢非德認為，聯儲局責任係管理金融市場（regulate），而非預測經濟方向，因此佢唔同意格蛇過去做法，更加唔同意依家貝南奇做法。資產管理公司主席Donald Gould認為，決定有冇泡沫本身已富爭論性，更何況決定幾時刺破佢？資產泡沫係無法避免，佢係市場經濟制度下一部分，係資本錯配（misallocation）結果，並有自我調整能力，唔使聯儲局擔心，聯儲局插手反而會擴大波幅。
美國聯邦保險公司主席Sheila Bair上周五認為，另一次美國信貸收縮又開始，相信係次按危機後第二波，呢次將來自商業及消費信貸市場。
雪茄伏警告，1978年聯儲局決定唔對抗通脹，令1980年通脹率上升到兩位數字，令全球人對美元失去信心，2007年正在犯同樣錯誤！佢認為，衰退對一個經濟長遠發展而言係健康。如1978年讓溫和衰退出現，可避免1981-82年大衰退。但上述講話有幾多人聽得入耳？美國1983年至今雖再冇出現衰退，但早已患上高血壓或心臟病。希望冇事啦，不然就大件事。
去年3月12日越南股市指數高見1170.67；舊年唔係好多人睇好越南股市咩？我老曹女兒去年到越南一次，但印象甚差（因為警察隨街收黑錢）。今天越南股市指數係448.9，較去年3月回落63.8％【圖】！今年3月越南入口仍高達73億美元，較一年前升68.7％，第一季入口達205億美元，貿赤86億美元。3月份越南政府批准外資持股量到40％（之前為30％），並宣布河內成立股票市場，但3月至今越南股市再跌15％。外資對越南似乎失去興趣！越南會否係礦坑內金絲雀（坑內如缺氧，金絲雀最先死亡）？
越南是否礦坑內的金絲雀？
中國今年第一季服裝出口仍升14.7％（去年同期升17.6％）、鞋類出口升11.2％（去年同期16.7％）、玩具出口升3.3％（去年同期升29.9％）。人民幣繼續升值下，第二季情況又點？
呢幾日股市炒四川重建概念，但錢從何來？依家四川省總負債超過6000億元人民幣。四川汶川唔係日本神戶，更加唔係美國新奧爾良。2005年颶風卡特里娜過後至今已三年，新奧爾良重建進度仍十分慢。大海嘯後印尼、泰國、印度及斯里蘭卡又如何？
1957年我老曹父親爆血管，1960年逝世時，家中已冇幾多餘錢。1967年我老曹才中學畢業，各位去年如果有睇我老曹同詹瑞文兄做舞台劇《富爸爸與笑爸爸》，便知道窮人日子係點過！冇父親孩子生活怎麼樣？一場天災正正暴露中國社會福利制度不足，一千二百萬人失去家園，到哪裏去領失業救濟金？四萬多人死亡，孤兒寡婦由誰照顧？六十年代香港人仲可以穿膠花、油公仔、剪線頭、釘珠仔……，今天四川汶川孤兒寡婦可以做乜？你童年係點樣過？我老曹自九歲開始，每天做完功課便做輕工業幫補家計，到晚上十一時才，唔似今天香港即使窮仍有廉租屋住、有衣服穿、有飯吃、有書讀，病可以睇街症。但今天中國人又如何？
沒有留言:
張貼留言