2008-05-24

補貼油企超過撥款災後重建

　　5月23日，周五。恒生指數跌329.05，收24714.07；成交752.6億元；5月期指跌349點，收24609點，低水；6月期指跌360點，收24530點。睇嚟幾多人加入Sell in May嘅行動。

　　中國海洋石油（883）跌6.6％，收14.76元；聯想（992）跌6.8％，收6.01元，因德銀建議減持；網通（906）升12.5％，見 27.05元後停牌；聯通（762）升12％，見18.48元停牌；中國電信（728）升7％，見5.67元停牌；中移動（941）宣布，收購中國鐵通，股價下跌5元，收125.1元；中國資源（661）升48％，見0.37元；浙江玻璃（739）跌12％，見6.18元，公司宣布計劃集資3.82億元；電盈（008）計劃提高固網電話用戶及移動電話用戶之間互連收費25％，由每分鐘4.36仙升至5.45仙。IDC降低中國嘅電腦銷售預測，因為筆記本電腦價格唔再大幅下跌，令消費者嘅購買欲下跌。

　　滬深三百指數跌0.98％，收3675.15，開始補上升裂口，估計可見3500點。

　　花旗推介華潤置地（1109），估計今年每股獲利56仙，升93％，O二十二點五倍，目標價20.71元。

　　周四道指繼續蒲頭升24.43，見12625點，似乎係過去二天回落430點之後嘅反彈；加上油價見135美元後，收市跌番落130.81美元，投資者由憂慮次按危機漸漸變咗憂慮油價對經濟嘅影響；金價亦跌咗10.3美元，見918.3美元。UBS雖然宣布供股集資155億美元，但股價仍升1.9％，抗跌力逐漸出現。

　　地震死亡人數已超過五萬，仲有三萬多人失蹤，時間一秒秒地過去，失蹤人口變成死亡人口嘅機會愈嚟愈高。

內地石油補貼勁

　　5月12日四川汶川大地震發生當天，中國共產黨主管宣傳及新聞媒體負責人指令中國新聞媒體，做地震救災新聞報道時必須正面……。當都江堰市聚源中學星期二復課，地震造成學校樓房倒塌而痛失兒女嘅幾百名學生家長舉行抗議，強烈要求懲罰建造、批准劣質樓房、導致大批學生死於非命嘅責任者後，周三美聯社同《紐約時報》指出，中國政府又再收緊對新聞媒體嘅控制。中國網絡作家田奇莊亦指出：上星期表現嘅新聞報道自由只因新聞媒體嘅報道大部分係正面，當新聞媒體開始報道中國紅十字會採購唔公開，以及痛失兒女嘅學生家長舉行抗議開始時，新聞媒體採訪嘅自由又再受到控制。5月12日至20日極有可能係內地新聞媒體採訪最自由嘅一個星期。5月21日又再收窄。

　　4月份香港CPI升幅達5.4％（3月係4.2％），因食物價格上升19.4％，以及公用事業收費上升8.7％，上述係推高CPI主要理由。展望未來，巴士車費上升、租金上升及恢復徵收差餉，都可進一步推高CPI。

　　福無重至，禍不單行。今年年初中國既有雪災在前、後有股災，再嚟地震……2008年只係過咗一半，災難已接二連三咁出現。

　　5月22日油價一度見135美元一桶。不過，中國成品油仲未同國際油價接軌。油價嘅倒掛令煉油企業虧損加劇及令成品油供應一直處於緊張嘅狀態。 2006 年中國進口原油一億四千五百萬噸，佔內地用油45％，2007年進口石油恐怕已佔內地用油超過一半，上述情況唔可以長存（東南亞國家已紛紛停止補貼成品油。但咁樣令短期CPI上升加劇）。中國唔可以長期依靠限制成品油而保持CPI處於相對較低嘅水平；依家煉油廠每加工一噸原油虧損1000元人民幣，以 135美元油價計，煉油廠虧損達1500億元人民幣，中央畀中石化（386）今年首季嘅補貼74億美元，估計今年嘅補貼全年係300億元人民幣，再加埋中海油補貼同減稅……。中國2008年對石油企業嘅補貼約800億元人民幣，超過災後重建基金嘅700億元人民幣。何況災後重建係一次性，如油價長期高企，補貼就係每年都需要。點解全國人民要補貼用油者（社會上較富有嘅人士）？呢800億元補貼點解唔用喺興建廉租房、小學、中學學校或解決農村醫療嘅問題。咁樣唔係較補貼用油者更合適咩？國家今年開支一律較預算減少5％用嚟抗災，但用喺成品油嘅補貼卻高達800億元人民幣，係咪有D荒謬？

　　五一黃金周嘅國產品牌電視市場佔有率急跌，反而外資品牌急升至市場佔有率73％。彩電已成外資品牌天下；點解會咁？外資品牌係上流面板，生產商嗰塊液晶面板大部分由外資企業嘅工廠生產或入口，?家仲有盈利。佢地喺大熒幕液晶電視機平均降價25-30％，蝕本賣電視嘅問題唔大，因為賣液晶平面板仲係賺錢；反而國產品牌佢地本身唔生產液晶平面板，所以賣電視機時唔可以蝕本。結果內地電視機零售市場漸漸落入外資品牌廠嘅手上，因為佔整個電視機生產成本60 - 70％嘅液晶平板生產技術仲喺外資電視企業嘅手中，中國工廠只能做加工生產。

　　預測從唔可靠。你投資即表示願意自己嘅資金承擔風險。因此，千萬不可冒你承擔唔起嘅風險。連銀行都會投資錯誤，何況係一般人？

　　2007年8月起貝南奇透過注資及減息去減少次按危機嘅殺傷力，搞到美元回落及全球性通脹。今年4月美國消費者稅後收入較2007年同期上升 4.1％，但日用品平均嘅售價反而上升10.4％，代表一般人嘅生活水平將下降；情況就好似七十年代嘅滯脹期。1979年年底雪茄伏出任聯儲局長就用高息對付通脹，搞到1981╱82年衰退先將通脹率馴服。今次又點？

超級泡沫爆破

　　喺滯脹期（Stagflationary Environment）耐性係好重要；商品價格此起彼落、食品價格及能源價格就係咁升；反而樓價同股價就唔升，雖然利率由5.25厘跌落2厘。個個都希望射中牛眼，結果就成日誤中副車。好似索羅斯所言：「我地正進入財富嘅破壞期。例如中國正面對高通脹嘅威脅，加埋出口增長率放緩，前景都幾令人擔心。」索羅斯認為，呢個次按危機係超級泡沫爆破，一個由列根總統時代已開始，超過二十五年日子嘅泡沫已爆破。

　　熊市反彈從來唔易玩，尤其係聯儲局响5月5日前已結束減息周期，利率由去年9月5.25厘減至今天嘅2厘，CPI升幅卻係4％。為協助JP摩根大通收購貝爾斯登，聯儲局已接受咗290億美元唔易買賣嘅資產，引發3月17日起嘅反彈。但係由5月5日起，股市開始無定向，時好時壞。

　　新興國家股市正係重犯七十年代OECD國家相同嘅錯誤。阿根廷通脹率已達23％、俄羅斯14％、沙地同印尼達9％（正在走向12％，如果印尼宣布取消汽油補貼）、中國達8.5％及智利8.3％。政府過去透過補貼或控制物價，阻止CPI上升，一如1972年尼克遜宣布凍結物價一樣；結果一取消後，物價就飛升。依家佔全球三分二人口嘅新興國家人民正面對通脹率走向雙位數（例如中國食物價格上升22％、非食物價格上升1.8％，政府已宣布物價管制；印度則取消唔少商品期貨交易去打擊通脹上升，但長遠而計，咁樣做害多於利）。新興國家CPI升幅大過OECD國家，理由係食品佔CPI比重30-40％，响 OECD國家就唔夠15％。

　　香港由1990至97年嘅情況係港元滙率偏低，以及香港政府唔俾港元升值，搞到本港通脹，樓價由2000元一呎升到12000元；薪金升咗三倍。 1997年7月至2003年7月樓價跌咗65％，出現Boom & Bust。上述情況2003至07年喺中國發生，樓價狂升，自2008年起樓價出現調整。滬深A股由2007年10月17日5891.72，跌落2008 年4月22日3122點，跌幅達47％，因政府宣布減印花稅而反彈；恒生指數由1997年8月7日16820點，跌落到1998年8月13日6544點，跌幅61.9％，亦因政府入市干預而回升。雖然恒生指數由1998年8月13日回升，但本港樓價卻一直跌到2003年第三季才止跌回升，相同情況會唔會喺內地出現？係一個好值得思考嘅問題。

　　真正壓抑CPI嘅方法係將利率推高至CPI增長率之上，咁樣做必引發短期衰退，令新興國家（包括中國）央行面對兩難局面。?家大部分新興國家仍處負利率期，貨幣供應增長率仍高達20％（俄羅斯更達42％），最終新興國家經濟會唔會出現1981╱82 年美式衰退？以中國為例，如將利率推高至CPI增長率之上2厘，立即刺激人民幣滙價大幅升值，雖然可令CPI嘅升幅受控制，但出口嘅能力出現大倒退，令 GDP增長率急跌至6％或以下而引發經濟衰退。如央行唔將利率推高，人民幣只會溫和上升，CPI升幅就解決唔到，最終因通脹嘅問題而削弱中國貨出口嘅競爭力，令GDP增長率回落，喺咁嘅情況下，內地A股响可見將來大方向係向下。