爭住接火棒
5月1日，周四。玩股票者，最怕接火棒；呢次奧運，香港官商名流都爭住接火棒，反而運動界代表卻少得可憐。如果話係來自各界代表，點解D每天為我地派信、風雨不改郵差又冇代表？港九及新界服務速遞員，佢地先至係香港正式跑腿，點解唔見有代表參加？唔通接火棒都需要有錢或有面，冇錢冇面者冇得玩？2008年8月8日北京奧運，本應係中華民族光榮事，點解會變成咁？奧運宣揚唔係平等與博愛咩？唔係強調無論富貴與貧窮，都同一起步點開始，憑個人努力而奪魁；無論你來自乜國家，無論你膚色紅、黑、黃、白，同一條件、同一天空下比賽而發揮人類博愛精神咩？但呢次奧運聖火傳遞卻好似古時保鏢咁，由鏢局派出龍虎武師去護送鏢銀上京，以防中途有人打劫。
ETF一直減持黃金
美國政府公布今年首季GDP增長率已降至只有0.6％。美國樓價回落及信貸壓縮環境下，美國GDP唔出現負增長已經係上上大吉，呢點有賴去年9月起至今減息3厘；但減息又令美元價急跌、CPI上升，因此本周三只能再減息四分一厘。5月份美國能否依賴退稅刺激而令消費額回升？據ADP報告，4月份非農業職位減少一萬（3月份改為五千，而非先前公布三千；2月份減少一萬八千）。睇美國就業情況在惡化中。油價因存量上升三百八十萬桶而回落2.17美元，成113.36美元。
技術上睇，油價回落至110美元甚至107美元，都只算正常獲利回吐；如107至110美元失守，才擔心先通脹、後通縮情況出現。ETF所持黃金量周二宣布4月份減少十一噸，至五百八十噸。自今年3月17日金價見1032.7美元後，ETF（實金持有機構）便一直在減持黃金。技術上睇，今年1月22日850.07美元係良好支持位，未破850美元前，仍未肯定金價真正轉勢。
聯儲局公開市場委員會認為經濟活動仍弱，物業市場及企業開支在回落中，勞工市場亦軟化。呢次減息會議中，已有兩位成員反對減息（上次一位），以八比二通過。
同1989年6月日本銀行行長三重野康唔同，當年佢為對付日本地產泡沫而大幅加息到1990年6月。日本樓市泡沫爆破後，佢又無法阻止日圓再升值。到1994年中，日圓最高見75兌1美元，帶來日本過去十三年半死不活期（日經平均指數出現長達十三年熊市）。貝南奇去年8月已匆匆注資金融體系，9月開始減息至今共3.25厘，雖然令油價一度接近120美元一桶、金價見1032.7美元、歐羅見1.61美元，至於能否阻止九十年代日式經濟衰退美國重演？仍有待觀察。
戰後日本透過低日圓價重建日本經濟（例如1美元兌360日圓，1971年起略為升值到1984年見250兌1美元，大幅升值係1988至94年7月事）。
1989年六四事件後，中國政府亦利用人民幣貶值去令中國GDP進入高增長期。1971至80年美元貶值亦令美國經濟由1982年起全面復甦。呢次美元經過2002到08年貶值後，能否阻止美國經濟2008年後陷入九十年代日式衰退?!至今未有答案。
政府政策不能改變市場基本因素，但可支配短期股市方向。呢次政府利用股市回落50%後超賣區公布減股票印花稅而引發A股反彈，代表去年5月開始中央政府欲冷卻股市措施亦告一段落。
另一方面，去年8月開始聯儲局一連串行動，相信亦減少次按危機所帶來殺傷力，但GDP增長率放緩卻無法避免。減息告一段落後，股市點樣反映美國GDP增長率放緩？相信5月份漸漸清晰。
由去年8月聯儲局注資美國金融體系而令美急速下滑所引發通脹率上升，係咪已告一段落？亦值得注意。
2005年7月起人民幣由8.7兌1美元開始升值，依家略低於7元人民幣兌1美元（估計年底係6.5兌1美元）。今天人民幣價較2005年7月前兌美元只升值20％。不過，透過去年減少出口退稅政策、勞工成本上升、原材料價格上升及航運費上升，今年第一季中國出口增長率已見大幅萎縮。1971至84年日圓由360升上250兌1美元，升幅30.5％，對日本經濟並未帶來任何損害；其後由250日圓升至1994年年中76日圓，十年內升幅達596％，才對日本經濟造成致命打擊，至今仍未復元。人民幣升值到七算，中國經濟能否利用內部消費替代部分出口增長，而保持GDP繼續高增長？任何事物都有臨界點，家人民幣價係咪亦已進入臨界點？1994年1月人民幣貶值到8.7兌1美元後穩定下來，加上1998年退稅政策，帶動中國近十年出口高增長，但同時令中國經濟出現今天過熱情況。如中國政府早一步（例如2002年）讓人民幣開始升值，或可避免今天過熱情況亦唔定。不過，上述日子已成過去，講多無謂；讓人民幣有秩序地升值至七算，到呢個水平出口增長率已放緩，內部消費係咪真係可填補出口增長率萎縮？
A股仍大大偏高
滬深A股指數去年10月開始面對The party is over！資金泛濫所造成股價偏高亦開始步入調整期。以1973年3月恒生指數為例，要到1987年6月才能再次打破1700點阻力；2007年10月滬深A股高點，真係唔知需時幾耐才能打破。由2006年1月到07年10月二十個月內，滬深A股共升六倍，過去六個多月已跌50％。最近透過減股票買賣印花稅而反彈，但可反彈幾多？冇人可事前知道，只知反彈完成後仍要進一步回落。以中石油為例，2000年4月來港上市初期只值1.21元一股，2007年11月1日見19.9元，升幅十五倍，理由係中石油去年11月5日回歸A股，以16.7元人民幣發行上市後更升至48.6元人民幣，然後回落到2008年4月24日16.02元人民幣，跌破招股價。唔好以為16.02元人民幣一股中石油好便宜，其H股香港只值9.82元！中石油去年純利只升2％，如政府唔補貼，今年純利將走下坡。由此推論A股仍偏高，今天投資A股只可做trader，唔能夠做投資者，因為股價長遠而言仍大大偏高。
新興市場特色就係由偏低走向偏高，然後又大幅回落；只有經過大上大落，投資者才會成熟。七十年代香港、八十年代日本、九十年代台灣及東南亞國家，以至今天中國同印度，都必須經過大熊市洗禮，似乎冇一個新興市場可以例外。情況有如青春發育期，往往對前景充滿希望同幻想。高增長自然帶來高O，最後引發過度投機活動，直到財富歸於少數人擁有，股市才漸漸成熟。如以O計最高計，1973年3月恒生指數曾見二百倍O，然後係1990年日經平均指數O達一百多倍；2000年科網股亦好高。去年10月滬深A股O只有六十多倍，同上述泡沫期O比較，算係正常。不過，今天A股O仍較成熟股市O高，代表調整期仍未完成；反觀2003至05年滬深A股O較恒生指數O仲低！
新勞動法尚未嚴格執行
中國經濟正由出口帶動轉為內需推動，情況有如八十年代香港。可惜廠商對工人過去每周工作八十小時視為正常。雖然新勞工法已落實四個月，根據瑞信分析，大部分工廠仍未嚴格執行。中華全國總工會已接獲十九萬宗投訴，但中央政府仍未正式採取行動，聽講寬限期係今年6月，即今年7月起中國政府才真正執行新勞工法，到時衝擊才會表面化。瑞信估計，新法案可令內地勞工密集行業生產成本上升15-20％，尤其係部分工廠旺季請工人、淡季解散工人，新勞工法下已唔容許咁做。以家內地勞工月入只有1000元人民幣左右，實在好難話新勞工法例太苛刻（尤其同全球其他國家比較）。但內地工廠產品大部分係OEM或ODM，缺乏向買家討價還價條件，因為大買家有更多選擇，結果令廠商有限邊際利潤被擠掉；情況有如1980年後香港製造業或1990年後台灣本土製造業所面對情況一樣。
唔少人引用香港成功例子（八十年代經濟轉型成功後香港更繁榮）而睇好中國未來，忘記亦有台灣失敗例子（九十年代台灣製造業移去長江三角洲一帶生產後，台灣內需並冇急升，過去十六年GDP一直停滯不前）。
美減稅法案將自動失效
美股方面，2000年殊仔上台後提出減稅方案（股息稅由35％降至15％，資本升值稅由20％降到15％，2003年生效，到2009年12月31日後失效）。除非明年新總統上台後立即通過臨時減稅法案加以延長，不然2009年後美股將大受壓力，因上述減稅方案係令美股由2003年起上升其中一項重要因素；上述法案卻二十個月後自動失效，將係2009年後美股另一威脅。美國政府財政赤字咁龐大情況下，又有邊位新總統有吉士一上台便要求將上述減稅法案延長而同時獲國會通過？2009年同2002年環境唔同，當年因發生2001年「九一一慘劇」，人人憂慮美國出現衰退。當年客觀環境有利通過減股息稅及資本升值稅法案（何況係臨時）；依家客觀環境卻大大唔同。
拉斯維加斯金沙集團（全球最大賭業集團）宣布，今年首季虧損1120萬美元或每股3美仙（去年同期獲利9090萬美元或每股26美仙）。該公司投資120億美元澳門興建酒店及賭場。金沙今年首季收益雖然較去年同期上升72％，達10.08億美元，但仍未符合分析員事前估計12.2億美元。消息公布後金沙股價場外交易跌7.22美元，至69美元；今年金沙股價已回落26％。
今年1月金沙集團拉斯維加斯開業Palazzo入住率只有79％，較拉斯維加斯另一酒店威尼斯人91％（一年前99％）為低，主要受高油價影響，令車去拉斯維加斯賭人數較估計中少。
2004年澳門開業金沙酒店EBITDA亦跌36％，至6530萬元，主因係被去年8月開業威尼斯人搶走部分VIP客戶，以及去年5月新濠國際（200）開業Crown酒店影響。今年4月23日澳門政府宣布停發新賭牌，維持只有六個，因回歸後至今賭場數目已增加超過一倍，至二十九間，而且未來仍然在增加中。
金沙集團亦有投資新加坡聖淘沙賭場，2009年開業，涉及資金40億美元。另美國賓州伯利恒城投資一間賭場，涉及投資8億美元，並有意用7500萬英鎊購入倫敦賭場Les Ambassadurs。
過去一般人認為生意淡薄，不離賭博。睇世界性賭業一樣受經濟吹淡風所影響！
沒有留言:
張貼留言