2008-05-06

未來樓價呈膠狀態
　　
5月5日，周一。恒生指數跌57.07，收26183.95；成交740.3億元。5月期指低水，跌174點，收26074點。利豐（494）跌6.89％。
　　
滬深三百指數升2.44％，見4055.78。南方航空升10％停板，國航、東方航空亦因油價下跌2.6％而上升，上海航空上升10％停板。原水股份升10％漲停，因第一季純利升一倍；西部礦業升7.1％，因同意收購澳洲採礦企業FerrAus 10％股權。
　　
德國GDP低增長，令中產階級人口由八年前佔總人口62％，降至今年只佔54％，估計2020年將有一千萬人口脫離中產成為貧窮階級，令中產佔人口總數少於50％。

港中產階級人口或少於半數　　

過去十年香港中產階級人口下滑情況較德國有過之而無不及，恐怕今天香港中產階級人口已少於半數。
　　
唔經唔覺，中原城市領先指數由2003年第三季至今已上升142％，重返73點水平（即1994年年初水平）【圖】；租金由每呎11元升至17元，上升54.5％。香港中等入息家庭收入由2003年第三季15000元升至去年第四季18000元，已上升20％；私人屋苑家庭收入由2003年第三季20000元升至2007年第四季24000元，升幅亦係20％。由於利率下跌，供樓支出佔香港家庭總支出由2003年第三季20％上升到今年3月40％（1994年佔總收入90％）。香港家庭面對依家樓價，大部分人仍供得起。
　　
家樓價會否回落？除非外來因素變化好大，不然機會唔大。至於負利率狀況下能否進一步推高樓價？GDP增長率放緩及收入負增長（加薪幅度小於物價上升），機會亦唔大。估計未來樓價最大可能性係膠狀態，即大升大跌機會皆唔大。
　　
相較於率升降，利息只係peanuts而已。不過澳元利率高達7.25厘，日圓只有0.5厘，所以利差交易誘因亦幾大，何況近年利差交易唔少賺息兼賺價。去年9月至今美元利率由5.25厘降至2厘，令從事利差交易者都放棄美元，轉其他貨幣，引發去年9月至今美元回落潮。
　　
不過，史丹福金融集團政治策略員Greg Valliere提醒大家，今年11月美國大選，民主黨應該勝出，並結束美國長達八年減息及減稅期。民主黨已控制國會，令資本增值稅及股息稅延長減免機會唔大，小心明年出現美元回升、美股下跌局面。仲有個人入息稅率依家最高係35％，唔排除到2010年升上39.6％（如民主黨拒絕再延長入息稅減免法案），2011年遺產稅減免亦可能由350萬美元降至100萬美元（香港近年已取消遺產稅）。
　　
換言之，大選後美國投資環境將漸對投資者不利！
　　
4月份歐羅區工廠活動指數50.7（3月份是52），極之接近前低點2005年5月50.8。上述指數如低於50便視為萎縮期，而西班牙早已跌至45.2、意大利48.2、法國51.1，只有德國仍53.6。歐羅區亦已接近衰退邊緣。
　　
雖然道指3月17日起上升，但哈佛大學經濟學家Kenneth Rogoff同馬里蘭大學Carmen Reinhart共同研究1300年到近代西方經濟，結果認為政府操作可能擴大及深化衰退，但從來唔係引發衰退者。經濟衰退成因係消費、投資及資產價格之間唔平衡。1987年股災出現係股價相對純利偏高；1998年長期資本管理出事係對沖基金過分借貸。上述都係金融市場災難，但對經濟影響極之有限，即使近年2000年科網股泡沫爆破情況亦一樣。但呢次唔同，唔係次按危機引發樓市泡沫爆破，而係人們已負擔唔起物業價格而出現斷供，引發次按危機。去年8月聯儲局插手令股市去年10月創新高亦冇用，今年3月17日亦因聯儲局願出手協助JP摩根大通收購貝爾斯登而刺激美股上升，但冇解決樓市泡沫問題。擔心呢次美國衰退係深而長，而唔係淺而短，直到美國物業重新變得有吸引力為止。

內地零售業高增長未必能維持　　

高達1170億美元退稅，最後去沃爾瑪百貨，定係去產油國OPEC及食物方面？經濟學家期待5月份500億美元退稅可令第二季GDP增長率高DD（第一季GDP只升0.6％）。不過，2001年年中退稅計劃未令當年GDP回升，今天美國家庭負債較2001年多85％，年入七萬五千美元個人只收600美元支票，夫婦兩人將收1200美元（如有孩子每個多300美元），能否刺激佢地增加消費？
　　
美國兩大半官方按揭公司房利美及房貸美將宣布連續三季虧損而必須再集資，睇落情況仍未樂觀。
　　
內地基金管理公司可以根據自身業務發展需要到香港設立機構，開展資產管理類相關業務，即內地基金已可投資香港（或香港以外地區），減少人民幣升值壓力。反之，港股直通車尚未開通，即個人投資者仍唔能夠直接投資港股。
　　
中國╱香港上市內地消費股今年1月至4月共失去約380億美元市值，或下跌22％，同期恒生指數跌6％、國企指數跌11％、滬深三百指數跌30％。雖然跑贏滬深A股，但大大落後恒生指數及國企指數，令人質疑中國經濟能否順利由出口帶動轉為內需推動。
　　
今年內地豬肉、牛奶及大麥分別升80％、40％及60％，因動物飼料價格升25％。果汁及蜂蜜市場面對國際品牌入侵，加幅只有15％，葡萄價格更下跌（因收成好），令葡萄酒生產成本下降，啤酒因大麥價上升60％而受影響。
　　
3月份中國零售業銷量較去年同期升21.5％。中國人口55％市區、45％農村，大部分係農民及低技術勞工，因此對產品售價非常敏感。依家零售業高增長到底能夠維持幾耐？安踏體育（2020）、百麗國際（1880）、蒙牛（2319）、華潤創業（291）、雨潤食品（1068）、佐丹奴（709）、國美電器（493）、海爾電器（1169）等，皆面對今年上半年高增長率能否一直維持落去問題。
　　
內地企業今年純利升幅面臨低增長，股價正把上述訊息反映出。
　　
中國船舶今年第一季獲利9.84億元人民幣，較去年同期上升135.91％，每股獲利1.485元人民幣，升69.33％，並透露兩大利好消息：一、中國船舶將整體上市，變成一個擁有造船、修船、造機三大業務控股公司，令上半年純利可升800％以上。二、旗下江南長興造船剛獲工商營業執照。雖然咁，今年1月至4月中國船舶股價卻下跌超過70％。即使造船業正處於高漲期，但不安因素已累積，例如鋼鐵價飆升，6毫米、10毫米、20毫米船板價格分別升35％、42％及30％；人民幣升值而中國船舶公司無法將率對沖；加上地方船企拚命擴張產能估計2012年進入另一個拐點，形成企業純利上升、股價急跌局面。
　　
中國股市一向係大戶金礦、散戶墳場。中國股市黑幕重重，不但黑箱作業，加上股評人無良，例如出書《銀廣夏──中國第一績優股》，令大量散戶買銀廣夏股票而損失慘重；其他如中科創業，黑莊呂梁捲款潛逃；億安科技「百元神話」被揭開後，黑莊雖然被即時拿獲，但9億元資金唔知去邊。中石油上市前，唔少股評人話50元唔貴，上市後卻直線下滑。內地做散戶必須罵不還口、打不還手，遍體鱗傷後還被批評「自作孽」。正是一人炒股、全家遭殃，中國散戶係蚊子最歡迎品種，不但血多，而且唔會反抗，數千萬散戶連一個「投資者組織」都冇，畀人呃連聲都唔敢聲。只要將股票交易印花稅從0.3％降至0.1％，散戶又再好了傷口忘了痛。
　　
今天內地人人魚翅撈飯，唔好以為內地人發達。無論北京、濟南或青島酒家，魚翅撈飯20元起，木瓜魚翅每盅40元，參鮑翅亦只賣幾百元一大碟！由於鯊魚中國列為瀕危物種，進出口中國必須通過海關批准才可。山東省海關話最近幾年並冇人申請魚翅進口，咁樣內地酒樓賣魚翅何來？答案係先將雜魚邊角料打成粉，加入瓊脂等物料造成仿翅針，與真翅針形狀極為相似。依家真翅針賣4000、5000元一公斤，魚鰭部位亦要賣500、600元一公斤，仿真翅卻只值幾十元一公斤，差唔多人人食得起。

魚翅撈飯大平賣
　　
過去五十年全球鯊魚數量減少80％，魚翅貿易係鯊魚被捕殺主因，家每年貿易量約一萬噸，香港及東南亞係最大進口及消費地。
　　
中國政府尚未對魚翅制定相關標準，因此不能禁止仿翅出售，只係唔能夠話自己係真翅。大部分仿翅成粉絲狀一條條，而真翅係一疏疏，泡發後相互間冇膠感；仿翅往往粘在一起。一D飯店為降低成本，往往將人造翅同仿翅混在一起做菜，如此一來一般消費者根本上無從分辨。
　　
冇證據證明仿翅對人體有害，因成分主要係雜魚。其實20元一份魚翅撈飯，消費者亦心知肚明食緊乜落肚。