2008-05-14

多災多難

　　5月13日，周二。假期之後恒生指數回升489.6，收25552.75；成交808.38億元。5月期指升590點，收25450點。長實（001）、和黃（013）、新地（016）、控（005）、恒生（011）、中移動（941）都有不俗升幅。

　　滬深三百指數跌1.36％，收3851.69。國壽跌4.7％、海螺水泥升5.5％、華新水泥漲停、雲南白藥亦漲停；上海汽車跌3.6％、一汽轎車跌4.4％、中石油跌3.8％。

　　中央政府下令關閉煤礦、化工廠、油井及天然氣井，以減少地震影響，短期將刺激能源價格上升。

　　英國4月份CPI升3％（3月份升2.5％），係十三個月內最高，亦係第七個月超過英倫銀行目標水平（2％）。由於4月房價回落，英鎊可能繼續減息。

內地將收緊建築標準

　　美國最大豪宅建造公司Toll Brothers營業額第二季度下跌30％，至8.18億美元，因需求減少及買家取消25％合約，平均每份合約值534000美元，較一年前跌26％（較上一季跌7.9％）。不過，該公司股價由今年1月1日至今上升17％，因投資者相信最惡劣日子快將過去。

　　花旗推介中海油田（2883），估計今年每股獲利66.5仙，升22.8％，O二十點九倍，目標價16.9元。

　　四川汶川附近最受地震影響兩大城市係成都及重慶。萬科成都有十一個項目（三個已售，五個出售中），華潤置地（1109）有四個，雅居樂（3383）、合景泰富（1813）、瑞安房地產（272）、新世界中國（917）、中渝置地（1224）等兩大城市都有投資，未知所受影響如何。

　　四川地震死亡人數已超過一萬，其中約五千人汶川，該區約80％房屋倒閉。隨之而來係暴雨令道路進一步阻塞，令救援工作更困難。咁多房屋倒閉，理由係建築方面冇加入防震措施。

　　地震之後，相信中央政府將進一步收緊建築標準，只要抗震方面做得好，建築物係可以承受十級大地震都唔倒塌，呢點可向結構工程師多作了解。中國唐山大地震之後，汶川地震仍有咁多房屋倒塌，令人唏噓。

　　今年中國都算多災多難，先有華南一帶雪災，然後係西藏暴動，接係地震，如再加上股災、高通脹……。

　　美股完成3月17日至5月3日反彈後又會點？估計美國企業純利今年上升8％，明年上升14％。從上述純利升幅睇，美股現價只係合理，唔算高亦唔見得特別吸引，最大可能性係隨業績公布而作個別發展，有D股價上升，亦有D股價回落。金融股由過去underweight轉為中立，相信最壞日子已過去，但唔少機構仍須集資，而且復甦需時。反而工業股可轉為overweight，相信利淡因素已在股價上反映。商品價格自1999年起上升，但對全球通脹率（CPI）壓力唔大，唔似七十年代及八十年代初期。呢次如非2002年起美元價轉弱，CPI升幅相信更細。投資者毋須過分憂慮CPI進一步惡化（內地例外），比較上令人擔心反而係信貸收縮所產生Spill-over效應。相信CPI升幅受控制後，唔排除今年第三季美國仍會減息半厘去刺激明年經濟（如退稅計劃未能產生效果話）。相信美國正進入低利率、低GDP增長率及低CPI升幅期，一如今天日本。

　　今年5月CRB商品期貨指數，如剔除油價及CPI上升因素，只及1974年高峰期56％。即係話除油價外，其他原材料價格由1974年至今係回落而非上升！商品價格指數2002年至今上升160％（但2002年指數為近三十年內最低）。農產品價格指數2003年至今平均升幅50％（1974至2002年農產品價格扣除通脹下跌75％）。除油價外，冇一種商品價格係真正較1974年高峰期更高！以金價為例，今年最高見1036美元，表面上較1975年1月850美元高出22％，但美元購買力由1974年12月至今平均每年失去5％。今天1035美元購買力相等於1975年335美元購買力，即金價過去二十三年其實係貶值60％，證明金並唔保值。今年唯一跑贏通脹商品係油價，今天126美元一桶相等於1980年53美元（當年係45美元一桶），升幅亦只有18％。

人民幣或破六遏通脹

　　依家通脹率主要集中能源及食物價格上。糧食價格上升可刺激農產品生產上升，唔會成為長遠問題，只要人類減少肉食、多吃植物類食品，已可令糧食價格回落。另一因素係減少玉米用作生物燃料，亦可令肉價回落。能源價格比較上麻煩D，需要較長時間才可建立替代性能源及節約能源產品。

　　最近八年能源及商品價格上升，背後理由係1980到2000年呢二十年能源及商品價格回落結果，今年相信已進入高潮期。

　　人民幣溫和升值、加息兼增加存款金率，卻未能令人民相信政府打擊通脹決心。4月份CPI上升8.5％，加上呢次四川汶川大地震，5月份中國CPI擔心進一步上升，可能逼政府使用強硬手段，例如容許人民幣再升9％或以上（即分析界所指「破六」行動）。如以歐羅計，人民幣須再升值15％才合理；但係咁樣會令中國過熱經濟迅速冷卻。以中國家情況，GDP增長率如降至8％仍可接受，一旦低於8％，麻煩便大量湧現。CPI壓力下，希望人行唔好採用過激金融政策，以及令中國GDP增長率急速下滑（尤其係奧運之後），導致經濟面對Boom & Bust危機。

　　今年依賴低工資工業正由中國移去越南、柬埔寨、印度等國家，有小部分移向內陸。珠三角一帶工業產品出口佔中國總出口30％，根據瑞信分析員陶冬4月29日報告估計，約三分一工廠將三年內外移，所失去訂單能否由其他唔太依賴廉價勞工製造業及內需所取代，例如電腦圓晶片、電子消費品、汽車等？

中國高科技出口難填補製造業　　改革開放三十年，中國GDP上升六十八倍，但有七億內陸中國人未能分享改革開放所帶來好處。小胡上台後已努力平衡地區上不平衡，包括三農政策、稅制合一（外資企業稅率由15％升上25％，內資企業稅率由35％降至25％）、支持中西部開發、大搞基建（例如青藏鐵路）。2002年至今中國出口較高科技產品上升412％，至3478億元人民幣，或佔2007年總出口28.5％，令中國GDP仍能保持11.9％速度上升。隨出口退稅減少（或取消），D依賴低勞工成本製造業去年下半年起逐漸外移，今年首季已見中國出口增長率大幅放緩，高科技產品出口近五年雖然急升，但似乎未能填補依賴低勞工成本行業產生衰退！上述情況1990年後日本出現，其後輪到台灣及南韓，1997年甚至東南亞國家，2008年起會否同樣在中國出現，將決定中國經濟會否出現Bust！

　　瑞銀估計今年第二季至明年底美國住房售價仍會回落10％，而今年底失業率將上升到6％，美國經濟復甦今年內出現機會唔大，所以今年3月17日至5月3日美股上升只係一次反彈，而非見底回升。《華盛頓郵報》╱ABC消費信心指數5月3日已跌至負46（上一周為負41），4月份該指數係負39、3月份是負31。Rasmussen消費者指數5月份為73.5（4月份75.4、3月份77.5）；小商人信心指數4月份為76.1（3月份77.8）。上述指數都顯示美國經濟仍在惡化。

　　油價125美元（今年第一季平均油價98美元，去年第四季平均油價91美元），即能源開支佔去美國人稅後收入4.5％（去年第四季3.5％、2003年只佔2％）。十年前油價每上升10美元可佔去美國GDP 0.8％開支，今天油價每上升10美元只佔去美國GDP 0.5％，即美國人承受高油價能力上升。

　　根據聯儲局Senior Loan Officer Opinion Survey（SLOOS）調查，4月份銀行貸款標準係收緊而非放鬆。利率雖然下降，但借錢要求較前更緊，情況已同2001年接近（或1990年）。銀行收緊銀根，估計將令美國今年第一季GDP增長率減少1％，令第二季GDP增長率減少1.5％，以及令第三季GDP增長率減少2.8％。銀行收緊銀根已令美國今年第一季GDP只升0.6％，第二季估計只升0.8％（雖有退稅刺激）。瑞銀估計，今年美國GDP升幅只有0.9％，明年2％。
　　美國今年收支赤字佔GDP收窄到3.8％，估計明年降至3％。美元價即使唔回升，亦不應再下跌。自從2001年格蛇發現通脹率唔再威脅美國經濟後便一再減息，令美元下跌，係引發油價及商品價格上升最大因素。2001年1月至今年3月美指數跌幅超過40％，不過2008年3月至今已回升3％。瑞信分析員Andrew Garthwaite認為，隨美國收支赤字收窄及下半年歐羅開始減息，相信美元價止跌回升，並推介控（005），估計係美元升值受惠機構。

　　■重慶鋼鐵（1053）、東方電氣（1072）、茂業國際（848）、福山國際能源（639）、湖南有色金屬（2626）、中民控股（681）、宏華集團（196）、第一視頻（082）、中國燃氣（384）宣布停牌。