2008年2月26日 星期二

2008-02-27

香港人唔好怨喇

  2月26日,周二。恒生指數升445.61,收23714.75;成交686.76億元。2月期指升407點,收23767點。新世界發展(017)升7.1%,收20.6元;信置(083)升6.6%,收20.6元;九倉(004)升6.5%,收40.15元;新地(016)升4.1%,收135.7元。

  本港今年1月份新批抵押貸款上升超過一倍,係1997年7月以來最高水平,共294億元(去年12月為125億元)。住宅銷售上升一倍,共一萬四千七百八十六宗(去年同期七千四百八十五宗)。

  花旗推介金界(3918),估計今年每股獲利2.8美仙,上升14.4%,O九點七倍;明年每股獲利3.2美仙,上升15%,O八點五倍,目標價2.7元。

  寶鋼宣布今年第二季鋼產品加價800元人民幣一噸,即售價至4842元至5556元人民幣一噸,計劃將鐵礦石漲價因素(每噸生產成本多400元人民幣)轉嫁,加幅更大於鐵礦石成本上升,因煤價亦上升唔少。上述售價較市價高出20%,市場係咪肯接受?!BNP百利大認為,呢次係由成本上升推動價格上升,而非需求上升,建議減持鞍鋼(347)及馬鋼(323)。估計鞍鋼今年每股獲利1.3元,上升2.2%,O十三點三倍,吸引力有限;馬鋼每股獲利37分,上升16.3%,O十一點四倍。

內地保險股吸引力返

  瑞銀推介國壽(2628),估計去年每股獲利1.4元人民幣,今年1.48元,目標價39.1元;平安保險(2318)去年每股獲利2.6元,今年每股獲利2.87元,目標價97.1元;中國財險(2328)去年每股獲利37分,今年每股獲利32分,目標價7.82元。內地保險股回落,主因係受A股回落影響,令投資回報方面減少,但保險業本身仍在上升。內地保險股經大幅回落後,下跌風險減少,吸引力又漸漸返。

  滬深三百指數微微低收,跌0.09%。寶鋼跌2.7%、武鋼跌3.3%、神華跌3.3%;雲南銅業跌7.5%,因上海期銅跌2.5%。中金黃金跌6.2%、平安保險升4.1%;浦發銀行升3.8%,因再融資。

  中國鐵建A股每股發行價9.08元人民幣,共發行二十四億五千萬股,集資220億多元,O三十點五六倍。內地投資機構認為發行價偏高,冇水位賺。

聯儲局減唔減息都畀人鬧

  今年1、2月份玩具接單報價方面,廠商面對左右為難局面。如報價過高,價格競爭優勢殆盡;如報價跟唔上,成本漲幅又會導致虧損。今年人民幣會升值幾多?勞動力成本升幅幾多?無法事前估計。新勞動合同法實施,令每個工人每月成本自動增加130元,如要將上述勞動成本轉嫁,必須提價8%才可完全抵銷。廠商計劃今年第一季提價4%,下半年再提價4%,即上半年毛利率下滑4%,要到下半年才完全抵銷。今年人民幣至今已上升超過2%,估計全年升幅8-10%(2007年6.9%)未計算在內。除玩具業外,鞋類及成衣都係最受影響行業,主要係工人多、毛利少。

  美國銀行1月份接收斷供住宅增加90%,至四萬五千三百二十七間,另有二十三萬三千間已斷供但未接收。

  美國透過減息,或可令經濟轉弱速度減緩,但會令通脹前景展望惡化(唔單止食品及能源價格,而係核心通脹率)。再膨脹貨幣政策令金價逼近1000美元,聯儲局到底可漠視通脹率上升幾耐?2001年起雙位數字增長貨幣供應,結果已漸漸浮現,聯儲局本應加息去壓制,但因次按危機聯儲局不加反減去對抗樓市疲弱及消費開支增長率下降,最終必重演七十年代式經濟模式。據美國全國商業經濟協會調查所得,全美經濟分析員中,有55%認為美國唔會今年進入衰退(即連續兩季GDP負增長)。今時今日,衰退定義已十分官式化,例如2001年只有一季GDP負增長,但對2000年投資科網股人講,2000年3月至2002年10月跌幅之大真係可以傾家蕩產。滯脹(stagflation)呢個名詞七十年代美國家喻戶曉,到2007年12月由已退任格蛇重提。由去年12月起,滯脹呢個名詞又再流行,今年起滯脹係咪重臨美國?七十年代,聯儲局加息畀人鬧,唔加息一樣畀人鬧。去年11月開始,聯儲局減息唔減息一樣畀人鬧。

  美國全國商業經濟協會主席科羅維克認為,美國經濟或可避過官式化衰退(連續兩季GDP負增長),在可見將來美國GDP增長率只能爬行。未來消費者將面對從緊貸款環境,而非2002至07年般流動性過剩環境,因去年第四季開始經濟已重返正常期。估計美國今年第一季GDP增長率只有0.4%,第二季1%,全年增長率只有0.75%(上述已包括刺激經濟計劃影響在內)。

陷入冇心水狀態

  今年,希望賺錢需要更高洞察力,唔似去年連盲毛都賺到錢,通街都係股神。今年精明如森池兄亦只有對住隻國壽(2628)同控(005)苦笑,話只係數字遊戲,最緊要健康。新春朋友見面皆話最緊要健康。去年11月至今大部分投資者都係買落輸多少。正是天要下雨,娘要改嫁;去年聖誕節至今我老曹一再被追問今年睇好乜行業?坦白講,由去年11月至今,我老曹陷入「冇心水」狀態,真係唔知應睇好乜,只在打水圍(東搞搞,西搞搞)。

  Ambac Financial及MBIA保住三A地位,令道指連升兩天。周一Ambac升15.9%,MBIA升19.7%,係唔係值得咁高興?1月份美國二手樓銷售減少0.4%,樓價回落4.6%亦被視為好消息,令Home Depot升3.8%。我老曹認為只係熊市反彈(去年10月底至今年1月中股市連跌三個月,反彈個半月好正常)。好多人度猜測股市方向,正確態度係制定應急措施,即「如果後市咁咁,我就咁咁」。不然只係風水大師,唔係分析員。

  投資需要頑強心態。去年10月人人都等港股直通車通車之時,我老曹自問「中國四大直轄市,點解只得天津,唔係上海、北京及重慶?中國四大銀行,點解只有中國銀行(3988),另外三大無份?中國銀行中,點解只有天津分行可做,其他分行唔可以做?」我老曹自己愈諗愈糊塗,於是決定減持股份。11月溫總理講話,確認自己憂慮並非無的放矢。至今一般人對港股直通車仍存有幻想,例如話今年3月可通車,你信唔信?所謂直通車計劃,類似香港迪士尼樂園玩過山車,緊張刺激兼而有之,但玩完之後返回起步點。由去年8月20日恒指20901點升至10月30日31958點,又再跌回今年1月22日21709點,一上一落間極之緊張刺激,但唔少人財富亦因此被轉移。

  今年第一季A股業績公布較去年第一季升幅有幾多?將影響今年第二季A股走勢;反之,今年上半年香港公司業績,要到今年8、9月才公布,正好係中國奧運期間,到時將有奧運滯後效應。

  2003年4月至07年10月,香港上牌國企升幅平均達六點七倍,或每年上升46%,上述升幅未來可持續嗎?如把港股直通車因素剔除,現水平國企股只係重返去年8月水平,唔見得特別吸引。如睇全球各地股票,低於去年8月股價者不知有幾多,國企大部分仍高於去年8月高價,不能成為「特別吸引」論據。

美面臨衰退銅價照升

  未望贏先預輸。入市時計計自己可以輸幾多,一旦輸到心目中數便止蝕離場,一旦贏錢便滋油淡定,好整以暇慢慢。但人性卻阻止你賺取最大利潤而承受最大損失。投資股票首先要學習違反人性而行,才能贏得大、輸得少。

  股市係令最多人輸錢、最少人贏錢地方,因此眾地莫企。成功投資者必須付出孤獨代價,一將功成萬骨枯,每一個成功投資者背後最少有十個失敗者。

  好多時,賺大錢較蝕大本所帶來禍害更深。最多人知例子係1997年7月前神童輝物業市場賺大錢,做人處事因此失去分寸,行為似賭徒多於投資者,最後慘敗。

  美國財政部宣布支持IMF出售980億美元黃金,共一千二百九十萬盎斯,令金價短期受壓,未能升穿1000美元,繼續徘徊。

  令人擔心事件係美國經濟面對衰退威脅下,今年銅價仍升25%,因中國仍大量購入,以及倫敦銅市場存量下降,由去年12月一百八十三千噸降至近期四十千噸。去年10月至今中國入口銅桿升幅60%,理由係受雪災影響,令中國今年銅產量減少四萬噸,加上非洲電力不足影響生產。

  印度The Economic Times報道,印度計劃成立主權基金,初期股本50億美元,估計2月29日財政預算案公布時公布,投資將集中石油、天然氣及煤資產項目。今年2月8日止印度外儲備共2910億美元,較一年前升57%,成立主權基金意味印度未來將減持美國國庫券。

  中國政府批准QDII投資日股,令日經平均指數一度重返14000點,但仍未脫離危險期。戰後東方國家經濟第一個起飛係日本,然後係亞洲四小龍,接係東南亞國家,最後起飛係中國同印度。日本由1990年起經濟一直停滯不前,日本人均收入一旦達到OECD國家水平便停滯不前。香港人收入到1997年因接近OECD國家水平亦停滯不前。東南亞國家人均收入甚至未達OECD國家水平,亦出現亞洲金融風暴。至於中國同印度,眼前景況仍算不俗;2007年股市泡沫化則令人擔心。

港人稅負輕內地人50%以上

  去年中國稅收達5.1萬億元人民幣,佔全國GDP 21%。去年美國聯邦政府稅收2.4萬億美元,佔美國GDP 18%。如以GDP計,中國稅收較美國高。今年1月1日起中國企業稅率由35%降至25%(外資企業逐步由15%上升到25%),估計今年中國政府稅收可降至只佔全國GDP 18%左右,同美國睇齊。

  香港2006╱07年度稅收1551億元,相等於2006年香港GDP 14743億元10.52%,係全球稅收佔GDP比重最低政府之一(政府仍有其他收入,例如賣地),即港人稅務負擔較內地人少50%以上,較美國人少40%以上。所以香港人唔好怨喇。

  對於2005年中國全國城鎮居民總資產,發改委估計約20.6萬億元人民幣,農民手上財富十分有限,相信加起來約27.6萬億元。中國政府手上土地國資委估計2006年年底約值50萬億元,另加十一萬九千家國有企業約值29萬億元。即中國政府手上財產係79萬億元人民幣,係民間財富三點四倍。

  美國去年底私人家庭資產73萬億美元,政府手上土地好少,國有企業更少。換言之,中國財富76%政府手中,民間只佔24%,係國富而民窮。美國財富絕大部分民間,政府極有可能資不抵債,美國情況係國窮而民富。至於香港,政府同人民皆富。

  美國人大部分富有,因此消費十分旺盛;至於中國因76%財富仍政府手中,人民富不起來(只有少數人例外),此乃內地消費佔GDP比重唔大理由。中國政府蚊年花到哪裏?答案係大部分用基建項目上。近年中國基建項目、政府辦公大樓建造得美輪美奐,造成中國投資過剩、但消費不足;反之,美國人賺錢去消費,造成貿赤擴大、消費過多。中美形成兩個極端。

沒有留言:

張貼留言