2008-02-11

鼠年策略寧可錯過


　　2月10日，周日，年初四。恭喜發財，祝大家鼠年都發財。我老曹唔係D坐處話你聽everything is OK分析員。過去幾個月投資者雖然已受驚嚇，加上上周三美國ISM非製造業指數宣布1月份已跌至41.9（12月份54.4），係1993年以來首次亦係2001年以來最低，即係話畀你知佔美國GDP 80.6％服務業2008年1月份已進入收縮期（如ISM指數低於50，代表服務業進入收縮期）。聯儲局積極減息，殊仔刺激經濟計劃上周四已獲國會批准，而且上周五G7開會，但無人保證上述方法有效。

唔止蝕亦唔好溝落

　　新春時節，我老曹亦唔想過分打擊閣下情緒，可惜令你頭腦清醒係我老曹責任，保護閣下投資免受損失，較講D好聽說話更加有用。如你去年10月冇適量地減持，鼠年就算唔打算止蝕，亦千萬不可再溝落。老鼠習慣夜間偷取閣下財富，鼠年投資策略寧可錯過，亦不能令虧損進一步擴大。請唔好嘗試捉住下跌中刀，唔好同股票談戀愛。買賣股票目的只係賺錢，即賺取差價利潤，而非同佢做人世。1997年8月起股市波幅已取代升幅，參加遊戲目的係賺錢而非投資。依家港股仍係牛熊共舞，但美股已確認熊市！熊市中投資有如逆水行舟，十分困難。1998年8月至今，行業盛衰取代整體經濟循環，如閣下從事金融業，去年花紅唔少，但從事科網行業者收入仍唔及2000年。冇一技之長中年人過去十年面對經濟壓力好大，至於製造業已接近唔存在；飲食業大部分得個捱字，因快餐業已佔去飲食業唔少市場，令本港飲食業過去十年都幾難賺錢。呢次衰退，美國次按業所受打擊最大，其次係房地產……。

　　標普2月9日宣布1月份全球股市市值損失5.2萬億美元，新興市場平均跌幅12.44％，OECD國家平均跌幅7.83％。五十二個股市中，五十個1月份下跌，其中二十五個跌幅達雙位數；土耳其跌22.7％、中國、俄羅斯、印度分別下跌21.4％、16.12％及16％；OECD國家中，德國跌13.72％、法國跌12.27％、英國跌8.85％、美國跌6.07％、日本跌4.47％。美國次級債券正產生「蝴蝶效應」，小小翅膀煽起全球資本市場滔天巨浪。

恒指降軌壓力十分大

　　恒生指數由1月22日21709點反彈，最終能否守住，成為鼠年第一個好淡爭持位。去年8月開始，美國次按問題經常成為財經報紙頭條。雖然上周道指已跌穿去年8月16日12517點，熊市去年11月已確認，但恒生指數仍去年8月17日19386點之上，仍係牛熊共舞。四十年經驗教曉我老曹只可追隨趨勢，而非預測走勢，呢次亦唔例外。1月22日係咪轉角點？分析員估計只係美股熊市反彈，而非牛市開始；如參考2000年3月至02年10月熊市表現，上述分析可信性甚高。每次牛市誕生都有新領袖，新牛市領袖一定唔係前牛市領袖，例如2002年10月並非由科網股領導上升道理一樣，即下一次牛市領袖股一定唔係金融股。新領袖未出現前，牛市無法誕生。如你係股市淡友，恒指21709點前要小心，因為反彈市可以好勁；如你今年10月前已全部資金入市，便更加要小心，依家市況生存需要技巧，調節你對前景展望係咪需要？

　　仲記得李佛摩著名句子嗎？The right side！如果你只係睇好，仍有唔少現金在手，請keep your powder dry並耐心等候。鼠年展望無論升跌，不但幅度大，而且十分急，無論好友淡友，一不留神損失會好大。鼠年應學習老鼠機靈及小心謹慎，唔好忘記一旦股價下跌10％至15％便行使止蝕。唔好溝淡，唔係話股價唔會反彈，而係通常溝淡結果係愈溝愈淡。如你手上現金所佔百分比少於投資組合30％，必須想辦法增加現金百分比。技術上睇，去年11月開始下降軌壓力仍十分大【圖】，未來數星期恒指如無法重返26000點以上，唔排除港股熊市獲確認，上述機會更高達80％；如獲確認，咁去年8月17日低點19380點便有機會失守，當然仍有20％機會上述可能性唔會出現。

　　波羅的海指數上周五回落到6002點，較2007年11月13日高點回落46％，反映來自澳洲及巴西鐵礦砂及來自南非及澳洲煤出口都在減少，其中一個因素係美國經濟快速放緩，中國春節加上大風雪令航運需求大減。據Clarksons plc（全球最大船經紀公司）估計，一旦鐵礦砂談判有結果及中國天氣好轉，乾貨船租金將再回升。去年海運鐵礦砂共七億三千五百萬公噸，較2006年六億八千五百萬公噸上升7.3％，刺激乾貨輪租金去年大升；並認為去年11月13日至今回落只係技術調整，建議吸納航運股云。新一輪鐵礦砂價格談判漸漸演變成三大私人企業與中國國家資本企業之間拉鋸戰，礦務公司要求加價70％，中國國企只願多付30％，最後誰佔上風？近日中國礦業公司已出手阻止必和必拓收購力拓，不然三大企業變成兩大，談判對手實力更強。

　　國家資本企業？上述係外國用形容中國國企，即企業由官員領導，但又以資本主義方式運行。兩者似乎矛盾（例如股東利益同國家利益不一致時，國企如何處理？），上述資本主義方式與盎格魯撒克遜（Anglo-Saxon）發展出來資本主義模式（純追求利潤）唔同。家國家資本主義模式企業唔少新興國家又運行得幾好，例如新加坡、中國、俄羅斯，以及唔少東南亞及拉丁美洲。國家資本主義特色係以權力去保障利潤，十分依賴國家提供廉價資源、勞動力及土地，因此可以低價競爭國際市場佔有率（甚至壟斷國內市場）。新加坡模式國家資本主義更發展出主權基金，過去投資成績不俗，依家唔少新興工業國家亦紛紛仿效，將國家大量收支盈餘運用，而非單純購買美國政府債券（或其他國家政府債券）。

　　未來國家資本企業及主權基金金融市場佔十分重要地位，不但直接同OECD國家私人大企業競爭，甚至入股OECD國家私人大企業，成為舉足輕重股東；反之，OECD國家經濟受房地產影響而形成次按危機，一個接一個出問題，開始步入日式衰退（日式衰退證明減息只能引起股市反彈，不能改變經濟大方向，恐怕同樣情況將美國及英國出現）。

歐洲人面對生活必需品漲價

　　花旗估計，2008至09年國際煤價可由100美元一噸升至200美元一噸，因為澳洲昆士蘭水災、中國電廠缺乏電煤及南非通脹壓力上升，皆可令發電用煤價上升。直到2010年澳洲港口及鐵路產能擴大、瓶頸地帶消除後，煤價才會停止上升，因此建議吸納煤炭股。

　　上周四英倫銀行宣布減息四分一厘，至5.25厘，但英股當天下跌151點，英鎊跌至1.94美元。上周五金價進一步上升至923美元，因未宣布減息歐羅區亦擔心衰退，下一步將係歐羅減息。令人生氣事係雖然歐羅兌美元大幅升值，但歐洲麵包仍加價12％、牛油升45％、牛奶升25％，理由係歐羅供應量大升。歐洲人亦面對生活必需品漲價而物業及股票卻跌價煩惱。

　　去年8月前隆巴特利率（倫敦銀行同業拆息利率）係5厘，三A級貸款者只需付5.0384厘便可借到錢。各國央行大幅減息後，隆巴特利率係3.1厘，回落接近2厘，但三A級貸款者仍須付4.99厘才可借到錢！換言之，經過六個月央行大幅減息後，三A級企業借錢成本接近不變。垃圾債券更慘，半年前係隆巴特利率加1.45厘（即6.45厘），依家係隆巴特利率加13厘（即16厘），由此可見信貸市場惡化程度。央行可以將利率降至接近零（例如日本），但仍無法改善信貸情況。1932年聯儲局亦曾將利率降至1厘，仍然無法阻止美國大蕭條出現。

美國人走向節儉影響廣泛

　　愈來愈多證據顯示美國經濟難逃衰退命運。隨信貸市場meltdown，ISM數據告訴大家未來美國就業市場將萎縮。以過去經驗，失業率一旦上升，上升周期可長達八點八個月才穩定下來，即美國失業率高峰期2008年第三季，未來一段日子各位可睇到美國失業率不斷惡化，情況較2001年次更嚴重，相信美國失業率可上升至6％。12月份信用卡貸款過六十天未償還者佔總貸款數字7.6％，較11月上升13.7％，睇信用卡貸款惡化情況正浮現，RBC Cash Index顯示美國消費信心跌至2002年以來最低。踏入2008年美國人開始節儉，呢段節儉日子好長，影響廣泛，所有依賴美國消費者支持行業皆面對壓力。一旦美國人增加儲蓄，連中國經濟亦難免受影響。沃爾瑪1月份同店銷售只升0.5％，係五年內最細升幅。美斯百貨宣布裁減二千三百個職位，Home Depot總部減少五百個職位。美國國際購物中心協會估計，今年將有五千七百七十個零售點結業，較去年多25％。Ann Taylor宣布計劃結束一百一十七間分店及裁員一百八十人。Talbot's宣布減少一百間分店。今年美國零售業已風聲鶴唳，其中最差係女性零售店Chico's FAS，同店銷售減少22％。

　　美國房地產混亂局面，令全球銀行面對不履行負債合約今年1月急升1.1％，穆估計今年年底可上升至4.6％。至於債券更上升至10.5％，係2002年以來最高，2002年年底垃圾債券息率較政府債券高出7.04厘，依家較政府債券息率高出11.4厘。評級公司仍不斷取消各公司三A評級，尤其係CDO。

　　上周四美國國會已批准1680億美元刺激經濟計劃，一億三千萬個家庭將收到600美元（個人）至1200美元（夫婦）支票，即使少於3000美元者亦可收到300美元（單身）至600美元（夫婦）支票、甚至過去從未交稅。另外，批准房利美及房貸美增加發行債券上限，以便有能力提供更多貸款。上述計劃作用有幾大，短期內可見到。

衰退係經濟循環一部分

　　畢非德對美國經濟十分樂觀。佢2月9日接受The National Post訪問時話，美國經濟曾經歷過較家形勢更差局面，最終世界係更好，因此唔使過分悲觀。銀行股短期可能唔係理想投資項目，但最終一定能克服次按危機。佢唔認為政府應提供刺激經濟計劃，佢認為不應由納稅人承擔銀行不正當貸款行為，就讓外資入股吧！美國人每天消費較收入大20億美元，必須付點東西畀外資，佢地入股後反而成為美國經濟支持者。畢非德話，1980年短期利率見21厘，曾引發1981至82年經濟衰退，1983年唔係又再好景？佢認為，衰退並唔可怕，因為係經濟循環一部分。

　　何時才係入貨時機？2003年3月英國股票息率首次高出債券息率，係1950年代至2003年首次，事後證明係買入機會；反之，日經平均指數股票息率已高出日圓債券息率，卻未見引發牛市。如根據分析員估計，今年美國企業純利仍可上升13％，未來O只有十四倍，將出現股票息率高出債券息率情況。但大摩Gerald Minack指出，過去二十年美國分析員從來冇估計過未來一年純利會回落。花旗認為，美國衰退步伐愈來愈接近，相信今年更多公司面對downgrade，但分析界仍估計今年企業純利可上升13％。過去歷史證明，美國衰退期，分析界估計過分樂觀約30％。七十年代美國出現衰退，亞太區股市（唔包括日本）跌幅較美股大；八十年代美國衰退、亞太區股市跌幅仍較美股大，只係幅度冇七十年代咁大；九十年代美國經濟軟陸，亞太區股市跌幅略大於美國。2000年美國經濟軟陸，亞太區股市跌幅才少於美國股市。2008年呢次又點？法興分析員James Montier認為，如2008年係熊市，未來美股O係二十一倍，而非十四倍；1950至2007年美股平均O係十六倍，冇數據支持依家熊市見底。

　　股票市場係一處人人有機會賺錢（唔係派錢）地方，如你唔精明，極可能輸清光。大部分innovations都以失敗收場，只有小部分成功。股票市場內往往富者更富、窮者愈窮，社會漸走向兩極化，冇人能控制其進程，亦冇人能預測其結果。物競天擇，適者生存。八十年代首先係中國，其後係其他國家加入環球經濟，政府政策係鼓勵出口、不鼓勵消費，為環球提供大量廉價勞動力，令產品生產成本下降，賺取大量外後又用作購買美國政府債券，為美國提供大量廉價資金。兩個因素加起來，令八十年代美國CPI升幅及利率下降，刺激資產價格（例如股票及房地產價格上升），引發1982年第四季開始美國股市大牛市。美國人因股票升值、物業升值而增加消費，吸納更多外國貨，the party goes on。1987年初雪茄伏離開聯儲局後，格蛇多次利用減息去阻止經濟衰退出現（變成軟陸），到貝南奇接手後，上述魔法唔再生效，自然力量最終戰勝聯儲局，重新控制經濟。People get what they deserve, not what they want！努力工作、儲蓄、有創見及肯接受挑戰者，最終必富起來；反之，消費再消費者，最終必付出代價。過去二十五年美國聯儲局主席都希望The party goes on，而不斷提供更多資金、更大信貸額畀消費者，直到信貸泡沫爆破、資產升值遊戲無法再玩落去為止。

　　2000至2002年10月，標普五百指數曾下跌50％、納指下跌78％，到2003年局面才扭轉。呢次泡沫較2000年個更大，何時才扭轉？難估計。更何況今年殊仔係跛腳鴨，如民主黨總統大選獲勝，更加會趁機會扶助低收入階層、打擊高收入者，不利股市。過去樓價係美國家庭二點八年收入，依家係三點九年（大城市更高達六年收入，1982年係一點二年）；睇呢段調整期十分長。