2008年2月22日 星期五

2008-02-21

央行注水浴缸去水

  2月20日,周三。恒生指數跌532.59,收23590.58;成交897.47億元。2月期指跌550點,收23630點。華爾街上市金融機構又面對新一輪撥備,就係ARS(Auction-Rate-Securities)最近拍賣以低位成交,令呢個2000億美元市值產品又須減值。

  法國最大零售銀行Credit Agricole(法國第三大市值銀行)宣布受美國次按危機影響,可能要3月5日再為去年撥備6.5億到9億歐羅(公司已公布去年撥備25億歐羅或37億美元)。此乃繼瑞信公布為手上債券額外撥備28.5億美元後另一間歐洲大銀行。

  美亞證券旗下兩隻對沖基金面對投資者提出起訴,要求美亞證券賠償損失。兩大基金截至去年7月止損失16億美元,投資者認為係美亞證券疏忽所造成。

歐銀行開始反映次按損傷

  英國Alliance & Leicester Plc股價跌至1997年以來最低,因下半年純利減少67%,股價一度下跌19%(今年已回落18%);另一隻Bradford & Bingley亦宣布,2007年呆壞賬增加三倍以上。睇歐洲銀行開始告訴大家2007年次按危機所造成損傷。

  日本最大銀行三菱UFJ股價下跌4.4%,另一間三井住友跌5.7%,睇落日本銀行亦踏入2007年次按危機帶來虧損公布期;今天日經平均指數更大跌3.25%。

  香港方面,今天中聯通(762)跌4.1%、中移動(941)跌2.7%、網通(906)跌3%、中國電信(728)跌5.2%,因法國巴黎銀行將中國電訊業評級下調由買入降為持有。信置(083)跌5%,恒隆地產(101)跌4.9%,應屬好消息出貨。中糧控股(606)升4.5%,見5.35元;中國食品(506)則跌6.4%,成5.13元;中石化(386)跌4.8%,成8.72元;中石油(857)跌2.2%,見11.7元。

  滬深A股跌2.23%。江西銅漲停板,浦發銀行則大跌5.11元,收45.98元,工商銀行跌3.2%、招商銀行跌5.7%、民生銀行跌4%、中海發展跌3.7%、中國遠洋跌4.2%……。

  人民幣價第五天高收。

  今年1月份中國鋼鐵淨出口較12月減少22%(較去年1月份減少19%),只有二百七十七萬噸,係2006年6月最低,部分理由係大風雪所影響;再加上4月1日起鐵礦石加價65%,日後中國鋼鐵產品對全球鋼鐵供求影響力大減,未來將以服務中國本土為主。從呢點睇,鋼鐵股前景未到可以睇好日子。

群眾常在趨勢改變時犯錯

  最近香港中區甲級寫字樓有一萬三千二百一十三方呎以2.9億元易手,平均每呎22000元,較今年2月12日美國銀行大廈每呎20923元高6%,較去年9月AIG大廈每呎19256元上升14%。

  冠君產業信託(2778)報告,花旗銀行廣場寫字樓每呎租金由去年底100元升到近日110元,遮打大廈更高達185元一呎。瑞銀認為,上述形勢將有利太古A(019)及九倉(004)。

  過去常常話「群眾常常犯錯」。經我老曹多年了解,呢句話應該改為「在趨勢發展期,群眾是對的;但在趨勢改變時,群眾是錯的。」例如去年10月趨勢開始改變時,群眾卻最樂觀(2003年4月沙士時,群眾卻最為悲觀)。

買股唔係睇息率

  1999年加息期,高科技股係抗加息項目。但踏入去年9月減息期,蘋果、亞瑪遜及Google表現皆令人失望。證明高科技股面對依家糧食及能源漲價、資產跌價潮中並冇抗衰退能力。今年何處尋避難所?2002年起弱勢美元為全球製造過量資金(各國銀行為吸收美元,被迫加入印刷鈔票行列),流動性過剩推動樓價及股價上升。去年8月次按危機爆發,雖然各國聯手注入資金,但注入資金速度唔及信貸收縮速度來得快,去年11月起出現全球信貸緊縮(credit crunch),令去年11月起美元止跌(雖然未回升)。各國央行仍在增加貨幣供應,但信貸緊縮力量更大(呢方面可參考1990至2003年日本情況)。舉個例子,各位如用浴缸沖涼,開水喉但同時拔掉個塞,若果流入浴缸水唔及流走水,浴缸內水位就會不斷下降。家金融市場就係咁情況,2003至07年經濟繁榮係建基於流動性過剩,隨次按危機爆發,一切都將倒轉,包括美元止跌回升,股市反覆向下。Never argue with the market(有智慧不如趁勢)。

  另一爭論點係十年期債券3.6厘、標普五百指數平均息率2厘多,可提供支持。股息論早1971年破產,估唔到2008年今天仍可殭屍復活!1971年我老曹《明報晚報》時代曾同當年《華僑日報》著名評論家打筆戰,爭拗點係「買股票目的係賺價還是收息」?老一代人仍停留買股收息思想因此推介當年電車公司(當年係上市公司)、會德豐(唔係今天間,而係由馬登出任主席、後來被九倉收購間,因為有6厘息)。我老曹認為買股票目的係賺價,因而提倡「O論」,否決「股息論」,推介新上市公司如長實(001)、新地(016)等,因睇好未來房地產業務市道。到今天人人只講O,已好少人講息率,證明買股票目的係賺價唔係收息(買債券目的才係收息)估唔到老掉大牙謬論,今天仍可死灰復燃。股息靠唔住,因為企業純利可升可跌(只有公用股例外)。1987年股災之後,美股只有2厘息,十年期債券10厘息,你話買乜?到2007年望番轉頭已有答案,就係股票大大跑贏債券!只要前景好,我老曹唔怕五年唔派息公司股份(如該公司每年純利升幅30%以上);如果前景差,即使有6厘息股份都唔買,因為明年純利跌50%後減息率50%,便只有3厘息,後年冇純利,公司隨時宣布唔派息!歷史證明息率唔重要,PEG(純利增長率)才最重要。最近例子係美國銀行去年購入Countrywide Financial,結果不但冇息收,最後更要全部收購,承擔起Countrywide Financial所有風險。

  股票市場常有謬論,例如留意大戶動態。一般人以為大戶贏梗!瑞銀、瑞信、花旗、大摩係咪超級大戶?去年成績又點?投資市場冇大戶散戶之分,只有smart money與stupid money,醒目資金永遠贏愚蠢資金(無論你係大戶或散戶)。如果你仍信大戶動態,只證明你stupid!

敏感三角形之戰

  冇人能預知將來,利用分析或可猜測到未來三個月情況(超過三個月無人能知,呢方面唔少大學已做唔少實驗證明)。美股熊市2007年已開始,相信唔會三個月內結束。港股熊市仍未確認,牛熊仍在爭持中。

  去年3月估計標普五百2007年每股獲利92.3美元,去年年底已改為83.98美元,今年年初改為79.2美元,由此可見預測幾難,而且一旦經濟轉差,企業純利消失速度係幾咁快。上述已係美國五百大企業情況,至於中小企抗衰退能力更差,部分可能捱唔過去而破產。

  再睇睇納指正在形成敏感三角形;三角形走勢出現代表好淡爭持。第二次世界大戰,美日雙方有兩場戰爭打得好精彩,第一場係偷襲珍珠港,日本迅速攻勢令美國太平洋海軍實力大減,美國無法威脅日本軍方亞太區擴張。另一場係中途島,日本計劃重演一次偷襲,只要將美國中途島海軍基地摧毀,美國就繼續無法威脅日本亞洲區軍隊。但呢場仗日本唔成功(因消息外洩,美國早有準備),同時美國飛機炸沉日本四艘航母,日本唔少優秀飛機師葬身大海,從此日本失去空中掩護,美國隨時可以起機轟炸東京!恒指情況亦一樣,21700至25700點之間好淡爭持……。呢個三角形走勢結果係偷襲珍珠港事件抑或係是中途島一役?從過去走勢睇,如三角形底部出現,應係「偷襲珍珠港」(即好友勝利);反之,如從高位回落75%,則係「中途島戰役」(即淡友獲勝)。點樣將戰爭策略用於投資方面?3月份出版《論戰》將有更詳細解釋,到時希望大家多多支持!

英樓市可能較美國更脆弱

  後市展望,呢次由美國房地產回落所引發次按危機,造成美股熊市恐怕日子唔會短,整個熊市過程中將不斷出現中期反彈(請參考2月6日刊出日股走勢)。聯儲局已盡最大努力去reflate房地產及股市,市場反應唔係房地產及股市上升,有D嚇親債券投資者,擔心出現短息跌、長息升現象(因擔心通脹率上升)。美國已有二千萬個家庭進入負資產期,雖然唔少仍未斷供,情況幾令人擔憂,好多問題仍未浮面,熊市又點能了結?!

  去年7月美國股票孖展金額3810億美元,去年12月已降至600億美元,即大量trader減倉。trader係春江鴨,佢地大量平倉,代表2008年股市好難炒。美國佔全球三分一經濟活動,有邊D國家或地區可以同美國兩不相干(decoupled只係廢話)?你信唔信美股熊市,而港股仲係牛市?

  由樓價回落到消費減少需時兩年。2006年8月美國樓價回落到今年8月,美國消費才會大幅下降。熊市中博反彈低回報高風險,非智者所為。Keep your feet wet仍然需要,因此只宜動用30%資本做投資,因為係熊市。

  畢非德認為,投資成功只需極之普通智慧,以及超乎一般人情緒控制。請好好控制閣下情緒。

  根據《金融時報》研究結果,1899至1985年投資英國股票扣除通脹後係蝕本!因為英國擴張期1900年見頂,美國GDP1900年首次超過英國。至於英鎊購買力1899年至今回落99.3%,但1985年1英鎊兌1美元;二十二年後1英鎊兌2美元,而且英國股市由1985年回升。上述係英國「百年歷史」。如果畢非德正確,唔通2000年美國經濟已見頂,2100年美國係咪會變成今天英國?美元購買力下降99%?二十世紀世界經濟中心由英國移到美國;二十一世紀世界經濟中心會否由美國東移?到2100年中國GDP會否超過美國,成為世界經濟中心?未來日子會否見到1美元兌1元人民幣?一如1900年英國人又點會相信未來世界將以美國為核心一樣,1990年豐銀行居然可以收購英國米特蘭銀行!人們就係唔明白時移世易道理。1980年美國人發現自己收入停滯不前,但樓價卻升完可以再升,因此將層樓按去消費。2007年美國人發現不但收入仍然停滯不前,連樓價亦唔再上升,再不能透過加按去改善生活,你說怎麼辦?1月份美國消費上升理由係聖誕節唔少家庭收到gift cards做聖誕禮物,佢地用gift cards購買日用品而非禮物,令1月份消費上升,恐怕2月份消費又再急跌。七十年代開始,美國製造業工人發現工序流失;2001年唔少電腦科學系畢業生發現無法搵到工作,理由係電腦公司將工序搬到印度,2000年起美國連高科技工作亦面對流失。2006年美國GDP 80%來自服務業,2007年起不但收入扣除通脹冇升過,連樓價亦停止上升,信貸市場2008年起更急速萎縮;加上美國步入人口老化期,過去二十五年利用資產升值製造出來消費上升期,開始面對退潮。

  格蛇認為英國房地產可能較美國更脆弱,因英國有更多利率可變按揭貸款。英國機構估計,去年英國有一萬九千個家庭因無法償還貸款而被銀行收樓,今年將增至四萬五千個;不過,英國冇次按貸款,相信影響較美國細。倫敦政治經濟學院教授John Van Reenen估計,未來英國樓價可下跌20%。英國最大房產專業網站Rightmove公布,去年10月平均報價24.16萬英鎊,今年1月23.04萬英鎊,跌幅近5%。真實情況係唔同地區漲跌互異,不能一概而論。

沒有留言:

張貼留言