2008-02-25

小心第二隻鞋

　　2月24日，周日。美股出現第二個星期上升，埃克森美孚石油與雪佛龍領導標普五百股份中，三十六隻能源股上升，因2月20日油價見101.32美元。AIG、大摩等亦因傳出挽救Ambac Financial計劃而上升，令標普五百指數上周升0.2％、道指升0.3％，但納指仍跌0.8％。周五尾市謠傳挽救Ambac，令道指一小時內升243點，十分戲劇化；Ambac收市升4.8％，見10.71美元。

熊市策略輸少當贏

　　傳八大銀行包括花旗、瑞銀、皇家蘇格蘭銀行、柏克萊、BNP百利大、Dresdner銀行、Wachovia集團等計劃挽救Ambac，該股股價已由去年高回落88％，上述消息令Ambac上周五收市前回升，美股上周五尾市亦止跌回升。後市如何？相信走唔出上落市框框，因滯脹恐懼愈來愈明顯，短期內唔似有能力孕育另一牛市。經今年1月22日至今反彈後，擔心「第二隻鞋」隨時亦跌下來。至今為止，能源股同礦務股抗跌力仍不俗，3月18日減息半厘後如美國經濟繼續放緩，擔心另一隻跌落鞋可能就係能源股同礦務股（跌市弱勢股先行，最強勢股往往最後才跌）。　　美元上周跌1％，見1.4827兌1歐羅；兌日圓回落0.6％，見107.17日圓；澳元表現強勁，見92.61美仙；紐元亦見81美仙。

　　2003至07年相信讀者投資成績應該不俗，至於升幅幾多？便睇每個人承擔風險能力及有冇紀律而定。但去年10月開始情況逆轉，以控制風險為主。過去四個月如投資虧損少於15％，成績已經了不起。由此可見有智慧不如趁勢道理。在反覆向上期，大部分人贏多輸少；在反覆回落期，便輸少當贏。記得香大俠常提「扭秧歌」（六十年代大陸常跳舞），舞步係三前兩後。投資亦一樣，大部分人成績係三前兩後，如能改為三前一後已經很了不起。各位應學習在升市中盡量賺多D、在跌市中盡量蝕少D。Minimize your loses乃熊市策略，直到大趨勢改變為止。

　　指數上一旦出現三角形走勢，在上升趨勢中係整固，在下降趨勢中係派發，我老曹相信呢個三角形係派發大於整固；投資策略係Better to climb hills than to bottom-fish（溝上唔溝落）。只買50天移動平均線在250天線之上股份，唔買50天線低於250天線股份。美股已係50天線低於200天線（香港情況好D），即依家係淡友當道，慘無人道。在淡市中搵淡市之花只宜小注（考考自己眼光），不宜大大地賭一鋪。雖然好多股份已被beaten或者battered，價錢上已到達極之抵買水平（豐評論）。記得十幾年前我老曹寫過，世上灰姑娘好多，但白馬王子難求。世上有幾多個灰姑娘可飛上枝頭變鳳凰？有幾多隻抵買股份日後真係帶來巨大財富？答案係極少。在熊市中保本第一、獲利第二。

　　經濟增長高峰去年已出現，CPI高峰滯後，到今年才出現。改革開放以來，中國GDP曾出現兩次連續五年保持兩位數增長。第一次係1992到96年，1997年亞洲金融風暴後出現大調整。第二次係2003到07年，2008年會否因美國次按危機而進入調整期？

　　鼠年元宵節，上海睇燈人少、睇樓人多，皆因萬科殺價，與上海綠地齊齊減價售樓，折扣額更高達10％。萬科最先在廣州、深圳打破「房價永遠牛市」謬論。呢回征戰上海，在元宵佳節「打折」出售旗下樓盤，減幅由5％到10％，未來追求規模效益而非漲價成為萬科盈利新邏輯。鼠年已唔似豬年，難以不斷提價去追求利潤。中原地產分析員表示，依家上海樓市處於敏感期，如大型開發商利用降價促銷，好可能會引發較大規模降價潮，因為上海樓市已滯銷好一段日子。

　　去年9月28日人行推出「第二套住房首付40％」後，深圳樓市成交量大幅下降，踏入第四季更出現殺價風，大量炒家被套住。去年11月14日擁有一百五十多間二手房經紀行深圳中天置業老闆失蹤。12月9日萬科在廣州康玉路萬科金色康苑以14000元一平方米出售，較周邊樓盤17000元低，兩小時內一百五十套單位售罄，殺價風吹到廣州；今年2月殺價風吹到上海……，睇內地房價已出現「拐點」。

次按訴訟困擾銀行及券商

　　樓價回落、通脹率上升，甚至製造業亦放緩，失業率開始回升，消費進入萎縮期十分正常。唔似供樓利息，信用卡利息係不可報稅，隨次按危機出現，過分寬鬆信貸環境迅速改變，鐘擺開始向另一方向擺動。本周MBIA及Ambac Financial能否保持三A評級？其實並唔重要，因為佢地擔保結構性金融證券隨美國樓價回落，其虧損最終令佢地三A地位不保，問題只在遲早。

　　周三及周四貝南奇面對國會議員質詢，問佢通脹率上升下點解減息？相信場面都幾尷尬（標普公司分析員Sam Stovall認為，美國批發物價升幅已達6.9％）。美國周四公布1月份新屋銷售數字，相信將進一步惡化。Stovall估計，今年第一季美國GDP只升0.8％，第二季負0.7％，即美國經濟第二季開始正步入衰退期。

　　本周四美國將公布去年第四季修訂GDP增長率，估計為0.6％（第三季係3.9％，第二季係4.9％）。今年第一季GDP出現負增長機會好大，將係2001年第三季出現負增長以來另一次。

　　殊仔在2000年獲選後，同格蛇配合2001年拋出經濟刺激方案兼減息，2002年起壓低美元價，令美股自2002年10月起止跌回升。呢次殊仔卸任在即，與貝南奇合作推出PPT（Plunge Protection Team）方案另加減息，能否重演2001年情況？不過，次按危機似乎未見底，估計美林今年第一季仍須撥備150億美元，花旗仍須撥備180億美元；去年第四季並非最惡劣日子。如樓價今年再回落多少，新撥備勢不可免。去年次按所引起民事訴訟共二百七十八宗（儲蓄及貸款危機引發訴訟共五百五十九宗，即今年次按訴訟將進一步增加）。訴訟本身已可令各大銀行及大證券公司今年受到極大困擾，何況唔少可能真係告得入而須作賠償。

　　美國，借錢係非常普遍現象，好少美國人係全資買樓。1997年美國貸款公司漫天廣告吸引美國人買樓，例如「你想過中產階級生活嗎？買房子吧！」、「積蓄唔夠，貸款吧！」、「收入不夠，搵ＸＸ貸款公司啦！」、「冇首期？我地提供『零』首付」、「利息太高？首兩年只收3厘息」、「仍然供唔起？首二十四個月只須支付利息免供」。有好多買家認為，兩年後可能已升職，即使兩年後仍未升職亦唔使驚，因兩年後樓價已升值，仍可大賺一筆。1997年起美國房地產表現亦的確如此，直到2006年7月樓價唔再上升，但美國人仍繼續因上述諗法而買樓……。到2007年8月，上述希望漸漸幻滅，樓價不升反跌7％，即使聯儲局去年9月開始減息，樓價進一步回落，家已較2006年7月低10％。另一方面，次按危機影響下，金融機構開始裁員，唔好話升職，唔少連職位也不保，上述情況短期內會改變咩？

美消費者改變亂花錢習慣

　　美國政府1680億美元刺激經濟方案，令美國一億三千萬個家庭每個可收到600至1200美元支票，能否扭轉美國經濟方向？華爾頓大學財務教授Nicholas S. Souleles研究2001年退稅計劃，發現可起到鼓勵消費作用。2001年計劃包括永久性減稅，唔似呢次只向低中收入家庭提供一次過資助。華爾頓大學另一教授Jeremy Siegel擔心上述刺激計劃雖然會令第三季消費回升，卻反而刺激通脹率進一步上升，對債市不利。華爾頓大學另一位教授Richard Martson認為，2008年經濟問題同2001年唔同，前者係科網股泡沫爆破，後者係次按危機，不能用刺激經濟方案解決。美國會否出現官式衰退（即連續兩季GDP負增長）仍然木宰羊，但可以肯定美國經濟前景都幾濕滯。最近密歇根大學信心指數已跌至1992年初以來最低，即使將來未必出現連續兩季GDP負增長，亦應擔心好好淡淡糾纏不清局面出現。Moody's Economy.Com主要分析員Mark Zandi認為，今年1月美國經濟已開始收縮，估計回落三至六個月，確認衰退機會十分大。由於環球經濟仍好景，令衰退好溫和，但擔心十分漫長。最近由TrueCredit.Com向三千零三十六名成年人所作調查，42％話收回政府支票後將用作減債，20％用作儲蓄，16％只買有需要用品，只有5％用作揮霍。睇美國人亂花錢習慣正漸漸改變。

經濟師料美衰退又長又大鑊

　　2001年7月至9月美國人十星期內收到380億美元支票，估計其中20％至40％用作消費。2001年退稅計劃令第三季非耐用品消費上升2.9％，第四季再升2.1％，2001年第四季美國經濟結束放緩期。呢次美國能否在2008年第三季結束放緩期？今年5月呢張支票開始寄出對第二季及第三季消費有一定支持。1974年衰退出現、1975年3月退稅計劃令經濟迅速復甦，同時令通脹率亦開始回升。不過，Zandi認為，上述擔心係多餘，他反而擔心2008及09年經濟糾纏不清，既非衰退又非復甦。

　　前列根總統Council of Economic Advisers主席Martin Feldstein認為，有證據證明衰退去年12月或今年1月已開始。同官方意見唔同，呢位哈佛大學經濟學家認為，今次衰退極可能又長又大鑊，較過去幾次更嚴重；不似1990至91年或2001年只有八個月，甚至超過1981至82年（次超過十六個月）。因為過去衰退係聯儲局壓抑通脹結果，令實質利率高企，經濟便放緩；一旦實質利率回落，衰退便結束。呢次聯儲局早在2006年6月已停止加息，2006及07年實質利率從未超過3厘，並非銀根抽緊而引發衰退，而係地產泡沫爆破。因此，聯儲局不能透過減息去阻止衰退出現，因為成因係信貸市場癱瘓、信貸市場信心崩潰，令銀行唔敢再借錢出街。債券市場、對沖基金、保險公司及互惠基金皆面對萎縮；證券化、LBO、信貸保險皆萎縮情況下，減息本身不能令信心恢復。結構性改變已開始，由消費帶動經濟增長期結束，重返由投資、努力工作及出口建立財富期。

　　六、七十年代美國人儲蓄率接近10％（1974年最高曾見15％），其後逐步回落，2005年最低曾見-3％。近期回升多少，2007年係1％，即大部分美國人仍然冇儲蓄，尤其係擁有物業者。在過去日子，眼見樓價不斷上升，儲蓄率最低曾見-13％，依家係-7％，上述先至係最令人心驚地方。過去美國樓價回落一般可跌25至30％，即將來美國樓價再跌15％亦十分正常，負財富效應加上唔少人負儲蓄率，而美國GDP 80％來自消費，唔好話要美國人儲蓄率重返六、七十年代水平，甚至重返較合理水平例如3-5％一年，已可令美國未來GDP增長率只有1％至2％並維持好多年，情況類似九十年代日本。

外勞唔返珠三角復工打擊港商

　　1908年英國農地45英鎊一公頃，今天約4500英鎊，上升一百倍。2008年一盎斯黃金值475英鎊，係1908年一百二十倍，即金價升幅大於英國農地。未來十二個月至十八個月英國農地仍可上升（因農產品看漲），沙地阿拉伯資金亦在美國購買農地。反觀去年英國北岩銀行（Northern Rock）市值53億英鎊，上周五只值3.75億英鎊，跌93％，金融機構市值變化之大可見一斑。當然唔係間間都係北岩銀行，但去年跌幅50％或以上銀行股卻比比皆是。今年新發行衍生產品較去年同期減少97％，衍生產品市場迅速萎縮，怪唔得大證券行股價跌幅咁大。如金融市場萎縮，英美樓價又點樣上升？樓價上升理由主要來自信貸膨脹。

　　衰退與擴張係好自然現象，本來唔使怕。呢次衰退出現，係流動性過剩結束結果，只係依家發生信貸危機，令未來復甦較困難，因而延長衰退期。

　　滯脹期（即經濟同時出現通脹及衰退），價格上升因供應不足（而非需求旺盛），經濟衰退令薪金無法上升，導致消費力下降，令佔美國GDP 80％消費動力消失。美元價下跌亦令購買力下降，令成本推動通脹更難解決。

　　上述問題將繼續困擾今年美國經濟。你信唔信只憑減幾次息便可解決？

　　香港中華廠商聯合會會長尹德勝估計，港商在珠三角營運約七萬間廠房中，接近一萬間將今年內倒閉，佔港商在區內廠房15％。低附加值產業如鞋、玩具、製衣、電子廠等珠三角蜜月期已過；去年中國加工貿易進出口共9860.5億美元，較2006年上升18.5％，低於中國總出口5個百分點；佔去年總出口值45.4％，較2006年減1.8個百分點，相信今年跌幅更大。過去美國經濟增長率每放緩1％，中國出口增速就放緩6％，加上近年中國限制漸多，令輸美服裝增長由2005年66.09％，降至2006年只有18.8％，到2007年更降至15.26％，估計2008年只升10％。元宵節後，外勞重返珠江三角復工人數只及往年一半，可能因雪災而延遲返回珠三角，不過今年復活節貨出口已大受影響，如大量外勞決定唔返珠三角，事態可以好嚴重。

　　中小企業平均利潤只有15％，但中小企貸款利率（在內地）已升至9.7％，加上除利率外有唔少額外成本，即貸款成本約14％。2008年誰敢借錢投資？中小企總產值佔中國工業總產值60％；中小企業總利潤佔全國工業總利潤40％；中小企業出口佔中國總出口60％，並提供75％城鎮就業機會。依家中小企面對外憂內患，今年中小企業前景如何？如中小企業走下坡，內地房地產今年價格仍可上升咩？

　　今年食物價上升20％，油價已見100美元，恒指自去年11月起跌幅超過30％。好彩香港樓價仍在上升，但到底係滯後效應抑或抗跌力強？今年第二季才知道。