2008-02-18

諗要似隻熊

　　2月17曰，周日。美國銀行首席市場策略師約瑟夫．昆蘭估計，明年10月後三個月內，全球資本總額將下降14.7％，約失去7.7萬億美元總市值，較前幾次危機爆發後三個月損失數字更大。長期資本管理危機，全球損失為13.2％；1987年10月股災，損失為9.8％；即係話，呢次損失較2001年「九．一一慘劇」、1997年亞洲金融風暴及94年墨西哥披索危機仲要大，依家仲未知呢場股市浩劫係咪已結束。上周美元又再回落，因數據令人失望。美元兌歐羅回落1.2％，見1.4686美元；但兌日圓升值0.5％，見107.82日圓，因日本央行揚言保持利率不變。芝加哥利率期貨市場中，有68％估計3月18日減息半厘，其餘32％估計減四分三厘。由去年9月18日首次減息至今，美元兌歐羅已跌5％，再減息會否令美元兌歐羅創新低（即1.49美元兌1歐羅失守？）。不過，分析界認為美元價去年11月已見底，但無力回升。

地產分類指數同樓價背馳

　　21世紀係廉價石油結束期、美元雄霸全球結束期，以及中國、印度重新成為經濟新勢力期……一如1900年美國冒起期一樣。上述三大趨勢將支配人類未來一百年經濟發展，一如1900年起石油工業支配全球經濟道理一樣。未來能源將多樣化，例如風力、太陽能、地熱及生物能源等漸漸冒起，唔再由石油及煤專美。貨幣市場亦由一元化返回多元化，經濟體系分成多個體系，唔再係美國打噴嚏全球感冒。股市方面，牛熊市漸唔重要，改為唔同行業盛衰。未來日子，美國及歐洲經濟受房地產價格回落引發次按危機拖累，加上高科技項目因2000年見頂後一直未能再創新高；反之，資源股同能源股自2000年起反覆向上，令原材料出口國如OPEC等受惠。1991及2001年美國濟放緩期，MSCI亞太區指數（唔包括日本）回落到賬面值一點四倍。如上述情況重演，ING投資管理部門亞洲區負責人Bratin Sanyal認為，未來中國及印度股市令人擔心；台灣、南韓及泰國則會好一D。至於減息對房地產影響，霸菱資產管理基金經理Willian Fong提提大家，恒生地產分類指數由去年10月高點40000點回落到最近32885點，跌幅17.7％，雖然同期本港樓價上升；上述背馳現象令人擔心。

　　去年11月以後，投資策略已改為點樣熊市中獲利，首先要改變係自己邏輯思維。例如從熊市角度睇大勢而唔再係牛市角度。牛市中，每次回落皆係技術調整，宜吸納；反之，熊市中每次反彈係技術調整，宜減持。牛市中，壞消息係入貨訊號；熊市中，好消息係出貨訊號（雖然恒生指數仍未確認熊市，根據滯後效應，一旦美股確認熊市，港股進入熊市只係時間問題）。「Think like a bear」，講就易，做就難。至今為止有幾多投資者已擺脫「牛」心態？呢幾個月如果你仍抱有「牛」心態，因大方向出錯，難怪你睇錯市。投資市場，睇好、睇淡並唔重要，最重要係睇。

淡友大致完成補倉

　　恒生指數由去年10月30日至今年1月22日，由31958點回落到21709點，跌幅超過50％股份一地都係，令抵買心態十分普遍，自然吸引bargain hunters，小小好消息已可支持一次反彈，令1月22日後進入上落市。最終能否完成前跌幅50％反彈，即見26833點？木宰羊。博反彈一向係極之專業行為，小心反彈市中上升股份，未必係你自己睇好幾隻。

　　美元利率回落到3厘，並暗示會再減息1厘，即年中美元利率可見2厘；但港元利率早已經跌到2厘以下，仲有幾多減息空間？

　　根據高盛策略員David Kastin資料，上周美股拋空係2000年以來最低，標普十個行業拋空更低於一年平均數，例如消費業、護理業、電訊服務業及公用事業，甚至金融業拋空者亦唔多，係去年3月以來最低；即過去四星期淡友大致上已完成補倉。

　　過去二十七年（1980年至今），全球投資者一年平均回報率係12.1％，或升值十六點三八倍（同期恒指由1980年1月848點上升到今天24148點，上升二十七點四八倍，跑贏全球平均數，平均每年上升14％）。由此可見去年9月同10月升幅係極唔合理（去年1月恒指只有19990點，到去年10月30日見31958點，升幅高達60％）。如將去年9月及10月受港股直通車消息刺激而急升部分剔除——現水平恒指係合理水平，唔偏高亦未偏低。天下本無事，庸人自擾之。

　　上周五美國路透╱密歇根大學宣布2月份消費信心指數跌至69.6（1月份78.4），代表美國消費信心踏入2月繼續回落。格蛇上周五休斯頓會議又講，佢話美國經濟已到衰退邊緣（上月佢只認為有50％機會衰退）。格蛇愈來愈肯定美國經濟將出現衰退，令上周五道指又再回落。美國經濟在放緩，除食物股同能源股有抗跌能力外，其他行業或多或少受影響。除非係高手，一般人熊市中損手爛腳機會十分大。至於time the market係專業投資者行為（美國，你擁有200萬美元或以上才算專業投資者，即唔計你住緊間屋及做緊生意值幾多錢，最少有200萬美元資金用作投資才叫專業投資者；美國《證券法》才容許你投資離岸基金、累股證、股票掛存款證等等）。近幾個月有人累股證上雞毛鴨血而欲告銀行及大行，相信贏面好細。除非你參加累股證前冇簽銀行所畀文件，以及有辦法證明自己唔係專業投資者（例如搵醫生證明自己智商有問題），不然都幾難告得入，因為香港《證券法》並冇上述規限，即閣下可以動用資金少於200萬美元仍可視為專業投資者。

利用Decumulator對沖隨時兩頭輸　　

聽講本港Accumulator市場涉及金額約500億至800億美元（約4000億至6000億港元），其中20％已1月22日前打靶離場，因冇能力補孖展，其中唔少係大陸資金，受港股直通車消息刺激而來港博一鋪；另有20％正利用呢次港股反彈計數，實行輸少當贏，其中唔少係香港廠商，因大陸生意無可為，便利用銀行提供信用貸款做Accumulator，呢次真係賠了夫人又折兵；其餘60％係真正有銀士，計劃長期收貨（如去年9月份才簽約，即收貨到今年8月止。每份合約大約要收貨1000萬港元左右）。塞翁失馬，焉知非福？有人希望利用Decumulator做對沖。我老曹三十年前亦有玩過期貨「起雙飛」（spreadbets），其作用係賭波幅拉大或收窄，唔係用作對沖。利用Decumulator去對沖Accumulator，類似買入期貨後蝕本唔計數而拋空另一個月份期貨去對沖，極有可能兩頭輸。

　　有意見反對用「200萬美元」作為專業投資者地位分野，所提出理論我老曹完全同意，但無法執行。例如「何謂十年經驗」？我老曹認為，本港證監會如須監管呢類衍生產品，都係參考美國證監會方法，以「200萬美元或以上」人士介定為專業投資，唔受證券條例保障。最近幾個月人們才發現大銀行及大證券行對財富破壞能力係咁巨大。證券化次按債券、累股證及各種衍生產品，不但可令你一朝富貴，同時亦可令你一無所有，所涉及銀碼又豈是澳門賭場可以想像？金融市場內上落金額，係馬場及澳門賭場無法比較；在賭場內，上落幾百萬元已經叫豪賭，金融市場卻以「億」為單位。過去四個月上市公司老闆家財減值由幾十億到幾百億者，大不乏人。

　　美國銀行估計，上周三有80％ARS（Auction-Rate-Securities）無人出價收回，呢個市場約3300億美元，其中1460億美元係免稅債券（俗稱muni），來自市政府、學校、博物館等組織。佢地有還款能力，唔似SIV或CDO但因為冇債保公司肯擔保，令呢類ARS亦無人敢掂，令Port Authority of New York and New Jersey的ARS須以20厘息借錢，而非過去四厘半，因為佢地已再唔係三A級債券（因冇債保公司擔保）。高盛估計，未來ARS利率要升上15厘以上至有人肯要，即信貸危機仍在擴散中（三十年代美國聯邦基金利率跌至1厘，但中小企業如要借錢，必須畀25厘息才借到；呢個情況會否重現？）。

　　滯脹，亦即經濟一部分漲價、另一部分跌價。以1966至1980年美國為例，能源及食物價格上升，下跌部分係美元購買力及債券價格。令人擔心2008年起中國經濟正步入滯脹期，即食品價格及能源價格上升，而股市去年10月已炒到五十倍O，風險為七年內新高，家雖已回落，但O仍高達四十倍，冇中長線投資價值；加上大小非流通股解禁，令春節後一周滬深指數下跌2.23％。2008年全年大小非流通股解禁總額可能高達三萬億元人民幣，全年呈現一個「V」字形解禁過程，即2、3月份解禁數量數大，4、5、6月份解禁量會較少，7、8月份解禁量又升到高位。解禁股份唔會一下子全部湧進市場，不過依家Ａ股股價偏高理由係流通量不足，當增加三萬億股解禁股，再加上Ｈ股回歸Ａ股市場及其他國企上市，今年Ａ股市場資金負擔唔輕，令人擔心滬深Ａ股指數有機會下見4000點。

　　有報道指深圳市去年勁刮「炒風」，唔少係香港炒家傑作！令去年首七個月深圳樓價勁漲50％，部分區域甚至高達70％。最鼎盛時，購房者中超過一半係炒家，更傳言有港人一年之內獨掃一千多個單位。如今肥豬遠去，瘦鼠來到。宏調措施如限外令、銀行縮緊按揭等，令去年第四季成交量驟跌70％。港人投資較多福田、南山等豪宅樓盤更因價位偏高而乏人問津。許多炒家半年內如搵唔到買家，只有賤價拋樓。去年第四季至今深圳樓價已急跌15％仍乏買家。

　　深圳中原地產總理李耀智話，兩年前深圳商品房以自用為主，入住率及亮燈率非常高。2007年卻係炒家橫行一年，唔少來自金融界及地產中介行業利用內部認購，首付只須二成甚至更低，一人買入幾套甚至十幾套十分平常，有D投資公司獨攬數百套甚至過千，尤其係去年3月前唔少人能夠用零首付，首三個月以免供方式拿到房子。不過，香港炒家慣見樓價漲跌，2008年應出現分流，即有實力炒家繼續留守等候樓市回暖，部分炒家則選擇保本或賠錢離場。相信今年上半年深圳樓價有所回落，但唔會出現驟跌局面。半年內資金鏈有問題炒家逐步放盤離場，下半年樓價將重返穩定期。

　　富人失去1億元會有D唔開心，中產失去1000萬元要節省開支，窮人輸100萬元要破產。美國人係富人，香港人係中產，但中國人仲係窮人佔大多數。