2008-02-22

耐心等候購買點

　　2月21日，周四。恒生指數升32.42，收23623點；成交754.26億元。2月期指跌134點，收23496點；3月期指跌127點，收23423點。期指倒掛現象又再出現，後市又再面對拋售壓力？富士康（2038）升5.9％，見11.76元；利豐（494）升4.6％，見28.6元；中海油（883）升1.6％，見12.98元；中石油（857）升1.4％，見11.86元；中國鋁業（2600）升5.4％，見14.94元；中移動（941）升1.1％，見117.2元。

內地CPI料續升

　　中國人行原貨幣政策委員會委員余永定表示，中國CPI將持續上升，央行可能會加息。高盛駐香港分析員梁紅一份研究報告中估計，中國2月份CPI升幅可能接近10％。內地國金證券估計，2月份CPI漲幅將超過8％；1月18日開始雪災所造成破壞在2月份浮現，估計CPI可能上升8.4％。

　　滬深三百指數今天微跌0.67％，收4876.03，變化唔大。

　　歐盟降低今年GDP增長率，估計為1.8％，CPI升幅2.6％。美國領先指數出現連續四個月下跌，情況令人憂慮。

　　美國聯儲局計劃將利率進一步降低，理由係展望今年GDP增長率放緩，估計今年GDP升幅只有1.3％至2％，而非去年10月估計1.8％至2.5％；3月18日將減息半厘，至2.5厘。

　　至今為止，標普五百企業已有73％公布去年第四季業績，較2006年同期平均減少20.1％，較今年1月時估計只下跌9.4％為低。展望今年第一季同第二季，根據Thomson Financial資料，每季純利升幅只有1％。市場分析員認為，今年下半年應會改善，因去年第三季及第四季業績令人失望，各銀行應在今年上半年完成撥備。去年第四季業績最差係金融業，九十二間公司中，有七十七間已公布業績，情況係自1997年以來最差一季；如把金融項目剔除，去年第四季其他公司業績仍較2006年同期上升11.8％，尤其係科技股第四季上升26％、能源股上升20％，估計今年第一季可再升10％及24％。如上述純利估計正確，美股有機會今年第一季或第二季見底（或重要支持位），除非情況較想像中更壞。　　一如2000年科網股見頂後，科網股唔再係領袖股；2007年見頂後，那些由2003年起一直領導大市上升股份唔再可能係下一輪領袖股，應該係新sector，相信係同次按完全無關者。

　　一如香港1997年8月見頂的紅籌股及本港地產股，在2003年開始牛市並非領袖股；呢次領袖股係國企能源股、資源股同電訊股，其次係六行三保及內房股。

　　假設未來股市上升，新領袖股係乜？我老曹目前仍在思考中。

投資者懷疑油價上望空間

　　美國經濟陷入滯脹期，股票及物業在跌價，能源同食物價則上升，情況同1970至1981年類似。1981年通脹率一度升至15％，1982年失業率一度見9％，1980年1月油價相等於今天100美元。近期因OPEC主席哈利勒宣布3月5日會議中不談增產，令油價重見100美元。技術上睇，油價出現三次到頂回落，除非企穩在100美元之上，否則上升空間有限。近期石油股股價表現落後於原油價格，部分理由係股市轉弱，更大理由係投資者開始懷疑油價未來可再升幾多？

　　小麥過去十年產量平均每年只升0.2％，只有18％全球產量用作貿易。主要入口國有中國、印度、日本、印尼、南韓，出口國有阿根廷、加拿大、美國、歐盟、俄羅斯及澳洲。近期小麥價格升上370美元一噸，對印度及巴基斯坦等窮國影響很大。玉米過去十年平均每年產量只升0.8％，全球產量11％用作貿易。入口國家╱地區有中國、台灣、印尼、日本及南韓，出口國有美國、阿根廷及中國（中國同時擔當出口國地位）。

　　油種子過去十年平均每年產量上升4.5％，其中亦只有18％用作為貿易。入口國有印度、巴基斯坦、新加坡、中國，出口國有印尼及馬來西亞（其中又以棕櫚油為主），近期已升至1100美元一噸。食米過去十年平均每年產量上升0.9％，只有7％作貿易之用。主要入口國有印尼、日本、馬來西亞及菲律賓，出口國有泰國、越南、美國及印度。

　　豬肉及雞肉過去十年每年產量平均上升2.9％，只有5％作為貿易，主要出口國有美國、歐盟及加拿大，主要入口地區有日本同香港。牛肉過去十年平均每年產量上升1.1％，只有10％作貿易用。主要出口國有阿根廷、澳洲、巴西及印度，入口國家╱地區有台灣、日本、南韓及美國。

　　換言之，農產品世界貿易量一向唔大，只要出現小量供求不平衡，已可引發價格大幅改變；農產品市場一向唔係大投資項目，好難分析。

　　英國政府將北岩（Northern Rock）國有化，係戰後首間被國有化銀行，理由係該行不負責任貸款行為令存款戶擔心而引發擠提。英國經濟係美國經濟縮影，兩者皆是國際資金聚集處，可惜兩個經濟過去支住虛假繁榮，當不能再吸引全球資金流入下，英國北岩有如去年9月美國的Countrywide Financial，開始出事。在美國，唔少1美元票面CDO基金只值5美仙，CDO出事保險公司亦無力賠償。

　　本周瑞信亦宣布誇大資產值28.5億美元，因為「mark to model」有一定困難。到底有幾多CDO、ABS（Asset-Backed Securities）、CLO（Collateralized Loan Obligation）及RMBS（Residential Mortgage Backed Securities）有問題？損失有多少？對西方金融機構影響有多大？冇人能估計，結果更令保守投資者袖手旁觀。

標普銀行股指數漸見抗跌力

　　標普銀行股指數自1月23日起至今已表現出抗跌力，最惡劣日子係咪已成過去？次按危機令美國及瑞士銀行需要各國主權基金注資，貝爾斯登屬下兩隻基金更被投資者入稟要求賠償損失，估計呢次次按危機影響一直伸延到2009年。

　　同1970至1981年唔同，當年聯儲局致力對抗通脹，將利率逐步推高至22厘，仍無法令通脹率回落。呢次聯儲局反其道而行，自2007年9月起狂減息去阻止房價及股市下跌。結果又點？七十年代聯儲局加息行為，不但未能阻止通脹率上升，反而引發1973-74年及1981-82年經濟大衰退。呢次反其道而行，唔知又能否阻止美國經濟衰退出現？分析家擔心美國樓價由2006年8月高峰可回落20％-30％，令負資產數目由2007年年底二百萬增至2009年年初一千五百萬。美國經濟增長率放緩但通脹率卻上升，今年1月份美國CPI升4.3％（去年1月份升2.5％）；美國已進入負利率期，仍然無法阻止樓價回落。反之，香港進入負利率，香港樓價過去半年上升20%。

藉期權買保險

　　你會為你的房屋、健康甚至汽車買保險，點解唔同自己投資買保險？為投資買保險方法就係「止蝕唔止賺」（或一旦感到不安便買認沽期權）。大部分專家只教你點樣賺錢，我老曹認為除賺錢外，另一重要行為便是防止「bust」在自己投資股份身上出現。如果係二線股，可利用止蝕唔止賺保護；如係熱門股，可用認沽期權，亦有人賣掉股份改購認購期權，將未來影響局限。總之方法好多，如事前唔買保險，當災難出現後便補救無從。

快艇投資法行之有效

　　「快艇投資法」（Paddle Strategy）並非我老曹發明。早在十五世紀，荷蘭人在初成立股票市場已開始運用，1929年甘迺迪家族用100萬美元進行上述策略而賺取巨大財富。近年亦有唔少知名人士採用呢種策略而獲得唔少財富，我老曹認為值得推介。至今許多人仍在採用1997年前投資策略（選擇優質股長期持有），令眼前巨大利潤在未來幾個月內又消失。過去十年贏家不少係採用快艇投資法，例如在去年10月鎖死利潤或行使止蝕。1997年7月之後，此方法極之有效，早已取代「買入後持有」（Buy and hold policy）。

　　日本經濟由戰後重建到1990年見頂共四十五年；中國1978年改革開放政策，係咪為中國帶來四十五年風光？印度1947年獨立，但以發展國企為主，令經濟不前，直到1991年IMF壓力下才走向改革開放政策，令GDP重返高速上升期，係咪可以維持好景到2030年？中國同印度未來十年GDP會否保持高速上升？能否抵銷美國同歐洲經濟放緩壓力？中國的興起，又係咪令日本經濟1990年起走下坡理由？中國在未來日子面對出口到美國及歐洲增長率放緩下，能否唔再依賴出口大幅增長仍能保持DGP上升？思考上述問題亦有助制訂2008年投資策略。

　　食有時，睡有時；投資有時，不投資亦有時。每年一定有一個購買點及一個沽售點。今時今擖u有耐心等候購買點出現，不然只是盲動。