2008-02-19

大冷之後總有回暖期

　　2月18日，周一。恒生指數跌389.8，收23759.25；成交781.1億元。2月期指仲係高水，跌447點，收23829點。

　　今天中遠太平洋（1199）跌5％，報16.88元；中國遠洋（1919）跌4％，報23元，因美國經濟增長放緩，抑制貿易增長率，航運股又再下滑。港交所（388）跌2.3％、創科實業（669）下挫3.6％、東方航空（670）下跌3.4％。剛公布業績東亞銀行（023）跌2.9％，因大摩分析師下調目標股價至44元。不過，碧桂園（2007）成功發行36億元可換股債券，令股價急升11％，見7.48元；怡富資產管理認為，碧桂園發債成功，將開啟其他中國房地產公司發債融資大門。去年12月中國房價仍較2006年同期上升10.5％。

玩上落市應綽綽有餘

　　滬深A股升2.03％，見4910.99。浦發銀行升2.9％、招商銀行升2.9％、萬科升2.8％；寶鋼升1.8％、武漢鋼鐵升3.2％、西寧特鋼升10％停板，因日本方面同意鐵礦石加價65％，相信中國鐵礦石入口價亦上升65％。中鐵亦升10％漲停，不過亦有跌停板公司例如株洲冶煉，主要因為鋅跌價。

　　豬年股市肥前瘦後，鼠年股市又如何？一、美國次按危機威脅係咪已消除？二、內地宏調係咪已結束？三、內地大小非流通股解禁，對A股市場影響又係點？換言之，鼠年股市變數很多。豬年投資策略係不畏高，站在高處未算高，因為一浪較一浪高。鼠年投資策略係唔好貪，股市經過2007年11月至08年1月調整後，恒指O已重返較合理水平，由1月22日恒指21709點開始，進入熊市二期機會甚大（即炒上落市）。除利淡因素外，亦有利好因素，例如美元利率好快降至2厘。鼠年應學會不盲目「止蝕」、不短線情緒化、唔拋售不該拋股份。短期股市大幅上升恐怕很難，但恒指在21709點以上、26500點以下玩上落市應該綽綽有餘，出現小陽春局面機會極大。8月8日奧運前中央政府絕唔希望全國股民愁眉苦臉迎奧運。天氣亦一樣，大冷之後總有回暖期。

　　上周美國財長保爾森及聯儲局主席貝南奇對美國國會講，2008年美國經濟冇衰退，但似乎好少人聽得入耳，因為太多人在過去四個月受到股市灼傷而忘記平常心。過去三個月熊已食飽飽，1月22日起去小睡一會而出現熊反彈。牛、熊心態最大分別係牛市中不怕被綁，因為下一個上升浪必將股價推到更高水平；反之，熊心態係要跑得快以免被綁，因為後市展望一浪低於一浪。在反彈市中一旦被綁，便不知何日才再見青天，因此在熊市中切忌大量資金投入，以免走唔切，亦因此令二線股在反彈市中升幅極之有限。從二線股反彈乏力，又可反過來證明呢次只係熊反彈。

　　花旗建議沽售港交所，估計去年每股獲利5.03元，O三十二點九倍；今年每股獲利5.21元，O三十一點八倍，因類似去年10月前國企股高潮唔易今年重演，加上今年純利重返低增長期（估計增長率只有3.5％，唔似2007年增長率達12.6％）。擔心港交所連三十一點八倍O亦企唔住。

　　油價已升上95美元一桶，對解除未來通脹壓力毫無幫助。南非電力問題令白金同金價上升，澳洲及巴西港口擠塞又令煤價上升。2月1日OPEC開會結果係唔贊成增產，反而建議3月5日會議討論減產；睇OPEC有意阻止未來油價回落。全球汽油需求上升四十萬桶到五十萬桶一天（汽油佔全球原油三分一消耗），甚至今年第二季美國經濟陷入衰退，油價亦唔易有大跌機會，因今年石油供應只上升六萬桶一天，主要來自美國、加拿大及巴西，但需求升幅遠大於此數。

地產股與樓價呈背馳現象

　　去年9月美國開始減息至今，本港二手樓價連升二十星期，係1994年以來從未出現過，升幅達25％。美國3月同4月將再減息，本港樓價又點？反之，由去年11月起本港地產股卻回落。最終係樓價上升拖高地產股抑或係地產股回落拖低樓價？或兩者互不相干（decouple）？1990至94年美國樓價回落，香港受負利率刺激樓價上升171％。2001至03年美國樓價上升，香港樓價則繼續大幅回落，因本港實質利率高企，證明美國樓價升降唔影響香港樓價。但歷史上少見地產股同樓價背馳現象，我老曹亦無法解釋當前情況。

　　投資者雖然開始講「衰退」二字，但投資組合仍係「牛」組合（即手上現金極少）。經濟學者在談再膨脹（reflation）例如負利率，1997年8月至今卻證明資金流向（fund flow）影響力更大。近幾個月本港二手樓價上升，並非負利率威力，而係有人股市賺錢後去買樓，鎖死自己D資本（因樓價波幅較股市波幅細，我老曹朋友中，唔少在去年10月沽股票買樓）。

　　至2月13日為止一個星期仍有4.61億美元資金由亞洲離岸基金淨流出，即今年至2月13日止亞洲離岸資金淨流出87億美元（去年資金淨流入164億美元）。

去年下半年流入新資金有94％已潛水，258億美元淨流入資金平均虧損12％或31億美元。呢批離岸亞洲基金總市值由去年10月底2250億美元下跌至今年2月13日1690億美元，縮水25％。各位唔好期望短期內有大批資金重返亞洲區股市，目前外資較睇好只有馬來西亞同台灣。1月22日起股市回升，購買力來自淡友補倉，而非形勢改變。淡友何時完成補倉，進入新一輪拋售？你問我，我問邊個？次按危機仍繼續，credit cunch開始擴散到municipal債券市場。上周二畢非德願為8000億美元muni提供再擔保，曾引來一陣歡呼聲，之後又再沉靜。次按虧損在歐洲銀行逐漸浮現，日本邊銀行又如何？中國境內銀行又如何？仍未清晰。

　　英國2月份樓價止跌回升，平均上升3.2％，見237856英鎊一間（1月份回落0.8％），倫敦則上升0.9％。不過，英倫銀行行長警告英國樓價仍有下跌空間。目前出售一個物業平均需要九十三天搵買家（一年前七十八天），平均每個地產代理手上有樓盤六十四個（2007年2月五十四個）。表現最差係倫敦貴區如Kensington及Chelsea，平均下跌4.2％，至160萬英鎊一間；表現良好係蘇格蘭區。

　　去年中，英國房地產步美國房地產後塵，進入回落周期。英國同美國唔同，美國最受影響係低收入家庭，房價跌幅集中在低價樓；上述樓價過去有賴次按提供零首期支持。英國樓價並唔依賴次按，貸款大部分來自銀行，仍需要20％首期，而且係浮動利率而非固定利率，因英國好少ARMS式貸款。不過，過去十年英國樓價升幅大於美國，平均升幅接近200％；英國家庭負債比率係稅後收入一點七五倍（美國係一點三五倍）。在英國如樓價跌幅少於20％，英國銀行所受壓力仍十分有限，除非英國樓價跌幅大於20％，英國銀行才會面對大量呆壞賬。英國房屋建造業只佔GDP 1.5％（美國住宅樓建造業佔GDP 4.2％）。換言之，英國物業跌價對英國金融業及GDP影響冇美國咁嚴重。

英戰後首次接管銀行

　　英國政府宣布接管Northern Rock（英國第五大貸款銀行），因樓按出事而須英倫銀行注資550億英鎊，其後一直搵唔到合適買家，此乃戰後英國首次接管銀行。1984年英倫銀行曾接管Johnson Matthey Plc，該公司以黃金為抵押而從事商業貸款業務。當金價由1980年1月850美元下跌至84年12月298美元一盎斯，英倫銀行要注資4億英鎊去支持該公司。再對上一次係利獲家證券公司，1974年須注資7000萬英鎊。年輕一代可能未聽過利獲家證券，它1970年來港，收購一間叫均隆驅風油公司（當時市價每股6角），佢出價每股1.2元，當持有90％後一直炒高股價到22元，之後改名利獲家證券，令1971至73年恒生指數狂升。其後透過大量發行新股同其他公司換股，並同和記企業合組公司，做證券抵押貸款業務。當1973至74年全球股市下跌（恒生指數由1774點回落到150點，跌幅91.5％），導致利獲家證券被接管，和記企業要豐出資挽救。英國政府注資7000萬英鎊挽救利獲家證券，豐銀行則出資1.5億港元（以每股1元代價收購和記企業三分一股權）及提供超過5億港元貸款，協助和記企業度過危機，在八十年代再以每股7.1元將和記企業出售畀長江實業（001）。呢次英國樓價回落多少，便有一間銀行被接管……，英國Northern Rock財政狀況似乎又幾脆弱。

　　從趨勢睇，2009年美國將出現黑人總統。奧巴馬雖然係黑人，但兩歲父母已分手，母親係美國中產白人階級，自己係哈佛博士及律師，除膚色外，奧巴馬同美國其他白人冇任何分別。奧巴馬年輕有為，完全有1992年克仔風采，佢地對手同樣係布殊（1992年係老布殊，雖然打贏波斯灣戰爭，但搞唔好美國經濟；2008年殊仔亦一樣，打贏阿富汗及伊拉克戰爭，但經濟開始進入回落期）。奧巴馬出身中產白人家庭，令美國白人唔會抗拒他，而佢黑人膚色又獲10％美國黑人選民支持，睇下屆總統早已在望。奧巴馬作風係民主黨內最左，一旦佢當選，美國從伊拉克撤兵指日可待，到時中東局勢會較目前更和平還是更混亂？奧巴馬左傾思想將令美國福利開支大幅上升，但美國財赤唔會因此而消失，令美國2009年經濟存在更多不穩定因素。奧巴馬能否一如1992年克仔為美國帶來新景象？還是美國氣數已盡，加快經濟走下坡速度？奧巴馬一定會為美國帶來改變，至於變好變壞，未知因素太多。

　　下月日本銀行行長福井俊彥退休，相信佢係全球最清閒央行行長。佢在任五年只做兩件事——加息兩次，將日圓利率由接近零提升到半厘；以及推行寬鬆貨幣政策，令日本成為全球最大資金供應國。2003年3月至今資金源源不絕由日本流向各國，令日本人可賺取利息差，此謂之「利差交易」。同期中國GDP全速增長，令日本出口中國金額過去五年上升五倍！兩者加起來，令日本過去五年GDP保持年率2％速度上升。2006年3月佢宣布戰勝通縮，令日本經濟重現通脹，其後加息兩次；分析家認為日本人高興得太早，福井在任五年並冇改變日本經濟結構，仍停留在出口帶動式經濟，而非由內需帶動。日本人工資過去五年不但冇上升反而萎縮（2006年日本人均收入36170美元，同1990年接近）。通脹率上升只反映高油價及高原材料價，而非由需求上升推動（良性通脹由需求推動，惡性通脹由成本上升推動）。日經平均指數目前只有13600點，只及1989年12月40000點三分一。十八年過去，日本經濟繼續在低位牛皮；2003年起經濟復甦，與其話日本貨幣政策成功，倒不如話係受全球經濟好景帶動。一旦美國經濟衰退、中國GDP增長率放緩，唔排除日本經濟重陷衰退。

　　香港2006年人均收入22960美元，亦未重返1997年水平；加上社會出現20╱80現象（即20％人口收入大幅上升，80％打工仔收入仍較1997年差），上述未計美元購買力每年下降大約3.5％因素。港人應該知道，2007年其實唔及1997年。

　　隨美國減息去刺激經濟，中國人行再不能用加息去冷卻經濟，睇只餘下人民幣加快升值一途。去年人民幣升值7％、今年至今升值1.7％（不足兩個月上升1.7％，即全年升幅極有可能高出10％）。JP摩根大通（目前已係美國最大市值銀行）估計，今年人民幣升值14％。今年泰銖已升值3.7％、新台幣升值2.2％，相較之下人民幣升值速度仍太慢。今年1月中國CPI升幅估計在7％以上（12月升6.5％），本周二宣布數據。蔬菜1月份零售價上升5.2％、豬肉升4.5％、牛肉升9.5％後，中央政府被迫宣布物價管制。

已婚男士投資更成功

　　我老曹係早婚支持者，二十五歲便結婚，因我老曹相信「已婚男士係較佳投資者」理論。一、兩個人共同生活，較兩個人分開生活更省錢。二、婚後令男女雙方更努力工作。三、結婚令男士更專心工作，拍拖卻係最浪費時間行為。

唔少鑽石王老五事業都十分成功，不過社會上大部分成功男士都係已婚男士。結婚對女士事業係咪有幫助，我老曹木宰羊，但對男士而言一定有幫助！找個好伴侶結婚，然後心無旁騖努力自己事業；先成家、後立業係我老曹忠告。我老曹唔相信遲婚有助事業，二十五至三十歲男士係適婚年齡，而且愈早愈好。二十五歲開始專心事業同三十歲始專心事業，大家到六十歲時分別有幾大？答案係二十五歲以10萬元起步每年投資回報25％，到六十歲身家可達2465萬元；三十歲以10萬元起步同樣每年投資回報25％，六十歲時只有646萬元），即早起步五年者較遲起步五年者，大家到六十歲退休時身家差距達四倍！

　　當然，生活與良好投資之間必須取得平衡（但我地不應為嗜好而放棄良好投資，同樣不應為良好投資而令生活過得刻板）。努力工作唔代表生活刻板，投資成功最重要係staying focused，而非日日努力工作。例如去年10月前將注意力集中在股市，11月股市高潮之後又不妨抽時間同另一半好好享受一下投資成果。成功trader唔係天天炒股，通常一年只工作四分三日子，其餘四分一日子享受人生。

成功trader都有謙遜性格，略帶點樸素生活，好少在公開場合大發偉論，只有輸家才有偏激言論及魯莽性格。唔係成功人士喜歡低調，而係低調性格者較易成功；唔係失敗者魯莽，而係魯莽性格往往招致損失。