2008-08-29

藝人點解難剩錢？

8月28日，周四。恆生指數跌492.43，收20972.29；成交667.2億元。8月期指跌280點，收21131點，由于結算日在即所以唔可以作准；9月期指跌423點，收20940點，仍較現貨指數略低。

中移動（941）跌6.3％，因摩通降該公司評級；聯通（762）跌7.3％；思捷環球（330）跌18％，系近十年內最大跌幅，最少三間証券行同時降該公司評級；中石油（857）因煉油事業虧損，股價跌3.3％；內地銀監會再次收緊房貸，令北辰實業（588）跌4.57％，報1.67元；上海復地（2337）跌7.18％，收1.55元；華潤置地（1109）跌3.2％，收8.9元。

日本地產都唔掂

《上海証券報》報道，土地系房地產源頭，2006及07年上海公開招拍挂批出嘅大批土地，唔少至今仲未投入市場。部分理由系開發商無法借到資金去開發土地，只有將D土地閑置。呢次中國人民銀行及銀監會共同發布嘅通知，令商業銀行唔可以發放貸款，對好多中小型開發商嚟講系「不可承受嘅重」。原來被視為香餑餑嘅土地，忽然間變成燙手山芋，最后結果可能系賤價拋售。

英國8月份平均樓價較去年同期跌10.5％，系近二十年內最大跌幅（較7月份跌1.9％），亦系1990年以嚟首次出現雙位數字下跌。喺倫敦嘅德銀分析員GeorgeBuckley估計全年跌幅可達15％，再加埋英鎊由去年11月兌2.1162美元，回落到家嚇1.8377美元，跌幅達7％，即系除咗樓價下跌外仲要加埋匯率損失，所以都几傷。法國第三大銀行CreditAgricole今年第二季純利較去年同期跌94％，今年第一季次按撥備達55億歐羅，5月份主管換人，第二季進一步撥備；今年內股價已下跌34％。7月15日起美元匯價回升嘅理由唔系美國情況好轉，而系歐洲同英國情況惡化，令投資者覺得揸美金反而安全D。

滬深三百指數今天上升0.45％，收2335.86。美邦服飾首日上市仍升36.13％，見到喺內地申請發行新股仲系穩賺唔蝕嘅行為。

DaiwaHouseIndustryCo.（日本第二大地產建筑商）主席TakeoHiguchi估計，未來有更多日本地產公司破產，TopixPropertyIndex過去十二個月已跌咗38％，系三十三個行業中表現最差嗰行，同期Topix只回落17％。

菲律賓第二季GDP只上升4.6％，今天宣布加息0.25厘，至6厘，因7月份通脹率達12.2％。

技朮表現睇7月15日至家嚇系「熊徘徊」區，而唔系「牛收集」期。

去年10月起因抵押品跌價而引發嘅次按危機，令現金日漸變得稀少，DowTheoryLetter作者李察羅素（我老曹嘅道氏理論，亦系由佢嘅每月通訊中學習）警告，世界上大部分地區正步入通縮期，而唔系通脹期。巴西批發物價指數7月份出現負0.44％（6月仍升2.28％）。喺倫敦LombardStreetResearch嘅GabrielStein指出，美國7月份MZM減少500億美元，系1959年以嚟最大跌幅（雖然一個月唔代表趨勢，但三個月平均升幅只得2.1％、六個月6.3％及十二個月11.5％），理由系房價下跌緊。

颶風古斯塔夫好似吹向墨西哥灣，油公司已開始疏散油井上嘅工作人員，上述因素令油價止跌回升，估計影響只系暫時，颶風過后相信油價又再回落。

現金又成皇帝

玉米自6月27日見每蒲式耳7.9925美元后，至今跌咗26％；大豆7月3日見16.3675美元后，至今跌咗18％；小麥由3月12日13.4925美元后，至今跌幅37％，再次証明農產品受天氣影響大過一切。
摩通環球天然資源基金嘅IanHenderson同意，長遠嚟講商品價格仲可以睇好，但去年8月次按危機后，礦業股平均跌幅20％，令呢類公司好難集資；加上鎳、鋅及白金等價格已較最高峰回落50％以上，令唔少投資者出現財政困難，被迫套現。甚至環球天然資源基金亦由今年2月至今跌咗30％。金屬價格可唔可以喺家嚇嘅水平穩定落嚟，唔再進一步下跌？就算系咁，下半年礦業股利潤已大減，唔少投資者等唔到下一個上升浪矣。

今年11月美國大選，大選后如通脹率仲未大幅回落，12月份美元加息機會好大。如12月唔加息，明年第一季亦需加息，因為長遠而言利率必需維持喺CPI升幅2厘或以上，除非通脹率跌到零，先可以阻止今年12月或明年第一季聯儲局加息。上述加息行動可扼殺任何經濟開始復蘇時嘅萌芽，情況好似九十年代嘅日本銀行。

隨住更多銀行被接管，美國FDIC手上嗰452億美元基金已唔夠應付，需向財政部借錢去支持接管銀行；上述又系另一令利率上升嘅因素。

過去七年對沖基金大量拋空美元去買股票、物業、商品及藝朮品，今年7月引發美元大平倉至家嚇已回升7％。CashbecomesKingagain（現金由7月份起，又再次成為皇帝），美元情況系咁，歐羅又點？代表十五個國家及三億五千萬人口嘅歐羅區，踏入今年亦減少發債，令歐羅供應上升速度下降；至于世界第五大經濟體系英國N，今年6月止仲喺度高速上升，但恐怕亦快見頂矣。因俄羅斯嘅有錢人正離開倫敦，例如ViktorVekselberg、MikhailFridman及LeonardBlavatnik等，佢地每人揸住400億美元以上。根據《福布斯》資料，1998至2004年由俄羅斯流向倫敦房地產市場嘅資金超過1000億美元，超過三十萬俄羅斯人喺倫敦置業，系倫敦樓價暴升部分理由，至今超過一百間俄羅斯公司嘅倫敦交易所上市，佢地選擇倫敦理由系因為接近莫斯科及國際化，今年開始俄羅斯人從倫敦搬走。

A股散戶血流成河

今年第二季全球售出三億零四百七十萬部手提電話，較去年同期升12％（主要嚟自新興市場），相較去年第二季升幅21％，增長率已大幅放緩。估計今年全年升幅11％，至十二億八千萬部（去年升幅16％），升幅主要嚟自印度、中東及非洲，明年進入單位數升幅，流動電訊嘅高潮漸過去。



隨住OECD國家嘅GDP增長率放緩甚至負增長，對中國產品需求自然放緩，令中國出口業進入低增長期。今年1至7月中國外貿盈余減少9.6％，上述因素引發去年10月至今滬深三百指數大幅回落，而且跌幅相當大。不過，中國經濟唔系英國、歐洲及美國，上述國家系成熟型經濟，GDP增長率好容易消失；反之，中國仍系新興國家，GDP增長只會下降到8％至9％之間，而唔系負增長，因政府以驚人速度投資基建項目。上述資金嚟自外匯儲備，所以唔使擔心因出口增長放緩，最終中國股市必出現V形反彈，問題系呢次急降几時完成？參考1973／74年恆指喺二十二個月內回落91.5％；反之，內地人行一早已將利率上調、收緊存款保証金率及畀人民幣升值等，減低滬深A股升幅。令去年10月起下調幅度一定唔及1973／74年嘅恆指，至于時間要几耐，往往事后先知，至今為止下調日子只得十個月，理論上仲未夠。1974年石油危機打擊肯定較呢次大（因為系第一次），加上恆生指數由1973年3月接近一百倍P/E回落到1974年12月六倍P/E。反觀去年10月滬深A股P/E不足五十倍便回落，至于到底要跌至几多倍P/E先見底？亦要事后才知。不過，可以肯定滬深A股已漸進入冬季，能夠捱過冬季者，便可迎接春天嘅嚟臨。到時春回大地，一切又改觀。

去年10月至今跌幅十大A股，依次系云南銅業（88.3％）、澳洋科技（87.1％）、石油濟柴（87.1％）、中色股份（86.9％）、ST金泰（86.4％）、株治集團（86.2％）、西部礦業（86.1％）、ST中鎢（85.9％）、鋅業股份（85.56％）、ST東盛（85.53％）。A股散戶喺過去十個月內，已血流成河，几時先止血（有人認為流血不止、麻煩開始，內地股市系咪進入麻煩開始期）？

力不到不為財

中國平安保險（2318）總裁馬明哲年薪超過6000萬元，反而中國人壽（2628）總裁楊超只有199萬元；研究兩間公司最近業績公布，冇証據証明高層人士高薪，可令公司業績表現出色。

大部分藝人缺點系「賺錢容易、剩錢難」。唔少成名藝人過身之時，家財都唔丰厚，理由系不善理財。例如屋企有几百件服飾、几十個手袋，隨住季節與流行要汰舊換新，未夠一年全部換晒。其次系自己冇時間，卻學人地做生意，忘記咗力不到不為財嘅道理。除非系大企業一切上晒軌道，一般小生意要做老板者，分分鐘都要睇實。結果系蝕本者多賺錢者少；如再加上喺唔適當嘅時刻買樓或投資股票，便又多一位賺錢容易剩錢難嘅藝人。1987年10月股災后，明星麥嘉曾搵我老曹問：「點解佢喺期指市場蝕得咁大？」其實道理好簡單，因為做明星唔可以二十四小時都睇住個市，往往喺最唔適當入市時入市，咁就真系dido。何況二十年后今天，金融市場已變成斗獸場，有錢冇時間嘅藝人請唔好入市。仲有一點要記住，系曉教書者唔代表曉經營學校、曉著衫唔代表識做時裝生意、曉食嘢唔代表可以做飲食業、曉寫文章者唔代表可以開報館，以及曉做戲者唔代表可以投資拍戲。

作為投資者應同政治保持一定距離，除非政治對經濟造成重大影響，我老曹先會評論，例如1982年中國收番香港主權、1984年中英聯合聲明、1989年六四事件、1997年7月1日八萬五及2003年7月嘅二十三條。作為投資者，最驚聽到政治人物用應該呢個字，即英文Should！除咗上帝十誡外，其它都唔系應該，以免犯上好心做壞事。例如為全民提供住宅、提供大學教育及提供優質醫療服務等，往往造成市民對政府有過高嘅期望，最后卻系極大嘅失望。

過去指出大學教授最唔適宜做聯儲局主席。呢次令人擔心嘅事系牧師身份競選美國總統；加上本周三奧巴馬宣布拜登做佢助手，上述決定令希拉莉感到好冇癮，有人甚至認為民主黨可能因此分裂。拜登嚟自特拉華州，1973年起已做參議員，依家主管美國外交關系委員會；佢亦曾支持殊仔出兵伊拉克。由一個今年六十五歲議員去做一個四十七歲未來總統嘅副手，上述配搭系咪有D搞笑？由過去表現睇，拜登几自滿，經常認為自己高人一等，例如吹噓自己系SyracuseCollegeofLaw嘅高才生，事實佢只系全班八十五人中考第七十六，1988年曾競選總統失敗，今年欲東山復出只因選票唔足而喺初選中退出。佢主張把伊拉克一分為三（類似過去將韓國及越南一分為二。由佢地自己打自己，唔使威脅他人）。1979年亦曾支持卡達嘅伊朗政策，令伊朗皇朝倒台由家嚇嘅政權取代，伊朗成為美國嘅敵人。拜登對奧巴馬嘅吸引力系支持打工仔階級，呢點同奧巴馬理念相同。將來如由佢主管美國外交，相信美國將重返卡達時代（被人當佢冇到）。假設未來美國總統系奧巴馬同拜登雙結合，睇怕美國唔單止系經濟上走下坡，喺外交方面亦走姑息路線，正好配合2000年起美國開始走下坡嘅大趨勢，或者呢個系國運，實在無可奈何。