2009-01-12

財富消失效應存時差

1 月11日，周日。1月係分享預測及展望嘅月份。回顧2008年1月大部分分析員嘅預測及展望，事後證明皆失準。咁點解2009年1月佢地嘅預測及展望仲有參考價值？去年1月，有邊個預測到雷曼事件？去年1月，有邊個話你知2008年會發生金融海嘯？再次證明人係冇預測能力。

美零售業進入長期下跌

有智慧不如追隨趨勢，2009年大趨勢係熊市二期延續，阻力喺16000點，支持喺10600點，相信2009年大部分日子恒指將喺呢個框框內上落，直到趨勢改變為止。點樣响上落市中搵食？上周六我老曹喺E*Trade研討會上有教，如各位冇參加，可睇睇2月份將出版嘅《信報月刊》；我老曹相信，2009年投資策略以揀股為主（Stock-Picking），唔似2008年大趨勢係向下，因此最好做「Short」（沽空），因我老曹唔做拋空，只有持盈保泰。此外，投資者應利用上周反彈減持銅、鎳及其他金屬股，因金屬價格只出現跌後反彈，一旦反彈完成後又再跌。

美國12月份零售業出現連續第六個月回落，係1992年以來最長一次回落期。面對失業率上升，加上股樓下跌令財富消失，美國零售業正進入長期回落。

英國樓價跌至2006年10月以來最低價。英國樓價2007年10月見頂後，有些地區樓價跌幅已達19.9%，而有些跌幅只有9.7%；十大地區中則無一不跌。

2009 年面對股市「Go-Nowhere」，策略上係低買（例如恒指喺萬一點）、高賣（例如上周接近萬六點）。2009年仍有唔少機會可Double your money（例如去年11月至今年年初），相信未來仲有三次或以上。

2009 年經濟在惡化，但並非跌落深淵。股市去年面對去槓桿化及經濟衰退，2008年10月27日港股因超賣引發反彈，並喺2009年1月8日初結束。2009年係睇淡太遲、睇好太早，各位睇淡應喺2007年11月，最遲係2008年5月；睇好應係2010年之事（淡市不出三年）。因此，如非投資高手，2009年最好無所事事，例如吃喝玩樂。坦白講，2009年股市不宜散戶。

2009尋找傻瓜年

上周道指跌4.82%，收8599.18。上周一我老曹已提點大家利用1月反彈市減持，因企業純利展望在減少。上周跌幅最大係金融類，達8.18%。道指由去年11月21日反彈似乎已完成。

恭喜大家，雖然2008年損失不菲，但總算度過，因為活着就是精彩。

1 月20日奧巴馬將上台，成為美國第四十四任總統，擔心屆時亦係美國人噩夢嘅開始，因為奧巴馬面對嘅係一個就快破產嘅美國。由1900年至今，响新總統就職年，1月及2月股市皆有較佳表現，到3月才回落。但2009年1月，股市只升咗幾個交易天。2009年投資市場相信係「尋找傻瓜年」，邊個願意做傻瓜便不妨高價搶貨。

上周四美國波士頓聯儲銀行主席羅森倫格响麻省按揭銀行家協會年會上話，呢次衰退較大部分人想像中嚴重，同時更長！唯一利好因素係能源價格已回落，最終可令經濟止跌回升（佢2010年唔再連任聯儲局政策決策成員，其言也善乎）。

股市預測信唔過

著名投資家John Bogle（Vanguard集團創辦人）向散戶提出忠告：

一、不要信任何股市預測。嗰D所謂專家（華爾街十二大證券行）去年平均預測標普2008年年底見1640點，結果係2008年年底標普見903點。可以話全部睇錯市。

二、忘記資產分配（分散投資）。將資金集中及逃避風險而非分散風險。2008年係避險年而非分散風險年。

三、不要追求高回報，賺得愈多，風險愈大。2007年表現出色嘅基金，2008年皆虧損50％以上。响熊市之中，保本為上策。

四、自己唔識嘅嘢少沾手。唔少金融產品嘅出現，目的只係賺取佣金及費用，而非為投資者增加利潤。

1977 年美國政府通過Community Reinvestment Act，鼓勵FDIC向商業銀行及存款公司提供保險，以便佢地向社會上低中收入人士提供貸款。從此美國樓價進入反覆上升期，直到2006年 Countrywide Financial出事（美國每五宗樓按，就有一宗由該公司負責），令美國銀行（Bank of America）注入20億美元資金及提供115億美元信貸，美國聯儲局亦提供500億美元墊支。雖然係咁，2007年Countrywide仍支持唔住，股價由44.07美元跌至低於2美元。次按危機喺2007年逐步浮現，到去年9月雷曼兄弟事件引發全球金融海嘯。响各國央行大量注資下，道指喺去年 11月21日見7449點後企穩及反彈。事情係咪就咁過去？

柏克萊銀行頭頭John Varley認為，2009年及2010年美國樓價仍可回落15%。Cass Business School教授Andrew Clare認為，到2010年美國樓價將較2006年高峰回落40%。我老曹相信，恒生指數由2008年10月27日至2009年1月7日嘅上升，只係熊市二期內一次大反彈。

聯儲局以好債交換壞債

12 月份美國又有五十二萬四千人失業；失業率已升至十六年新高，達7.2％，為1993年以來最高，估計2009年最高可見9％（2008年失業人數已達二百六十萬）。美國財赤已接近GDP 7％，如進一步上升，將危及美元嘅安全（例如財赤佔GDP 8％）。2009年將係苦難年（痛定思痛），唔知痛苦指數可上升到邊個水平。

美國債券泡沫爆破會否係「另一隻鞋」？債券價格下跌令按揭貸款唔再產生收益，其他貸款則面對賴賬，令金錢價值迅速消失，而產生compressive debt deflation（中文好難譯，大意係指因貸出嘅款項變成呆壞賬而產生通縮壓力）。

聯儲局為阻止上述情況出現，正以好債（國債）交換壞債（例如兩房債券）及向銀行注資，並要求佢地將資金貸出去。最終係市場力量戰勝政府干預，或係有形之手打贏無形之手？最後結果係：一、美國政府摧毀美元價值（例如戰後國民黨曾摧毀關金券及金圓券嘅價值，阿根廷政府及唔少南美洲及非洲政府亦曾摧毀本國貨幣嘅價值）；二、債券市場泡沫爆破。眼前形勢似乎係後者而非前者。次按危機後，美國政府並冇大量增加美鈔供應量，而只係大量增加美債，理由係美債吃香，市場出現 flight for quality現象；即投資者拋售房屋、股票、黃金、商品等產品，將資金用作吸納政府債券。不過，當美債供應大於需求，債券泡沫係咪已响去年12月已爆破，而令美債勢將大跌？

銀行業仲有排搞

2008 年信貸收縮壓力只落喺金融市場上；2009年因企業破產、裁員漸漸影響實質經濟。美國12月份工廠訂單為1992年以來最大跌幅，信貸收縮令二手樓交投大減，服務業、零售業、飲食業衰退壓力亦在上升。例如美國三大汽車廠由二十四萬間供應商供應各種零件，即係話汽車不景氣除影響三大汽車廠嘅九十七萬工人外，亦涉及全球三百萬工人嘅就業問題。

2009 年經濟大方向係收縮，因廉價能源、廉價原材料及廉價勞動力推動全球經濟向上嘅時代結束，由1982年開始全球GDP高增長時期亦告一段落。因收縮所產生嘅財富消失壓力，會否令全球生活水平下降，以及令更多人失去家園、收入甚至捱餓？只有耐心觀察。

所謂財富消失效應，係有兩年時差。美國樓價從2006年年中開始下跌，而美國消費減弱由2008年年中才開始【圖】；2009年1月美國樓價仍在回落，代表 2009年全年甚至之後美國消費力仍唔會上升。分析界估計2009年下半年美國經濟會復甦，只有傻瓜先至信！美國商場2008年第四季空置率高達7.1％（第三季6.6％），估計2009年第一季進一步上升。銀行業分析員Meredith Whitney相信，2009年全球銀行仍需大量注資，即銀行業仲有排搞。

春寒料峭更勝冬

2001 年世界經濟開始下調，但格蛇同殊仔聯手阻止其下調，利用減稅、減息及美元滙價下跌，去造就2003到2007年繁榮期。2008年世界經濟又再下調，貝南奇雖盡九牛二虎之力去阻止，2009年再加埋奧巴馬，能否扭轉乾坤？例如利用公眾開支去抵銷私人消費下降，能否成功？恐怕美國呢架老爺車將步九十年代日本嘅後塵，再無法高速行駛矣。全球廉價資源及廉價勞動力時代，已因中國完成三十年改革開放而結束，美國已太老了，無力再打呢場仗。

2008 年內地樓市從火熱到冷清、從希望到失落。2009年又如何？專家認為將更理性、更健康。2008年樓市流行語——抄底，結果係抄咗好多次，仍然伊於胡底。冬天來了，春天還會遠嗎？面對2008年下半年內地樓市開始嘅「寒流」，唔少企業已捱唔住，春寒往往較冬天仲凍，何況樓價走喺經濟之後而非之前。近60％內地市民相信，2009年樓價仍將下跌，因為2009年上半年內地經濟仍好唔起來。利率回落雖然有助置業，但先決條件仲係市民收入能否上升？中國經濟正由出口導向轉為內需帶動，通常需時三年才完成轉型。由2008年起計要到2010年年底才完成三年過渡期，相信最快到2011年經濟才逐步上升（股市走喺經濟之前三到九個月，即2010年年中起步走。房地產走喺經濟之後三到九個月，即到2011年才進入「大地回春」期。

改革開放「後繁榮期」將現

天下久分必合、久合必分。戰後美國同蘇聯喺政治、軍事上曾二分天下，最後美國勝出，响政治、軍事上出現一國獨大局面。但喺經濟上自1971年美元危機後，世界步入「三頭馬車」時代（即美國、日本同西德）。今天全球經濟仍係三分天下（即美國、亞太區同歐盟）。過去經濟上最強大嘅美國正進入衰退期，至於歐盟相信只能獨善其身，依家正在冒起嘅係亞太區（日本除外）。美國經濟大蕭條由1929年開始，到1946年才完全走出來，前後十七年。呢次由2007年11月開始嘅美國次按危機，需時幾耐才可走出來（日本1990年嘅衰退到2003年4月才見底，共十四年）？

至於歐盟因實施三十多年福利政策，對歐洲企業嚟講，早已成為沉重負擔，福利開支正在拖垮歐盟內嘅大企業，雖然唔似美國企業面對大量破產及重組，但大方向仍係好也好不了、壞也壞不了。反觀中國透過三十年改革開放政策，正在脫胎換骨，不但經濟上完成同國際接軌，並吸收歐美制度之長，而避免走上西方國家福利社會之路。

中國唔似歐盟由多國組成令力量分散，中國喺政權上係完全統一嘅大國，估計到2030年中國嘅實力可漸漸接近美國（但人均收入相信仍唔及美國人）。未來三十年，我地將睇見改革開放嘅「後繁榮期」出現。

PIMCO亞洲區董事Brian Baker認為，亞洲區經濟復甦仍有排等，即2009年無法好起來。

經常面對「三個我」

我老曹為TVB拍攝特輯，共用咗三天時間才拍成《我的2008》，喺上周一晚上10時35分出街。上周二走在街上，唔少人同我老曹打招呼，話係我老曹Fan屎！真係有D做明星嘅感覺。

做我地呢行，經常面對「三個我」。第一個「我」叫做形象。過去因每天寫日記、經常開研討會又或者上電視產生嘅那個「我」，其實只係我老曹嘅形象，唔係真我。另一個「我」係太太眼中嘅我——既為食又唔肯做運動，食生果要老婆切好至肯食。當然還有另一個「自我」藏喺內心深處，例如少年喪父之痛及對自己嘅期望，許多時因無法做到自己嘅期望而產生挫折感，往往响人人興高采烈時自己忽然沉默，因內心深處仍有一份莫名其妙嘅空虛感。

人係十分奇怪嘅動物。因我老曹從未做過舞台劇，對舞台劇有份好奇。2007年9月同詹瑞文兄做過《富爸爸，笑爸爸》後，認為做舞台劇付出與收穫不成比例（例如編寫嗰份劇本，單係度橋已用咗六星期，練習又用咗兩星期，最後三天更天天喺舞台上走來走去，合共用去八星期，而演出時間只有兩小時，能博取嘅只係台下一千幾百人嘅歡笑！）。呢次拍電視台半小時特輯，由同TVB劇本組見面商討內容開始到拍攝，共用去三天，每天八小時都幾辛苦，但收穫唔錯。不過，我老曹覺得最好玩都係做投資——嗰份緊張、刺激、得失感，冇一個行業能及。