2008-12-30

美元唔死就美債死

12月29日，周一。恒生指數升144.34，收14328.28；成交219.5億元。12月期指升198點，收14318點。股市繼續個別發展。

2008年快過去。大部分分析員皆承認2007年年底（或2008年年初）嘅估計唔係錯到離晒譜就係睇得唔夠淡。2009年又如何？邊一行業可睇好？

2009 年嘅危機係美國債券市場。John Hussman博士估計，今年10月開始聯儲局透過寬鬆貨幣政策，逼令美元滙價及利率下跌，美國債券市值則上升26％。呢類人為性操控可維持幾耐？結果只有兩個：一、如美元滙價穩定，美國債券將大跌；二、如美債穩定，美元滙價將大跌；兩者唔可能並存。我老曹傾向相信係前者而非後者，即美元滙價2009年將穩定下來，美國債券價格則大跌。因為法國、中國同日本已投訴美國政府利用美元滙價貶值去增加競爭優勢；歐盟則威脅向WTO投訴。睇嚟唔使幾耐聯儲局再不能撳住美元滙價及利率，如此一來，美債有可能响2009年大跌！

09年二線股先係主角

調查所得，39％投資者相信2009年首季二線股可跌3-10％；53％相信低點已喺2008年10月（或11月）出現，呢次反彈估計可一直維持到2009 年年初；63％估計2009年指數升幅只有3％（2008年9月時估計2009年指數升幅大於10％）；54％相信2009年大企業唔會跑贏大市；39％估計2009年二線股先至係主角。大部分投資者唔再睇好金融股；至於能源股、原材料股同工業股，睇法相當分歧，有人睇好亦有人睇淡。以1930年代為例，大跌市後亦有一段日子係二線股表現較大企業出色。通常喺衰退中期（即熊市二期），二線股便會有出色表現；但熊市一期及熊市三期，二線股跌幅則較大。

2009 年你可以只做銀行存款，一於實行「無風險、無回報」策略；亦可一如我老曹動用30％資金喺股市中進進出出賺取微利，因企業資金成本下降，大部分消費者仍在消費。2007至08年過去呢十二個月內，細價股跌幅太大，令未來下跌風險大大收窄，例如電子股可實行「Buy the Dips」（過度被拋售者可吸納）。地產股短期痛苦、長期獲利，只要有耐性，總可等到美好明天。至於能源股同資源股，便「Buy Vale」（偏低時才吸納）。

2009 年股市嘅優點係，由於2008年10月27日恒指出現超賣，令未來股市下跌壓力減退。對沖基金通常「揸長多於拋空」，佢地响2008年大量退出，係 2008年股市狂瀉嘅部分理由。2009年雖然仍有對沖基金退出投資市場，但總數已唔及2008年，即2009年股市拋售力量正在消退。

2009 年信用卡呆壞賬情況卻令人擔心。2008年11月底呆壞賬率已升至6.6％（一年前4.6％），估計2009年及2010年仍會上升，因失業率續升甚至可打破歷史高點7.5％，為金融股帶來另一個隱憂。

瑞銀估計2009年金價可能見300美元一盎斯，主要係各國央行積極拋售黃金以獲取資金，去修復各大銀行嘅資產負債表。高賽爾首席分析師王瑞雷話，黃金嘅作用只喺避險，响經濟衰退初期，金價上升；一旦衰退長期化，金價亦難逃一跌。2008年黃金嘅需求來自印度、中國、日本及中東，隨住衰退進一步惡化，2009年呢D國家對黃金嘅需求一樣會減弱。

東京上周六宣布，在2009年3月結前日本政府再冇新嘅經濟刺激方案推出。雖然11月份數字顯示日本工業產量在急跌、失業率急升及家庭消費大減，但日本政府已筋疲力歇，只有任由日本經濟隨波逐流。

歐洲銀行衰嘢可分階段入賬

今年10月國際會計準則委員會（International Accounting Standards Board, IASB）同意歐洲銀行可讓資產負債表「好睇D」，即有問題嘅投資可分多年入賬，例如德銀可將320億美元有問題資產分階段入賬，令本應出現9.7億美元第三季稅前虧損轉為獲利1.2億美元；德銀股價喺10月30日上升19％。IASB監管一百一十三個國家嘅會計標準，依家礙於國際形勢，不得不將標準降低；雖然IASB主席David Tweedie為此事一度考慮辭職，但最終仍向現實低頭。IASB响1973年成立，由Financial Accounting Foundation負責管理，目的係提升全球會計水平（至今美國仍未加入；日本、南韓、印度及加拿大已答應加入，即三年後將有一百五十個國家採用 IASB標準。11月14日美國證監會宣布計劃所有美國上市公司响2016年12月15日前採用IASB標準，有一百間最大機構喺2009年率先採用）。今年10月8日法國、德國、意大利、英國及其他共市成員喺巴黎聚集，要求IASB放寬標準，以免歐洲銀行面對不公平競爭（因美國銀行仍未採用），响政治壓力下IASB只好同意。換言之，自10月份起各位所睇到嘅歐洲銀行資產負債表並未充分反映真實一面。上述決定令全球股市11月起回升，但同時延長金融股嘅調整期（因為衰嘢可以分階段入賬）；銀行股喺可見將來仍缺乏吸引力。

2009 年股市所面對嘅壓力同2008年相同，就係去槓桿化（deleveraging）。由於美國家庭負債已好大，去槓桿化好易引發消費負增長，各國政府正努力去阻止上述情況出現，能否成功仲係未知數，以免經濟由衰退變成蕭條。CDS有如一個50萬億至60萬億美元、不受監管嘅賭場突然破產，其威力已非一國政府可以阻擋。

上周路透／Thomson調查分析界對2008年第四季標普五百純利估計係負0.9％（7月1日估計升59.3％，10月1日估計升46.7％，上周估計仍升0.5％）。下周開始，標普五百企業將陸續公布第四季業績，恐怕純利估計將進一步下調。依家2009年第一季純利估計係負9.2％（10月1日估計升 25.7％，上周估計負8.5％），證明係今年10月1日起，分析界先至對前景轉為悲觀。

12 月份美國有銀士仍袖手旁觀，雖然同意股票已極之便宜，但只有35％有銀士曾入市吸納。69％同意股市會反彈，但佢地相信未來十二個月美國經濟將較家吓更差。今時今日揸茄殊者並唔急於入市，佢地寧可再等多十二個月。

鋼鐵業衰退期至少四年

《金融時報》Harris所作問卷調查結果顯示，大部分英國人相信呢次衰退會維持兩年，同財長戴理德嘅估計唔同，戴理德認為英鎊滙價轉弱及油價便宜可令英國經濟2009年下半年復甦。不過，大部分人都認為最快要2010年年底才復甦，只有18％相信2009年下半年可復甦。再根據英國特許人事和發展學會（Chartered Institute of Personnel and Development）調查所得，三分一英國人相信2009年將凍薪或失業，估計2010年失業大軍超過三百萬人，並要求英國商業部長取消最低工資以增加就業；依家英國失業人口已達一百八十六萬。雖然大部分英國人對前景悲觀，但42％表示佢地已作好較以前衰退期更佳嘅準備，相信可以捱得過。

雖然英國聖誕節零售好差，但周六及周日零售業反而較2007年同期升7％（唔少英國人皆等節後才掃平貨）。由於聖誕銷售欠佳，節後大減價反而吸引大量消費者。證明咗消費者變得精明，懂得節後購物而非節前。

隨住環球鋼鐵售價重返2001年水平，英國鋼鐵業重陷虧損期。家吓每噸鋼鐵售價676美元，估計明年7月亦只能重返750美元（2008年7月1160美元）。業內人士估計，下次鋼鐵業復甦期將由2013年開始（上一次鋼鐵業衰退期由1979年開始，並長達四年。過去一百年鋼鐵業盛衰循環周期中，衰退期皆長達四至五年。呢次高峰喺2007年，全球產量十三億四千萬噸；2008年略減……。上一次1979年高峰期，全球產量七億四千六百七十萬噸，1982年減至六億四千五百六十萬噸，要到1998年才重返七億七千七百二十萬噸）。

倫敦樓價2008年平均回落8.7％，但East Anglia及倫敦東南部跌幅較大，達12％以上。展望2009年，相信倫敦樓價仲會回落12％或以上。根據Halifax報道，2008年12月份英國全國樓價較去年高峰已回落18.7％，雖然利率下降3厘，到2厘，而且英鎊大跌25％，但英國樓價跌勢仍在加速。

今年夏季開始至今，英國商業樓已大幅回落25％。IPD地產指數急速下跌，比較住宅樓價嘅跌幅，有後來居上之感。隨住空置率大升，擔心2009年商業樓價仍無法回升。樓價下跌亦令家庭用品業務大受影響，由傢俬、電器到電子用品等需求，無一不走下坡。

最近三天內地A股有二十八家公司限售股面臨解禁，其中二十二家就喺本周一，周二五家、周三一家。短期A股面對嘅大小非減持壓力好大。

2008 年A股出現罕見嘅大熊市。「投資者收益情況網上有獎調查」結果顯示，82.56％投資者2008年喺A股市場出現虧損，其中29.76％虧損達50％至 70％之間；24.64％虧損喺20％至50％之間；更有22.31％虧損達70％以上；以上三個群體佔被查者76.71％。不過，仍有11.99％表示 2008年獲利10％以上；3.65％獲利20到50％之間；2.08％獲利50至100％；0.81％獲利100以上。上述調查證明我老曹過去提及股市二八分正確（即只有20％投資者喺股票市場獲利，80％皆虧損）。大熊市中仍有不足溫巴仙投資者獲利100％以上，證明喺大熊市中一樣可以賺大錢，問題在於策略運用。

A股將進入猴市

持股時間方面，有26.38％持有十二個月以上；30.15％持有六到十二個月；17.4％持有三到六個月；11.74％持有不足三個月；純短線只佔 9.24％；更有4.4％被調查者表示持股時間响一周之內。2008年虧損最大係堅持長期持有者，證明「高位站崗」嘅投資者慘遭套牢；獲利者大部分係持有一個月之內或一周者。2008年A股贏家都係短線操作者。上述結果亦證明我老曹理論正確：响熊市中作長期投資係致命傷。投資並冇長線、短線之分，喺唔適當時刻做長線投資，係絕對錯誤嘅決定！投資應論勢而行及重視策略運用，與長線、短線無關。過去我老曹最長線嘅投資係由1982年起每月買一金幣，到2002 年（共二十年）仍然虧損；最短線嘅投資係2007年8月買入二線股、10月出售，短短三個月獲利100％以上。股市內只有贏家同輸家，冇大戶與散戶之分；賺錢不在乎長線、短線，只在乎掌握大趨勢。順勢者昌，逆勢者亡。

2008 年A股市場盡悲情，指數由2007年10月6124點一直跌到2008年11月1664點，跌幅達72％，兩年總市值縮水22億元人民幣，令中國股市位列全球股市跌幅第三名，僅次於2004年跌幅79％。A股自2004年下跌十四個月後回升。呢次跌市共十二個月，係咪已見底仲未肯定。2008年11月28 日止中國證券登記結算公司公布，A股共有賬戶一億二千萬，22萬億市值蒸發，按流通股計共8萬億元人民幣，即每戶平均損失13萬元人民幣。上述戶口，其中四千萬戶响2007年才入市，另二千萬戶通過基金，即有六千萬新戶口响2007及08年加入，依家都成為損手者。

以 1664點計，A股基本因素已到咗有投資價值嘅水平，加上政府出台4萬億元人民幣刺激經濟計劃，理論上A股有條件响2008年結束熊市。只係「融冰」時期剛開始，過程會非常曲折，相信A股仍有一段日子响低位牛皮，才能重建投資信心。情況有D似1982年12月，當年恒生指數已見底，但因香港主權問題談判未有結果，令投資者十五十六。當年森池兄所創「鹿市」論（心如鹿撞），即既唔係熊市又唔係牛市，股市只喺炒上炒落，到1984年7月，港股牛市才開始。內地專家認為，2009年A股係「猴市」，上蹦下跳，相當於香港1982年12月至84年7月股市炒上炒落。股民開始嚼香口膠──博反彈，但用香口膠所吹嘅波波皆唔大。市場需要三個月到九個月觀望期才可決定升降。最樂觀估計，A股市場要到2009年下半年才轉勢，上半年將面對上市公司業績全面下滑甚至出現虧損，而令重心下移，但政府救市政策層出不窮，令股市有跌唔落去嘅感覺。2009年A股形成猴市嘅機會甚大。