2008-6-17

對沖基金挑戰畢非德

　　6月16日，周一。恒生指數上升437.39，收23029.69；成交566.79億元。6月期指升592點，收23038點。招商局國際（3968）升4.4%，見32.4元；中遠太平洋（1199）升4%，見12.88元；中國海外（688）升3.8%，見13.54元；中石化（386）升3.4%，見7.51元；國泰航空（293）升2.1%，見15.6元；國航（753）升2.2%，見5.01元；太平洋航運（2343）升5.6%，見11.4元；中海集運（2866）升6.7%，見3.36元。

越南唔會令中國引起併發症

　　花旗推介復星國際（656），因公司宣布以38億元人民幣購入天津鋼鐵47.5％股權，估計今年每股獲利52.3仙，上升46％，O九點九倍；明年每股獲利76.3仙，上升45.8％，O六點八倍。

　　玉米價格升至近8美元一蒲式耳，因美國存貨減少53%，降至十三年內低位。過去兩星期玉米價格升33%，見7.915美元；過去一年升85%。米價亦升2.2%，見20.74美元一百磅，仍較4月24日高價25.07美元有一段距離。

　　大豆亦升1.2%，見15.79美元一蒲式耳；小麥升1.8%，見8.9775美元一蒲式耳。

　　歐洲5月份通脹率升上3.7%（4月份3.3%），係1992年6月以來升幅最大；食物價格升6.4%（4月份升6%）；能源價格升13.7%（4月份升10.8%）；勞工成本第一季升3.3%。歐洲央行總裁揚言加息。

　　英國四大市值銀行柏克萊股價升13%（過去一年跌32%），該行計劃兩星期內宣布出售40億英鎊市值股份畀主權基金；今年撥備17億英鎊，比較皇家蘇格蘭59億英鎊及HBO28億英鎊為少。

　　全球最大保險集團AIG將由惠林斯特出任CEO取代沙利文，因6月6日美國證監會宣布調查該集團一直低估次按危機所帶損失。

　　滬深三百跌0.9%，收2952.24。

　　越南危機爆破以來，越南股市由去年10月10日1110點回落到今天378點，跌幅66%，同期滬深三百A股指數跌幅也超過50%，同屬今年全球最差股市之一，但專家紛紛表示睇唔到越南會令中國引起併發症。

　　越南盾危機產生成因係過度使用外資（1987年越南實施外國投資法，採取極為寬鬆引資政策，提供四免四減稅收優惠），並引發通脹。「趕印超中」鼓聲中，國際熱錢去年紛紛湧入越南，增長幅度達40%以上，形成極大流動性，引致股市樓市大漲。

　　雖然A股同越南市場基本上並唔同，雖然中國A股亦在下跌，跌幅好大，而且中國同越南都係新興市場國家，但兩者模式有相似地方，亦有唔同地方。中國經濟處於開放過程中，但同時存在自我封閉性，例如外資不能投資A股，經濟仲有好強計劃經濟模式。

　　此外，越南盾在貶值，人民幣在升值。越南6月10日將利率調升至14厘，6月11日仍將越南盾兌美元貶值2%；反而人民幣面對升值壓力，人行提升存款保證金率目的係打擊通脹，唔係保持人民幣價。何況中國板塊較越南大得多。

　　內地經濟學家譚雅玲認為，越南股市大跌主因，唔係國際資金逐利所造成，因為流入越南外資唔會好大；當然亦不能完全把熱錢因素排除掉，只係其他因素佔更重要比重。例如越南資源匱乏，容易受到資源進口價格衝擊，加上經濟快速發展企業生產鏈相互需求，貿易逆差、管理唔夠嚴謹、節奏速度把握得唔好等，再加上股市快上快落，才造成今天尷尬局面。

　　不過，越南板塊同中國、印度板塊相比仲細好多，影響十分有限。

　　日圓已跌至四個月內低位，利差交易活動能力大增，支持住英鎊及紐元價，同時亦支持日經平均指數上升。

關公都有對頭人

　　對沖基金大淡友Doug Kass揚言拋空巴郡股份，理由係畢非德稱霸股市五十年，人人當佢係投資界「莎士比亞」，但Kass相信「畢非德永遠是對的」日子已成過去，佢旗下Seabreeze Partners（只做拋空）2005年1月成立，到今年4月上升40.7％，同期標普五百升15％。依家每股巴郡132,990美元係咪太貴及值得拋空？Kass分析巴郡主力可口可樂、富國銀行、卡夫、美國運通、華盛頓郵報等，表現唔見得特別出色；今天巴郡股價最少已偏高10％（因可口可樂已跌7％、富國銀行回落12％、卡夫跌2.3％、美國運通跌超過12％，冇理由巴郡股價只跌5.5％）。呢回真係曹操亦有知心友，關公都有對頭人。Kass挑戰畢非德，結果一定精彩。

　　美國出現次按危機時，金融市場宣揚「decouple」（分道揚鑣）論；去年10月我老曹一再反駁此說法。八個月過去，道指由去年10月11日14198點跌至今天12307點，跌幅13.3％；滬深三百指數由去年10月17日5891點跌到2952點，跌幅超過50％！《信報》另一作者畢老林話，decouple論已徹底粉碎，而且跌幅更大。

　　點解去年10月我老曹反駁decouple論？因為美國經濟係成熟型，如油價、食物價格上升，對美國CPI影響唔大（例如今年5月CPI升幅亦不外4％）；反之，中國、印度係新興市場，油價、食物價格上升可令兩者CPI升幅達8％以上……。由於美國CPI壓力唔大，所以聯儲局仍可採寬鬆貨幣政策去緩和美股跌幅；而中國同印度卻須採取從緊政策，自然放大股市跌幅。

成年人的割禮

　　本港貨幣政策受制於美國，而H股及內地股份交投已佔港股50％以上，故恒生指數跌幅由去年10月30日31958點跌到最近23029點，跌幅28％，略大於美股，卻較滬深三百跌幅細好多。一如去年分析，呢次跌市，H股同內地股份跌幅較本港股份大好多。

　　一旦全球股市下跌，新興市場跌幅必較成熟市場大；一旦上升，新興市場股市亦必較成熟市場為大。任何國家或地區經濟由新興市場走向成熟市場，都難以避免一大跌，有人戲言此乃「成年人的割禮」（猶太教儀式）。滬深A股家正進行「成年人的割禮」，經此一役，內地股民心智才成熟，一如1973至74年香港。至於滬深A股底邊度？事前冇人可預知，例如1973年3月恒生指數1774點時，有邊個諗過O可由一百零二倍跌至八倍，見150點？呢方面人人只能做事後孔明，因為股市買賣70％係理性分析時段，30％係非理性行為。

　　非理性期，貴貴都有人追、賤賤都有人沽，都係莫估底罷啦。1974年7月我老曹事前以為恒指由1774點跌至450點，應該見底！結果恒指跌至150點，令我老曹損失慘重。寧買當頭起，莫買當頭跌，一天股市未出現當頭起，仍應持盈保泰，因為「溝淡溝淡，愈溝愈淡」。

　　一百五十年前，當第一口油井開始噴油，至今人類向地球抽走一萬億桶石油，估計仍有一萬億桶存量。反之，美國政府負債由一百五十年前7500萬美元上升到2007年54萬億美元。油價即使升上139美元一桶，仍未睇到美國人真正節省用油！照依家趨勢睇，五十年後石油世紀結束，到時人類又點？甚至煤及天然氣亦唔係取之不盡，一百年內人類如無法搵到新能源，到時才係真正能源危機。人類又能否重新適應十九世紀式生活？

　　我地呢一代人十分幸運，生於「能源充足期」；我地下一代差一D，將生於「能源短缺期」（第一次石油危機1973年出現）。最悲慘係我地孫仔，佢地必須面對「冇能源期」（除非五十年內科技有新突破）。