2008-06-04

熱……錢會繼續

　　6月3日，周二。恒生指數跌455.6，收24375.76；成交838.57億元。6月期指跌414點，收24239點。

　　今天中國聯通（762）跌14%，收15.88元，因瑞信及大摩降低評級；網通（906）跌13%，報23.6元；中國電信（728）跌13%，報4.95元。中石油（857）跌4%，報11元，雷曼兄弟降低評級；中石化（386）跌3.4%，報7.87元；國壽（2628）跌3.1%，報31.3元；中國鋁業（2600）跌4.3%，見13.28元；永隆銀行（096）升3.6%，報152.7元。

賭場股進入高原期

　　本港5月份住宅銷售減少31.1%，價格則穩定，只有小部分地區售價回落。以單位計減少25.5%，至八千二百八十一間（4月份減少5.1%）。

　　美國最大豪宅發展商Toll Brothers宣布第二季虧損9370萬美元（去年同期獲利3670萬美元）；過去十二個月股價回落27%，成20.96美元。平均每個豪宅售價534000美元，較一年前跌26%（較上一季跌7.9%）。

　　滬深三百跌0.32%，收3614.11。

　　澳門賭博業今年第一季出現61％平均增長後，第二季進入放緩期，4月升幅只有40％，5月更只有25％。銀河（027）公布今年首季收入只升6％，相信第二季情況更差。睇連賭場股亦面對高原期，收入唔係冇增長而係增長率放緩，理由係內地開始限制居民到澳門旅遊次數，尤其係廣東省，已改為單程而非多程（即每次都要重新申請）。

　　中金公司首席經濟學家哈繼銘表示，今年越南多項經濟指標已亮起紅燈，貨幣危機一觸即發。5月份通脹率已達25.2％，5月19日央行將基準利率由8.75厘調升至12厘，銀行貸款利率上升到18厘，仍遠低於通脹率，未能有效控制通脹預期。今年1月至5月貿赤144億美元，外債規模已達240億美元，相等於GDP 30.2％，政府財赤已超過GDP 5％危險線。越南盾今年3月至上周五兌美元貶值2.7％，十二個月期貨較現貨低30％；越南股市今年跌55％。上周惠譽將越南主權評級展望由「穩定」改為「負面」。依家越南情況已同東南亞國家1997年面對亞洲金融危機前差唔多。

　　《廣州日報》報道，4月份中國外儲備增長744.6億美元，扣除貿易順差及外商直接投資後，不能解釋外流入高達501.8億美元。呢500億美元相信有唔少流入內地房地產及股市，部分則存入銀行。換言之，流動性過剩問題到今年4月仲未解決。由於投機者認為人民幣可見六算，人民幣出現1美元兌6元人民幣前，熱錢仍會流入，估計家熱錢規模已經達6500億美元。冇人知道呢筆資金幾時會流出，一旦出現，將嚴重威脅國內經濟同金融市場穩定性。

　　雖然內地勞工成本一再上升，但相較其他國家仍有優勢（印度勞工成本雖然較中國便宜，但勞工技巧差好多），令中國出口增長率下降唔係因為勞工成本上升，而係因為運費急升！過去十年油價上升十倍，令近期海上運費急漲，CIBC World Markets主要分析員Jeff Rubin話，運費令中國貨競爭力迅速下降！今天由上海運一個四十呎標準箱貨櫃到美國東岸收費8000美元，係一年前四倍，上述情況令中國鋼鐵產品出口到美國今年首季已較去年同期減少20％。運費急升才係中國經濟面對最大難題！

　　UBS估計，半導體行業今年7月至9月將見底，10月至12月回升。3月10日開始上升納指近日已見頂回落。PHLX半導體指數已由5月8日起下跌，睇連半導體股短期亦不宜睇好，尤其係生產手機公司面對壓力更大。

LED照明市場前景無限

　　迪士尼世界已改用LED照明，節省大量電費。美國時代廣場採用LED照明後，亮度增加一倍而電費減半。美國大城市重要建築物愈來愈多採用LED照明。

　　據市場調研機構iSuppli and Strategies Unlimited公司調查報告顯示，2011年LED市場總額將達到90億美元，主要增長點係新興應用所推動高亮度LED產品需求，用於汽車內外照明以及一般照明。估計高亮度LED驅動晶片2011年將超過19億美元。

　　LED有超長壽命（通常可達五萬小時或十一年），係依家市場上任何其他照明技術無法企及；傳統白熾燈只有一千小時、小型熒光燈八千小時。加上LED燈管功效較傳統白熾燈高五到十倍，即1W電功率LED燈管發出光亮度約一百流明，傳統白熾燈泡只發出十流明。從節能角度睇，LED燈管用電量只及燈泡十分一。其次係顯色指數（CRI）接近90，較我地熟悉霓虹燈更高，加上體積小巧，未來前景無可限量。

　　恒生指數由2003年4月25日8331點升上去年10月30日31958點，上升283％，牛市已完成。熊市一期由去年11月1日回落到今年3月18日20572點，跌幅35.6％後，反彈至5月5日26387點，回升28.26％而完成。今年5月6日開始進入熊市二期，出現個別發展及個別行業盛衰（或叫牛熊共舞期）。大部分散戶呢段時期表現都唔出色，因為揀股需要十分專業知識支持。

　　去年11月1日股市回落，理由係貝南奇希望黃金歲月（Goldilock）受次按危機影響，再無法維持；三低一高（低利率、低通脹率、低失業率、高GDP增長率）時代結束，變成三高一低（高通脹率、低GDP增長率，下一步將是高利率及高失業率）。

　　依家日圓利差交易最多係歐羅（沽日圓歐羅），令歐羅4月一度突破1.6美元。近日歐洲通脹率上升，歐羅後市難以樂觀，一旦利差交易進入套現，將係歐洲「潘朵拉魔盒」打開日子，小心引發一系列連鎖反應。表面上平靜金融市場，其實危機處處。

　　1952年美國家庭流動資產係負債250％（即手上現金或隨時可變現投資達負債250％），到去年卻回落到70％（即手上現金或隨時可變現投資係負債金額70％）。美國家庭手上流動資產減除負債最高峰係1990年，達淨流動資產1萬億美元以上；最差係2006年，為淨負債3萬億美元。1990至2006年美國到底發生乜事，令美國家庭由淨流動資產變成淨負債？就係因為次按日漸流行，愈愈多人借錢買樓，美國人從樓價上升中賺錢去消費。到2006年下半年美國樓價唔再上升，去年出現次按危機，鐘擺又由一邊擺向另一邊，長達十七年，由次按支持引發樓價上升潮結束，各位信唔信短期內可以解決？加上美國戰後嬰兒潮開始進入退休潮，愈愈多美國人賣樓套現。從呢個角度睇，美國樓價由2006年下半年開始調整唔會不久將來結束。

　　今年首季美國住房價格較去年同期回落3.1％，部分地區如加州及內華達州跌幅更達8％，未售出二手樓相等於十二個月銷售量。利率向下時尚且如此，第二季情況相信會進一步惡化。

　　索羅斯認為，英國樓按情況較美國更差，依家先開始回落，對英國銀行影響較去年對美國銀行影響更大。英國家庭負債係個人收入148％（美國係125％），而英國金融業佔英國經濟8.5％（美國佔7.5％），加上英國政府決定向外國人抽稅，令唔少高收入外國人打算離開倫敦去蘇黎世，將進一步推低倫敦樓價。

北海道起間屋就做地主

　　十九世紀美國政府為發展西部，訂下某年、某月、某日只要你將一幅地圍起，上面起間屋並決定度居住，就可向政府登記幅地係你！形成成千上萬人由美國東部湧向西部。今天同樣條件出現日本北海道，自1998年起日本人口老化，居民向大城市遷移，令北海道人口進入負增長（日本2005年起人口才開始負增長）。北海道冬季氣溫係攝氏零下二十度，太陽下午三時三十分便落山，而主要行業如農業及漁業面對日本市場逐步開放亦走下坡。小城士別人口過去十年減少10％，依家只有五千八百八十九人，為吸引日本人移居該小鎮，該鎮提供二十八幅土地，面積由四百至四百八十五平方米，只要上面起樓及入住三年，便可向小鎮申請，一經批准幅地便屬於你！上述計劃反應良好，唔少到退休年齡、居住東京日本人，都打算賣掉自己東京一百一十平方米房子，把資金用作興建房屋，移居北海道士別呢個小鎮，北海道其他小鎮亦計劃學習。由於北海道就業機會唔多，上述計劃只能吸引大城市內準備退休人士移居，北海道本身年輕人仍打算到大城市搵食。

　　Oppenheimer & Co銀行分析員Meredith Whitney去年曾提出警告，美國樓價回落遲早影響美國銀行。佢最近接受彭博TV訪問認為，另一場信貸危機快將開始。呢次係美國消費項目再次打擊美國銀行業，理由係銀行將信用卡貸款證券化後市場出售。過去消費者唔使擔心信用卡還款能力（因樓價上升，未能支付信用卡貸款亦可轉為樓按──本港亦漸漸流行矣）。信用卡貸款不但息高，而且呆賬率唔高。依家樓價回落，美國人信用卡貸款再唔能夠輕易轉為樓按貸款，8000億美元信用卡貸款點樣處理？

　　高油價不但推高煤價，相信亦可推高天然氣價。Conoco ─BP計劃由阿拉斯加北部斜坡興建一條天然氣管到加拿大阿伯達省油砂區，以阿拉斯加天然氣去蒸餾加拿大油砂，生產石油供美國使用！

　　中國亦興建一條長九千公里輸氣管，將天然氣由土庫曼（前蘇聯共和國）經中亞細亞，一直到上海。

　　最近中國簽約向北非卡達購入二十五年天然氣，代價600億美元，由2011年起每年將三百萬噸液化天然氣運到中國（未來每年增加7％）。

天然氣將成人類主要燃料

　　巴西離岸大西洋海床最近發現「Sugar Loaf」氣田，相信係全球最大；仲有俄羅斯巴倫支海（近北極）Shtokman計劃，以及澳洲西北部近岸計劃及美國洛磯山西部計劃……。

　　估計不久將來，天然氣將成為人類另一重要燃料。

　　2006年天然氣價格一度見16美元，之後跌至4美元，最近重返8美元，估計可見11美元。以氣價11美元計，仍較油價便宜好多。天然氣最大缺點係運送唔方便以及液化成本昂貴。油價高見135美元後，天然氣吸引力便大增。石油中東開採成本每桶只係6至7美元，今天石油售價對中東產油國而言係一本二十利（每1元成本獲20元）。

　　近年人類消耗天然氣增長率為石油一倍，或遲或早天然氣將供應汽車及輪船使用，汽油只留畀飛機用。2006年油╱氣比率（同一熱量單位）係四，即用油產生熱量成本係天然氣四倍；2008年有關比率係十一，即用油產生熱量成本為天然氣十一倍。成本優勢漸漸抵銷天然氣運送唔方便缺點，各國都投資輸氣管或液化設施。

　　商品價格上一高潮1974年，1981年只係略高於1974年（主因係美元貶值，但扣除通脹因素仍唔及1974年）；低潮係1998年，大幅上升由2002年起步，2008年進入第七年大升期，小心七隻肥牛故事。推高商品價格重要因素係愈來愈多國家採用負利率政策，商品價格2002年起急升，理由係2002年起連美國亦加入負利率。去年8月至今過去一年油價急升一倍，唔係因為需求急升，而係美國再次實施寬鬆貨幣政策。估計低利率期只可維持六個月，今年底開始利率又會再回升，明年起美元利率將十年內重返4厘或以上。