2008-06-05

貝南奇放棄撐樓價

　　6月4日，周三。恒生指數跌252.51，收24123.25；成交789.16億元。6月期指低水，跌334點，收23903點。中海油（883）跌4.1％，收13.26元，因原油價跌2.7％，收124.31美元。中國神華（1088）跌4.9％，見33.9元；兗州煤業（1171）跌8.9％，成15.54元，因山東省政府宣布奧運期間禁止煤價上調。中聯通（762）跌4.3％，見15.2元，因麥格理降低該公司評級，理由係重組方案下中國網通（906）受益更多。

美貨幣政策有變

　　日本企業今年第一季資本開支（唔包括軟件）減少5.3％，係連續第四季減少資本投資，因企業第一季純利較去年同期減少17.5％。甚至豐田汽車亦宣布減少投資，因美國方面銷售並唔理想。

　　英國消費信心跌至2004年5月以來最低，只有69點，估計周四英倫銀行維持利率不變。英國4月份通脹率3％，可阻止英倫銀行減息，即使4月份樓價下跌2.5％，係1991年以來最大跌幅。

　　滬深三百指數跌1.86％，收3546.92。寶鋼跌1.9％、馬鋼跌2％，因中國鋼鐵協會要求會員將鋼鐵價降至5月12日地震前價格。紫金礦業跌3.3％、中金跌4.1％、山東金礦跌4.3％、雲南銅礦跌1.9％、江西銅跌3.1％，因金價跌1.2％。內地招商銀行跌3.1％，因標普調降其評級，指招行決定收購永隆銀行（096）對前景不利。

　　畢巴頓認為美股今年3月見底，今後將進入上落市，因此應開始選擇性投資。佢一度係大摩首席投資策略員，並1999年成功預測科網股泡沫爆破而名噪一時，可惜2004年5月曾預測油價49美元見頂回落而令名氣漸減（股市冇長勝將軍）。依家佢管理17億美元市值Traxis Partners對沖基金，今年跌價4％；呢次佢預測水準又如何？

　　貝南奇注意力已重返通脹，令美元價獲支持（但相信難以大好）。2002年至今美元兌歐羅失去40％市值，兌日圓失去26％市值；今年4月由1.6美元兌1歐羅開始，美元進入企穩期而非上升期；美元兌歐羅已回升3％、兌日圓回升8％。紐約富國銀行貨幣分析師Vassily Serebriakov指出，貝南奇咁明確表述都係第一次，代表美國正面對通脹壓力，過去寬鬆貨幣政策告一段落。加拿大豐業資本高級貨幣分析師Stephen Malyon認為，貝南奇言論代表美國貨幣政策有變，即使房屋價格繼續回落，寬鬆貨幣政策亦已告一段落，以免影響美元外市場表現。睇高油價壓力下，貝南奇不得不放棄挽救美國樓價。

　　4月份美國新造樓宇按揭只有五萬八千宗（3月份六萬四千宗），去年同期係十一萬三千宗。美國樓價仍在回落，呢次經濟能否完成軟陸，抑或係滯後傾向，仍然木宰羊。我老曹只知唔肯定（uncertainty）日子愈維持得耐，日後脫離衰退便愈困難。

　　最新《瞭望》周刊認為，中國將進入高CPI增長、高工資加幅及高GDP增長期。4月份中國CPI上升8.5％（首四個月升8.2％）。5月12日至18日地震後，國內四種鋼材綜合平均價上升11.4％（較去年同期升47.3％），政府已下令鋼價重返5月12日前水平。第二個矛盾係煤電油運供求緊張，煤被下令唔准加價，年初發生雪災影響至今仍未復元，最近更面對嚴重地震及國際市場漲價壓力。中央黨校經濟學部教授韓保江認為，應實事求是咁修訂今年CPI目標。

　　經濟過熱已敲響越南金融市場警報。一年半前越南係國際游資青睞新興市場，越南股市一度係全球最火爆市場之一。今天卻惡性通脹嚴重、股市狂瀉，越南盾幣值告急。經常賬持續逆差、低外儲備、資本專案自由化、金融市場開放速度太快組合，通常伴隨以貨幣危機告終。1997年前東南亞國家係咁，今天越南亦係咁。德意志銀行預測今年越南盾將貶值30％或以上。2006年越南股市上升145％，2007年頭兩個月再升51％，令2006年初市值10億美元股市升至150億美元。去年1月越南股市O高達七十三倍，同年3月初IMF向越南發出警告，但越南政府遏制通脹問題上優柔寡斷，令房地產出現熱潮。越南今年5月份CPI升幅達25.2％，政府才速速把利率推高到12厘。家十二個月遠期外交易顯示，越南盾一年內跌幅達30％。

美國最叻將損失轉嫁

　　另一方面，印尼6月2日宣布，5月份CPI上升達10.4％，為二十個月來最高點；繼越南之後，印尼亦進入惡性通脹期。此外，泰國宣布5月通脹率為7.6％，創近十年高位。市場人士擔心越南可能係亞洲倒下第一張骨牌，1997年亞洲金融風暴可能重臨。越南已向外儲備充足中國同馬來西亞尋求協助。熱錢加速流入令當地股市及房地產價格上升；一旦熱錢流走，又可令股市及房地產急跌。中國雖然外儲備豐厚，1990年日本何嘗唔係咁？

　　美國次按危機下，導致美元價急跌及利率急降，資金向全球流竄，令中國、日本等持有大量美元資產國家受損。一旦次按危機穩定下來，過去流向全球美元又回流美國；透過一放一收，美國便利用其他國家損失去補貼美國居民房地產上損失；透過損失轉嫁，美國人損失便大大減低。呢方面美國已係老手！

　　羅傑斯長線睇法，我老曹基本上同意。十九世紀係英國人、二十世紀係美國人、二十一世紀係中國人。二十世紀我地見到英、美之間勢力交替，二十一世紀我地亦見到中、美之間此消彼長。值得注意係，美國由1900至2000年經濟亦唔係直線上升，一樣有衰退甚至蕭條（例如1932年），並經歷兩場世界大戰……。至於羅傑斯相信商品價格進入超級大牛市，呢方面我老曹則有保留，而且唔同意商品牛市可一直延長到2020年。我老曹反而認同索羅斯睇法，即商品價格已出現泡沫，只係唔知幾時爆破。

　　印尼宣布減少汽油補貼，令零售價上升33％；馬來西亞亦宣布減少補貼。台灣新總統上任後宣布取消汽油價格管制，相信奧運之後北京政府亦將宣布減少（甚至取消）汽油補貼，讓汽油零售價可反映原油價，令石油需求明年起減少。

農產品難長期大升

　　股市方面，越南已出現大熊市，印度情況令人擔心，中國亦唔例外。如果你1929年投資美國股市，要到第二次世界大戰後才打和，因此長線睇好係一回事，短期分析又係另一回事，兩者不能混為一談。

　　油價影響肥料價、運費及生物燃料價。美國2006年對農產品補貼達134億美元，歐盟達420億歐羅（650億美元），仲有日本、南韓……。上述情況未來十年唔會改變。OECD國家補貼令呢D國家農產品生產過剩，亦令新興國家農民受苦（穀賤傷農）。例如歐盟牛油、葡萄酒甚至因生產過剩而須倒掉去維持價格或賤價出口。我老曹唔信農產品價格可長期大升理論！

　　輕工業產品自1980年中國改革開放政策後，上述產品售價過去二十八年接近不變。近年中國減少出口退稅，加上勞工成本上升，令印度將成為世界另一生產基地，因此輕工業產品亦漲不了價。

拋售石油股吸納煤礦股

　　可以漲價產品只有礦產及能源。至於農產品經三十年跌價後，近五年才大幅上升。礦產及能源如俄羅斯大力開發資源，亦可壓抑價格上升。2002至08年商品漲價主要理由係美元供應大增，美元價下跌及利率下跌因素大於商品出現短缺，一旦美元價企穩及利率止跌回升，全球通脹問題明年可漸受控制，因為全世界未開發資源仲好多。

　　可見將來升幅較大估計係煤，預計2008至2030年全球煤消耗將上升74％，今年煤首次出現供不應求二千五百萬到三千五百萬噸；估計印度2030年煤需求係2008年四倍，達四百六十萬噸；中國到2030年煤需求亦係2008年兩倍。依家情況有D似五年前石油，估計明年煤價係130美元一噸、2010年可能係250美元一噸……。今時今日應拋售石油股吸納煤礦股，其次係天然氣股。

　　我老曹亦唔多相信「滯脹理論」。同七十年代唔同，二十一世紀OECD國家工資漲唔起來。我老曹只相信「此消彼長」論，即四金磚國興起、美國同歐洲步日本後塵。美林證券分析員David Rosenberg亦抱持呢個觀點，即未來投資應集中四金磚國，一如二十世紀資金流向美國；至於幾時進入四金磚國又係另一回事。2003至06年美國透過樓價上升去保持消費，對唔住，呢個遊戲2006年7月已停止。2001至06年美國樓價平均升50％、GDP只升30％、CRB商品指數升40％，而標普五百指數只能重返2000年水平……。到去年次按危機爆發後，透過減息及美元貶值，樓價下跌影響並冇擴散，只影響銀行、金融、住房建造商等。今年5月至8月美國可透過退稅頂住美國消費，今年第四季又如何？即使美國可逃過衰退（GDP連續兩季負增長），未來GDP升幅有幾多？冇樓價上升呢個巨大引擎推動美國經濟又點？CDO過去被視為「資產」，家變成一項「負擔」；貝爾斯登、花旗、美林、大摩等紛紛大幅撥備及集資，最近雷曼兄弟亦希望集資40億美元。

　　美國「此消」已肯定；反之，中、印「彼長」一如青少年性格，極唔定性，會否出現Boom & Bust？

　　戰後日本決心成為世界另一經濟強國，1945至65年經過二十年生聚後，由1965年起至1980年GDP出現爆炸性上升，由910億美元升至11000億美元，十五年內GDP上升十一倍。八十年代GDP仍能保持每年5％上升，1987年外貿盈餘達877億美元一年。G7開會逼日圓升值，日本政府抗拒日圓升值而濫發鈔票，引發泡沫經濟，令地價由1987至90年上升兩倍然後爆破，並陷入十三年衰退，2003年才逐漸復甦。

　　中國1949年內戰結束後，新中國成立並實行共產主義制度，搞三十年，可以講一塌糊塗。1978年鄧小平提出改革開放政策，以市場經濟制度取代共產主義制度，最近二十年GDP保持每年10％以上增長，2005年7月開始人民幣有秩序地升值。1998年開始房改政策，亦令內地樓價過去十年狂升，但往後路點走？中國GDP增長率會否由過去二十年平均每年10％，下降到未來十年平均每年5％？世界上冇一個國家GDP可長期保持10％速度上升（香港自1987年起GDP增長率由過去二十年10％下降至依家5％）。

　　全球流動性過剩已引發初級產品價格大幅上升，加上國內勞動力成本長期被低估壓力漸釋放，令通脹成為中國經濟最大風險，其中又以能源價格最為突出，如果唔解決，將影響中國經濟未來健康發展。

　　國家發改委員會綜合司司長石剛表示，夏糧生長情況唔錯，中國糧食方面並唔擔心，包括豬肉、菜價都在回落。但上游工業品出廠價卻一直呈持續上升之勢，國際原油價已站於130美元水平，內地原油成品油價格倒掛、煤炭電力價格倒掛等問題，才係今後價格矛盾所在。央行金融研究所宏觀經濟分析小組建議繼續實施從緊貨幣政策，去壓抑內地上游工業品出廠價上升。

　　中國政府宣布6月13日起取消部分植物油出口退稅，包括豆油、花生油、橄欖油、棕櫚油、葵花油、棉子油、椰子油、芥子油以及人造牛油等。外國人連農產品價上漲亦話係中國因素，事實上中國農產品方面除玉米外，基本上自供自足，毋須依賴進口。依家中國大城市大量興建運輸管道，未來集體運輸系統才係中國大城市主流，而非人人汽車上班！相信當管道建成後，中國對汽車需求反而下降（一如本港地鐵建成後情況）。未來中國對電力需求將大於汽油，煤係主要發電燃料，相信可以睇好。