11月6日，周四。恒生指數跌1050.12，收13790.04；成交482.5億元。11月期指跌1043點，收13730點，期指仍然倒掛。滬深三百指數跌2.46％，收1649.78。
英倫銀行大手減息1.5厘，歐洲央行則減半厘，睇嚟英國同歐洲經濟俱杰過鑊粥也。
Denmark Lowers Benchmark Rate to 5%, Tracking ECB Cut (Update1)
今天國泰航空（293）跌14％，見8.08元；碧桂園（2007）跌16％，見1.22元；大新金融（440）跌19％，見17.88元；中遠太平洋（1199）跌16％，見5.9元；洛陽鉬業（3993）跌9.8％，見2.66元。中芯國際（981）中途停牌，公布發行新股，停牌前報0.155元。
窮則變未必變則通
香港消費者信心跌至四年內最低，只有88點（上半年109點），因今年恒指下跌逾半，加上10月份住宅銷售減少58.1％，創九年來最大跌幅。
瑞信董事總經理陶冬話，中國政府最好嘅救市方法就係讓全國房價下跌30%，成交量才會明顯上升。家吓成交量平均按年下跌40%至50%，國內大多數城市房屋庫存達十四個月，响咁嘅情況下，內地樓市又點樣好起來？
國都證券房地產行業研究員鄒文軍表示，明年房價再下跌10%至15%係有可能嘅，即使政府再減息，都係改變唔到房產下行嘅趨勢。
中國社科院金融研究員易憲容認為，房地產市場調整只係開始，响房價回歸理性前，調整之路仍十分漫長；房價跌得愈快，調整日子愈短。
紐約Depository Trust and Clearing Corp研究顯示，AIG、MBIA、Ambac Financial等出事嘅理由係因為唔公布唔受監管嘅CDS業務（例如AIG去年8月才宣布持有4400億美元CDS，9月份已進入破產邊緣）。依家市值已降至47萬億美元嘅CDS市場，到底仲會產生幾多虧損？木宰羊。雷曼、華盛頓互惠、冰島銀行嘅虧損，有90％同CDS有關。
花旗推介合生創展（754），估計今年每股獲利1.15元，減少18.8％，P/E三倍，目標價9.87元。希慎興業（014）估計今年每股獲利93仙，升9.7％，P/E十三點五倍，目標價17.42元。
美國大選結束，情況一如1932年11月羅斯福總統（當選第一天股市便下跌），並冇蜜月期；但會否一如羅斯福當選時嘅情況，股市跌至佢上任時嘅2月才見底？當年道指由68點跌到50點，跌幅26.4％。如歷史重演，道指將由周三9654點下跌2546點，喺7100點才企穩？上述純屬我老曹猜測，毫無數據支持。「Change」係奧巴馬嘅口號；所謂窮則變，係咪變則通又係另一回事。
呢次出現blood in the street, but trouble in the market. 今天美國嘅情況有如第二次世界大戰後嘅英國，過去支配世界經濟、政治及軍事力量嘅地位隨住1946年來臨而漸走下坡。所有帝國响盛極之後都因軍費負擔日重而令經濟上無法負擔，最後債台高築。1946年美國取代英國，2008年相信世界走向三分天下──即美國、歐盟同中國。美國依家嘅最佳學習對象可能係1990年至今嘅日本（點樣盛極而衰）！
去年10月起美股喺可見將來都係有反彈冇牛市。十八年後今天，日經平均指數失去72％市值、土地失去81％價值，呢D種叫做「資產負債表衰退」而非「商業周期」。銀行因股東資金減少（虧損）而被迫收緊信貸，企業借唔到錢，又點樣擴充？即使1998至2005年零利率時期，企業面對低利率、緊信貸，一樣死火。政府為bailout各大銀行而令流動性崩潰，投資者只有拋售股票及物業套現去減債，以逃避破產命運。日本由1990至2002年十二年內失去15萬億美元資本（或等於日本三年GDP）；2007年美國GDP 14萬億美元，未來失去嘅資本會否高達42萬億美元？上述情況「無法改變」！
五年揮霍十年清還
2003年起美國人進入冇明天式消費，五年揮霍必須十年時間才能清還。美國2008年才開始「窮則變」，同「變則通」距離仍很遠。香港人1995至97年三年揮霍，亦付出六年衰退去支付。
美國70％選民投奧巴馬一票，目的只係顯示對布殊嘅不滿，次按危機浮現、信貸壓碎、樓價下跌、股市出現熊市等等都係理由，而非因為奧巴馬係黑人。如奧巴馬任內搞唔好經濟，休想連任。美國人祈求經濟救世主降臨，由五年股市低點拯救美國股民，不成功便成仁，奧巴馬將成為美國人口中嘅bastard！
美股去年11月起回落，經濟今年7月起走下坡，估計一直伸延到明年。由於消費佔美國GDP三分二，近期正迅速下滑；製造業方面如通用汽車10月份銷售額下跌45％，9月份失業率達6.1％。奧巴馬接收嘅係一個5000億財赤（估計2008／09年度可達1萬億美元）嘅美國，奧巴馬有冇錢去改善美國醫療、教育、基建及環保？雖然資本增值稅由15％上升到28％，但2008年又有邊個咁威有資本增值？股息稅上升，又將進一步壓抑股價，令美股大跌。美國經濟肯定未到破曉時分。
You can't control the market, please control your portfolio. 如你投資組合內冇茄殊，都幾令人擔心。响2007年10月仍採取buy and hold，有如用穴居人嘅智慧响現代社會生活。
10月份美國ISM製造業指數見38.9（數字一旦低於41，代表進入衰退），係1982年以來最低；10月份Senior Loan Officer Opinion Survey（SLOOS）指出銀行信貸方面極之緊絀，兩者皆反映未來經濟陷入衰退。
銀行股係early cycle stocks（大市未見底，銀行股先見底；例如2002年10月滙豐見底，恒生指數2003年4月才見底）。假設今年10月滙豐75元係底部，恒指亦要到明年第一、二季才見底，急乜嘢？關鍵响銀行信貸，而唔係邊個做總統去決定股市方向。依家倫敦三個月Libor係2.71厘，雖然較10月10日4.8厘回落，但仍較聯邦基金利率嘅1厘高好多，代表銀根仍緊。
日本銀行減息0.2厘，無法阻止日圓利差交易拆倉。今年日圓兌美元上升14％、兌歐羅上升29％，估計未來將由98.02升上90日圓兌1美元，甚至80日圓兌1美元（1995年4月19日曾見79.75日圓兌1美元。當年我老曹去東京，發現成間酒店得二十二個客，我老曹與家人、外母已佔六個，通街空的士冇人搭，因此回港後決定沽售香港嘅物業，轉為投資倫敦）。如日圓重見80兌1美元，對日本經濟而言將係另一場災難。
政府多數低估bailout代價
自從英國政府推出bailout方案，令倫敦股市一度上升後，bailout已成為大部分投資者最歡迎嘅方案。翻查歷史，bailout並非乜嘢新方案，早喺美國政府成立初期，首任財長Alexander Hamilton曾經向一間銀行提出發債畀政府作為抵押品，吸收資金去增加貸款。當年該銀行負責人William Duer接受上述條件，但美國立國後首次金融危機無法停止──此乃著名嘅「Panic of 1792」，美國政府債券價格大跌，政府又向銀行借錢去支持政府債券價格，結果引發銀行出現倒閉潮，最後William Duer（當年國會議員）宣布破產及被關入獄（被債權人控告）。四十五年後嘅1837年，美國總統Martin Van Buren面對Second Bank of the United States出現財政危機，總統拒絕bailout，銀行破產，存款人只能收回部分款項，銀行股東一無所有；銀行破產後亦引發美國經濟衰退，以當年規模媲美大蕭條。1897年美國財政部面臨破產（無法應付別人用美鈔換黃金），由JP摩根個人聯同其他銀行成立私人syndicate，借出6500萬美元價值嘅黃金畀美國財政部贖回美鈔，令美國政府逃過破產命運，但唔少參加該計劃嘅銀行因自己手上嘅黃金唔足夠而破產。1907年，同樣危機出現，唔少銀行已唔願意參加，JP摩根把邀請番嚟嘅銀行家關响自己嘅私人圖書館裏（East 36th街），直到凌晨五點各銀行家同意簽名為止，JP摩根才放佢地返屋企。到1914年，聯儲局成立，調控金融嘅責任由聯儲局負責。上述例子證明，無論bailout或唔bailout，其實都有後遺症。
最近由Luc Laven及Fabian Valencia共同研究，1971年美元浮動滙率制度下响三十七個國家共四十二宗bailout事件，發現事發前政府皆低估為bailout所付出嘅數目（睇嚟呢次財長保爾森亦犯咗同樣錯誤，例如AIG已一再要求增加撥款）。據兩位學者研究所得，平均bailout代價係該國GDP 13％。如上述結果有參考價值，美國政府呢次bailout代價應係2萬億美元，而非7000億美元。由於三十七個國家中發展中國家佔大多數，如只參考日本呢類已發展國家，bailout代價係GDP 24％，令日本經濟進入十年失落期。
Dunne及Henwood研究日本、南韓、挪威、瑞士已發達國家嘅bailout，發現呢D國家皆出現低通脹率、低債券息率、失業率較穩定，而危機後第三年股價才上升（日本更陷入通縮）。如參考前科，未來美國通脹率將回落，利率維持低水平，失業率唔會急升，而美股到2010年先至會回升！
沒有留言:
張貼留言