2009-06-01

恒指最大阻力區20000點

5 月31日，周日。5月份美國消費信心為去年9月以來最高，見68.7（4月34.9），首次重返50點之上，因大部分人認為最惡劣日子已過去。真係咩？小心迴光反照。英國5月份消費信心係一年內最高，未受H1N1影響。不過，日本CPI喺4月份出現第二個月下跌，估計一直下跌至2010年3月，因需求下降。日本經濟重陷通縮，主因係企業純利下降，員工面臨減薪；日本銀行估計，2008／09年核心通脹率為負1.5％，2009／10年為負1％。

滙豐銀行認為，通縮係家吓全球經濟嘅最大威脅，因工資下跌引發價格回落，加上今年油價較去年平均便宜50％。油價去年12月見32美元後，至今已上升 100％，主因係美元弱勢。5月8日美滙指數跌穿200天線83水平，引發呢次Tangible & Intangible資產上升潮。

港股相對便宜令反彈較好力

唔少人相信衰退已結束、經濟繁榮期再臨，但願如此。亦有人相信去年11月起新興市場可以同美國分道揚鏢（decouple），可以嗎？雖然1990年到 2007年日經平均指數曾經同全球股市分道揚鑣。美國人儲蓄率已由2007年嘅負數到去年佔GDP 4%，估計今年升至GDP 6％。响咁嘅環境下，新興市場表現會點？

金價去年3月17日見1023美元，並喺今年2月24日見989.75美元後形成雙頂，回落到4月20日870美元，七星期內回落12%，然後喺5月29日見980美元。如能升穿此阻力位可見1150美元，反之係咁先。

3 月9日開始嘅恒指大反彈較估計中好力，理由係港股相較其他地區股市便宜。估計今年本港上市企業純利只會減少5％（唔計物業重估），加上聯滙因素令熱錢流入，擴大咗港股升幅（但若日後流出又可擴大港股跌幅）。中國刺激經濟方案亦幫咗一把，令唔少股份喺短短三個月內升幅超過100％，證明咗喺熊市中獲利一倍嘅機會十分多，响牛市反而唔易賺大錢。不過，恒指P/E已漸漸接近平均水平（十五倍），唔似3月9日當時P/E低於十倍，喺APAC地區港股仍算便宜。响恒指18000點以上入市，未來風險愈來愈大。

標普五百指數由2007年10月高峰到今年3月9日下跌58%，至今回升24%，係 1993年以來最短時間內最大升幅。1993年係牛市嘅開始，2009年3月9日至今只係熊市反彈，因為2007年10月股市相對1929年9月更加偏高，後者下跌90%，而前者只回落58%。呢次反彈市出現，係建基於美國銀行系統證明仍安全及經濟停止下滑，而短期利率接近零、長期利率上升，為銀行提供賺取息差利潤嘅好環境。

1997年7月1日香港主權回歸日，如閣下投資股票、房地產、黃金及定期存款，結果分別係點？以恒生指數計至今上升超過10％，房地產除豪宅外虧損30％，金價上升190%，存款（平均5厘計）上升79.5％。過去十二年呢場龜兔競走中，贏家係黃金，第二係定期存款，股市接近打和，物業揸家則係大輸家。證明由1997年7月起，股票同物業只可作trading之用，已失去投資價值！

經濟展望：2009年第二季起中國經濟進入穩定期，美國及歐洲便木宰羊。油價仍有上升空間，只係未來升幅已經有限；金屬價格進入整固期；農產品方面仍有升值空間。5月份股市買盤主力來自淡友冚倉盤（short covering），主因係4月豬流感期間唔少人空咗倉，完成冚倉後順勢推高Ｄ；但VIX指數已重返去年8月水平，6月宜小心。值得注意嘅係，十年期債券息率與二年期債券息率差係2003年以來最大，闊達2.63厘（2003年係2.74厘）。點解有錢人寧可收0.25厘息，都唔肯揸3.75厘嘅十年期債券？主要係擔心「第二波」就快出現，例如6月份通用汽車破產需政府注資500億美元去交換70％股權……。响政府瘋狂注資挽救大企業環境下，美債可能有排跌。

2008至09年過去十二個月，中國只購入美國新發行國債嘅六分之一，較兩年前為少；今年4月開始購買量進一步下跌。今年1月起中國政府動用唔少資金購入原材料，令原材料價格响過去一段日子飛升。今後中國政府會點樣做？5月份起中國政府已唔再吸納銅，令銅價自4月14日起牛皮。

油價見75美元亦冇乜大不了

美元喺3月4日起轉弱，漸漸接近去年12月17日低點，即1.44美元兌1歐羅；上述係3月4日起原材料漲價嘅另一理由，不過升市已近尾聲。中國家吓持有嘅美元資產超過1.2萬億美元，已超過日本。去年6月底到今年2月只增加美國國債2100億美元，其中更以短期國債為主。今年4月28日美國國會眾議院撥款委員會主席馬克．柯克喺出席美國華人組織「百人會」時話，睇嚟中國已靜悄悄而又不失禮地收回發畀美國嘅「信用卡」矣！估計今年美國財赤1.75萬億美元，超過GDP 12%，因主體經濟陷入衰退。美國財政部今年必須發行最少2萬億美元國債，呢個規模係前所未有（2003至07年平均每年發行5647億美元）。即使美國人儲蓄率由去年1.8%上升到今年8%，亦只能吸收6600億美元國債。一旦中國唔支持，美國長債息率必升！上述係今年下半年美國經濟嘅最大風險。

今年商品價格上升唔少，令資源股升完可以再升。石油喺5月份出現自1999年以來最大單月升幅，白銀出現1987年以來最大單月上升，白糖亦升至十個月內高價，仲有大豆、可口等；連波羅的海乾貨輪指數5月亦上升96％，唔少人認為通脹重臨（一般人所指嘅通脹係CPI指數，例如麥當勞漢堡包，1959年喺美國賣57美仙，今天4.29美元，上升653％或每年上升13％；如未來五十年每年仍上升13％，2059年漢堡包應該賣32美元一個！）。CPI上升除咗原材料（商品價格）上升外，好大程度受消費者購買力影響。過去五十年麥當勞漢堡包漲價，唔代表未來五十年可以同樣速度上揚，因美國人收入近年已停止上升；過去五個月商品價格上升，未必會令未來通脹率上升。以油價為例，由去年8月嘅147美元回落到同年年底33美元，今年油價上升只係一次反彈，即使回升到 75美元一桶亦冇乜大不了。何況3月至5月商品價格上升動力來自美元弱勢，美元弱勢令十年期債券息率由2厘升至3.75厘，令三十年固定貸款利率跳上 5.45厘（2月份以來最高），不利美國房地產前景。大摩認為，年底前美滙將再回落10％，如上述預測正確，意味商品價格將再升，美債則進一步受壓，可能引發另一場金融風暴。去年美國喺負利率環境下，CPI 升幅亦只有2.8％，因為去年GDP跌5.7％（今年首季跌6.3％），估計今年第三季美國CPI只能較第二季升3.5％。油價一旦高出75美元，將連 OPEC亦冇能力再令油價上升，因為今年石油消耗量正在減少而非增加。

5月份道指升4.1％（過去三個月共升20.4％，係1998年11月以來表現最好嘅三個月），由3月9日起計則上升29.8％，為2007年10月以來最大升幅。

至於恒指能否挑戰最大阻力區，即去年3月18日嘅20572點及8月21日嘅20350點？恒指喺去年9月跌穿20350點（三次到底而破），引發大拋售，而呢次反彈市嘅最大阻力區就响呢個水平【圖】。

1960 年代美國經濟由戰後一直保持繁榮。經濟學家在問：Is the business cycle obsolete? 隨之而來係十六年滯脹，其中又以1974年及82年最慘烈，兩者都因石油危機而產生。1980年代隨住經濟環球化出現，OECD國家製造業外移，新興工業國內嘅工廠互相競爭訂單，結果令工業產品無法漲價，OECD國家境內服務業員工收入則大升，因而引發消費熱潮，吸納新興國家出口產品，直到原材料不勝負荷，引發2008年石油危機（油價曾見147美元一桶）。今天唔少人卻相信2007年10月開始嘅CDO危機可以喺今年3月結束，真係咩？

今次衰退一如1990年代日本

日本自1990年起大部分日子都係衰退。日本經濟由1953至81年迅速由農業走向工業，1980年代開始GDP進入低增長期：日圓升值、樓價上升、日經平均指數大升，令日本進入泡沫經濟。1990年日經平均指數總市值超過當年美股（美國人口係日本嘅兩倍，GDP亦係日本兩倍）；邊個相信東京皇室所擁有嘅土地市值竟超過整個加州？1990年日經平均指數P/E七十倍，十九年後日本係點？泡沫爆破之後，日本銀行減息至零，政府提供大量刺激經濟方案，卻令日本政府由1991年財政盈餘高達GDP 2.9％到今天年年財赤，政府負超過GDP 160％。

石油危機2008年8月出現，2008年美國經濟情況卻較1990年代日本更差，但人們卻認為美國唔會係另一個日本。戰後美國經濟繁榮建基於「需求推動」（demand-side economic），政府不斷刺激消費需求推動經濟增長，因此引發通脹。1980年代開始改為「供應推動」（supply-side economic），即不斷增加供應量去刺激需求，推動經濟增長。到咗2007年，美國經濟面對供應過剩嘅危機，即使將利率降至零，亦只能產生短期消費上升；反之，金融危機卻向全球擴散。擔心2007年11月起呢次衰退一如1990年代日本，係沒完沒了。

■多謝詮易軒玄學顧問公司12000元、曾太3800元、黎氏家族2000元、蔡先生及馮小姐各2000元、陳先生及徐小姐各1000元及《信報》讀者捐款數百元。上述款項連同過去一個月捐款共85500港元，已代為滙畀農家女技術訓練學校，正式收據不日收到。