2008年7月31日 星期四

2008-07-31

衰退下要縮飲

7月30日,周三。恒生指數升432.6,收22690.60,成交533.17億元。7月期指升393點,收22676點;8月期指升538點,收22800點,高水。短期大市仍有上升空間。五窮、六絕、七翻身,熊市二期另一隻腳相信由7月16日開始。

花旗推介冠華國際(539),估計2008年度每股獲利43仙,升9.5%,P/E四點三倍,目標價2.23元。

滬深三百指數跌0.73%,收2884.38。

星巴克大撤退

美國證監會擴大限制「裸空」範圍,包括房利美及房貸美在內,令房利美股價周二回升12.5%、房貸美升9.1%。

Hamptons係紐約金融界人士嘅度假勝地,第二季樓價較去年同期跌12%,銷售下降26%。喺長島東部度假屋跌至970000美元一間,理由係金融機構裁員七萬六千人,令呢類高級職員度假屋售價亦回落。

英國最大銀行萊斯TSB上半年純利跌63%,令股價下挫4.9%,今年股價已下滑35%,家吓市價係賬面一點五倍。滙控(005)周一公布業績又點?

德銀分析員Mike Mayo估計,以美林標準,花旗手上CDO要撥備多80億美元,令第三季繼續虧損。花旗今年股價已跌咗41%,周二回升5.9%。

1995 年之前,拉斯維加斯並冇星巴克咖啡店,而依家有一百五十五間。經過多年擴展,星巴克計劃今年全美關閉六百間店,至一萬一千一百六十八間,而拉斯維加斯則關掉十六間(超過總數10%)。星巴克响澳洲亦大撤退,計劃關掉六十一間(依家共八十四間)。星巴克全球共一萬五千間,响唔少地區難敵經濟衰退嘅壓力(例如中國),都減少分店數目。汽油價格、食物價格及失業率上升,但樓價及股價則下跌,美國人開始唔飲4美元一杯嘅Latte,令星巴克第三季純利估計回落15%,至1.34億美元或18美仙一股;不過,周二股價升5.3%,收14.99美元(今年已回落27%)。

拉斯維加斯酒店入住率過去五個月亦減少2%。賭博營業額5月份較去年同期減少16%,係連續第五個月回落,住宅樓價更由2006年8月開始回落,至今已下跌29%。6月份失業率6.4%(全美5.5%),MGM股價今年跌65%、金沙跌57%;最威係永利,只跌12%。上述證明咗喺經濟衰退壓力下,連星巴克及賭場股都冇抗跌力。有銀之時,4美元飲杯Latte唔緊要;一旦要節約,自然幫襯「麥麥」嘅廉價咖啡嘞。

至今標普五百公司中已有二百九十一間宣布第二季業績,第二季純利平均下跌24%(7月3日分析員估計跌11%);金融業分析員估計跌60%,公布結果下跌 87%;能源股純利升15%。今年第二季純利跌幅達24%,係1998年第二季以來最大跌幅(上一次係2001年第三及第四季,2007年第四季跌幅係 23%)。

次按危機爆發後至今,全球銀行及證券公司共撥備4700億美元。

資訊科技表現不俗,純利升21%,其中Google升35%,蘋果升31%(分析員7月3日估計只升13%)。

全球第三大汽車製造廠福特第二季虧損87億美元或每股3.88美元。萬豪(Marriott)全球最大酒店連鎖集團第二季獲利減少24%。

Hinsdale Associates董事Paul Nolte認為,受高油價影響,第三季邊際利潤將進一步下降,因為營業額升幅放緩而成本升幅加快。聯邦速遞、美國運通、地產公司及金融股等對第三季純利前景更悲觀。高盛證券則認為,第三季業績唔會好,但亦應該唔會較第二季更差。

紐元跌至十個月低點,成73.89美仙,係去年9月26日以來最低。7月份紐元跌3.3%,因紐國7月24日宣布減息0.25厘,至8厘,引發拋售。日圓亦跌至一個月低點,一度見108.29兌1美元,係6月2日以來最低,估計年底可見110日圓兌1美元。主因係6月同7月日本人獲得14.8萬億日圓花紅,其中唔少變成「利差交易」。

杜拜面對經濟大災難

私募基金始祖Kohlberg Kravis Roberts(KKR)喺2006年5月3日以每股25美元响阿姆斯特丹交易所上市,共二億股,集資50億美元,當年獲大量搶購,兩年後今天值幾多?上周五收市價10.5美元,跌咗57%!邊個醒目D?私募基金董事局定係市場上一般散戶?KKR成立後,由市場上購入上市公司並將之整理,然後再高價喺市場出售。透過上述操作,令KKR响上市時升值一百六十倍;至於KKR上市之後……。

美林大刀闊斧清理手上CDO(每1美元CDO以22美仙出售),壓力去咗花旗及瑞銀處,因為花旗手上嘅CDO今年首季每1美元仍作價61美仙,如按美林水平須再撥備160億美元。瑞銀3月結時有66億美元CDO,至於入賬方式未有公布。

雖然美林大撥備,加上S&P/Case Shiller二十個城市5月份房價較一年前跌15.8%,係2001年以來最大跌幅,但油價一度逼近120.42美元,然後以122.19美元收市,仍為美股帶來刺激。

聯邦公路管理局喺7月28日公布,到今年5月止,美國人响路上行車里數較一年前減少3.7%,係連續第七個月回落,亦係1979年後最長一次跌市。美國能源部7月28日宣布,5月汽油需求較一年前減少4.3%,至一千九百七十萬桶一天,較今年1月減少八十八萬九千桶一天!全球汽車協會(AAA)宣布,7月份一股汽油售價跌1.7美仙,成3.941美元一加侖;8月份汽油期貨跌1.17美仙,成2.996美元一加侖。9月期油成122.42美元,响倫敦 ICE期貨交易所成122.71美元,係6月4日以來最低。OPEC主席哈利勒响雅加達話,如美元滙價轉強、中東局勢緩和,長期睇油價應回落到70至80 美元一桶。原油價格由7月高點至今回落17%或25美元,仍未破支持位。印度、越南、馬來西亞、印尼已增加柴油及汽油價只有中國不變;如亞洲各國取消汽油補貼,估計可令原油價進一步回落!

波斯灣阿聯酋杜拜嘅情況令人擔心,家吓通脹率已達22%。杜拜只有全球0.02%人口,但全球建築機械「天秤」有10%响杜拜。杜拜係全球唯一擁有七星級酒店嘅城市,亦有全球最高大廈及正在大量興建嘅人工島;一旦油價回落,恐怕杜拜將出現經濟大災難!

油價主要由產量決定。過去全球對石油需求量平均每年升2%。1980至98年非OPEC世界嘅石油產量每年上升超過2%,形成油價回落;1998至 2003年產量升幅降至2%,令油價保持穩定;2003至08年產量升幅下降至每年1%,形成油價急升。根據IEA估計,2008至2013年產量每年升幅只有0.5%,形成2008年油價狂升。踏入2008年,美國石油消耗量首次出現下跌。

OPEC 方面能增產幾多(印尼、伊拉克、尼日利亞及委內瑞拉因政治因素無法增產)?估計明年可增產四百萬桶一天,2010年只能較依家增產二百萬桶一天。換言之,OPEC未來增產能力好有限。值得注意嘅係,天然氣液化產能可由今年五百一十萬桶一天升至2012年七百一十萬桶一天。

需求方面,IEA去年7月首次估計2008年需求八千八百三十萬桶一天,今天實際數字係八千六百九十萬桶一天,即需求升幅在下降中。估計2008至 2013年每年上升1.6%,由八千六百九十萬桶升到九千四百一十萬桶一天;非OECD國家需求年增長率達3.7%(尤其中國及中東),到2013年 OECD同非OECD佔需求比重將為51/49(1996年為64/36)。

央行忘記咗自己責任

即使石油需求以年率1.6%上升,但產量以0.5%速度上升,亦刺激油價由70美元一桶一度升至147美元。上述高油價令OECD國家需求下降(1973 至74年油價一下子上升八倍,曾引發需求下降;1980至81年油價一下子上升三倍,亦引發需求下降),如油價保持喺120美元以上,亦會令OECD國家石油需求下降(因可節省嘅空間其實好大)。

殊仔明年1月卸任,假設由奧巴馬上台,佢嘅石油政策對油價將有一定影響。

另一方面,依家印度電力2-3%來自核電計劃,未來將上升十倍(即20-30%);中國亦大量興建核電廠,對未來能源供求亦有一定影響;當然仲有全球經濟狀況。換言之,油價係一個極難預測得準嘅項目。

八十年代經濟全球化,最先係中國,然後係東歐、蘇聯、印度及南美洲重返環球經濟體系,為美國、歐洲等OECD國家帶來大量廉價進口貨,壓抑OECD國家 CPI升幅,帶來1982至2007年長達二十五年嘅信貸擴張期。呢二十五年OECD國家央行唔使對付通脹,只須全力阻止經濟陷入衰退便可,例如1987 年股災、1990年波斯灣危機、1994年墨西哥危機、1997年亞洲金融風暴、1998年俄羅斯危機、2000年科網股泡沫爆破、2001年「九.一一慘劇」……。部分央行官員甚至忘記咗自己嘅責任係對付通脹率上升!呢段美好時光响舊年8月結束,理由係環球化到咗今天,已面對有限資源嘅問題,各國央行嘅責任重返1982年前,即必須對付通脹同時刺激經濟繁榮!

2006年由高盛將之普及化嘅諗法:decoupling,响2007年年尾已證實錯誤,各國經濟不但冇同美國decoupling,反而係 recoupling(例如滬深A股跌幅較美股更大)。理由係美國GDP佔全球GDP 30%;唔單止咁,美國經濟唔似日本,美國屬於開放式,同各國關係千絲萬縷,纏在一起。

滬深A股明年V形反彈

值得關注嘅係,中國雖然出口增幅放緩,令第二季GDP只升10.1%,但零售業6月份仍升23%(扣除通脹實質升15.1%),係十年內新高。中國消費開 始同美國經濟decouple,上述情況能否維持到明年?如果能夠,明年嚟自內部消費動力可支持中國GDP繼續高速上升,如果係咁,滬深A股出現V形反彈 機會極高(先跌後升)。

歐美嘅問題係樓價炒爆而引發次按危機,根據日本經驗需時十三年才康復,香港經驗需時六年。中國嘅問題係通脹率偏離政府目標水平,因此人行加息兼增加存款準備金率,希望控制通脹;銀根抽緊引發股市及樓價調整,一旦通脹率受控制,人民幣可減息及降低存款準備金率,股市同樓價便立即復甦。根據1973至74年香港經驗需時二十一個月,1981至82年美國經驗需時十四個月。由2007年10月起計,如果係十四個月,即2009年1月;如係二十一個月,即2009 年下半年。換言之,滬深A股短期繼續睇淡,但到2009年可出現V形反彈,唔似歐洲同美國經濟有排醫。到2030年,中國將有三億五千萬人口達中產階級水平(相等於一個美國人口)。

歐洲每年只花1.3% GDP响高等教育上,而美國卻高達3.3%。歐洲大學生平均每年獲8700歐羅補貼,美國大學生卻高達58000美元,上述可能係近三十年歐洲GDP增長率落後美國嘅真正理由。歐洲國與國之間分別好大,有大補貼嘅丹麥、瑞典、英國及瑞士,最差係意大利及西班牙。

美國除咗嚟自政府嘅補貼多,私人捐款亦佔好大比重。美國一流學府大部分都係私人、機構或基金捐款支持,令呢D學府不但獲更多資金、更大自主權,同時面對更大競爭(例如教授每年出幾多份研究報告,可直接影響明年捐款)。美國唔少知名學府不但擁有自己嘅產業及招聘職員嘅自由(決定員工薪金權及決定佢地嘅財政預算),响競爭research funds方面亦相當激烈,不但學校與學校之間競爭,連部門與部門之間亦競爭,甚至教授與教授之間都明爭暗鬥。

香港1950至80年經濟係出口、製造業導向型經濟,1984年至今係內部消費主宰型經濟(經濟盛衰由樓價同股市升降主導),能否進入知識產權型經濟?便睇政府投資幾多喺高等教育,以及私人、機構及基金對高等教育方面嘅捐獻。香港不但需要更多大學生,同時需要更高質素嘅大學生去提升港人人均收入,只有咁樣,香港經濟才有條件進入第三次繁榮期。

2008年7月30日 星期三

2008-07-30

當大家齊齊等市跌……

7月29日,周二。恒生指數跌429.21,收22258點;成交475億元。7月期指跌389點,收22283點;8月期指跌398點,收22262點,高水4點。

花旗推介中煤能源(1898),因上半年獲利42億元人民幣,升59%;估計全年每股獲利80仙,升56%,P/E十五點三倍,目標價16.4元。亦推介中國電信(728),估計今年每股獲利29仙,升14.6%,P/E十二點八倍,目標價16元。

滬深三百指數跌1.87%,收2905.63。

我老曹從未見過咁多資金喺度等股市回落【圖一】,相當於家吓美國股票總市值12.39萬億美元嘅27%!各基金共持有資金高達3.36萬億美元 (Printing Turner Capital Group資料)。未來可能係:一、人人等緊嘅熊市第三期唔出現;二、呢個熊市二期十分長。各位唔好睇得「太淡」!

油價將營造右肩

印度宣布加息半厘,再回購利率由8.5厘升上9厘,係近兩個月內第三次;同時將存款準備金率由8.75%上升至9%,印度股市應聲下挫3.89%,收 13791點。印度7月份批發價格升11.89%,由於有一半印度人每天收入少於2美元,上述通脹率印度人肯定頂唔順。政府今年向農民取消170億美元債務,並且估計補貼燃油425億美元,令印度政府債券被標普降至BBB級。

巴基斯坦亦計劃加息1厘,至13厘。巴基斯坦6月份CPI升21.53%(5月份升19.27%),並將存款準備金率由8%升到9%,依家財赤已相當於GDP 7%,情況幾令人擔心。

油價已回落到頸線,短期反彈去完成「右肩」【圖二】,122美元係頸線,若果失守,一個大型頸肩頂便完成;反之,一天未跌穿122美元,一天未能肯定油價已改變方向。Wilbur Ross認為,石油泡沫已爆破,建議今時今日吸納航空股,佢深信十二個月後油價將較今年7月便宜。佢管理嘅資金達79億美元,過去係航空股分析員出身,曾服務已破產嘅美國太陸航空、東方航空(美國)及環球航空等航空公司。佢睇好航空股,各位唔好以為佢冇料到。

日本6月份失業率4.1%,係兩年內最高。家庭開支減少1.8%(連續第四個月回落),估計GDP上一季已收縮0.5%,日本人平均收入再次下降;睇嚟日本較美國更快進入衰退期。日本最大證券公司野村宣布第一季(日本企業係3月結)撥備631億日圓(5.86億美元),出現虧損766億日圓,去年同期獲利 759億日圓。今天野村股價跌2.9%(今年已跌19%);野村去年6月起停止吸納美國次按債券,並將該部門結束,雖然係咁仍受影響。

兩房好多衰嘢未公布

美林同意出售超過300億美元有問題嘅按揭資產,而須進一步撥備57億美元(因每1美元次按債券只可售22美仙)。淡馬錫基金答應進一步認購美林新股而注 入34億美元新資金,其中25億美元叫做reset payment for losses;換言之,真正注入嘅資金只有9億美元,理由係去年12月24日至今美林股價跌咗55%,美林向淡馬錫作出若干補償。韓國投資公司亦話將今年 1月認購嘅20億美元優先股轉為普通股,換股價較1月份所訂低一半(去年12月及今年3月淡馬錫以每股48美元認購50億美元美林股票,呢次每股只需24 美元)。

Lloyds TSB銀行7月30日公布業績,估計上半年純利下跌43%,只有8.81億英鎊,因為喺信貸業務上要撥備4.71億英鎊,喺投資業務撥備6.18億英鎊,宣布減派息機會甚大。同其他英資銀行比較,Lloyds TSB已經係表現唔錯嘅銀行。Aviva及Prudential英國兩大保險集團今年上半年可能出現虧損,估計Aviva虧損11億英鎊(去年上半年獲利 14億英鎊);Prudential可能虧損6.04億英鎊。英國嘅大銀行大保險公司今年上半年成績尚且如此,你自己投資成績又點?

分析員Jonathan Weil認為,房利美及房貸美仍然好醜陋,估計未來日子仍有進一步下跌壓力,因為好多衰嘢仍未正式公布。房利美及房貸美技術上已破產,情況有如張健雄兄叫九十年代日本唔少大企業為「殭屍企業」(其實已經死咗,卻仍然存在)。

前克林頓白宮經濟學家Nouriel Roubini(曾協助解決美國1991年儲蓄及借貸危機,現任大學教授)接受彭博訪問時認為,呢次危機較1991年更嚴重,擔心美國將體驗一次影響全局嘅金融危機(Systemic financial crisis)。反之,JP摩根私人客戶服務CEO Hans Olsen(管理1200億美元資產)卻認為依家係入市時機。佢認為,今年標普五百指數平均P/E十七點六四倍,明年將降至十四點五四倍。响過去嘅低息時代,標普五百指數歷史性P/E响二十點○五倍到二十五點九八倍,何況80%標普五百企業獲利皆增,只有金融、證券及投資銀行股例外。只要呢類股份純利唔再下跌,標普五百企業純利立即回升。一個銀幣總有兩面,問題在乎你從邊個角度睇。

新會計制度打擊價值投資法

按市價入賬(Mark-to-market)會計制度被認為係引發呢次次按危機嘅催化劑。過去銀行盤數將唔少純利收藏起來,以便日後純利回落時才將盈利重新入賬,形成過去銀行無論損益賬或資產負債表嘅真確性俱存疑(八十年代香港唔少銀行年報寄出不久仍宣布獲利,幾天後卻被香港銀監局接管,例子不在少數)。上述入賬方式近年已行唔通,銀行損益賬及資產負債表真正反映「實值」,因唔少金融資產價格波動好大,例如去年上半年仍值1美元嘅次按債券,依家已跌至只值 22美仙,令銀行出現大量虧損(撥備),同時令資本充足比率不足而須集資!有人建議改為「Mark-to-model」,由各國銀監會訂下一個準則讓銀行遵守,既保持銀行賬目透明度及真實度(唔似八十年代咁都唔知條數係真係假),同時可減少銀行受金融市場價格波動影響,由賺大錢忽然又變成蝕大本,減少金融機構受經濟盛衰循環嘅影響。

响新會計制度下,亦令本港地產股近年純利大增。過去物業升值、公司可以入賬(入儲備),亦可以唔入賬,形成地產股每股資產淨值低於真正價值。依家半年重估一次,將重估列入損益表,樓價升便形成地產股純利暴升;一旦樓價回落,上述制度又可令地產股純利急跌(須扣除物業跌價準備)。較銀行股優勝嘅地方係,地產公司冇資本充足比率嘅問題,到時唔使供股集資。

新會計制度下,令價值投資法失去吸引力,因每間公司(工業股例外)每年都重估一次,人人都知公司真正價值幾多,再唔使價值投資分析員去尋寶矣。新會計制度擴大咗股市波幅,令繁榮期企業純利暴升、不景氣時企業純利暴跌。投資者欲賺錢便必須隨波(浪)、逐(潮)流,例如去年10月恒指30000點及今年3月 20000點,由此可見幾咁驚濤駭浪。

依傳統智慧,面對負利率環境便借錢買資產(例如1990至97年香港),呢一次卻撞板,因為負利率與「去槓桿化」同時出現,形成商品價格同服務成本上升及資產價格回落。歷史不斷重演,但每次劇本都唔同。

「去槓桿化」過程中,金融股長期受壓。PIMCO董事總經理Paul McCulley認為,呢個係房屋泡沫爆破後必然現象──減債。整個減債行動需時甚久(日本十三年、香港六年),不但不利房利美及房貸美,同時不利大部分銀行及金融機構,因為整個社會進入資產價格通縮期,上述係2002年11月貝南奇加入聯儲局後所努力阻止。2003年5月貝南奇著名演說:保證日本貨幣政策唔會喺美國出現,不然佢會揸直升機去擲銀紙!2003年5月佢成功阻止日式通縮喺美國登陸,但依家又捲土重來。商品及服務費用上升,同時資產價格通縮,又睇貝南奇能否扮演「黑夜之神」(Dark Knight)!

美國人對前景愈嚟愈冇信心

The Dark Knight由時代華納製作,製作費高達1.8億美元,估計營運利潤高達5億美元(因一直可勁收到2010年,同時大大提升蝙蝠俠嘅品牌價值),不但帶嚟 8億美元全球票房收入(時代華納佔總收入45%),另加電視版稅、DVD及其他方面收益……。呢套片令蝙蝠俠唔再係無敵,而係愈來愈人性化,但最終能戰勝自己嘅弱點。

Pew Research Center上周五公布民調結果:86%中國人對自己國家未來充滿信心(2004年只有48%),較第二個最樂觀國家澳洲高出25點。美國就慘,只有20%美國人對自己國家未來充滿信心。

美國人均收入已達42000美元一年,係全球第八大富裕國(其他係盧森堡、卡達、冰島等小國),但美國人對自己國家前景愈嚟愈冇信心。反而中國大城市人均收入只有美國人八分一,對未來充滿信心。

美國正從雲頂高處逐漸回落,情況有如1900年英國;中國則漸漸由地底泥之處升起,家吓已係美國最大嘅債主。未來中國嘅道路雖然艱辛難行,但方向向上。過去三十年美國人靠增加信貸去保持經濟繁榮,中國人卻努力工作!今年美國政府設法協助房利美及房貸美唔破產,以免美國樓價進一步滑落;反之,中國人行卻增加存款準備金率,去阻止樓價進一步上升。

過去佛利民曾開現任美國政府玩笑:佢話如殊仔去管撒哈拉沙漠,可令全球連「沙」都出現短缺!佛利民追隨者認為,殊仔已唔使去撒哈拉,因為佢已令美國日漸沙漠化,例如航空公司破產、銀行被接管、人民負資產!

有朋友問:社會主義同資本主義有乜分別?其實兩者分別唔大。社會主義國家將賺錢嘅企業國有化,資本主義國家則將蝕本嘅企業國有化。例如英國政府今年國有化 Northern Rock銀行、美國政府今年國有化七間銀行、阿根廷政府國有化蝕大本嘅Aerolineas Argentinas航空公司等等;唔使幾耐,相信美國政府將國有化房利美及房貸美。

2008年7月29日 星期二

2008-07-29

國樓市天曉得

7月28日,周一。恒生指數跌53.5,收22687.21,成交414.73億元;7月期指跌138點,收22672點;8月期指跌135點,收22660點,低水。

根據Russell Napier所寫嘅書Anatomy of the Bear(解剖熊市)。上世紀四大熊市係1921、1932、1949及1982年,結論係:一、熊市對你嘅財富不利,一旦一個大熊市出現,好少人能避免冇損失;二、喺熊市結束時先入市,未來嘅利潤好驚人;三、熊市結束前嘅經濟通常陷入衰退期,成交額進入萎縮期(十個牛皮九個淡)。

港股跌幅不太大

至於香港(我老曹1968年先入行,對1968年前嘅情況唔清楚)熊市最厲害一個係1973/74年,由港股偏高,再遇上石油危機引發;第二個係 1981/82年,石油危機加埋香港主權回歸嘅談判;第三個係1997/98年嘅亞洲金融風暴加埋香港特區政府推出八萬五;第四個係2000到03年美國嘅科網股泡沫爆破加埋香港沙士疫症。全部都係外來嘅因素再加上本地嘅因素先造成大熊市,缺一不可。

至於2007年10月開始嘅呢個熊市,係美國次按危機加中國內地A股泡沫嘅爆破,但香港自己仍冇乜利淡因素,所以理論上跌幅唔會大。

過去習慣咗每年第二及第三季唔利金價,2008年似乎都唔例外。通常到咗第三季尾、第四季初先係投資黃金嘅日子(所謂金風送來);夏季不宜金,要等到秋天。各位如睇好黃金嘅不妨等到9月份先出手,通常5月係股市見頂月份,今年亦唔例外,油價如果低過120美元一桶,中國通脹率可由7.1%,降至5%,美國次按危機亦可透吓氣,同時支持滬深A股及美股再升番多少,令港股完成一次似樣嘅熊市反彈;我老曹睇油價喺可見嘅將來,極有可能回落到100美元一桶【圖】。踏入8月份,香港進入公布今年上半年嘅業績期,所以港股仲有上升嘅空間。

滬深三百指數升0.74%,收2960.85。

喺1982 年,中國人口結構中,最多係十到十九歲嘅人口,即未來一段日子中國嘅廉價勞工供應充足。到2002年,中國人口中最多係二十五至三十四歲,令 2002年起中國廉價勞工供應開始進入短缺期!由2002年起計三十年,即2032年,中國人口中最多嘅係五十歲或以上,已婚及大部分居住喺城市(可能佢地父母仲喺農村)。佢地嘅下一代係二十歲左右,開始進入勞工市場。

由於1975年起中國實施一孩政策,令過去三十年人口增長率由每年嘅3.5%,降至今年嘅不足1%。上述改變不但令中國由2003年起面對廉價勞動人口供應不足嘅問題,加上2006年起政府推出嘅三農政策,不但取消每年近1000億元人民幣嘅農業稅,以及今年起每年增加投資3000億元人民幣喺農村(達農村每年人均380元人民幣)。更多農民留喺農村,令城市嘅廉價勞動人口供應因此而進一步減少。

過去三十年最少有二億人口由農村走去城市工作,加上佢地嘅下一代接受較佳嘅教育,2006年起中國開始進入中產階級人口大量冒起嘅時期。估計每年最少有三千五百萬人口進入人均收入6000至30000美元嘅階層,為消費市場帶嚟興旺,亦同時刺激中國嘅CPI加快上升,因為中國已進入工資與物價嘅互相追逐期,一如七十至九十年代嘅香港。未來嘅日子中國大部分時間將處於高通脹期(理由之一係勞工成本不斷咁上升)。中國近年大量投資基建,例如發電廠及交通系統嘅建立,令全球原材料價格高企及工程師、技術人才或建築師等好吃香。

捕捉A股見底期

中國人經過過去三十年嘅儲蓄後,2006年起進入咗高投資期,由於缺乏投資市場嘅知識,引發咗股市狂升或暴跌,令商業周期(business cycles)好明顯。至於點樣利用中國商業周期從中獲利?必須細心分析,以便捕捉內地A股熊市嘅見底期!

花旗推介遠洋地產(3377),估計今年每股獲利43.6仙,較上年度減少20%。P/E十點八倍,目標價8.08元。

今年1月1日,美國方面估計第二季標普五百指數嘅純利仍較去年同期上升4.7%;4月1日修正至負2%;7月1日再改至負11.5%;最近改至負 17.9%,係2002年第一季起至今首個負增長季度(至今已公布業績嘅公司有二百四十九間)。最差係投資銀行及證券商(負94億美元),然後係金融(負 78億美元)。二百四十九間中,67%表現較估計好;10%同估計嘅接近;只有22%較分析員估計嘅差,就係投資銀行、證券業及金融業,拖低咗整個第二季嘅業績。如果將上述嘅行業剔除,今年第二季其他行業嘅純利平均仍較估計嘅好2.5%,例如能源股升25%及科技股升15%。展望第三季能源行業嘅純利仍可上升20%及科技股上升16%;問題喺投資銀行、證券商及金融業,如剔除嘅話,今年第三季估計嘅純利仍可升7.7%。美國金融業已連續四季負增長,相信第三季或第四季亦到咗尋底期,理論上可支持股市由7月16日起,出現一段反彈期。

債券大王Bill Gross認為,1.6美元兌1歐羅嘅滙價最少偏高30%,佢建議全面沽出歐羅,估計今年9月30日前見1.52美元,明年4月前見1.45美元。

7 月份英國嘅住宅售價由年初至今回落4.4%,平均每間賣16.85萬英鎊,較6月回落1.2%,係七年內最大嘅跌幅,估計喺秋季前仍然受壓。跌幅最大嘅係英國南部,响過去嘅三個月需求減少20%。英國農地需求亦係2005年起首次回落。近期英鎊滙價較弱未能阻止英國樓價嘅下滑。

兩房由盛轉衰

經濟二字响中文嘅解釋係經營與濟民;即由政府提供良好經營環境,令各行各業發揮自己嘅所長,便可達至濟民嘅目的而唔使政府派糖;英文係 Economics,來自兩個古希臘文即oikos(房屋)及nomos(經理),加起嚟就係房屋經理人!原來英文Economics就係要求政府好好管理房屋(即土地),便可達致經濟繁榮嘅目的。政府必需推行良好嘅土地政策,而唔係好似香港特區政府一上台便推出八萬五,搞到香港嘅中產階級人人叫苦; 2003年9月再嚟一招鈎地表,令樓價升到大部分打工仔負擔唔起嘅水平。(美國嘅合理樓價係中等收入者年收入三到四倍;香港嘅合理樓價應係中等收入者年收入六到七倍。)土地係一切經濟之本;合理土地政策先可產生良好嘅經濟。

1938年美國房利美就係基於上述嘅理由成立。七十年代房貸美成立嘅目的亦係協助美國經濟從1974年嘅石油危機中恢復過嚟。不過,今天嘅兩房卻高度槓桿,以及不合比例嘅投資兼嚴重資本不足(undercapitalized)。兩房係半官方機構(government-sponsored enterprises;簡稱GSE)過去刺激房地產嘅方法係:一、買樓嘅人喺買入物業時可同銀行借錢。銀行將貸款人嘅借貸賣俾兩房套回現金再借。上述貸款組合之後由兩房做擔保人,喺市場出售成為有擔保嘅證券(mortgage-backed securities)。如果供樓嘅人唔還錢,由兩房代還,佢地則從中賺取息差。喺樓價不斷向上或樓價下調幅度少於20%前,上述一切都係美好,其後兩房自己亦投資次按債券,由2000年時接近零,到2007年12月持有7170億美元嘅次按債券。

金融機構供股集資

2006 年下半年起,美國樓價開始回落,令2007年8月出現次按危機。貝爾斯登被逼將兩個擔保證券喺市場上出售,出售結果係1元嘅投資,市價只得9美仙!由於2007年起美國實施嘅新會計制度,所有擔保證券必需按市值入賬。2007年12月如所有金融機構都按貝爾斯登嘅擔保證券市價入賬,全部都出現資本不足嘅問題。因此,各機構紛紛集資及唔將部分擔保證券喺市場上出售。例如兩房只公布2007年下半年蝕咗90億美元;2008年上半年兩房計劃先集資 120億美元,然後才將手上嘅次按撥備。至於自己曾擔保嘅證券仍未處理(亦無法處理,因為係涉及5萬億美元,如果大幅撥備,有人形容有如喺美國境內打核子戰爭),雖然依家兩房可為自己做擔保嘅債券唔撥備,但已唔可以繼續為其他債券做擔保。今年上半年兩房成為其他樓按者主要資金嘅供應企業(因為其他嘅金融機構已經唔敢做),下半年連兩房亦無力繼續提供樓按資金嘞(因佢自己都面對資本不足),到此各位大概知道未來美國樓市嘅嚴重性。

過去仲有阿布扎比、中國投資公司、新加坡主權基金、淡馬錫基金及Warburg Pincus等有銀嘅機構為歐美金融機構提供資本,依家皆略有虧損。今年下半年歐美金融機構仍需資本,就只好向股東要求供股,以極吸引嘅供股價去吸引股東供股。不過,咁樣供股後,唔少股價都跌穿供股價,你話點算?投資唔係抵買,而係前景,美國房地產前景點?你問我,我問邊個。

2008-07-28

兩房變成植物人

7月27日,周日。中投動用30億美元投資百仕通,到今年7月 23日百仕通收市價17.83美元計,賬面損失12億美元,即資產縮水近40%!中投每年須為 2000億美元資金支付5%利息畀國家,即每年最少要有100億美元收益才可應付利息支出。好彩,中投响去年11月以1億美元購入中國中鐵(390)H 股,去年12月底中鐵H股收市價10.74元,較中投入股價升咗85.8%;另外中投亦入股工商銀行(1398)、建設銀行(939)、中國銀行(3988)、光大銀行及數家內地證券公司,去年12月底收市價都較入貨價為高。似乎中投响內地嘅投資成績較海外好。但中投成立嘅目的係減低人民幣滙價升值嘅壓力,而非只追求高回報率,上述係矛盾所在。未來中投點樣為自己嘅策略定位?繼續向海外投資而蝕本,抑或回歸內地股市?

兩房被廢武功

過去令畢非德成為全球首富嘅buy and hold策略,1990年响日本唔再生效,1997年喺香港亦無用武之地,去年10月亦响美國結束,取而代之係無止境嘅波動(volatility)。 Trader取代咗長線投資者,買賣股票必須學人隨波(wave)逐流(trend)。到底有幾多人明白全球經濟結構已改變?加上會計制度改變,令我地必 須放棄買入後持有策略?

1990 年起喺日本買樓發達嘅日子結束,1997年起喺香港買樓發達嘅日子亦完結,去年起响歐美國家買樓發達嘅日子同樣結束,因為信貸泡沫已喺去年8月爆破,永不停止嘅信貸增長告一段落。房利美同房貸美已被廢咗武功。雖然上周六美國參議院批評挽救兩房方案,並以七十二票贊成十三票反對通過有關方案,但只係支持兩房39億美元注資及協助四十萬房貸者用可以承受得起嘅利率再按,即日後兩房只能提供「有限度服務」,再唔係以前咁成為推動房價上升嘅引擎。

代表十七種主要商品嘅CCI指數由7月初回落,由於油價上升軌未失守(支持位响100美元),美滙指數亦未升穿下降軌,睇嚟油價回落只係一次中期調整而非見頂。

上周五美國銀監會關閉兩間地區性銀行,由於10萬美元以下嘅存款戶受聯邦存款保險公司保護,因此影響唔大。被關閉嘅係內華達州First National Bank及加州First Heritage Bank of Newport Beach;前者存款只有30億美元、資產34億美元,分行二十五間;後者只有三間分行、存款2.33億元及2.54億元資產。兩者關閉理由都係資產不足(undercapitalized)。至今為止,今年內美國被關閉嘅銀行共七間,睇嚟美國地區性銀行財政狀況將繼續惡化。影響之下,未來十二個月美國房地產仍會惡化,唔會因新總統上台而改變。加上美國第四大銀行Wachovia上周五股價又跌近10%,並傳CEO辭職;該行第二季虧損89億美元及宣布派息減少86%,即每股只有5美仙。該公司响2006年收購Golden West(加州地產貸款機構),變成濕手揦麵粉,不知如何是好。上周該行CFO Tom Wurtz宣布辭職,如CEO Rebert Steel亦打算劈炮嘅話,真係幾濕滯。

油價回落可見110美元

美國全國房地產商協會宣布,6月份二手樓銷售較5月減少2.6%,以年計係四百八十六萬間,較去年同期減少15.5%;平均售價215100美元,較一年前跌6.1%。上周五房利美及房貸美嘅三十年固定利率升上6.63厘,睇嚟7月份情況更差。標普可能將兩房所發嘅債券降級,嗰批192億美元嘅AA級債券及260億美元嘅優先股可能受影響。房利美股價上周五再跌3.9%,見11.55美元;房貸美跌6.1%,見8.27美元。金融新聞一日比一日惡劣,過去十五個月歐美金融股平均跌幅超過25%(唔少更達60%),物業市場則每月差D。依家汽油價格仲係半天咁高,但股市自7月16日起不跌反升,資源股近月表現弱勢,到底係中期調整抑或上升趨勢改變?

殊仔重新批准離岸採油及開發阿拉斯加北極圈,人們開始對長線(三至五年)油價睇200美元論表示懷疑,令油價立即回落,並向100美元一桶進軍,上周五收報123美元而非147美元。根據黃金分割率(Fibonacci)預測,呢次油價回落可見110美元,最大跌幅可至低於100美元,但唔影響長期上升趨勢。

各位宜學習愛上低P/E股以找尋廉價股,例如搵今年P/E十倍或以下嘅股份作投資,只要明年情況唔太差,已能令該股P/E重返十倍以上,即可獲利。各位放棄P/E响二十倍以上嘅股份,因為即使明年純利仍然上升,股價亦已充分反映。

7 月16日雖然唔係熊市嘅底,但應該係其中一個低點,因為美國證監會限制「裸空」;加上VIX一度見30%,相信拋售高潮已過,油價亦開始回落。股市短期而言係投票機器,長期而言係評估機器。作為投票機器,由恐懼同貪念推動,主要反映非理性投資者行為,例如5至7月初股市回落,隨住恐懼感漸減,貪念又再作怪,形成7月16日起回升。至於評估機器方面,標普五百指數以去年第二季計每股獲利84.95美元為最高(去年3月投資者估計去年全年每股獲利92美元,結果去年全年每股只獲利66.18美元,引發去年第四季急跌)。依家則估計今年全年每股獲利72.01美元及明年全年每股67.66美元,係咪正確?無論高估咗或低估咗,响往後日子市場自會調整。換言之,所謂短期波幅,背後係對後市不斷評估所引發。

1929 年前美國係富人天堂、窮人地獄。華爾街危機後,1933年羅斯福採取新經濟政策,引入唔少社會主義制度,從此佔1%嘅美國富人由二十年代佔全國 GDP 20%到七十年代只佔7.5%;可以講由三十年代起至七十年代美國貧富懸殊差距係拉近咗。1966年起美國經濟增長率放緩,令股市停滯不前而令經濟進入滯脹期(工資及通脹率繼續上升,但GDP增長率有限)。

八十年代列根上台後,响大幅減稅政策刺激經濟下,加上中國採取改革開放政策,令美國大量工序外判。美國人嘅工資由1980年至今再冇實質上升;反之,房地產、股票卻因減稅及利率下降而上升;加上企業邊際利潤不斷改善,今天1%美國富人再次佔美國GDP 18%,雖未至於1929年前嘅水平,但亦已差唔多矣。

工資跑唔贏CPI升幅

1990 年後嘅日本以至1997年後嘅香港,努力工作不如研究點樣掌握投資機會。例如喺2003年買樓及股票,過去五年所獲回報率之高,超過打工仔一生儲蓄(以貝沙灣為例,2003年一間一千五百呎住宅只賣760萬元,畀首期228萬元,今天市值1500萬元,獲利740萬元,係首期資本嘅224%。另一方面,即使年入100萬元嘅高級打工仔;一年亦只能儲下15萬元,需要四十九年才儲到740萬元……)。香港GDP愈來愈集中响溫巴仙人口手中。

隨着新興國家加入環球經濟,打工仔工資實質上升機會有限。1980年至今嘅美國、1990年至今嘅日本、1997年至今嘅香港,皆顯示工資跑贏CPI升幅嘅機會並唔存在,例如今年有幾多香港人獲加薪超過6.1%?

日本嘅情況係股市回落、樓價回落之後,不但未能改善貧窮差距,更引發M形社會出現。中產階級面對高通脹,同時面對股市及樓價回落;企業破產率上升及經濟衰退,令生活質素直線下降。日本人响今年嘅收入較1990年差咗而非上升咗;大部分香港人今年生活水平亦較1997年差咗,只有少數成功者才能躋身上層社會,大部分則貶為新貧窮階級(即M形社會出現)。樓市及股價喺一上一落中嘅功能係separate fools from their money,一般投資者年紀大咗,聰明咗,但窮咗。

次按危機去年8月爆發後,令資金由美元區流向歐羅區。但根據3P理論(購買力),歐羅滙價已偏高50%,日圓卻偏低27%、新加坡元偏低18%、南韓圜偏低12%,最偏低係人民幣。站响投資者角度睇,應拋售歐羅買入民幣。索羅斯喺去年8月認為,債券證券化改變咗全球經濟,金融業已改變真實經濟嘅命運,過去服務真實經濟並唔一樣。索羅斯稱上述情況為「The Theory of Reflexivity」。

簡單D講,甲公司上市後股價急升,令公司可透過發新股而獲取低成本資金,令公司更賺錢;利潤上升刺激股價再升,令公司獲取資金嘅成本更便宜,而推動經濟向上。反之,一旦股價下跌,公司不能透過發新股獲取低成本資金,令公司賺少咗錢,利潤下降令股價再跌,公司資金成本更貴,結果令經濟向下。即係話,股市再唔係經濟晴雨計,反而成為推動真實經濟向上向下嘅力量。索羅斯認為,由股市上升而推動真實經濟向上嘅日子由1982年10月開始到2007年10月結束,長達二十五年嘅超級泡沫(super bubble)超過第二次世界大戰後任何一次boom and bust。佢唔相信政府有力量阻止經濟進入回落期。

只有拋空者成大贏家

索羅斯認為,過去二十五年令真實經濟增長唯一辦法係增加信貸,可惜信貸泡沫喺去年8月已爆破,令樓價、汽車分期付款及信用卡分期業務全面萎縮,所產生嘅巨大壓力令真實經濟最終走向衰退。响咁嘅情況下,即使最佳及最醒嘅投資者例如貝爾斯登、花旗、美林、瑞銀、大摩等股價亦回落一半甚至三分二,連畢非德亦面對虧損。金融市場已成為投資者輸多D或輸少D嘅地方,只有極少數例外,例如John Paulson透過拋空賺取驚人利潤。最終出現冇個別行業突出嘅情況(No Garden - Variety Crisis),即連牛熊共舞亦無法發生。股市內少數大贏家都係拋空者,但上述並非普通投資者可以做得到。

2008-07-26

樹永遠長唔到天上

7月25日,周五。恒生指數跌347.01,收22740.71;成交613.9億元。7月期指跌304點,收22804點;8月期指跌305點,收22795點。

國泰航空(293)8月1日起增加燃油附加費,短途由171元升至231元,長途機票由710元升至924元,雖然航油價格由7月3日181.85美元下滑14%。

澳門永利賭場認為,中國緊縮民眾赴澳門限制,對該酒店影響唔大。據官方數字,6月起澳門鮋內地遊客較5月減少2.3%。

花旗推介和黃(013),因赫斯基石油純利升89%,達13.6億加元,估計和黃今年每股獲利3.3元,較去年減54%,P/E二十二點八倍,目標價94元。另推介永恩國際(210),估計今年每股獲利29仙,升23.8%,P/E十四點一倍,目標價5.7元。

滬深三百指數跌1.28%,收2939.20。徐工科技跌10%,收15.98元,公司計劃以每股16.47元向母公司發行三億四千萬股收購資產。神華能源跌3.1%、兗州煤業跌2.9%,因國家發改委開會討論限制鋼材、焦炭和焦煤價格,協助中小企應付不斷上揚鮋成本。

任何事物都有見頂日

日本出現五十五個月來第一次出口下跌,出口量減少1.7%,理由係出口美國減少15%、出口歐洲減少10.3%、出口中國升5%,雖然出口俄羅斯上升40%、出口中東升22%……。睇嚟其他國家經濟增長冇法抵銷歐美國家經濟增長放緩。

英國第二季工資升幅只有3.2%,前景展望悲觀,估計今年GDP僅升1.5%,明年1.4%。6月份日本核心通脹率升1.9%(5月份升1.5%),响CPI升幅少於2%之前,日本銀行仍然唔會加息。

澳洲最大銀行澳洲國民銀行為美國次按撥備8.3億澳元,令股價下跌13%,係七年內最大跌幅。

由7 月16日起鮋熊市二期反彈,技術上睇並未完,後市仍然反覆向上。道指跌283.1或2.4%,理由係兩房股價回落;花旗跌9.8%,見19.06美元;AIG跌8.9%,見27.43美元;Pute Homes及D.R. Horton跌14%、Toll Brothers跌8.5%、福特跌15%,見5.11美元;反之,亞瑪遜升12%,見78.72美元;諾基亞升17%見52.43美元。換言之,大市仲係個別發展。

美國宏觀經濟仍然向下,信貸壓縮(credit crunch)持續。我老曹睇法係,任何事物都有見頂日(通常人人睇好時)。相反理論十分有用,但必須由有智慧鮋人去用。如投資較你份工更重要,份工做唔好最多炒魷,投資失敗可以一無所有。投資絕對唔係part-time job!

美國政府話,北極有九百億桶石油、一千六百七十萬億立方呎天然氣及四百四十億桶液化氣未開採,相等於全球未開採石油13%、天然氣30%、液化氣20%。其中84%係離岸,位於西西伯利亞盆地、東巴倫支盆地及阿拉斯加北極圈內。由於北極領土唔屬於任何國家而無法開採。油價泡沫會否接近爆破(2001年11 月未有石油期貨合約前每桶19美元,到2008年7月11日147.5美元,共升676%)?合理油價係咪值80美元一桶?事後才知。响商品期貨活動鮋資金今年3月達2600億美元(五年前只有130億美元),上述未計投資資源股同能源股鮋資金。樹永遠長唔到天上!我老曹唔敢叫大家拋空期油,但對能源股及資源股應抱敬而遠之態度。短缺(shortage)?响自由市場係冇短缺呢回事,只有價高、價低,利用價格調整供求,只有在計劃經濟制度下才有供應短缺。

美難再靠減息減稅製造繁榮

所謂專家意見往往自相矛盾,有人睇好時必有人睇淡,不然如何成市?誰對誰錯,事後才知。

周四Downey Financial股價又急跌,該公司CEO已同公司講拜拜,理由係第二季虧損2.19億美元或每股7.86美元,令股價一天內急跌28.2%,至 1.96美元。地區性金融機構出事有如三水佬睇走馬燈,仍然陸續有來。過去八個月全球投資者財富減少3萬億美元(或資本30%),不但花旗、美林、UBS 等股價暴跌,蘋果、RIMM、雅虎、Google等跌幅亦幾大,仲有通用汽車、福特汽車;以及滬深A股(畢非德過去八個月亦失去20%市值)。你鮋損失有幾多?

Theodore J. Forstmann係《福布斯》美國富豪四百強之一,佢認為,信貸惡化問題較大部分人估計差!「九.一一慘劇」後政府大量放寬信貸,令利率進入負利率期,刺激股樓上升。依家泡沫已爆破,有排搞,情況較2000年科網股泡沫爆破更差,最後必令美國消費下降。

歐羅之父蒙岱爾認為,歐羅面世後,美國政府再不能夠透過減息、減稅去製造經濟繁榮!2003年可能係最後一次,因當年歐羅仍未普及。1913年美國入息稅只有3%,到第一次世界大戰時升至60%,第二次世界大戰時升到92.5%,其後漸漸回落到列根時鮋28%、克仔時鮋35%;最後一次透過減稅刺激經濟上升仍然有效,應係殊仔矣。蒙岱爾研究所得,減稅到25%最有刺激作用(佢早喺七十年代發表);低於25%稅率後再減稅所帶來鮋刺激作用有限(例如今年香港政府減稅);稅率高於35%可妨礙經濟發展;今年1月起內地稅率降至25%,可能亦係信蒙岱爾分析。蒙岱爾主張美國聯儲局同歐洲央行結盟要「共同進退」才有效,不然會此消彼長,作用互相抵銷。呢點我老曹亦同意,但上述日子不知何年何日才出現。

轉向技術及品牌必經歷痛苦

戰後三十年,日本工資漸漸同美國拉近;中國改革開放三十年,中國工人工資今天只及美國3%,係乜嘢道理?主要係中國進口導致世界礦產品價格及石油價格最近七年以年均70%鮋速度上升,海運價格更以年均170%鮋幅度狂升。由此出現咗中國進口產品價格瘋狂上升、中國出口產品價格如非瘋跌就係無法提價鮋現象。結果係辛苦了中國工人、污染咗中國江河、沙漠化咗中國三分二草原、消失咗20%森林,換來鮋只係中國人有餐飯食吓,代價係咪太大?反之,西方發達國家八十年代起獲得中國廉價產品出口後,通脹率回落了,外資企業利潤上升了。以2007年為例,中國出口一百七十七億件服裝,平均每件只值3.51美元,响外國賣幾多錢?以電腦滑鼠為例,响美國售價40美元一隻,中國出口價卻係3美元!大摩估計,美國消費者因中國廉價產品而節省下來鮋金錢每年達1000億美元!中國人辛苦賺返嚟鮋1萬億美元外滙儲備,過去五年喺美元滙價回落下已貶值接近50%,相等於全中國人一年工資收入。

反而高檔汽車中國鮋售價較海外市場高出一倍,進口化妝品及奢侈品價格比較海外市場更高得離譜。

過去三十年,中國經濟就喺「低價出口、高價進口」中發展起來。以2005年為例,外商從中國賺走最少1000億美元利潤,因為外資响中國享有三年免稅、兩年減半,再加廉價土地、超低勞工成本。上述條件其他發展中國家幾乎都冇,形成外資企業佔中國總進出口值達55.48%。

近年中國政府逐漸糾正呢個錯誤,例如兩稅合一,外資企業稅率漸同國有企業看齊;其次逐步取消出口退稅;以及讓人民幣有秩序地升值及中國工人工資上升……。上述令更多利益回歸中國人手中,上述調整2005年7月已開始。勞動成本上升、人民幣升值、退稅減少或取消,兩稅合一鮋影響逐漸浮現,令大量中小企可能捱唔住而被淘汰。上述係由低勞動力成本優勢轉向技術及品牌優勢必須付出鮋代價,雖然痛苦卻係必須。上述調整令中國股市由去年10月6100點跌到近期 2900點,跌幅達60%。房地產市場成交量萎縮,部分大城市樓價已出現逐月回落鮋態勢。由於人民幣仍在升值,國際熱錢繼續大舉流入,威脅中國金融及經濟安全,痛苦鮋調整期仍在進行中。

中國面對五大難題

中國依家面對鮋難題:一、防止通脹率急升(今年上半年大豆、食用油、鐵礦砂、原油價格分別升77.9%、75.6%、78.8%、64%),但上游生產材料價格加速上升,下游產品點應付?家吓依賴行政手段壓住鮋通脹率可維持幾耐?二、出口形勢不容樂觀。廣東省紡織服裝、塑膠製品及玩具出口增長率上半年只有 0.7%、7.4%及7.6%,唔少出口型企業已陷入虧損狀態,由低技術含量出口產品過度到高附加值、高技術含量鮋產品十分困難。三、房地產市場走勢可能逆轉。中國人「買升唔買跌」鮋心理預期影響非常顯著,一旦房價回落,買家大量消失。四、農民今年第一季現金收入只有1494元,上升18.5%。依家柴油價、尿酸、磷酸二銨等國內價同外國價相差好大,如扣除開支,今年一畝小麥田純收益只有153.5元人民幣,反較去年減少49.74元或24.5%。五、全世界都知人民幣要升值,形成熱錢加速流入,而流入管道多,隱蔽性強,監管難度極大。

未來中國能否由低附加值、低技術含量產品走向高附加價、高技術含量產品,一如1973年石油危機後鮋日本?木宰羊。

2008年7月27日 星期日

2008-07-25

通脹幾高因人而異

7月24日,周四。恒生指數高開低收,收市跌46.83,收23087.72;成交772.47億元。7月期指跌152點,收23108點;8月期指跌143點,收23100點,仍係高水。

滬深三百指數升3.26%,收2977.36。

瑞信次按危機表現值得一讚

瑞士第二大銀行瑞信第二季利潤減少62%。該行自2006年起已減少次按業務,到今年3月31日止已減少呢方面貸款達59%。瑞信股價今年跌咗27%(同期瑞銀跌咗足足50%),今年1月宣布响2010年前招聘一千名財富管理顧問,第一季已錄用一百一十名(亞太區佔四十名)。瑞信2006年嘅遠見,不但令自己响次按危機中輸少好多,同時利用其他同業仍在水深火熱期,自己則拓展財富管理業務。呢一仗瑞信表現出色,值得一讚。

受信貸危機影響,全球股市由去年10月平均回落20%或以上;有關衰退嘅言論佔據傳媒大部分篇幅,有關熊市嘅妙語亦大量出現。上半年財務資產有所回落,但 醒目私人投資基金繼續有出色表現;估計用作投資嘅資金由2008到2030年仍係增加而非減少。2012年全球投資資金估計可達4500億美元一年,2020年達6000億美元……。即係話未來愈來愈多蚊年湧入投資市場,近期信貸壓縮(credit crunch)只係考驗市場解決問題嘅能力,而非廢掉市場。今天股票市場早已多元化,唔係只有單元行業,例如2000年科網股泡沫爆破,同時卻係能源股同 資源股起步期,2001年起再加添房地產及金融股;2006年美國樓市見頂,2007年8月爆發次按危機下,邊D領袖股又會冒起呢?

前景展望分成兩派:一以瑞信陶冬為首嘅高通脹論,二以我老曹為首認為最高通脹期已喺眼前,明年不但唔使憂慮通脹,反而要憂慮通縮,擔心歐美經濟將進入九十年代日式經濟(capitulation)。隨着歐美地區樓價同股市回落,美國人消費估計將減少3000億美元一年,令美國GDP重返歷史性增長率(例如 1966至82年)。1966至82年亦係美國人工資上升期,出現因工資與物價互相追逐而令CPI上升嘅滯脹期。呢次CPI上升卻非需求推動,而係由成本推動,即美國人工資已無法跑贏通脹,只有節衣縮食。

美限制石油投機漸獲支持

根據Petroleo Mexicano CEO Jesus Reyes Heroles嘅研究,如剔除投機成分,油價只值80美元一桶。依家美國國會正在制訂法律,限制石油投機活動。根據美國商品期貨管理委員會資料,4月份喺紐約商品交易所買賣合約中,71%由投機者持有(五年前只佔37%),加上愈來愈多共和黨議員亦支持民主黨所提嘅方案,限制石油期貨投機活動。民主黨總統候選人奧巴馬6月22日正式提出,如果當選必會管制石油投機活動,共和黨麥凱恩响6月25日亦要求石油期貨市場立即停止「魯莽嘅投機」活動,但冇提出點樣停止。

中國七十個大城市6月平均樓價較一年前升10.2%,但上海、北京及深圳已回落。受美國兩房影響,銀監局劉明康要求國有商業銀行小心房地產風險及收緊審批,以免兩房事件响中國發生。

中印互動可帶動亞洲

上周美國按揭銀行家協會嘅再按揭指數下跌5.6%,因三十年期定息按揭利率升37點子,見6.59厘。利率上升加上兩房危機,令美國再按揭活動進入退潮。

根據凱恩斯理論,C+I+G係對付衰退嘅有效工具。C即增加信貸,I即人均收入上升,再加上政府赤字,可刺激經濟繁榮。展望未來,美國無論C、I、G都無法上升,又點樣刺激經濟繁榮?九十年代日本嘅C同I雖然無法上升,但政府仍可增加財赤,都未能引發日本繁榮。美國未來連增加財赤都有困難,因為其他國家嘅主權基金正降低美元所佔比重。

九十年代日本經濟萎縮只係斯人獨憔悴,唔影響別國。去年美國曾流行decouple論,即只有美國衰退,別國唔衰。去年我老曹唔認同decouple論,理由係其他國家太依賴美國,而美國並唔係日本(九十年代前好少國家依賴出口產品到日本去維持本國繁榮)。另一方面,中國同印度嘅人口足以成為另外兩大引擎,尤其係中國正由出口導向轉為內需為主。因此中國最終會出現V形反彈,即跌得快、升得高。但去年10月開始嘅A股熊市幾時結束?只能做事後孔明。如中國同印度進入互動,應可帶動亞洲區十一個市場,例如菲律賓、泰國、印尼、馬來西亞甚至澳洲、紐西蘭等保持繁榮,唔再依賴歐洲同美國。中印最終同歐美可能出現 decouple(即你有你衰、我有我好),但幾時出現?我老曹心目中估計係2009或2010年。美林證券環球財富管理亞太區投資策略員Stephen Corry認為,應該係滬深三百指數P/E見十二倍之時,睇嚟我地應耐心等候。

美國眾議院以二百七十二票支持、一百五十二票反對通過挽救兩房計劃,相信7月25日及26日參議院投票亦會通過。房利美今年股價已下跌62%、房貸美下跌 68%,去年兩間公司股價都喺60美元以上。新法案下,兩房只能向625000美元以下嘅物業貸款及協助400000萬美元次按者再按揭,三十年期固定利率貸款由政府做擔保。殊仔亦取消支持購入「被接管物業」法案,响咁嘅情況下,美國政府負債上限仍係9.5萬億美元(依家仍差3600億美元),冇再提升。

美國第四大銀行Wachovia Corp第一季向兩間Federal Home Loan Banks借入532億美元,較去年第四季414億美元進一步上升,三間信貸評級公司本周二降低其評級。花旗亦借入885.3億美元,成為Federal Home Loan Banks最大貸款戶;排名第三係Washington Mutual,共519.5億美元。Washington Mutual第二季虧損33.3億美元,或每股6.58美元。

由此證明,美國財政部自去年第四季及今年第一季已為金融機構提供大量資金,今年第三季起再加上兩房貸款機構,最終將連政府亦冇錢借!

英倫銀行成員出現咗意見最分歧嘅一次,六個成員中,有人主張加息、有人主張減息、有人主張維持利率不變。6月份英國CPI上升3.8%,工廠價格指數7月份係34點(6月份28點),為1990年以來最高。如保持5厘息,CPI將進一步上升;如果加息,失業率將進一步上升。6月份新樓按揭較去年同期減少 67%,8月7日英倫銀行點樣決定利率方向?

响牛市中,跑贏通脹率甚易;喺熊市中,點樣跑贏通脹率?今年到底通脹率上升幾多?官方數字雖然係6.1%,但老婆話我老曹知,食開嗰隻牌子嘅米去年60多元一包,今年賣97元一包,加價50%;囡囡則話:爹哋,舊年500蚊已可入滿架車D油,今年1000元亦入唔滿,通脹率係100%至真。我老曹則同老婆及囡囡講,食物同汽油唔屬於「核心通脹率」,因此唔計嘅。老婆問:邊個唔食飯?囡囡問:邊個唔搭車?我老曹去年760美元一盎斯賣掉嘅黃金,今年唔係值 940美元咩?通脹率似乎係35%。所謂通脹率,好多時睇你買乜嘢而定。至於政府指CPI升幅只有6.1%,點計出嚟?木宰羊。

北京奧運絕非省油之燈

官方話CPI為6.1%,而銀行存款利率只係1.5厘,即一年唔見4.6%。响負利率下,借錢買樓係咪制得過?Wait a minute! 即使CPI上升之時,資產價格亦可以回落(例如1973至74年及1981至82年)。1982至2007年美股上升十三倍,恒指上升三十二倍。長線而言,揸股票好過揸鈔票係人都知,但短期而言,2007年10月至今八個多月,入市嘅投資者都幾傷。

聯儲局成員Mishkin認為,美國樓價每下跌1美元,消費者則減少消費7仙。去年至今美國樓價跌幅,令消費者減少消費1500億美元,上述數字已由政府退稅1460億美元填補,所以至今美國GDP仍可溫和增長。今年5月之後,美國樓價同股市繼續跌,未來失去嘅消費力由邊個嚟填補?

資本主義最大失敗係即使你擁有電視機、冷氣機及雪櫃,但仍然只算係窮人。共產主義最大成功係即使月入1500港元嘅古巴人,仍然認為自己好富有。共產主義嘅成功係可以五十年如一日(2008年嘅古巴同1958年一樣),資本主義最失敗係boom & bust,例如2007年10月人人認為香港經濟繼續繁榮,依家人人擔心經濟衰退。

北京奧運費用知多少?非正式統計係430億美元,係四年前雅典奧運開支嘅三倍,絕非省油之燈。共有二十八項運動、三百零二項賽事喺北京舉行,由射箭到柔道、從乒乓波到排球。北京奧運係中國向全球展示新面貌嘅日子,中國人人以此為榮。因此唔好研究奧運之後喇,因為冇人會聽。

2008-07-24

外國銀行股可牛刀小試

7 月23日,周三。恒生指數升607.07,收23134.55;成交757.86億元。7月期指升829點,收23260點;8月期指升823點,收 23243點,高水。東亞銀行(023)升4.6%、滙控(005)升2.9%、國泰(293)升6.3%、東方航空(670)升11.8%、中石化(386)升5.3%。

滬深三百指數跌0.74%,收2883.32。同仁堂年僅三十九歲嘅董事長張生瑜因心臟病逝世,英年早逝,令人可惜,亦令同仁堂失去掌門人。

戰後至今,除咗一個國家外,所有奧運會主辦國响奧運聖火熄滅前後,都經歷咗經濟滑坡。不過,中國政府顧問、中國改革研究基金會、國民經濟研究所負責人樊綱認為,北京奧運會後,中國經濟仍將快速及健康增長。

北京可避過奧運後遺症

大摩最近報告指出,戰後至今,十一個主辦過奧運會嘅城市中,只有1996年美國亞特蘭大嘅經濟响奧運會後冇出現放緩迹象。北京只佔中國GDP 4-5%,加上响建設新體育場館及基建上冇今天花明天錢嘅情況,相信可避過奧運後遺症。

標準普爾亦認為,中國並冇將自己响財政上保持謹慎嘅傳統拋諸腦後,早已防範其他奧運主辦城市中出現嘅「白象」效應。例如2004年主辦奧運會嘅雅典,唔少奧運場館到現今仍然閒置。北京一向缺乏體育及娛樂設施,未來北京奧運場正好服務日益富裕嘅一千七百萬北京人口。

德意志銀行7月22日報告認為,中國內地面臨經濟下滑風險大於通脹風險。出口量增速已由去年上半年24%下降到今年上半年13%,一D地方例如珠三角已有 10%中小企業倒閉,部分中小房地產企業由於資金鏈斷裂而被迫降價,清貨壓力導致房地產價格下降及銷售量下滑。反之,CPI升幅由4月份嘅8.5%降至6 月份嘅7.1%,估計7、8月份CPI升幅少於7%。

根據花旗Elaine Chu資料,今年上半年從亞洲基金流失資金約140億美元,即去年認購亞洲離岸基金有85%已贖回。上周流失資金約8億美元(最近七星期平均每周12億美元),估計拋售力量在減弱中(去年淨流入164億美元)。最大拋售力量响6月19日至7月9日,由每周平均嘅6.45億美元,最高曾見22億美元。7月9 日後拋售力量已減弱,但唔排除股市回升後仍有小量拋售。五窮、六絕、七翻身,相信熊市第二期另一隻腳由7月16日開始,呢次反彈理論上可維持到8月下旬才結束,但並唔係因為有新資金流入,而係拋售力量告一段落,因此唔排除乾升現象出現(例如升市成交額未能大幅上升)。

滬深三百指數由去年10月嘅五十三倍P/E,回落到最近嘅二十一倍;印度Sensitive指數由年初嘅三十一倍P/E,回落到依家嘅十四倍。現水平計,中國股票及印度股票再唔係貴,但亦唔便宜,估計可以玩上落市。

房利美及房貸美手上未售出物業今年3月總值69億美元(全美八千五百間銀行手上未售出物業共值85.6億美元),被接管物業即使減價20%仍未能售出,即兩房手上物業如全部售出,最少虧損13.9億美元。除咗上述外,房利美亦持有或擔保512億美元次按,以及持有或擔保3446億美元Alt-A貸款。

兩房典型官商勾結

1998 年兩房嘅主腦諗出一條賺大錢嘅絕橋,就係用兩房嘅低息借貸能力購入高息次按債券,令房貸美債券持有量由1998年嘅250億美元升到2007年嘅 2670億美元;房利美由185億美元升到1270億美元,令兩房純利大升。五大巨頭因此獲分派1.99億美元紅利,股東及管理層獲分派1220億美元股息及福利。好喇,依家出事嘞,虧損卻由美國納稅人負擔?唔通資本主義只有天堂而冇地獄?過去十年兩房為游說國會議員去保護佢地嘅「特權」而用咗1.7億美元,更多資金用於幾屆總統選舉上,乃典型官商勾結!即使今天面對重大虧損,仍希望派息6.5億美元一年!真係奇哉怪也。

美國兩房貸款機構搖搖欲墜,美國金融危機仍未到柳暗花明嘅時候。美國人借貸消費受到打擊,再不能寅吃卯糧。金融業係美國經濟嘅脊骨,如今已出現毛病;消費業係美國經濟嘅血液,依家變得唔暢通;美國經濟肯定有病,而且在惡化中。

英倫銀行貨幣政策委員會理事布蘭弗羅話,英國經濟正步入衰退,要求大幅減息去減輕借貸成本;估計英國快將出現GDP負增長!依家英倫銀行利率5厘、通脹率 3.8%(目標通脹2%)。布蘭弗羅估計英國房地產價格將下跌達30%,萎縮期可能長達一年;估計英國明年GDP升幅只有1%。

全球性去槓桿化(deleveraging)及對衰退嘅恐懼,短期出現極端(VIX喺7月16日曾見30,相當高啤打系數),令一次技術反彈出現,但唔代表熊市見底。

投資尤其係trading乃辛苦嘅工作。金融市場瞬息萬變,每次回望,我老曹都認為自己可以做得更好一D。檢討過去以便提升自己未來作戰能力,乃我老曹一向作風。今天策略係點樣將波幅(volatility)變為自己嘅機會(opportunity)。例如學習閱讀VIX,睇VIX便知道油價到達147美元時係拋空而非買入時機。睇VIX亦搵到7月16日乃熊市嘅腳。今天股市再唔係一個穩定嘅世界,而係一個充滿波幅嘅市場,作為投資者不但唔好怕波幅,反而學習利用波幅增加自己嘅財富。請學習牛眼投資法,練好自己嘅功夫,以便一矢中的。唔好再相信買入後持有法,因為已經過時;今天需要嘅係快、狠、準,唔再做懶惰嘅投資者。

7月16日開始嘅反彈有一特色,就係喺海外嘅銀行股反彈十分有力,乃去年5月至今少見。海外銀行股係咪見底?抑或係因為美國證監會嚴限拋空嘅結果?著名銀 行股分析公司Ladenburg Thalmann分析師Richard Bove認為,歐美銀行股已嚴重超賣,係一生人少見嘅購入機會。佢認為,美國政府接管IndyMac,係二十年內最大嘅一次接管行動,乃滿街鮮血、入市時機。

投資切忌動真感情

記得1989年6月5日我老曹亦曾用「滿街鮮血、入市時機」叫各位買港股,曾被已故香大俠破口大駡我老曹「冇血性」,我老曹唔開心咗一個月,因香大俠教咗我老曹好多嘢,我老曹亦好尊重佢,所以反覆思考我老曹自己係咪冇血性?後來我老曹諗通咗,北京六四事件與我老曹買唔買股票無關,投資股票就係要「冇血性」!其後香大俠將泰盛出售,1997年更將自己嘅住宅賣掉,去咗新加坡住,充分反映佢大情大性,但佢亦犯咗投資學上嘅大忌:「動咗真感情!」

今天外國銀行股係咪最黑暗嘅時刻,同時係最光明嘅時刻?事後才知道。我老曹意見係不妨牛刀小試,例如花旗銀行、富通銀行、皇家蘇格蘭銀行及瑞銀等都幾便宜。明知山有虎,偏向虎山行。古龍教落:最危險嘅地方可能係最安全嘅地方。

Fisher Investments創辦人Ken Fisher唔認為依家係信貸壓縮(credit crunch),而係信貸重新分配(credit reallocation)。大及高質素嘅貸款者獲取廉價信貸好容易;反之細及低質素嘅貸款者獲取信貸成本卻十分昂貴。形勢對大企業有利,對中、小企不利。佢批評年紀漸大投資者過分強調安全而錯失機會,例如追求回報率(yields)而非賺價。

本周一Michael Kahn响《巴隆氏》發表意見:各位請聽住,金融股已見底,但唔係牛市開始,請唔好做chicken littles,天冇跌落嚟!佢認為,7月16日起領袖股變成落後股,例如石油股同資源股;落後股卻強力反彈,例如銀行股。Select SPDR Energy ETF本來相對強勢,但6月底已結束!能源股同資源股成拋售項目而非吸納對象。Michael Kahn大有來頭,佢寫咗三本有關技術分析嘅書,亦係Chief Technical Analyst for BridgeNews及Market Technicians Association前董事;佢嘅blog地址係www.quicktakespro.blogspot.com。

美國銀行、運通銀行公布今年第二季業績令人失望,主因係信用卡問題逐漸浮現。例如美國運通信用卡消費,4月較去年同期升10%、5月升5%、6月升2%,相信7月份更差。呢類依賴信用卡去提供盈利嘅銀行,投資者可以少沾手(雖然畢非德亦揸咗美國運通,可能佢年紀太大,已成為懶惰嘅投資者)。美國地區銀行 SunTrust响資金壓力下,被迫出售由1919年一直持有嘅可口可樂(畢非德另一愛股),收回20億美元去增加銀行資本充足比率。可樂股價近年表現一直令人失望,因美國本土已冇增長,全賴新興國家市場支持營業額上升。

今天值得學習嘅對象再唔係畢非德,而係五十二歲嘅John Paulson,呢位前貝爾斯登銀行家乃CDS專家,佢管理嘅Credit Opportunities Fund去年獲利係本金六倍,共賺到200億美元。管理層獲花紅37億美元,而佢自己淨賺17億美元,成為2007年收入最多嘅對沖基金經紀。今年上半年該基金再升值26%(同期標普五百跌15%)。John Paulson一年內令自己變成《福布斯》四百位全美最富有嘅人中排名一百六十五,快、狠、準乃佢投資策略嘅特色,你做得到咩?跌市唔係賺唔到錢嘅理由,只能怪自己學藝未精。家吓佢公司管理嘅資金已達330億美元,計劃12月份開辦另一基金,集資多少未定,目的係向金融機構提供資本。

知名人士預測唔好信

Amex Securities Broker/Dealer指數過去十二個月下跌35%。雷曼兄弟、美林、Wachovia、Washington Mutual 股價跌幅都超過65%,由Paulson計劃組成基金向金融機構提供資本睇,明年係咪執銀行股嘅日子?

美國證監禁止祼空(Naked Short)共三十天,代表7月中到8月中乃睇好嘅安全期。市場出現典型挾淡倉行為,淡友暫時揠旗息鼓,留番9月再算。

去年12月根據Association of Investment Companies統計,約三分二基金經理及四分三投資顧問仍然對今年股市展望樂觀(即使熊市已喺去年11月開始)。雖然2008年只過咗一半,但相信佢地預測準確嘅機會亦唔大。2008年屬鼠而非屬熊,今年呢隻熊都幾霸道,令人感到沮喪及悲觀。應付之道係多D去旅行或學習新事物,皆有助減輕財政問題所帶來嘅苦楚。無論邊個,只要作預測便必定遲早出錯,因此應該把注意力集中喺揀股而非預測大市方向。除非你嘅投資技巧較風水佬更勝一籌,不然便少D預測,只須追隨趨勢。近期知名人士如羅傑斯上周睇好石油及食物,已吃了眼前虧。知名人士預測成績同我老曹一樣,時準時唔準,所以唔好信。

2008-07-23

三分努力 七分天意

7月22日,周二。恒生指數跌5.42,收22527.48;成交519.25億元。7月期指跌174點,收22431點;8月期指跌158點,收22420點,低水。

滬深三百指數跌0.22%,收2904.74。中國石化跌2.1%、中國國航跌2.7%、南方航空跌2.5%、海螺水泥跌4.4%。

1100年循環周期

中國國務院發展研究中心、金融研究所副所長巴曙松响香港一個會議上表示,內地通脹壓力短期內無法消失,因此短期內放寬貨幣政策唔太可能。中國出口便宜貨嘅時代可能已結束,進入依靠高科技嘅時代。佢請嗰D高能耗、重污染企業唔好一遇到乜嘢困難,就討論出口退稅問題。利率同滙率仲有提高空間,因中國將繼續面對嚟自食品、原油及勞動成本上揚所帶來嘅價格壓力。

美國兩房須為2170億美元冇市價嘅債券減值,佔兩房次按債券9.2%;另Alt-A債券佔5.8%,亦須減值。估計房貸美虧損達240億美元;房利美則少DD。兩房股價响歐洲繼續回落,令美股進一步回落,港股短期受壓。

貝南奇及保爾森要求國會對兩房作出類似1930年代嘅承擔(或瑞典1990年代嘅承擔)。1997至2003年香港負資產家庭亦曾要求特區政府作同樣承擔,不過特區政府拒絕。所謂承擔即成立類似1933年嘅Home Owners' Loan Corp,向所有貸款者及投資者購入斷供樓。當年美國政府投資2億美元(相等於今天200億美元),另借入20億美元,到1937年該公司共持有美國樓按 14%,相等於今天1.4萬億美元;1951年解散時獲利1400萬元。各位須留意,1933至51年係美國經濟向上期;如今天美國政府作類似承擔,未來結局如何?

九十年代瑞典政府面對銀行危機,亦作出類似承擔,依家已揸住全國銀行系統內22%嘅按揭資產,佔瑞典每年GDP 4%(相等於美國納稅人每年負擔多4000億美元)。點解賺錢歸兩房股東,蝕本卻由全美納稅人去負擔?

根據Economy.Com資料,即使停止所有新住宅興建,現存物業仍要二點五年才賣得清。依家賣一間屋需要九個月(2005年四個月),其中30%係因買家借唔到錢。

波浪理論(或叫循環理論)又再喺全球冒起,好彩我老曹响1974年11月已開始認識它,都算老資格。擒日講完1984年起到2001年嘅十七年向上周期(cycle),再講由2001年起向下嘅十七年周期,兩者合起嚟係三十四年循環周期;然後係七十二年……。由於大部分人一生只能經歷一個七十二年嘅循環周期,只有歷史學家透過研究歷史,才搵到二百二十年循環周期及一千一百年最大循環周期(可能仍有,但已冇人研究矣)。過去我老曹响唔少公開研討會上,唔止一次提及一千一百年循環周期(即五百一十年至五百五十年東方、五百一十年至五百五十年西方)。西方冒起由十四世紀文藝復興開始,高潮响1950年代,踏入 1960年代西方文化開始走向衰退期。反之,東方文化(尤其係中國)卻由十四世紀開始走下坡,低潮係1940年代。1978年嘅改革開放政策,係中國進入五百年向上周期嘅起步點!我地呢一代正好經歷西方文化盛極而衰及東方文化重新冒起期(上述諗法令我老曹一再反對移民海外,可惜連我老曹嘅弟妹亦唔信)。

香港未來十年路難行

太長嘅循環理論冇命睇,因此集中研究三十四年循環周期嘅下半部,即由2001至2018年嘅表現。第一個四點三二年由2001年年中開始,2005年第三季結束,由於受到三十四年周年循環周期向下嘅壓力,變成「反過來」(即上升周期反而向下,例如2001年年中至03年年中;回落周期則向上,例如2003 年年中至05年第三季)。第二個四點三二年循環周期才正常,由2005年第三季到2007年第三季向上,擔心由07年第四季到2010年第一季又再向下。最初兩個四點三二年仍處於十七年循環期向上日子,因此仍可力抗三十四周年循環周期向下嘅壓力。到2008至2018年呢段日子,連十七年循環周期亦係向下,只憑四點三二年本身向上嘅力量將十分弱;加上香港經濟已非處於向上期,即2001到2018年四個四點三二年循環周期中,估計係由兩個向上另加兩個向下嘅四點三二年組成。如再用1945年起香港七十二周年循環周期睇,香港2007年10月到2018年未來十年嘅路都幾難行。附圖係一個典型嘅四點三二年循環周期標準走勢,可因應唔同客觀形勢而產生唔同變形。

到底人定勝天,定係天意難違?年輕時我老曹係毛澤東信徒:敢教日月換新天;年紀漸大變成鄧小平信徒:大氣候與小氣候,不因人嘅主觀願望而改變。結論係七分天意、三分努力。我地可以改變自己30%命運!如三分努力都唔願付出,便各安天命也。森池兄則主張「謀事在人,成事在天」,總之做人就要努力同付出,能否成事由上天決定。

循環理論容易走火入魔

過去幾十年,我老曹响專欄內好少談及循環理論,一來容易走火入魔,二來似乎幾消極,好易導人相信命運與風水,而忽略「三分努力」所在。好彩中國正在行大運,由1940年起,未來有五百一十年到五百五十年大運可行。第一個大運一百四十四年,係大起大落(1940至2084年);第二個大運(另一個一百四十四年)平步青雲;第三個大運飛龍在天;要到第四個大運才進入亢龍有悔期(一如戰後嘅美國就係行緊第四個大運)。Cyclical analyst極易誤入歧途,初學者要小心。

Wachovia第二季虧損61億美元,並宣布減少派息,令股價急挫;派息減少87%,至5美仙(之前為37.5美仙,都勿話唔得人驚)。該公司嘅麻煩來 自兩年前以255億美元收購Golden West Financial Corp.,剛好喺美國樓市高峰期,結果不但未能帶來收益,反而須大幅撥備。

美國運通第二季純利跌37%,令股價喺延長交易時段下跌11%或4.55美元,收36.4美元,成為巴郡旗下另一隻表現失色嘅股份,至今為止已由去年高位回落三分一。

泡沫嘅形成係由人們嘅非理性行為引發,呢點可由1637年鬱金香泡沫爆破到2007年內地A股泡沫爆破去證明。當年一個鬱金香球莖售價相等於當年工人二十年薪金,當泡沫爆破後,荷蘭唔少銀行破產,從此歐洲金融中心地位由十七世紀嘅鹿特丹轉咗去倫敦。1990年日本股市平均O高達六十七倍,當泡沫爆破後,日本大部分銀行須合併才能生存。2007年8月次按危機後,美國各銀行情況又點?所有泡沫事前皆難估頂,一旦見頂後,麻煩便開始湧現。作為投資者,只有耐心等候低潮出現,能夠做嘅事情好有限。

美國政府決定出售阿拉斯加土地(此乃1999年起第六次)共三百萬英畝,喺Colville河附近,冇路及其他基建設施,每英畝售價由5美元到950美元,年租每英畝3至5美元。1923年由政府劃出共二千三百萬英畝土地作為採油及天然氣之用,2002年數字估計蘊藏量共五十九億至一百三十二億桶石油,以及三十九萬億至八十三萬億立方米天然氣。

由於颶風多莉7月23日只會橫過德州海岸,而唔係直吹德州,對油田應唔會造成破壞(墨西哥灣北油田佔美國石油產量25%),令9月油價回落54仙,成131.28美元(7月11日曾見147.5美元)。打風季節過後而唔造成重大損失,估計10月起油價將有較大幅度調整。

向一百零一位National Association for Business Economics(NABE)成員所作調查顯示(上述調查由1982年開始每季一次),44%估計下半年GDP升幅將大於1%、45%估計升幅少於1%,只有10%相信負增長。

美國人5月份儲蓄率升至總收入5%,係1995年3月以來最大升幅。根據Fisher Investments研究,今年如閣下六十五歲,平均仍有二十年壽命(甚至更長),過去八十年唯一一段債券表現較股票好嘅日子係1928至48年,由 1948年至今股票表現較債券好98%,因此你嘅退休金仍應投資股票為主,而非債券。

Jean-Marie Eveilland(管理330億美元基金)認為,今時今日投資日股或亞洲新興市場,較投資美股吸引。佢認為亞洲股市甚至較南美洲、中美洲或東歐更吸引;依家最缺乏吸引力係美股,因剛完成信貸膨脹期。

中國股市回落,理由係原材料、食物及油價上升,令中國經濟進入滯脹期,政府為對付通脹率上升而抽緊銀根及加息。反而美國卻放寬銀根及減息,因為中國普通家庭花嘅食品上嘅開支佔總收入25%到50%,响美國只佔15%,令美國人對通脹壓力唔及中國人。一旦全球原材料、食物及油價受控,中國便可放寬銀根,令股市重新上升。但美國卻無條件再放寬銀根(因去年9月至今已放寬)。家吓油價已由高峰回落10%,到底係咪已見頂仍木宰羊(因上升軌未失守)。

OPEC油儲夠買起全球金融資產

以100 美元一桶計,OPEC石油蘊藏量價值係140,000,000,000,000美元(140萬億美元),相當於全球股票、債券價值嘅總和!換言之,以依家嘅市價計,OPEC手上石油儲備足夠買起全世界嘅股票及債券!去年年底OPEC已持有4.6萬億美元外國金融資產,到2013年將超過12.2 萬億美元,即OPEC所擁有金融資產總和甚至較西方國家仲多,全球財富將由歐美轉移到OPEC。唯一阻止上述情況出現係油價跌破100美元一桶,到底會否出現?《福布斯》雜誌出版人Steve Forbes認為,油價上升80%嘅因素係美元弱勢,一旦美元滙價轉強,油價將跌穿100美元,情況有如1975或81年,只係貝南奇唔知道,美國經濟必須先衰退,然後才能復甦。

Prudent Bear Fund創辦人David Tice接受彭博訪問時認為,標普五百指數將重見800點,即2002年嘅水平,到時熊市才完成,即由家吓水平再回落20%,需時十八個月到兩年。樓價回落推動佔GDP 70%嘅消費業走下破,最終令美股重返2002年水平。

Gary Shilling認為,美國正步入衰退。第一階段係樓價回落引發次按危機。第二階段係華爾街去槓桿化(Over-leverage結束)。現正進入第三階段,即消費回落,5、6月份因退稅而抵銷,7月份將出現大幅回落。第四階段係入口減少影響全球各國經濟,繼而令油價回落、美元滙價上升,進入通貨收縮期,估計2009年第二季美國失業率達7.2%。過去每次樓價回落期,建造業佔GDP便由5.5%降至3.5%;呢次將由6.3%降至3%(出現類似跌幅只有 1957至58年及1973至75年,估計呢次係第三次)。預測美國呢次樓價平均回落25%。

6月份美國領先指數回落0.1%,代表今年下半年美國經濟仍在回落。

2008年7月22日 星期二

2008-07-22

短期受阻 中期睇好

7 月21日,周一。恒指升658.71,收22532.9;成交696.4億元。7月期指升631點,收22605點;8月期指升597點,收22578 點。短期展望阻力漸現,但中期睇法,呢一潮升市可維持到8月下半月才完成。請參考以下分析。五窮、六絕、七翻身。以RSI睇,踏入7月份已出現背馳;以循環理論(cycle theory)睇,7月9日起下跌浪完成,上升浪開始。7月16日恒指20988.74係咪熊市二期內第二隻腳?今天恒指升穿由5月5日開始嘅下降軌,即類似今年3月至5月嘅熊市二期反彈由7月16日開始,估計可維持四十五天左右(由7月9日起計)即。用VIX指數睇,7月16日係另一隻熊腳機會極大,即股市進入中期睇好期。

循環周期影響股市

捉熊腳並非一般散戶可應付嘅遊戲,需要高度技巧,並能克服個人心魔才行,一旦形勢轉為不利,便應立即止蝕離場。你能做得到咩?去年有幾多所謂投資專家能掌握去年10月股市高潮而減持?循環理論我老曹1974年11月開始學習(當年有關書籍由行止兄所贈),但至今仍少見一般分析員利用此法分析(cyclical analyst),理由係掌握上述理論必須有幾深嘅數學基礎才掂。

其中最微細嘅浪約九至十一天(此乃移動平均數係十天之理由);大一D係二點三個月約十周(此乃50天移動平均數出現嘅理由)。再大一D係五點七六個月二十五周(即一百二十五天);再大係十七點三個月七十五周(三百七十五天)。完成一個大浪需要五十一點九二個月二百二十五周(一千一百二十五天),此乃二百二十五周移動平均數出現嘅理由。

上述循環互為影響,而形成股市韻律(rhythms),常見韻律有十七個月(或七十五周),即由低至高再返回低點需時十七個月;第二種係四點三二年(二百二十五周)。一個經濟盛衰影響通常需四點三二年才完成,再大一D係八點六四年、十七點二八年及三十四年半。

對股市影響最大係四點三二年同十七點二八年嘅循環周期;四個四點三二年組成十七點二八年。以香港1984年年中起步,第一個四點二五年係1988年第三季、1993年初、1997年8月、2001年下半年。第一個四點三二年嘅波浪係十七年大浪中嘅上升浪,即1984至88年第三季,上升日子多、下跌日子少;第二個四點三二年嘅浪亦係十七年浪中嘅上升浪,亦係上升日子多、下跌日子少(如當地經濟向上,第三個四點三二年浪亦係,此乃港股响1997 年8月見頂 嘅理由)。第四個浪便難逃一跌,至2001年年中,完成十七點二八年周期。當然,真正嘅cycle theory十分深奧難明,必須懂得計幾何者才可以學習。簡單D講,如你喺1984年已明白十七點二五年周期,便可避過1997年入市及2001年下半年加入大舉拋售行列。

不過,點解另一個四點三二年周期無法將恒指由2001年中到03年上半年呢兩年內推上?就係受三十四年嗰個更長更大嘅周期所影響。根據三十四點五年周期, 2001年起已進入下降周期,呢個大周期壓抑住四點三二年小周期向上嘅力量,令今次呢個十七年周期升市由2003年4月才開始。

上述教cycle嘅書,1974年11月由行止兄所送,唔知家吓市場上係咪仲有售。各位可試試上網搵搵,呢本書叫做Investing for Profit with Torque Analysis of Stock Market Cycles,作者係William C. Garrett。香港投資者已經相當成熟,學習cycle分析相信亦唔會走火入魔(但數學基礎差者不宜學習)。

花旗推介平安保險(2318),估計今年每股獲利1.745元,較去年減少33.1%,未來P/E二十五點七倍,目標價70元。平保手上持有嘅4.99%富通銀行,股價雖然下跌50%,但同A股比較跌幅仍略少。平保股價去年10月至今跌幅已超過50%,估計未來下跌風險有限。

花旗亦推介中渝置地(1224),認為股價跌幅有D過分,今年每股獲利20仙,減少57.4%,P/E二十四點六倍,目標價8.81元。奧運之後中央政府將進一步加強對重慶嘅支持(6月30日中央已要求全國各省市支持四川重建,香港特區政府亦答應捐助100億港元)。繼長三角以後,可成為中國第三個新經濟特區。該地區佔地一千六百平方公里(相等於二點六個新加坡),其中七公里土地將交畀新加坡政府協助發展。

中國進入脫胎換骨期

滬深三百指數升3.4%,收2911.05。由於上證指數重返3000點之上,短期阻力開始浮現。

依家中國經濟正進入大型基建投資期(佔每年GDP 9%)及結構重組期(由出口導向轉為內部消費),成功嘅話將脫胎換骨,不然就像東南亞或南美洲其他國家一樣,成為另一個二流國家,無法成為OECD一分子。1978至2007年中國經濟剛完成黃金三十年,增長速度之快令人咋舌。當人人沉迷於高增長所帶來嘅歡樂時光,去年10月股市卻敲響警鐘,代表中國黃金三十年結束,進入痛苦嘅脫胎換骨期,甚至唔等2008年8月奧運;呢段時期可能需時三幾年才完成。根據UCLA大學經濟學家Edward Leamer分析,中國GDP增長率放緩乃無法避免之事,中國經濟正面對一場bust。例如通脹率加速(家吓以行政指令阻止),出口增長率放緩(今年第二季GDP增長率只有10.3%,唔及去年第三季11.9%)。流動性過剩壓力下,人行不得不提升存款準備金率,但負債升幅仍然太快;再加上外資另覓其他出路(今年6月私人企業只獲5.124億美元外資投入,較去年同期減少18%)。中國經濟係咪另一隻火鳳凰?機會好大。至於何時重生?木宰羊。今時今日面對內地投資項目,只能依賴「忍」字訣,或只作中長線考慮。菲利普曲線(由經濟學家Alban William Phillips制訂)現象正在中國境內出現。

美利堅夢碎

房利美1938年成立,當年美國經濟剛由大蕭條復甦,需要一個「美國夢」(置業安居)。因為咁成功,1970年成立嘅房貸美令更多人可以借錢買樓發達,令七十年代開始美國樓價加快上升。美國今天嘅問題就係呢個長達七十年嘅「美國夢」破碎了,情況同1990年日本有D相似,美國人面對嘅係信貸壓縮(credit crunch)而非滯脹。失去信貸支持嘅美國人,加上房屋需求進入真空期,令樓市由賣家市場轉為買家市場。過去多少樓按貸款由兩房提供或擔保,尤其係嗰D 低收入及信貸評估好差嘅美國人,如兩房不能再提供貸款同時不能再擔保,會令房貸利率突然抽升。Albert Edwards及James Montier甚至認為,衰退已無法避免,因而提出通縮理論,並預測油價好快會重返100美元或以下。佢兩位過去係Dresdner Kleinwort最佳分析員,近年係法興環球資產管理策略員,佢地認為呢次衰退深而長。

近日反彈,係股市回落20%至30%嘅必然現象,今年1月及3月亦出現過,7月份再出現多一次。例如2000至03年亦有四個反彈升幅大於20%才見底,每次反彈都令人們再次恢復信心,然後又再次失望,直到最後投資者絕望為止。情況有如去年美股回落時幾多新興股市跌幅較美股大一樣。理由係投資者為增長率過分付出高O,例如四十倍甚至五十倍,忘記2003年嘅P/E不足十倍。新興市場股價上升,唔少係因為外資流入,一旦回落,外資可大量減持手上新興市場股票,造成重大跌幅。新興市場不但冇decouple,反而升跌幅較美股大一倍或以上!

債券大王格羅斯認為,今年12月前美元利率將不變,並認為美國通脹率同短期利率升降關係唔大。呢點我老曹同意,唔好諗住加少少息或減少少息便可影響 CPI,除非利率高出CPI 2厘或以上。債券大王同時認為,未來十二至十八個月即使美國唔加息,CPI亦將回落。呢點我老曹亦同意,依家油價即使未見頂亦已在尋頂,十二個月後油價應係100美元而非200美元一桶(短期受天氣及地緣政治因素影響,無法預測)。

食物漲價潮漸結束

上周五(18日)芝加哥期交所(CBOT)大豆價格急跌,因阿根廷計劃取消備受爭議嘅累進稅制,市場估計阿根廷大豆將湧向全世界,令8月合約跌51美仙,收1470美仙一蒲式耳;11月更收1448美仙一蒲式耳,出現價格倒掛現象(現貨價較期貨價昂貴)。如本周美國中西部地區天氣良好,有利大豆生長。根據 T Storm氣象預報,美國種植區氣溫唔會超過華氏九十度,降雨量適中。阿根廷取消累進稅(大豆依家出口關稅35%),農民罷工便結束,將引發大豆拋售潮,因農民必須依賴賣出出口大豆期貨,為下季大豆種植籌措資金(南美洲依家係冬季)。商品基金上周五已拋空八千手合約,即食物價格上升潮可能進入結束期。

今年殊仔支持俄羅斯响2008年加入WTO。俄羅斯正發展卡拉海上嘅Yamal油田,估計蘊藏量達三十萬億立方米天然氣,將之轉為液化氣供應全球,足以改變全球天然氣售價!俄羅斯亦建造價值200億美元嘅運氣船,作為將液化氣運到全球之用。有人話2003年中國加入WTO將令全球原材料價格狂升,2008 年俄羅斯加入WTO後,2009年會否令全球原材料價回落?!武俠小說名作家古龍教我地:最危險嘅地方就係最安全嘅地方,反之亦然。

2008年7月21日 星期一

2008-07-21

投資策略要睇時機

7月18日,周五。恒生指數升139.47,收21874.19;成交595.7億元;7月期指升184點,收21974點,高水。
滬深三百指數升3.58%,收2815.46。

花旗推介港交所(388),估計2008年每股獲利4.68元,減少19.1%,P/E二十三點一倍,目標價137.8元;至於內房股,內地樓價較去年6 月仍升9.2%,長三角一帶表現好過珠三角一帶。依家下跌只有廣州(跌0.3%)、深圳(跌3.8%),以及武漢(跌0.2%),跌幅最大係深圳,二手樓平均跌6.9%。不過,十七隻成交較多內房股股價跌幅卻十分大,或可考慮吸納,例如方興地產(817),估計2008年每股獲利27仙,減少 64.6%,P/E十點六倍,未來目標價5.32元。

美林再蝕錢美林第二季蝕咗46.5億美元或每股4.97美元,係美林歷史上最大虧損。過去三季美林已為次按撥備咗300億美元,2008年第二季仍需撥備97億美元,為增加資本而出售佔20%彭博LP畀彭博母公司,代價係44億美元;另出售Financial Data Services Inc.,代價係35億美元。

Oppenheimer & Co. Meredith Whitney認為,營業額大減而開支減少速度追唔上,係所有大企業面對問題。只有出售Winner,因為仍有買家;卻要留下Loser,因為冇人要,最後連食飯餐枱亦被迫賣埋。新領導層Thain去年12月接手後必需為美林找尋155億美元新資金,至今仍未籌夠。穆廸公司將美林長債評級由A1降為A2,令籌錢成本進一步上升。

美國參議員德明特話,「兩房」利用GSE品牌從事私人公司方式運作,有銀賺時由股東分享,行政人員亦獲私人公司優厚酬勞;喺時勢差時就要納稅人負責,實在係太唔公平。說來有道理,睇嚟財長保爾森要求國會以不設上限貸款去支持「兩房」有一定困難。

貝南奇已挽救咗貝爾斯登,接管埋Indy Mac,以及注資房利美及房貸美,情況好似1991年日本銀行總裁三重野康(1990年7月三重野康開始減息,希望日本人再借錢頂住日本樓價)忘記咗八十年代日本經濟繁榮建基於負債、槓桿比率及投機活動,上述活動只能製造紙上富貴而唔係真正興隆昌盛。1990年日股下跌令日本投機者收斂,雖然開始減息,但佢地仍設法減債及降低槓桿比率,結果引發咗一場financial meltdown!1990年起,日本唔係通脹而係通縮(deflation)。1990年前日本因海外投資甚大,企業把海外投資調回,令1990至94 年日圓升值,加快咗日本經濟陷入通縮;相反,外資喺美國投資很大,2007年9月起資金調離美國令美元貶值,美國出現冰火二重天(房地產及股市係冰天雪地;油價及食品價格係熱火朝天),次按令美國虧損超過1萬億美元,而令整個借貸市場萎縮,同時令美國財赤上升,推高長期利率引發大量破產潮,情況都幾令人擔心。

全球分析員都希望喺家吓亂七八糟股市中搵到方向,有人利用利率、失業率、通脹率或GDP增長率,甚至求神問卜;事實上都係猜測遊戲,有時準有時唔準(甚至大機構投資者或超級大戶都係咁)。

價值投資法須搵牛市起點 投資策略最大主流可分為價值投資法。例如譚甫屯喺1939年起步,其後佢將譚甫屯基金以44 億美元出售,並只為自己投資,估計死時身家超過200億美元;最出名係畢非德,佢1964年起步而成為全球數一數二富翁。其理論基礎係低價買入後一直持有,直到極高價時才賣出。各位應留意譚甫屯起步點係1939年,畢非德係1964年;美國超級大牛市由1982年先起步至2007年10月結束。情況好似香港房地產由1967年起步,1997年結束;最大升幅係1984至97年。任何人喺1984年前投資香港房地產都可賺到盤滿缽滿;如果你係價值投資法支持者,自然賺得更多。任何策略都離唔開時機(例如超級大牛市開始前投入,結束前離開,係價值投資法賺大錢背後理由);相反,喺1990年至今用同樣方法投資日本成績會點?各位問問王增祥便知。七十年代佢係香港大投資家之一,當年家財同唔少今天香港地產富翁差唔多,由於佢响戰前留學日本,於日本大學第二商業學校畢業,喺七十年代佢決定賣出香港物業,投資日本王子製紙,並佔該公司13%,另一家係片倉工業,佔該公司23%……,三十年過去了,佢 好朋友例如李超人及彤哥等無不富甲一方,至於佢本人就連新一代香港投資者都好少人認識。佢都係用價值投資法,可惜佢選擇地方係日本,唔係香港或美國,過去十八年日本股市不前,令佢响1978年日股投資,由當年日經平均指數5000點,升到2008年7月13000點,升幅得160%;同期恒生指數卻由1978年330點,上升到2008年7月22000點,升幅係六十五點五倍。

換言之,價值投資法必須找尋超級牛市起步點,而唔係由結束點開始。如果1990年投資日本、1997年投資香港以及2007年投資美國而採用價值投資法者,永遠唔會變成譚甫屯或畢非德。細佬,因為你出世得太遲。因通脹回落喺美國1981年開始,樓價回升美國响1982年開始;最低通脹率係2003年,最高樓價係2006年;2004年起美國通脹回升,樓價2006年下半年開始回落,令2007年8月出現次按危機。資產價格回落可能喺2008年年底或09年上半年引發美國衰退。

油價回落如因供應增加(或找到替代品係好消息;相反,油價回落因需求下降則係壞消息),一見到油價回落便將股價炒上者可能係表錯情或炒錯市。油價係咪見頂同油價係咪泡沫係兩回事。由荷蘭鬱金香、到密西西比投資、1997年香港樓價,2000年科股泡沫及去年內地A股,人人事前都知道係泡沫,何時爆破都係喺事後先知。例如香港房地產爆破喺1997年第三季;科網股泡沫爆破喺 2000年3月;內地A股爆破喺2007年10月。油價已處泡沫期呢點係十分肯定,係咪見頂?木宰羊。如果以金價計,十年前一盎斯黃金可買十桶油,依家只可買七桶油,即油價應喺100美元左右一桶先合理(或金價上升30%)。由於睇唔通,最好少D沾手。

面對超級大牛市結束(通常得二十二至三十年長。美國今次係二十五年),請勿再用價值投資法,應改用蔡至勇策略,即係近年本欄一再推介牛眼投資法。利用時機最短時間內賺取本金100%或以上回報,一旦形勢唔對就止蝕離場,把損失局限喺投入本金15%至20%之間。

對學曉牛眼投資法人嚟講,嗰D仍然採用價值投資法人係懶惰投資者。喺現今瞬息萬變社會點可以買入後持有呢?國共之爭,蔣介石相信以不變應萬變,結果退守台灣;毛澤東以萬變應付萬變,結果就得天下。花開堪折直需折,莫待無花空折枝。

網上唔少人問我老曹,假如1974年12月你持有十萬股和記,並一直持有到依家又會點?我老曹可以回答係市值升至760萬元(未計三十四年派息),真實情況係我老曹喺1976年初以每股2.8元賣咗,套番28萬元再投資,到1981年我老曹已擁有第一個100萬元。由於當年香港主權問題鬧到熱烘烘及聽郭得勝話三七分,即70%現金,只30萬元股份,一直到1984年7月才再次重新入市。喺牛市中以每年50%速度增加財富;响熊市中將虧損局限係15- 20%。

VIX(volatility index)係量度美股波幅,當佢上升時通常代表股市回落緊;因為股市中唔存在被迫買家,但存在被迫沽家,例如孖展Call,喺咁情況下引發股價急跌令VIX急升,例如1998年長期資金服務公司出事,以及2002年10月科網股拋售高潮,VIX均超過40點,事後證明係入市良機,其餘時間都很少超過 30點,一旦超出30點通常係入市時機(最近喺27點即漸接近拋售高潮)。

貝南奇不夠經驗技術上睇美股仍有10%或以上跌幅。金融股一旦完成反彈,未來跌幅喺30%至40%,理由係未來兩至三年仲有10000億美元呆壞賬撥備。冇理由相信熊市只係跌30%(上述只係平均數)及時間十八個月(上述亦係平均數而已)。每個熊市出現都係泡沫爆破後遺症,今次係次按泡沫及樓價泡沫。

與2000年嗰次唔同係貝南奇經驗唔夠,一開始就亂槍掃射,將利率由5.25厘降至2厘,依家面對大熊又冇子彈,但熊市只開始咗八個月,以後日子點捱?格老係市場出身,完全掌握市場脈搏,貝南奇喺象牙塔裏長大,只有理論而冇實戰經驗,流於紙上談兵。

2008年7月18日 星期五

2008-07-18

政府責任唔係派糖

7月17日,周四。恒指升511.22,收21734.72;成交634.6億元。7月期指升579點,收21789點,主因係受美股上升、油價報跌刺激。

美國證監會禁止十六隻金融股淨拋空,令道指升276.74或2.5%。美國銀行升22.4%,JP摩根大通升15.9%;富國銀行宣布第二季淨收入減少 21%,但派息多10%,令股價升32.8%。雷曼兄弟升20.6%、美林升12%、大摩升11.7%、房利美及房貸美升超過29%,地區性銀行如 National City及Zions Bancorp皆升22%。聯合航空升42%、美國航空升32%、三角航空升30%。連通用汽車亦升14.9%;通用汽車自1922年起第一次宣布唔派息。

美國債或失三A地位

自從貝南奇、保爾森及JP摩根大通戴蒙挽救咗貝爾斯登後,美國聯儲局同財政部已將自己嘅信用作為賭注。上周再出手挽救房利美及房貸美,市場反應好唔到十五分鐘。呢次連美國證監會亦出手挾淡倉,禁止房利美、房貸美及十六間金融機構股份淨拋空(只可借貨拋空),外傳殊仔亦搵友好幫手推跌油價同金價……。我老曹擔心,大反彈之後情況將更差,咁落去連美國政府債券最終亦將失去三A評級,因為美國政府將須承擔房利美及房貸美5萬億美元嘅擔保責任(信貸分析員 Nikola Swann認為,美國政府仍可承擔5萬億美元擔保,短期內唔會因此而被降低信貸評級)。1998年日本政府為協助當地金融業,亦曾擔保77萬億日圓債券(相等於5790億美元);1998年9月惠譽將日本政府債券降為AA級,同年11月穆廸亦將日本政府信貸降級。

美國政府債券一旦承擔5萬億美元房貸擔保,其三A級地位可維持幾耐?木宰羊。

去年8月開始,美國金融業進入「慢動作熔毀」期(Slow-motion meltdown)。初期政府仍相當理智,但漸漸失去理性,甚至直接干預市場機制,例如限制石油期貨合約拋空,呢次則限制金融股拋空。好友只佔27.4%(上周五為31.9%,5月份為44.8%),係1994年7月以來最少人睇好;淡友佔47.3%(上周五為44.7%,5月略低於30%),係1998 年9月以來最多。响咁超賣局面下宣布限制拋空,自然引發道指升276點,睇嚟只係一次大補倉行動,完成平倉後又點?標普銀行分類指數已跌穿今年3月貝爾斯登危機前嘅水平,技術表現極差。再睇睇道指美國銀行股指數跌足一年,早已出現大拋售!至於油價,道指石油股指數早喺去年10月見頂(石油股份走在油價之前),道指原材料股亦喺今年6月見頂,美國鋼鐵股指數今年5月見頂。我老曹再強調一次,我地面對嘅唔係滯脹前景,而係信貸萎縮,情況有如1990年代日本!美國政府依家正努力對付,一如九十年代日本政府。但大家都知道,「有形之手」短期力大無窮,長期無能為力;市場呢隻「無形之手」短期軟弱無力,長期卻無人能左右。政府短期內可任意妄為,但長期付出代價卻極大(例如1949至78年中國政府曾不按經濟規律辦事,結果如何?)。1990年起日本政府同市場鬥咗十八年,結果又點?

華盛頓方面,估計次按虧損達4000億美元;上述係計得到嘅損失,至於無法計嘅損失,例如2006年7月至今過去兩年美國住宅價值減少5.2萬億美元,因此而令全球信貸減少3.3萬億美元,即過去兩年內計唔到嘅損失已達8.5萬億美元,上述未計衍生市場(市值800萬億美元)虧損。相對全球GDP只有50 萬億美元一年,過去兩年金融市場虧損數字幾咁驚人!

國際熱錢的「四高」特徵

1982 年10月起因金融市場膨脹而帶動全球經濟繁榮期,將因2007年10月起金融市場萎縮而陷入一次幾長嘅衰退期。但全球分析界人士大部分仲懵盛盛,繼續希望浮响水面嘅禾桿草可以救佢一命而不致浸死。例如紐約曼哈頓區寫字樓空置率已升至7.1%,但貪得無厭嘅業主仍加租21%,至71.59美元一平方呎,就係例子之一。

歐、美、日三大世界經濟火車頭呢次集體減速,全球化推進到今時今日,有邊個國家可以decouple?美國已進入漫長嘅「去槓桿化」信貸收縮期,去年第四 季及今年上半年仍可引入中東、新加坡、中國主權基金頂住,今天連呢D主權基金亦輸到怕(既輸股價亦輸滙率),「兩房」危機下,政府都唔知點算。7月15日貝南奇响國會作供時已改口,轉為承認美國經濟下行風險極大(6月25日議息前仍然認為下行風險有所緩解)。日本央行總裁白川方明7月15日亦改口,日本 2008年財政年度GDP只能升1.2%,較4月份估計減少0.3個百分點。歐洲方面,丹麥成為第一個陷入技術性衰退嘅歐盟國,GDP連續兩季負增長,西班牙、愛爾蘭將步後塵,英國亦好唔到去邊。

歐、美、日之中,只有日本冇房價泡沫,但一齊面對高油價壓力。高盛全球經濟研究主管奧尼爾認為,四金磚國嘅GDP仍能增長,家吓佔全球GDP 16%(美國佔30%),仍可令全球GDP有3%至4%速度增長。

經濟金融全球化、國際熱錢具備「四高」特徵:一、追求高收益。二、承擔高風險。三、高度資訊化、四、高敏感度。經常用最迅速嘅時間進行套利及投機行為,作出快速出擊,响極短時間內產生極大流量,所到之處一如蝗蟲!中國社科院一位專家指出,過去五年流入中國嘅熱錢規模已達1.75萬億美元。北京師範大學金融研究中心錄得計算係6500億到8000億美元之間,並已响中國市場賺取暴利,依家正在炒人民幣升值仍未流走,一旦流走影響力極大,只係防不勝防!

菲律賓宣布加息半厘,至5.75厘,以壓抑當地通脹。

香港6月份失業率3.3%,仍喺十年低點。

滬深三百指數連續第三天收低。中國神華跌2.2%、平煤天安跌4.2%、潞安環能跌4.1%、金融街跌3.2%、集利地產跌2.9%。至今為止,今年滬深三百指數下跌49%,係彭博跟蹤全球八十八個股市中跌幅最大。管理7.9億美元嘅上海交銀施羅德基金經理Michelle Qi話,今年下半年內地企業盈利將進一步受壓。

今天仍冇人認同(或相信)美國已進入長期下降趨勢,一如二十世紀初期英國或1990年日本,擔心2007年極可能係美國人最光輝嘅歲月。根據 butterfly trade反映,信貸收緊喺去年夏季開始,將一直伸延到2010年年底,即較大部分人估計中長。所謂butterfly trade,即同時買入及拋空,起雙飛去賺取差價利潤,係期貨嘅慣用手法。例如每年12月銀根較緊、利率較高,投機者可買入家吓嘅利率合約,拋空12月利率合約,賺取利差利潤。利用此一市場,可睇到未來銀根最緊嘅日子係2010年第四季,而非目前。由butterfly trade角度睇,呢次衰退期深而長,唔係淺而短。

經濟=經世濟民

7 月14日殊仔宣布取消美國離岸石油及天然氣開採禁制令(上述法令由佢父親响八十年代草議,經列根批准),呢六千八百萬英畝嘅美國海岸線近海水域又可再開採石油及天然氣矣。日後可減少美國每年支付7000億美元入口石油開支,不過此乃長遠影響。唔少人以為油價回落經濟向好(但1981至82年油價回落,經濟卻極差)。美國6月份新屋建造跌至九十六萬間(5月份為九十七萬五千間)。

「經濟、經濟」,人人曉講,到底經濟係乜嘢?簡單D講就係「經」營有道,以便「濟」民。作為政府,應為各行各業提供良好營商環境,使工商各界能經營有道,令人人受惠;而唔使由政府去「派糖」(美國政府5月份曾退稅1000億美元,結果呢?特區政府去年10月亦曾派糖,結果又點?)政府嘅責任唔係扮聖誕老人,而係為各行各業提供良好營商環境,自然可以「濟」民(社會上只有20%人口因為老弱傷殘,才需要政府特別照顧),並唔需要派糖。

例如中國政府1978年起實施改革開放政策,令營商環境改善,各行各業自然可以「經」營有道,達到「濟」民嘅目的,唔需要「黨」特別照顧。反觀1949到 77年「黨」關心你嘅衣、食、住、行,結果卻令人民穿不暖、吃不飽、住得差、交通設施欠奉。改善經營環境,才係政府責任所在。

中國經濟進入冷卻期

中國第二季GDP升10.1%(第一季升10.6%),代表中國經濟進入冷卻期,6月份CPI升7.1%(5月份升7.7%)。7月份商務部要求國務院增加出口退稅協助出口。自1978年至今,中國GDP平均每年升9.9%,今年第三季中國GDP升幅如再跌,將低於過去三十年嘅平均數。CPI雖然有所回落,但同央行嘅4.8%目標通脹率仍有好大距離,何況生產商價格指數6月份升8.8%(5月份升8.2%),代表廠商面對嘅壓力仍在上升。四川重建及 3000億元人民幣鐵路投資,令中國GDP仍可保持高增長(估計第三季GDP升幅略高於8%)。

中國銀監會認為,人行將存款準備金率提升至17.5%,係造成GDP增長率放緩及通脹回落嘅理由。雷曼兄弟經濟學家孫明春認為,內地提升存款準備金率害多於利,此舉已凍結1.3萬億元人民幣,估計今年內仍會提升一次。依家內地貸款利率7.47厘,已較香港高出2厘,如再加息,對股市及房地產傷害更大。JP 摩根大通嘅陳舜認為,人民幣唔會再加息。十一屆全國人大財經委員會本月15、16日舉行第五次全體會議,認為要把治理通脹放响突出位置,要千方百計抑制價格總水平過快上漲,但同時要重視中小企資金緊張問題,防止因素過於集中對出口企業造成過大衝擊。

「代價」係西方媒體最近報道奧運話題中嘅常見用詞。响佢地眼中,呢次中國政府為舉辦一個成功奧運會,已去到「不惜代價」地步,所付出「代價」十分高昂。

美國Radio86電台網上民調,69%美國人認為中國為舉辦呢次奧運付出太大代價者佔69%,唔同意者佔31%。

德國《經濟》周刊更認為,2008年係中國「噩夢」之年,雪災、西藏騷亂、地震,依家北京三星及四星級酒店接受預訂房間只有半數,原先期待2008年係中國旅遊高峰年,卻因最近收緊入境規定而告吹。

英國《金融時報》話,中國响達爾富爾危機、津巴布韋大選,以及制裁伊朗問題上、西藏騷亂上,都讓西方國家藉奧運會而批評中國對外形象,令到中國响國際形象上大大受損。路透社引用垃圾問題專家一份報告話,北京將十幾萬外地進京謀生嘅拾荒者趕離北京,令市容睇嚟乾淨D,奧運之後又點樣?咪就係有十幾萬拾荒者重返北京!

《今日美國》撰文話,北京已指導市民响奧運會召開嘅兩周中排隊等待接受服務(唔排隊乃內地市民嘅壞習慣,例如喺上海等的士,唔少西裝畢挺者就喺你面前將的士搶走,我老曹响香港時代廣排隊等的士,亦被內地自由行人士打尖)。

外國傳媒「睇死」京奧

倫敦大學國際發展問題學者詹姆斯勞派克接受《環球時報》訪問時話,唔應該將中國股市同奧運掛鈎。奧運會可讓主辦國與世界加強溝通和交流,透過奧運讓全世界更了解主辦國嘅人民、經濟及社會,而唔應計較短期經濟得失。

作為中國人,願北京踏上成功舉辦奧運之路,唔好畀外國人睇死!

2008年7月17日 星期四

2008-07-17

兩房變成植物人

7月16日,周三。恒指低開後回升,收市21223.5,升48.73;成交598億元。7月期指升150點,收21210點。

滬深三百指數跌3.76%,收2745.6。利好預期落空,市場又再進入漫長尋底過程。投資者除咗繼續耐心等待之外,可以做嘅嘢唔多。地產板塊跌幅超過 6%,有接近十家地產股跌停,包括北辰、上實發展、華業地產等,金融、鋼鐵、有色及煤炭亦成為跌市主力。據上海交易所數據顯示,7月1日至8日嘅六個交易天內,機構投資者資金淨流出104億元人民幣。基金同散戶唔同,近日利用滬深A股反彈減持,理由係外圍股市甚差;反之,散戶仍信北京奧運可帶來沖喜。

外資擬撤出中國股份

換言之,8月份如內地股市不升,擔心將引發散戶大舉拋售。JP摩根私人銀行(管理4000億美元)認為,依家喺美國發生嘅事冇可能唔响亞洲區出現。睇嚟外資正由中國股份身上流走。

英國6月份CPI可能升3.8%,係1992年以來最高(其中食物價格升幅超過10%,汽油價格較5月份上升5%),代表六十萬公務員可能發動四十八小時罷工行動去爭取加薪,並傳出英鎊將加息。

日本銀行估計,日本2008/09年度(3月結)GDP增長率只有1.2%,通脹率1.8%,日本人工資及企業純利仍走下坡。睇嚟日本2003年4月開始嘅溫和繁榮期又再結束。

格蛇唔認為美國經濟下半年會出現回升,信貸危機可能會拖到明年。標普首席經濟學家戴維.懷斯認為,最糟糕嘅時候仲未到臨!美國財政部寄出退稅支票後,消費者兌現呢D支票嘅速度較預期要快,呢D錢一用完後,衰退便來,估計最糟糕時候係明年第一季。

索羅斯認為,2008年係超級大泡沫破裂嘅日子,情況有如1930年,實際上人們剛剛開始感受到呢場危機對實際經濟所造成嘅影響,未來痛苦日子仲好長。房利美及房貸美事件唔係最後,而係開始咋,美國進入清還負債能力危機期(Solvency crisis),而非流動性危機(Liquidity crisis)。上述兩間公司短期內並唔缺乏資金,只係投資者質疑兩公司貸款人嘅未來還債能力。

因此,由聯儲局提供短期資金作用唔大,因為兩公司並唔需要,只有美國樓價止跌回升,才可大大提升貸款者未來還債能力。呢方面無論財長抑或聯儲局均無能為力(1990至2003年日本政府無法改變日本樓價方向,1997年8月至2003年4月本港特區政府亦改變不了香港樓價方向;未來美國政府得咩?)

《華爾街日報》引述美國聯儲局委員意見認為,貝南奇已江郎才盡,佢估計下半年美國經濟擴張速度略低於趨勢增長率,主因係房地產繼續不景氣、能源價格節節上升以及信貸狀況欠佳等。佢話今後兩年經濟增長率會逐漸加快腳步,但信徒已經唔多。

美國勞工部宣布,6月份生產商價格指數升9.2%,係1981年以來最大嘅年度漲幅。

投資者對美國整個金融體系缺乏信心,銀行股遭受十年來最大損失。繼加州IndyMac之後,National City股票交易一度被中止。Oppenheimer & Co.分析員Meredith Whitney過去曾正確預測花旗減派息,佢依家認為Wachovia Corp.前景暗淡,令該股股價急跌13%;估計今年每股虧損1.35美元,明年每股虧損35美仙。Wachovia今年內股價已下跌74%,周二再跌 1.2美元,成8.64美元。

冇阿媽生任由自生自滅

財長保爾森要求國會畀房利美及房貸美「絕對保證」及短期無上限貸款,但共和黨議員認為對納稅人負擔太大,睇嚟上述申請短期內不獲國會通過機會好大。 Uncle Sam已決定收養房利美及房貸美,因為佢地係「GSE」(政府資助機構)。至於其他金融機構,由於冇阿媽生,任由自生自滅。美國證監會宣布唔准淨拋空房利美、房貸美及雷曼兄弟、高盛、美林或大摩等十九間金融機構嘅股份,若拋空必須先借貨,務求支持金融公司股價(美國政府已愈嚟愈唔尊重自由市場矣)。房利美响1938年、房貸美响1970年由國會製造出來,有阿媽生的確唔同D,不過救番又點?兩隻股份現已跌價80%,擔心已失去派息能力(房貸美去年派息 15.5億美元、房利美24.8億美元,依家可能已變成植物人,因過去二十八年嚟嘅利率回落期已結束)。

2000 年科網股泡沫破裂後,2002年10月股市才見底;2007年8月次按危機後,需時幾耐?次按危機估計最終會拖垮油價,依家似乎已開始。如無意外,油價好快會由146美元回落到100美元,引發原材料價格崩潰。2009年我地面對嘅壓力唔係通脹,而係「信貸崩潰」(credit crash)!美國油股ETF周二跌幅達到5.2%,成111.36美元。早喺油價下跌前,美國石油股已率先回落。

唔好以為中東油佬好掂

唔好以為中東油佬好掂,唔信請睇睇沙地阿拉伯股市指數,早由2006年2月26日回落,去年出現反彈,今年又再跌過,並喺7月15日再跌穿今年3月低點,繼續尋底。願天下股民皆同聲一哭!

溝上唔溝落,有邊個諗過以每股30美仙吸納IndyMac,結果係全軍盡墨?1973至74年和記由每股43元跌至7元,我老曹開始溝落,7元、6元、5 元……最後係1蚊,自己50萬元投資响半年內變成10萬元!好彩和記冇破產,不然你地今日一定冇曹仁超日記睇,亦冇人再聲嘶力歇叫人唔好「溝落」。响熊市中,只能動用30%資金去玩(唔好希望自己能跑贏大市!呢點連畢非德亦做唔到),記住保存70%資金(Keep your powder dry)!有智慧不如趁勢,「人」嘅力量永遠唔及「熊」,只有乖乖地度過嚴冬,留番D種子春天時播種用。如果你唔喺秋天收成、冬天藏糧,春天來到又點?

人民幣自2005年7月21日起升值,至今已漸漸抑制中國產品嘅出口能力,而增加咗入口產品嘅能力。如今製鞋、製衣、玩具加工、電子加工等低利潤行業已面對工廠外移(或內移)甚至倒閉,進入青黃不接期;高技術產品仍未發展起來,但依賴密集勞動嘅工業卻在加速淘汰,最惡劣日子相信係今年下半年或明年上半年,能夠捱過者可生存,否則便淘汰。

下半年中國汽油相信進入上調期(上一次係6月20日)。中國成品油由去年10月31日起至今只上調過一次,形成每加工一噸成品油要虧損1000元人民幣,加工及進口石油都出現嚴重虧損,引致大部分地方煉油廠停工或半停工。汽油短缺由廣東、廣西、雲南、浙江、上海……從南向北蔓延。今年6月20日上調成品油價後,由於國際油價進一步上升,令加工一噸成品油要虧損2000多元人民幣;加上地方煉油廠已停工(或半停工),變成大部分成品油由國營企業供應,到處都出現短缺。相信奧運過後,有很大需要大幅調整成品油價格。

糧價又點?舊年12月泰國大米每噸 376美元,今年4月17日升至1000美元,引發埃及、喀麥隆、科特迪瓦、塞內加爾、布基那法索、埃塞俄比亞、印尼、馬達加斯加、菲律賓、海地等地區發生騷亂;海地總理愛德華因此下台。反而中國糧價十分穩定,除咗去年12月20日取消小麥、玉米等出口退稅,今年1月1日宣布上述產品出口關稅,以及今年1月19日宣布出口配給制外,內地糧價基本上穩定。理由係中國糧食自給率達95%,加上過去四年豐收,政府有能力阻力內地糧價上升,形成同國際糧價脫節;只係農夫面對化肥漲價,農產品價格唔漲嘅日子可維持幾耐?

日前報道有600萬美元先至可退休,呢個數字唔係我老曹計算出嚟,而係由《巴隆氏》呢份金融財經界權威計算所得,數字都幾嚇人(或令大部分中產階級心碎)。

1967 年剛離開學校時,我老曹已想發達,目標係賺100萬元(當年百萬已係富翁)。1980年,我老曹已賺到100萬元,當年同森池兄遠足,同行者有位係森池兄口頭上叫「契爺」嘅公務員,佢1964年五十五歲已退休,退休時揸住幾十萬元,到1980年七十一歲仍身壯力健,但已唔夠錢使。佢教我地要有 1000萬元才好退休。喺1980年,1000萬元已係唔少嘢;1994年森池兄賺到1億元才退休,今時今日仍然豐衣足食。

每年失去5%購買力

自1971 年美元唔再同黃金掛鈎後,美元購買力以每年5%速度失去。今天600萬美元嘅購買力,二十五年後只餘下166萬美元。除非你係理財專家,否則冇人能保證每年投資收益都係正回報。點樣每年皆跑贏失去嘅5%購買力?並唔容易。1997至2007年恒生指數每年平均只升2.5%,而過去十年樓價除豪宅外都係負回報。

何況人到最後三年嘅醫療支出,係佔咗一生人中嘅50%。今天養和醫院二等房(包括醫生費)一天開支大約1.5萬元;如住喺法國醫院,上述開支減半,即7500元一天。以兩夫婦計,最後三年醫療費用(如住私家醫院)大大話話至少500萬元。

退休並唔係一般人想像咁輕鬆。請睇吓嗰D喺1978年前退休嘅港人今天生活點樣?今天佢地嘅情況,三十年後將响閣下身上發生。請唔好忘記金錢購買力正以每年5%嘅速度減少。

今年5月五卡鑽石可以100萬美元售出,較一年前升值76.5%。粉紅色鑽石升幅達75%、湖水藍鑽石升幅超過100%。五年前十卡或以上完美鑽石每卡可售7萬美元,今年非20萬美元以上一卡不可,因為每年新發現五卡或以上完美鑽石少於二百粒,粉紅色或湖水藍者更少,好多時有錢亦未必買得到。三個月前一顆 D無瑕二百四十三點九六卡鑽石以5000萬英鎊售出(買家係亞洲人,身份通常唔透露),打破1995年5月响日內瓦蘇富比拍賣嘅一顆一百點一卡梨形鑽石售價1650萬美元。睇嚟鑽石較股票及房地產更有投資價值(少於一卡者則冇投資價值)。

2008-07-16

金融股未見屁股

7月15日,周二。恒生指數跌839.69,收21174.77;成交657.91億元。7月期指跌960點,收21060點、低水。工商銀行(1398)跌4.3%,見5.3元;交通銀行(3328)跌4.6%,見9.15元;東亞銀行(023)跌6.8%,見34.85元;利豐(494)跌 5.8%,見21.8元;國壽(2628)跌5.3%,見27元;平保(2318)跌7.1%,見48.35元;信德(242)跌6.2%,見5.79 元;新濠國際(200)跌9%,見5.34元;合景泰富(1813)跌12.3%,見4.5元;華潤置地(1109)跌9.7%,見10.48元。

TCI沽領匯填氹?

英國TCI响6月份虧損超過10億美元(管理超過100億美元資產),會否因此而出售喺香港上市嘅領匯(823)?

花旗推介上海實業(363),估計今年每股獲利1.79元,較去年減少2.1%,P/E十四倍,目標價29.8元,因該公司有20%資產係現金。

人民幣今年內已升值7.1%,報6.8211元兌1美元。

滬深三百指數跌4.13%,見2852.98,睇嚟反彈已進入弱勢,另一次回落又再開始。7月4日至6日溫總响江蘇、上海進行經濟運行情況調查研究,要求江蘇、上海一帶克服國際經濟形勢不利因素及嚴重自然災害所帶嚟嘅困難。

四領導同時「問診」殊不簡單

習近平喺粵、港、澳了解咗港資企業受國外消費需求下降、石油及原材料漲價等因素影響,生產經營出現大幅下滑情況,要求地方部門採取措施幫助呢類企業。李克強在浙江考察期間亦指出,國內外形勢出現唔少新嘅複雜因素,世界經濟放緩、輸入型通脹對中國經濟負面影響逐步顯現,發展已面臨新挑戰,必須諗辦法解決問題。王岐山响山東調研時指出,過去嗰種粗放型外貿發展方式已難以為繼,必須從結構上、方式上、品質上解決眼前問題,必須增強憂患意識。

四位中央領導近距離「問診」經濟,遍及沿海五大省,下半年會開出乜嘢「藥方」?近三年人民幣升值21%,信貸偏緊令民間貸款利率已較銀行貸款利率高出四倍(個別高出十倍),而稅率合一(25%)壓力,以及取消國產設備40%所得稅免稅率,減少或取消出口退稅,加上勞工成本上升、運費上升、原材料價格上升,令中國產品出口前景險惡。點樣應付?四大中央高層領導同時「問診」沿海經濟,殊不簡單。

全球股市遭遇沉重沽壓而挫跌,油價一路飛漲,經濟形勢惡化,企業獲利增長情況令人憂慮。今年上半年內地唔少企業仍可發「盈喜」,下半年又點?股市有前冇後,股價反映嘅係前景而非過去嘅上半年業績,小心。

我老曹唔認為通脹係問題,反而擔心信貸萎縮。1990至2003年日本經濟就係典型信貸萎縮期,1997年8月至2003年4月香港經濟亦係另一信貸萎縮期,2007年10月至今內地經濟亦面對信貸萎縮造成嘅傷害。美國聯儲局及財政部可阻止房利美及房貸美破產,卻不能阻止美國出現信貸萎縮。今年3月批准 JP摩根大通收購貝爾斯登,令道指响3月至5月上升15%,但到今天,3月嘅低點已失守。呢次政府支持房利美同房貸美,美股連半天亦好唔到;美國四百萬間房屋借入12.8萬億美元,平均每間市值32萬美元,只要樓價回落10%,損失已係1.28萬億美元;房利美及房貸美擔保其中45%,即損失5760億美元,可以承擔得起咩?

銀行方面,IndyMac跌至28美仙後被接管,佢地係Alt-A貸款方面嘅專家,現已成為犧牲者。周一上午National City宣布停牌,因為被存戶大量提款;該行係美國俄亥俄州最大嘅銀行,股價由2007年3月38.94美元回落到今年7月14日2.99元,反彈到 3.77美元後停牌。另一隻令人擔心嘅金融股係Washington Mutual,股價已由2007年1月46.02美元回落到今年7月14日3.03美元,反彈到3.23美元收市,周一單日跌幅達34%【圖一、二】。

全家齊齊跳海救邊個?

Washington Mutual係全美最大嘅貸款公司,其股價回落令標普五百金融指數(代表八十九間金融機構)跌6.1%,係2000年4月以來最大跌幅。例如美國鹽湖城金融機構Zions Bancorp股價一天之內跌23%、First Horizon National Corp.股價跌25%、畢非德旗下巴郡持有嘅投資銀行M&T Bank跌16%、全美第四大銀行Wachovia Corp.跌5%,睇吓貝南奇救得幾多間?房利美同房貸美有阿媽生,所以有Uncle SAM(政府)睇住;其他金融股似乎冇阿媽生,便你死你賤。貝南奇面對阿媽、老婆、仔女齊齊跳海時佢會救邊個嘅問題?答案係救阿媽,因為阿媽死咗就冇,老婆死咗仍可再娶、子女死咗仲可再生(上述乃黑色笑話,應該適合詹端文兄講)。

港股已大幅回落,家吓係咪便宜?過去恒指熊市三期P/E通常喺八到十二倍,以上述標準,恒指仍未進入熊市三期。再以投資心態而言,依家人人仍在尋底 (where is the bottom?),其實每天沖涼之時我地都見到自己嘅bottom(臀部),又何須到處搵(又係笑話一則)?今天金融股嘅屁股(底部)仍未露出嚟。

房利美1938年嘅成立目的係協助美國人完成置業美夢,七十年過去咗,美夢漸漸變成噩夢(nightmare)。愈來愈肯定美國樓市已進入自1930年代最大嘅一次調整期,唔係1991至92年式,而係更大!

大淡友麥嘉華話,貝南奇錯誤管理聯儲局,包括挽救貝爾斯登,依家又挽救房利美及房貸美,最後誰來挽救聯儲局?佢由去年9月開始減息,由5.52厘降至2 厘,以為負利率可挽救房地產,點知負利率令全人類都唔再信任美元,咁搞落去,未來十二個月美國將有一百五十間銀行被接管,到時又睇貝南奇點樣應付!

中印將成為全球新引擎

中國方面又點睇?長遠而言,中國投資率及儲蓄率都會下降,但一如日本,由於民族性因素,仍保持相當高水平嘅投資率同儲蓄率,可支持中國進入另一個二十年經濟繁榮期,一如1975至89年日本,問題係幾時進入,而非能否進入;反而美國同歐洲極有可能進入1990年嘅日式衰退。

中國CPI增長率估計今年第四季開始回落,到時政府可放寬或取消汽油價格管制、取消資源價格管制,並讓電價自由化,估計需時六到九個月才能响CPI充分反映,即明年年中中國人行才會着手放寬銀根。今年下半年MSCI中國P/E十四倍、明年十二倍(估計今年純利上升21%,明年再升18%),同時A股純利由 過去兩年以年率40%速度上升,改為較正常嘅增長率上升,因此滬深A股中期睇仍受制下降趨勢,不斷失去動力,到明年年中才會回升!

換言之,內地A股眼前係「危」,長遠係「機」!上述諗法响1982年中國宣布收回香港主權時,我老曹亦曾提出,估唔到2008年下半年又再出現,呢次係中國!由於1974年7月我老曹太早吸納和記(今天嘅和黃),教訓仍在,所以呢次我老曹嘅耐性應該足夠(因太早入市係死罪)。

反之,美國受困於CDO,大部分金融股有排搞,喺可見將來仍唔易重返GDP高增長期,房利美及房貸美救番都殘廢,未來再唔能夠擔當美國樓價上升嘅引擎,美國樓價將失去動力而變得死氣沉沉。唔似中國經濟由勞工密集型轉向科技密集型成功後,又再有二十年經濟繁榮期。明年起西方金融業同經濟問題將成為自己本身嘅問題,再唔影響其他新興市場及資源提供國,明年起我地或者見到decouple情況出現,一如九十年代日本進入「斯人獨憔悴」嘅日子。呢次係美國同歐洲成為難兄難弟;中國同印度則支撑其他資源國經濟繁榮。2009年起中國同印度成為全球經濟繁榮引擎,重新啟動,並帶動巴西、俄羅斯、澳洲、加拿大甚至非洲 GDP保持高增長。

下半年中國出口或掀恐慌

中國長遠而言前景秀麗,但中期(例如未來半年)卻危機處處。5月份M2升幅18.1%(4月份16.9%),存款升幅19.6%、貸款升幅14.9%,即短期通脹壓力仲好大。中國必須解決眼前一連串問題,才可進入美好境界。

6月份中國出口量只升7%(去年同期20%),估計下半年進一步下降,甚至會引起恐慌。相信下半年中國股市及樓市將繼續承受壓力,要過咗2008年下半年,情況才有機會好轉。

2008年7月15日 星期二

2008-07-15

貝南奇要向觀音借庫

  7月14日,周一。恒生指數跌170.09,收22014.46;成交583.3億元。7月期指跌174點,收22026點。富士康(2038)跌7.6%,見6.34元,係7月8日以來最大跌幅。國航(753)升2.3%,見4.05元;南方航空(1055)升3.4%,見3.04元,因美林推介。創維(751)升6.9%,至77仙;新上牌卓智(982)較招股價升8.1%,見1.73元。

  滬深三百指數升0.76%,收2975.87。食品股如大江、中糧屯河、新希望、高金食品等漲停,其次中國武夷漲停,中國中鐵漲4%,但中石油、中國遠洋、大秦鐵路、中國聯通、興業銀行則回落;加上成交量萎縮,後市仍唔樂觀。

港強積金6月平均負回報

  香港強積金6月平均虧損5.26%,創下今年1月以來最大單月跌幅。上半年香港強積金平均回報係負9.29%。股票基金6月平均虧損8.94%,上半年平均回報負16.74%;債券基金6月平均虧損0.39%,上半年平均回報1.55%。

  恒生國企指數6月跌13.51%(上半年跌26.14%)。恒生指數6月跌9.9%(上半年跌20.13%)。

  同期上證指數跌20.34%(上半年跌48.02%)。台灣加權指數跌12.71%(上半年跌11.55%)。全球股市連跌六星期,係2002年10月以來最長,理由係金融機構撥備4000億美元,而且油價升上新高。標普五百指數第二季跌14%。在倫敦Henderson Global Investors(管理1250億美元資產)相信,未來幾個月情況將進@步惡化。過去七次熊市,指數平均跌31%,需時三百九十一個交易天。全球二十三個股市未來平均仍須回落14%,因長達五年牛市已在2007年10月結束,MSCI世界指數共上升139%,長達一千八百四十八個交易天。

  英國最大住宅樓建築公司Taylor Wimpey係MSCI世界指數中唯一跌幅達81%大藍籌股。馬莎百貨跌59%,拉斯維加斯賭場MGM Mirage及Sands(金沙)分別跌71%及67%,因賭博收入連續五個月下跌。MSCI世界指數平均O十四點一倍,金融股O九點七倍,消費股O十七點七倍。New Star Asset Management(管理410億美元)認為,可見將來仲未睇到銀行股及消費股有轉機。

  美國財政部及聯儲局為增強投資界對房利美及房貸美信心,希望國會授權財政部購入兩間公司股票(如有需要的話),透過政府入股去穩定股價。未來十八個月美國樓價如繼續回落,咁又點?除房利美及房貸美外,美國仲有十二間聯邦房貸銀行又點?房利美及房貸美在歐洲已回升13.7%及9.5%,相等於11.65美元及8.49美元,係咪代表危機已過?你話呢?

  去年8月至今過去一年,政府大量介入借貸市場去阻止恐慌性拋售出現,如果你仍相信市場經濟,肯定睇唔過眼。在格蛇管治期間,可以讓咁多令人難以理解貸款投資工具發展得咁蓬勃,刺激美國樓價上升到咁非理性水平。家呢個12萬億美元樓按市場出問題,政府卻利用納稅人蚊年不斷投入呢個無底深潭,作用係點?1990年至2003年日本已示範過一次,一如Council of Economic Advisers主席Martin N.Baily認為:你唔可能告訴我,呢個係一個不受約束市場。或者如史丹福大學胡佛研究所自由經濟學家David R.Henderson所講:上述唔係免費午餐,一旦政府介入,代表用納稅人錢去補貼不負責任的金融機構,最後整個國家受害。

華府有口話人冇口話自己

  1980年代美國曾批評中國政府不應用稅收補貼銀行去保護沒有效率的國營企業,1990年代曾批評日本政府用大量金錢去支持唔負責任的日資銀行,依家華盛頓自己卻做相同事,結果唔係解決危機而係將危機延長。

  道指已接近120個月移動平均線(上兩次係2002年10月及2003年3月),道指能否守住10747點?道指已跌穿200周移動平均線11687點(自2003年11月起,道指從未跌穿呢條200周線)。如道指10747點失守,代表我地面對唔係小熊市而係大熊市,跌幅將大於2000年至2002年10月次!房利美上周五最低見6.68美元,不但係1990年以來最低,由去年8月24日起計在不足一年內股價由70.57美元下瀉到6.68美元,跌幅達90.5%(由今年3月35美元至最近6.68美元,在短短四個月內失去80%市值)!至於房貸美都係不提也罷,因為技術上已資不抵債。

  繼IndyMac被接管後,另一銀行Red Cards Regional Bank亦令人擔心,股價由2006年5月1日32.43美元跌至上周五3.64美元;另一間已進入吊鹽水狀況銀行PFF Bancorp,股價由2006年4月8日39.49美元跌至上周五63美仙,跌幅98.4%【圖】。類似銀行已超過四十間。貝南奇必須向觀音借庫、變成千手觀音先至能應付。

  假設美國政府挽救所有出問題金融機構,代表2007年10月起美國進入1990年日式經濟;假設美國政府唔向有問題金融機構伸出援手,美國將進入1930年代式美國經濟。由於貝南奇熟讀三十年代美國經濟大蕭條文章,相信貝南奇選擇係前者而非後者。

牛市賺錢千萬不可熊市蝕突  在牛市中請盡量搵錢,在熊市中請努力保本!虧損100萬元往往較賺取100萬元容易。千萬不可在牛市中賺錢而在熊市中蝕突(The wrong move, you'll lose your fortune!)。一次錯誤決定可令你一無所有。隨美國次按危機爆發,信貸將進入緊縮期,一如1990年至2003年日本;雖然日本利率由6.5厘降至零利率,因為冇信貸,經濟大方向仍然是反覆下沉。

  7月14日內地出版《瞭望》新聞周刊指出:一、中國出口實際增長出現較明顯回落,令外貿出口企業困難有可能繼續發展,對中國經濟增長負面作用應予高度重視。二、中國城市房屋銷售及價格指數明顯下降,特別係深圳等大城市房價已出現普遍睇跌預期。今年1月至5月城市房產銷售量較去年同期減少7.2%(去年同期升16.8%),估計愈來愈多房地產企業將因資金鏈斷裂而陷入困難,出現大漲之後大落。房地產建設帶動五十幾個生產行業,單單建築業就業人口已達三千多萬,另有銀行及金融業,一旦出現調整,影響面不容低估。三、價格上升令下游產業,尤其係勞動密集型中小企業,由於困難加大而陷入破產環境,影響居民就業及收入增長。四、股市走弱令居民財產性收入增速減縮,影響居民消費信心,再加上樓價及油價因素,令目前興旺消費業亦有可能出現減速。四大因素下半年必須加倍重視。

  內地銀行宣布降低二手房貸門檻。二十年或以下、面積少於九十平方米二手房,即日起可按樓價八成貸款(過去係五年以下二手房才獲八成樓價貸款,五年以上只提供六至七成貸款);同時規定住房固定利率按揭唔再只限首套自住房和第二套自住房,而適用於投資項目。

黃金三十年非中國獨有

  某銀行房地產金融業務部總經理話,央行和銀監會並冇明確規定第二套房不能做固定利率房貸,但分析界認為,如果冇央行和銀監會暗示,銀行界唔會今時今日放鬆樓貸。

  人人在談中國奇。其實黃金三十年並非中國獨有,日本、東南亞、亞洲四小龍等都曾出現過,主因係勞動力比較優勢所引發。至於能否由勞動密集型的製造業走向科技密集型,或類似香港同新加坡走向金融業為主,令經濟再出現二十年GDP高增長期(例如6%左右)?才是國家或地區能否由小康走向富裕最最重要因素。例如1980年香港就係剛完成勞動力比較優勢所引發經濟繁榮期;1984年至2007年再進入二十多年經濟由勞動密集型走向金融業為主經濟。日本戰後到1973年已完成勞動力比較優勢引發繁榮期,全球第一次石油危機後,迅速轉型而走向科技密集型經濟,1990年出現高峰。

  中國改革開放三十年,到2007年已走完勞動力比較優勢所引發經濟繁榮期。今天唔少國家勞工成本已較中國便宜,以中國經濟體積咁巨大,唔可能走香港及新加坡路線,只能走日本或南韓路線,即由科技密集型經濟引發二十年左右繁榮期。呢段繁榮期由勞動密集型的製造業走向科技密集型所帶動。

  今年內地大學生薪酬總體呈下降趨勢。1000元至4000元者佔77.6%,除最低月薪較去年800元提高200元外,3000元以上比例普遍降低,尤其係8000元以上只佔2.1%歷史新低。內地大學生不再吃香,但呢這批大學生進入社會,有助中國經濟由勞動密集型的製造業走向科技密集型企業,帶動中國未來二十年GDP保持6%左右升速。GDP增長率6%左右似乎唔及過去三十年GDP 10%增長率咁快。1978年起步時內地只係月入36元人民幣,今天已是800元人民幣;呢次起步點係1000元到4000元,二十年後可升至6400元到12800元,已同今天香港大學生收入接近(今年香港大學生起薪點由8000元到14000元)。

  七十年代日本經濟由輕工業(玩具、成衣、電器、消費性電子產品)走向科技密集型(例如手機、電腦、汽車)、高檔消費性電子產品為主,唔少生產外判到中國及東南亞地區代工,自己只負責設計、市場推廣及品牌。

  英、美兩國八十年代開始,除產品走向科技密集型外,更大力發展金融業,引發1982年起道指超級大牛市,此一超級大牛市係咪去年10月結束?令人深思。

越南下半年走進黎明前黑暗  7月7日越南財政部公布6月份CPI升幅達26.8%,刷新十三年來通脹紀錄,理由係4月份政府要求汽油、電、煤炭、自來水、公共汽車票、火車票、飛機票、煤氣、鋼鐵、糧食和醫療十類生活必需品和服務唔漲價,此限價令6月底結束;加上6月份貿易逆差擴大至13億美元(去年同期7.71億美元),都係令6月份CPI升幅擴大理由,何況6月27日開始放寬越南盾兌美元率浮動範圍。6月份越南工業生產總值567.71億越南盾,較去年同期升17%,較5月份升3.4%。今年首六個月境外直接投資(FDI)達220億美元,上升134.1%,都證明越南經濟前景仍然良好。

  越南6月20日起汽車零件進口稅提高5%至10%,手機、化妝品等非生活必需品加稅3%到10%,另研究限制手機及香煙進口量。

  6月27日越南國家主席辦公廳同時宣布試行「外國單位、個人在越南購房並擁有所有權」緊急決議,2009年1月1日生效。即明年開始外資購房種種限制取消。今年下半年極有可能係越南黎明前的黑暗。

2008年7月14日 星期一

2008-07-14

美金融股風聲鶴唳

7月13日,周日。上周報道IndyMac銀行,上周五已被監管機構接管,因此唔好以為銀行股穩陣!2006年IndyMac每股50美元,去年每股29.91美元,上周五每股28美仙!股價令人擔心金融機構仲有Washington Mutual及Downey Financial,當然亦有房利美及房貸美,雖然財長保爾森認為毋須政府提供保證。

房利美出事美樓按利率急升

上周五美國房利美及房貸美股價分別下跌22.4%及3.1%,成10.25美元及7.75美元,最低曾見6.68美元及3.89美元。美國參議員麥凱恩認為兩間公司已需要政府提供生命線,芝加哥Piper Jaffray Cos分析員Robert Napoli接受彭博電視訪問時認為,聯儲局必須向兩公司提供資金;不過,花旗建議買入,認為股價已跌得過分。

Fox-Pitt Kelton及Friedman, Billings, Ramsen & Co分析員Paul Miller則估計,房利美虧損450億美元、房貸美虧損300億美元,即兩間公司虧損已達750億美元。如兩間公司倒閉,估計將令房貸利率上升到12厘,而全美房價將下跌40%。聯儲局發言人話,兩公司並冇搵佢地洽商,但周一開始兩公司可向貼現窗借錢( 利率2.25厘),聯儲局願為兩間公司提供短期貸款。兩間公司風雨飄搖,已令美國樓按市場利率升上7.3厘,令美國樓市進一步惡化;上一次超過7厘係2002年4月,見7.13厘。

一年前房利美每股值70美元、房貸美每股值67美元,兩間公司股價一年內蒸發80%或以上,會否步IndyMac後塵?IndyMac係美國史上第三大破產銀行,令聯邦存款保險公司虧損40億至80億美元資金(令聯邦存款保險公司須撥出總資金530億美元10%以上去接管)。美國史上最大規模破產銀行係1984年Continental Illinois National銀行(資產400億美元),第二係响1988年破產American Saving & Loan Association of Stockton。今年6月底Charles Schemer去信要求監管局調查IndyMac財政狀況,引致該行最近十一天內被提走13億美元存款。IndyMac於1985年由Countrywide Financial Corps(全美最大貸款公司)成立,其後各自發展甚至互相競爭,今天名字係由Independent National Mortgage演變出嚟。IndyMac今年2月宣布二十三年來第一次虧損,公布後股價下跌至低於7美元一股,被接管前為每股28美仙。

房貸美5月份已集資55億美元。房利美賬面值430億美元,房貸美賬面值380億美元,卻為45萬億美元貸款做保證,兩間公司資金只及被擔保貸款1.22%及0.81%,在樓價上升期問題唔大,一旦樓價回落情況又點?周一房貸美必須售出30億美元短期債券,如果唔成功將進一步打擊投資者信心。上周五雷曼兄弟股價跌16.6%、Wachovia股價跌12.1%;美國金融股已進入風聲鶴唳境界。

雷曼兄弟今年股價已下跌75%,已跌至2000年以來最低,見16.4美元(上周跌24%)。雷曼兄弟一度係美國最大債券包銷商,點解跌幅咁大?6月30日止共有七千零三十萬股拋空(佔流通股份10%);上述情況過去亦曾在貝爾斯登出現,而貝爾斯登今年3月被JP摩根大通接管。

法國最大零售銀行法國農業信貸銀行CEO Georges Pauget本周二要求董事局表態支持佢,不然劈炮唔撈。Pauget與主席René Carron矛盾已表面化,起因係該行投資部在次按債券市場虧損45億歐羅,而Carron認為唔應該在衍生市場同跨國金融機構競爭。上述矛盾令周五股價跌9.75%,成11.75歐羅。

皇家蘇格蘭銀行計劃將去年收購ABN Amro部分資產出售畀澳洲最大銀行NAB及日本野村證券。上述消息令皇家蘇格蘭銀行股價在上周五跌9%,成182.7便士,較供股價200便士低。

花旗亦計劃出售49億歐洲德國零售銀行畀Credit Mutuel,可獲稅前利潤40億歐羅,並擴大自己資產以解困。

富通銀行炒CEO魷魚

比利時最大金融機構富通銀行CEO Jean-Paul Votron亦因動用240億歐羅收購ABN Amro荷蘭銀行投資部,而令今年富通宣布唔派息。富通董事局(十四位成員)及主席上周五通過炒Votron魷魚,由副CEO Herman Verwilst接任,令富通股價上周五再跌4.2%,成9.45歐羅,即整間銀行只值222億歐羅。該行响1990年由荷蘭保險公司NV Amev、比利時保險公司AG集團與荷蘭銀行VSB合併而成,去年完成本世紀最大銀行收購ABN Amro後,卻遇上呢次次按危機。去年10月債股集資134億歐羅,今年6月26日宣布發行20億歐羅債券及出售15億歐羅資產及15億歐羅新股去提升一級資本比率(Tier l capital ratio)。富通銀行所面對壓力亦好大。

Bridgewater Associates估計,全球次按危機虧損數字係1.6萬億美元,目前已公布數字只有4000億美元,最低限度有1萬億美元虧損數字仍被隱藏起來。根據Bridgewater估計,次按危機共損失約8000億美元,目前仍有一半以Alt-A貸款方式被隱藏起來,另有5500億美元企業虧損仍未撥備,一旦數字公布後,估計將令信貸市場失去12萬億美元信用貸款,而令全球經濟萎縮。據Board of Governors of the Federal Reserve System資料,銀行今年已減少貸款約1543億美元,係2001年起銀行首次減少貸款!估計未來九個月銀行貸款將減少6000億到7000億美元,即收縮8%。除非各大銀行仍可大量集資去補充資本。上述只講及銀行,仲有房利美及房貸美呢?房貸美已資不抵債52億美元,理論上已冇借貸能力;房利美股價跌咗78%(資產值減少66%,至122億美元),第三季亦可能進入負資產,即兩大貸款公司快要失去貸款能力。目前美國樓按貸款有80%由兩間公司擔保。

明年通縮壓力大於通脹

此外,美國企業純利亦走下坡,如純利減少20%,P/E跌幅更大(即股價跌幅唔止20%);如未來美股純利減少20%,P/E可由目前十五倍下降至十二倍,兩者加起來,未來美股仍有機會下跌30%或以上。利用股票作抵押貸款亦面對收縮。

美國失業率5.5%,表面睇並唔嚴重,但如將就業不足率加埋落去,數字便升到10.3%!美國人因失業或就業不足而減少借貸數字又點計?

我老曹愈來愈相信美國唔係進入滯脹期,而係進入1990年起日式衰退。美國五大危機:一、樓價回落。二、企業純利減少。三、失業率上升。四、美元滙價回落。五、股價下跌。情況同九十年代日本接近(唯一唔同係日圓由1990年至1994年仍上升,美元2007年8月起已回落;1990年原材料價已回落,而呢次係上升)。除油價、食物價格上升外,擔心其他東西都在跌價,估計到明年通縮壓力大於通脹壓力。明年我地面對將係賤物鬥窮人環境,而非滯脹。

6月份紐西蘭房屋銷售下降42.4%,只有四千三百零五間(去年6月七千四百七十四間),係1991年12月以來最少。中價樓價較一年前跌2.2%,至34萬紐元一間(或較5月份跌5000紐元)。紐西蘭人將80%財產放在層樓上,樓價下跌將令今年第一季家庭消費少0.4%。

日本銀行7月15日相信唔會加息,仍係半厘,估計日本經濟亦進入收縮期。

依家距離熊三仍遠

英國金融時報指數較去年高點下跌22%,形成1918年以來第十九個熊市。過去熊市平均三百五十八天,跌幅35.6%。上一個熊市由1999年12月30日開始,2003年3月12日結束,其後上升105%,至2007年6月15日。當美國加州Countrywide Financial Corp宣布因次按債券而出事,英國金融時報指數已大跌。英國短期展望亦唔樂觀。

上周五栢克萊話,第二季商品價格上升19%,流入商品資金升19%或2700億美元,其中流入商品指數資金升26%,至1750億美元。

熊市有許多種。例如中國熊貓十分可愛,澳洲樹熊只吃樹葉。不過熊貓同樹熊都唔係真正熊。世上有只吃果實的熊,亦有極兇殘北極熊。熊市最小跌幅20%,今天無論MSCI世界指數、道指或金融時報指數跌幅都已超過20%。今年全球肯定進入熊市。

根據JP摩根大通Thomas Lee資料,1900年至今標普五百指數共有三十個熊市,其中四個熊市跌幅20%,另十一個再跌多10%(即30%);九個在股市下跌20%後再下跌多一年,五個在下跌20%後再跌多30%。

如扣除通脹率,標普五百指數仍未重返2000年3月水平,金融時報一百指數亦未重返2000年高點。換言之,英美熊市其實早在2000年已開始。綿綿不絕熊市由1900年至今只有四個,就係1921年、1932年、1949年及1982年。如扣除通脹,美國2000年起已進入綿綿不絕熊市。根據Russell Napier所出的書Anatomy of the Bear,任你點睇,呢個熊市都唔似會在2008年內結束。熊市結束前:甲、成交額大增而股價急跌;乙、成交額大減,股市牛皮好一段日子,目前兩者都未見出現。至於P/E,通常回落到平均數或以下(例如香港恒生指數熊市結束前,P/E跌至八倍到十二倍)。目前距離熊三仍遠。

熊市二期係考驗投資者耐性期,緊記唔好過分投入(嚴守三七分,即只動用30%投資資金),唔好揸重股票作退休用。在熊市中,只有極少人能賺到錢,對退休人士而言,在熊市中係不宜持有大量股票。唔好相信通脹率宣傳(將短期現狀看成長期趨勢)。

短期展望,美國CPI或可升至6%,即1990年12月以來最高,但只係短期現象,估計明年CPI升幅又再回落到4%或5%,2010年回落到3%或更低。呢次推高CPI係油價及食品價格,唔係工資同租金。過去四十年油價同食品價格起起跌跌多次,唔似工資同租金上升之後好少回落。因此,呢次CPI上升係周期性上升,而非成本推動,應該唔會長存。反之,內地CPI卻係由成本推動,先至令人擔心。

2008-07-12

奧運後一切弱點表面化

7月11日,周五。恒生指數升362.77,收22184.55,成交700億元。7月期指升350點,收22200點。

美國經濟面對低增長、高通脹,對於聯儲局應先處理低增長定係高通脹,經濟學家意見好分歧。五十三位經濟學家中二十二位認為應對付經濟增長、二十一位認為應先對付高通脹,認為如果唔好好處理高通脹問題,將令經濟進一步下滑,估計今年CPI升4%(年初估計只有2.3%)。不過,雷曼兄弟分析員Ethan Harris認為,呢次唔係七十年代式工資與價格互相追逐而引發高通脹,而係油價及食物價格呢項聯儲局無法控制嘅因素;反之,樓價下跌及脆弱嘅資本市場如果唔加以應付,極有可能令美國進入九十年代日式衰退。高盛分析員Jan Hatzius認為,刺激方案早已發放,包括減息及減稅,已經令經濟下滑放緩,但無法改變大方向,反而如控制通脹成功,有助美國經濟早一點復甦,情況有如歐洲央行。睇嚟下半年經濟方向都幾混亂。

放寬信貸難再刺激股樓

次按危機去年8月爆發至今快一年矣。過去二十年,無論1987年10月股災、1990年波斯灣危機、1994年墨西哥金融危機,1997年亞洲金融風暴、1998年俄羅斯危機、甚至2000年科網股泡沫爆破、2001年「九.一一慘劇」,英美兩國只要透過信貸膨脹令人民借多D蚊年消費,問題便迎刃而解,雖然同時產生貧富不均現象:製造業面對新興工業國競爭,令工人收入1980年起至今停滯不前;而投資銀行及對沖基金經理收入卻十分驚人。

但呢一次卻行唔通也,放寬信貸不但不能再刺激樓價及股價上升,反令油價直奔150美元一桶,繼而整沉世界經濟,情況幾令人擔心。類似1990年代日式經濟係咪已喺美國開始?

中國6月份外貿盈餘減少20%,只有213.5億美元,因出口增幅由5月份28.1%降至6月份17.6%。中國經濟漸由出口、製造業帶動轉為內部消費,入口增加31%。中國經濟只係轉型,出現硬着陸機會唔大。

滬深三百A股微跌0.68%。國航跌1.9%,南方航空跌1.5%,因航油佔中國航空企業去年總成本10%,油價上升4.1%嘅影響好大。鞍鋼亦跌2.2%,因今年純利可能減少1.26億元人民幣,寶鋼亦跌2.5%。中國鋁業升2.9%,雲南鋁業升3%,因十九家鋁業同時減產5-10%,令鋁價升6%,至3380美元一噸。

花旗推介中國海外(688),估計今年每股獲利75仙,減少28.8%,P/E十八點一倍,目標價16.83元;中國中材(1893)每股獲利20.8分人民幣,上升6.3%,P/E二十五點三倍,目標價7.35元;建滔化工(148)估計2008年度每股獲利3.77元,升16.8%,P/E九點二倍,目標價44.9元。

油價高企令阿拉伯海灣國家每日收入20億美元(其中一半歸沙地阿拉伯所有)。未來阿拉伯國家點樣運用石油賺番來嘅美元?由於沙地擔心伊朗威脅,由以色列出手炸掉伊朗核設施機會極大(除非可循外交途徑解決)。

8月8日北京奧運,中國經濟卻四面楚歌。政府官員貪污事件因四川汶川事件而激化、金融業內部失調、地區主義抬頭、無法繼續下去嘅能源補貼、中國食物價格與國際食物價格差距……上述能否藉奧運而降溫?不然,奧運之後,一切弱點都將表面化。今年第四季中國情況令人擔憂。

土耳其變得愈來愈進取(例如入侵伊拉克北部而美軍無法阻止);以色列同敍利亞亦急於達成和平協議,以便減少伊拉克嘅另一威脅。殊仔必須响11月大選前解決中東一連串問題,呢方面如取得伊朗合作會容易得多。從呢點睇,以色列近日所做一切可能係逼伊朗走上談判桌上,同意美國嘅限核條件。如伊朗合作,將可穩定伊拉克,然後穩定中東,咁樣油價才會回落。油價升降可主宰第三季全球經濟大氣候。

高油價令俄羅斯經濟復元,俄羅斯希望重奪往日地位,因此响國際舞台上採取強硬態度,已令歐洲各國不安。中俄之間經濟互相依賴,亦令美國看在眼裏、恨在心裏,擔心中美關係甚至中歐關係因此走下坡;美歐可能聯手限制中國產品入口……。

港人只能聽天由命

換言之,今年第三季有好多因素變緊,變好變壞將影響明年全球經濟。油價如長期保持140美元以上,明年將有愈來愈多國家經濟陷入不景氣。中東緊張局勢如能降溫,又係另一回事。中國奧運之後,點樣解決內部問題亦好重要,例如減少(甚至取消)汽油補貼,同時抽緊銀根、向貧窮省份提供更多援助、向富裕省份抽多D稅,以及化解來自歐美嘅貿易保護主義、平息民憤、懲治貪官……都係十分艱巨嘅工作,小胡能否一一化解?

至於地處中西方夾縫嘅香港,如中美關係良好,我地左右逢源;反之,兩國關係淡化,我地香港遭殃。上述變化非港人所能控制,睇嚟只有聽天由命,可做嘅事極少,只能見步行步。


美國前財長魯賓對世界經濟前景抱悲觀態度。OECD組織最近將三十個成員國GDP增長率改為1.8%,係2002年以來最細嘅升幅。美國今年上半年GDP升幅只有0.8%,係近五年內最差嘅六個月。魯賓擔心次按問題仍會惡化,並相信其他國家領袖將繼續向人民幣施壓。

房利美及房貸美股價分別再跌24%及34%,因瑞銀分析員認為兩公司集資有困難。聖路易聯儲銀行前主席普爾認為,房貸美負債已大於資產52億元,房利美則只有資產淨值122億美元,有可能响第三季成為負資產(現年七十一歲嘅普爾今年3月才退任聯儲局成員,早喺2006及07年已要求政府關注此事)。兩公司為6萬億美元嘅美國房貸作擔保,一旦出事,可令美國經濟陷入類似日本1990至2003年嘅情況!貝南奇及保爾森已發言,美國政府負擔唔起兩間公司破產,估計政府好快有挽救計劃出台,例如向兩公司購入1.5萬億美元有問題負債。

倫敦樓價呈兩極化

呢次G8選擇响日本北海道溫莎酒店(Windsor Hotel Toya)做開會地點,實在令人費解。該酒店响1990年計劃興建,1993年開業時取名Hotel Apex Toya。最大貸款銀行北海道拓殖銀行(Hokkaido Takushoku)1997年11月宣布破產,酒店因此停業。2002年改名溫莎酒店才重開。呢次G8响度開會,係咪向世人啟示美國將踏入日式衰退──即低增長或冇增長長期化?7月8日同樣喺日本主持亞洲會議嘅朗尼陳,亦擔心未來十年G8 GDP進入低增長期;反之,新興工業國保持GDP高增長機會甚大。

1990年起,日本嘅「貧窮工作者」(指年薪200萬日圓即14.5萬港元)急升到2007年嘅一千萬人,大部分係兼職員工。日本今天兼職員工、臨時工及非終身僱用員工已佔日本工作人口三分一以上,大部分係二十來到三十來歲,因佢地無法搵到長工。日本一如其他西方國家,收入差距在擴大,低收入工作者不但貧窮而且被社會孤立,冇朋友甚至冇家人,好容易傾向自殺、犯罪及離婚,大部分唔打算生兒育女,並成為憤怒青年,例如最近便發生揸車到大城市斬死途人事件。面對全球化競爭,日本不能好似1990年以前咁,企業為員工提供晉升機會及良好福利,令呢個家吓仍係全球最富有國家之一嘅日本,社會愈來愈不安全。

halifax報告指出,6月份英國住宅樓價下跌2%(5月份跌2.5%),即英國樓價已由高峰回落8.7%,但仍較去年6月升1.2%。(根據F.T.樓價指數),如唔包括倫敦,今年6月只較去年6月升0.4%。

倫敦樓價一如香港兩極化,例如Kensington及Chelsea豪宅區仍較一年前升22.1%,City of Westminster及Canden分別升17.7%及17.2%;反而,Ceredigion已回落5.4%,Blackpool跌4.4%。

似乎全世界都走向兩極化。

深圳市「城市總體規劃2007-2020」响7月3日獲廣東省政府常務會議批准。呢次係深圳市喺城市發展上一個重大突破,依家正爭取獲國務院批准。由於國家副主席習近平提出「粵港澳」計劃,相信年內可獲中央批准,成為粵港澳合作先行、先試、先導者。包括推進深港之間金融深度合作、積極建設深港創新圈、擴大雙方在高新技術產業、現代物流及高端服務業合作,喺重大基建、跨境開發、兩地機場、河套上合作,擴大跨境人流,由依家每日四十二萬二千提高到一百萬,加快港深兩地經濟融合。

中式企業唔夠砌有因

中式管理就係「權力向上集中、責任向下發放」,即使聰明如諸葛亮亦得「揮淚斬馬謖」。無論國有企業及私營企業,改革開放後權力仍係向上集中。從來冇部門主導領導引疚辭職,亦冇企業領導人受責處罰,出咗事責任便向下推,完全由下屬承擔。唔單止咁,薪酬更係兩極化,權力集中喺上層收入幾級跳,承擔責任嘅下屬有事便下崗,無事亦冇人工加。而中國企業領導者大都有多疑、監視下屬、強調忠誠、口密腹劍嘅性格。

企業嘅制度係畀下屬守嘅,老闆往往凌駕公司制度之上。例如遲到早退永遠係老闆唔係員工。最唔遵守公司制度就係老闆或公司領導層。老闆嘅觀點成為企業嘅規條,員工升職由老闆個人喜好及厭惡決定,同員工勞動價值無關,形成拍馬屁者升職、努力為公司者唔受重視。老闆喜歡叫下屬做事但唔授權,令下屬成為無權司令;表面上在發號施令,其他人聽或唔聽冇關係,反正人人都知道權在老闆手中。咁情況點叫下屬領導公司其他員工?有D部門主管同下屬稱兄道弟、團結一致,將自己部門由公司中「割」出來,自成一「國」,其他部門插針不入、潑水不進,搞割據形成自己勢力,唔理公司死活。

上述種種都係中式管理嘅毛病,亦係中式企業一旦大起來便唔夠外資企業砌嘅最基本理由!

2008年7月11日 星期五

2008-07-11

平準基金難以成功

  7月10日周四。恒指全日升15.97,收21821.78;成交741.8億元。7月期指仍係高水,跌54點,收21850點。

  恒指係咪由7月8日進入熊市二期浪C(反覆上升期高點應較浪A即較今年5月還高),才完成熊市二期,但VIX仍未配合。

愈來愈多美國家庭負資產

  IndyMac 2006年每股值50美元,依家只值44美仙,財富消失速度何其快?房利美股價跌13%,已跌至十四年內最低;房貸美已負資產52億美元,須政府注資才可繼續經營落去,情況都幾惡劣。睇美國政府必須出手挽救兩間公司先至掂。

  美國金融股仍然令人失望。雖然係咁,熊市二期內第二隻腳如非7月8日開始,相信亦都好接近。石油專家 T. Boone Pickens估計短期內油價可見150美元,意大利總理則相信油價可見200美元。換言之,油價仍對短期股市構成壓力。英倫銀行一如估計保持利率不變,仍係5厘。6月份美國接管住宅單位較一年前升53%,超過25.2萬間,2006年春季至今美國住宅樓市場失去3.5萬億美元價值。

  今天來自次級債券樓按者,有53%已係負資產,估計明年將升至63%,即愈來愈多美國家庭加入負資產行列。

  阿布扎比主權基金以8億美元購入紐約佳士拿大廈。2001年Prudential以3億美元購入,七年內獲利5億美元。世界改變矣,到處都有便宜貨。

  世界投資界泰斗投資成績係點?根據GuruFocus網站,今年全球五十五名投資界泰斗中,只有四名由去年11月至今年6月仍有蚊年賺,最出色石油專家T. Boone Pickens,因投資油股;另三十三位虧損15%或以上;14%虧損20%或以上;四位虧損40%或以上,包括Bill Miller呢位過去十五年跑贏大市基金經理,今年虧損42%。如2003年6月Legg Moson 投資1萬美元,今天只值9800美元,因為太多金融股。滬深三百指數今天回落1.38%,收2973.73。

  投資市場冇人會只贏不輸,除非佢係先知,不然就係講大話。由於世上冇先知,因此99%係講緊大話。

  油價及食物價格上升,樓價同股市則回落;前者代表通脹,後者代表通縮。美國人消費時面對通脹,而自己投資組合卻面對通縮,即兩面受敵。今年美國人買車方面已減少(尤其係SUV),令通用汽車股價跌75%。美國近郊寫字樓空置率上升,價值則在下跌,而零售面積空置率亦在上升。以人口計,美國人擁有零售面積為法國人十倍,因法國人買靚但好少買;美國人經常購物,但係以平為主。

  信貸壓縮(Credit Crunch)不但代表借貸減少,同時亦代表消費減少。日本九十年代發現,即使零利率亦冇人借錢消費,結果進入通貨收縮期。Bridgewater Associates估計,信貸壓縮可從美國經濟體系中抽走12萬億美元,甚至聯儲局亦無法補回上述數字(如美國人一如日本人咁開始儲蓄話)。1990至2003年日本消費市場每年流失約1萬億美元消費力,即使銀行推出零利率,日本人仍唔肯增加消費。至今為止,聯儲局將利率由5.25厘推低至2厘,卻只能令到油價及食品價格上升,而非樓價及股價。

  每次信貸泛濫都會令樓價同股價上升,因為負利率環境可錯誤引導投資甚至過分投資,上述情況都由政府造成。政府可以印鈔票,但不能創造財富;鈔票供應大增結果必推高財富價值,最後引發調整。睇呢次亦唔例外。

  中國工商銀行城市金融研究所發布最新一期研究報告指出,好多地產開發商自有資金所佔比重已由35%降至30%以下,加上二套房政策出台後,好多銀行已收緊房地產開發貸款及住房按揭貸款,開發商資金狀況日益趨緊。

  世邦魏理仕(上海)項目董事周煒表示,上半年上海房價升7.26%,平均月漲1.21%;但7月第一周新房供應量下降27%,成交價亦大降17%。

  北京房地產交易管理網統計,今年1至6月北京住宅期房及現房網上簽約共四萬零六百套,較去年同期減少38%。

  深圳市國土資源和房產管理局7月9日發布數字:6月商品住宅平均售價11159元╱平方米,較去年10月17350元下降36%。世華地產發布資料顯示,深圳二手房價維持9500元╱平方米左右。

先拋股再拋樓求自保

  杭州市商品房與二手房成交量亦縮水,上周只成交四百零二套,較前一周四百三十四套減少7.37%。

  雷曼兄弟分析員孫明春指出,銀行收緊信貸,多數開發商面臨資金鏈斷層威脅,房價回歸理性價係必然事,預計房價仍可再跌20%。

  幾年前,幾乎所有大中型企業都進入房地產;如今面對資金鏈緊張,最先拋售自然係股份,擔心下一步係拋售房地產以求自保;上述係浙江產權交易所董事長顏春友擔心地方。

  過去幾年紡織業利潤只有2%,家電利潤亦只有2%,外資利潤8%,但房地產開發利潤率高峰將達30-40%,邊個都會心郁。因此,2003年起,各行各業資金都流入房地產市場。

  2006年長三角十六個城市佔全國土地1%、人口6%,投入地產資金卻佔全國28%(4076億元人民幣)!單係浙江省已有二千四百多家房地產企業,顏春友擔心其中90%房地產企業將被淘汰,剩低10%就只有二百四十家!企業點樣從房地產中將資金套回來?過去幾年房價上漲五倍以上,形成千軍萬馬齊擠獨木橋現象,依家主業出事,點樣將資金由房地產抽調回本業?令人擔心今年下半年起內地房地產價格將出現急跌現象。

  樓價只漲不跌神話今年開始終結,樓市交易一落千丈,深圳房價已跌回一年前,而且成交稀少,好難搵買家。

基金更熱衷追漲殺跌

  中國經濟正進入結構性改變期,估計每年投入1500億美元基建項目上,相等於中國一年GDP 9%,此情況將維持十年。上述做法將令全球原材料價格及油價上升;反之,出口、製造業增長率放緩,將令中國GDP升幅由2007年11.9%(十三年最快)慢落;加上人民幣升值、外資流入減少(私人企業投入資金上半年係512.4億美元,較去年同期624.4億美元減少18%),種種因素皆話畀大家知,今年下半年中國經濟會冷卻,即所謂青黃不接期;情況有D似1982至83年香港,即製造業大量外移,同期內部消費未見回升,中國今年下半年及明年上半年亦作如是觀。

  安本(亞洲)資產管理行政總裁Hugh Young管理500億美元資金,佢接受《金融時報》訪問時告訴大家:唔好期望中國經濟迅速好轉,例如今年下半年甚至明年,因為中國正面對西方尤其係美國同歐洲需求減少壓力,加上入口原材料成本上升,以及工資、人民幣升值壓力,必令企業純利下跌。不過,佢管理基金已開始吸納內地股份及印度股份,因為從長遠角度睇一定表現出色!

  從美國股市近百年歷史發展上,不難發現每次華爾街作出重大制度改革,都係對權力及市場進行一次「理性」安置。過分尊重市場,會疏忽監管而出事;但政府權力太大,亦會引發尋租現象。新中國股票市場歷史只有二十年,需要學習地方甚多,但大方向同別國一樣,應向公平、公開、公正原則走。2000年中國股市由一大批來歷不明金融大鱷市場上操控,例如德隆系、凱地系、格林柯爾系、泰躍系等,佢地以低成本購入上市公司控制權,然後操控股價炒高派發,從中賺取暴利。2004至05年呢類公司紛紛出事,唔少金融大鱷亦因此鋃鐺入獄,部分金融大鱷被雙規,形成股市日益下沉(因少大鱷翻雲覆雨)。

  1998年開始由證監會推動基金業,加上2005年政府一連串股改,2006年起內地股市又再恢復生氣,2007年更創高潮。依家回望呢D所謂機構投資者,不但冇起到市場穩定器作用,好多基金公司較散戶更熱衷於追漲殺跌,反過來機構投資者成為市場最不穩定因素!例如近期金融股及煤炭股暴跌,就係基金們爭相拋售結果。

  基金成立原先目的係讓無知散戶手上資金流到「專業投資者」手中,透過基金操作而起市場穩定作用,事實卻剛剛相反,資金落入基金手中,基金經紀較散戶更熱衷於追漲殺跌,令股價上升之時更狼、下跌之時更狠,壯大機構投資者反而成為股市不穩定因素。

內地擬引入中國版薩班斯法案  今年6月28日中國財政部、證監會、銀監會、保監會及審計署五部委會聯合發布「企業內部控制基本規範」,明年7月1日起首先上市公司範圍內施行,內容包括企業內部環境、風險評估、風險控制、信息與溝通、內部監督等,提升企業經營公平。其次亦考慮引入美國著名《薩班斯法案》中國版,限制基金部分活動。呢次係繼2004至05年起限制金融大鱷後另一次「權力和市場」之間理性安置。呢次A股股災後,中國政府要處理問題係政府權力和市場自由度之間,點樣得到最有效發展?世上冇絕對自由市場,以美國為例,仍係見一事、長一智,何況中國股市。

  中國證監會澄清:「迄今為止,證監會內部還沒有得到消息,亦沒有聽說有推出平準基金這回事。」睇只係市場炒作。平準基金就係由政府提供資金,股市非理性暴跌時買進、股市泡沫泛濫時賣出,熨平股市非理性波動(台灣便有平準基金)。早1990年深圳證券市場大幅回落時,已有人提出由財政部提供2億元人民幣去恢復正常運行,2005年亦有人提出。從台灣平準基金過去二十年操作睇,其實並唔成功;反觀OECD國家政府從來唔直接干預股市(只透過金融政策)。我老曹反對中央政府成立平準基金!

2008年7月10日 星期四

2008-07-10

三水佬睇走馬燈

7月9日,周三。恒生指數升585點,收21805.81;成交745億元。7月期指繼續高水,升643點,收21904點。五窮、六絕、七翻身。唔排除7月8日低點21098.84係呢次熊市二期嘅另一隻腳,因7月港股看漲!瑞信私人銀行亞洲股票研究主管范卓雲(過去乃《信報》員工)認為,打底過程要持續好幾個月。瑞信認為,恒指年底可睇25000點,2009年年中睇28500點!佢同時睇好中國內地、台灣及新加坡股市。

A股回升迎奧運?

滬深A股升3.9%,見3015.13;保利地產升10%漲停、萬科漲8.1%、中遠航運升7.2%、國壽升10%漲停、中儲升10%漲停、中國遠洋升5.7%;分析界估計A股可反覆上升到8月份北京奧運!

美國房利美及房貸美如不獲注資,將可能失去三A地位;雷曼兄弟估計需要資金750億美元。兩間公司响1970年成立,目的係協助美國人借錢買樓,家吓擁有(或擔保)房貸市場12萬億美元嘅其中46%,如兩間公司失去三A評級地位,對美國樓市將加多一層壓力,係造成周二港股大跌嘅理由。

第一太平戴維斯分析員Jeremy Helsby及大摩David Miles同時認為,倫敦住宅未來兩年樓價仍須回落25%。花旗分析員認為,2010年前倫敦樓價須回落20%。睇得最淡係Capital Economics嘅Ed Stansfield地產分析員,佢估計2010年倫敦樓價須回落35%。英國最大建築學會Nationwide(亦係最權威)認為,英國樓價去年10月見頂至今回落7.3%,由於情況改變得太快,對未來不宜預測。最樂觀係Hometrack分析員Richard Donnell,估計下半年樓價再跌4%,明年再跌2%已差唔多。

愛爾蘭方面,周二銀行股進一步下跌,例如愛爾蘭銀行跌9%、Irish Life & Permanent跌14%。由去年高價至今,愛爾蘭金融股已跌咗60-75%,估計今年GDP只升0.3%(去年12月時估計今年有3%增幅)。加入歐洲共市後,為愛爾蘭帶來過去十幾年繁榮期,樓價由1995年上升到2006年,升幅三到四倍,但過去一年出現負增長。估計未來一、兩年愛爾蘭樓價調整幅度會好厲害,情況有D似香港1984至97年嘅十三年地產繁榮期,然後帶嚟六年大幅調整期,到2003年年中香港樓價才止跌回升。

南非極有可能响年底陷入衰退,因去年6月至今加息六次,依家通脹率仍高達10.9%,遠遠超過央行估計嘅3-6%。南非今年首季GDP升幅2.1%,房地產及汽車銷售轉弱,第二季消費信心跌幅係近二十四年內最大。

澳洲5月份樓按貸款係近八年內最細,或較4月減少7.9%,消費信心亦係近十六年內最低。澳元隔夜拆息成7.25厘,估計今年內利率唔變。

中國6月份出口增長率估計進一步放緩(5月份仍升28.1%),因人民幣升值6.6%,加上原材料、能源及勞工成本上升,而入口亦較5月份上升40%為細。七萬個香港內地廠商估計將有三分一結業。清華大學經濟管理學院企業戰略與政策系主任魏杰教授認為,到2010年中國嘅成本優勢將喪失殆盡。佢認為,1978到98年中國企業嘅競爭力主要來自低成本,由2003年開始,低成本時代漸漸轉向高成本時期,只靠低成本嘅企業漸漸失去競爭力,只有轉向技術優勢才係唯一出路。

OECD國家對企業發展基本上採取不干預政策,但對企業技術創新提供很大扶植力,例如美國、日本及德國。今後中國一步步取消出口退稅下,應考慮扶助技術創新。

魏杰認為,80%企業利潤持續增長同三大要素有關:一、壟斷,例如從前香港電話公司利潤極高,一旦電訊市場開放,電訊盈科(008)股價狂瀉。二、市場准入困難,即別人不能做,只有你可以做,例如本港地產公司,你冇幾十億元資本根本冇得做。三、技術創新或有品牌優勢。作為政府,不應該讓前兩者「長存」,卻應該扶助第三類企業——即扶助企業技術創新或發展本身品牌,上述乃中國未來三十年應走嘅路。

例如王老吉原本只係老字號嘅企業,呢次汶川大地震,加多寶集團以「王老吉」名字捐贈1億元,令王老吉涼茶火熱起來,消費者响網上發起「買光王老吉」行動!令王老吉一下子成為熱門品牌,加多寶集團財富滾滾而來,就係其中例子。今後內地企業應走嘅路就係技術創新及建立品牌,而非低成本;汰弱留強無可避免。

日本最大超市營運商Aeon首季盈利回落20%,只有226億日圓(2.1億美元)。睇嚟日本消費業亦走下坡。

石油業人士料油價見頂

响日本北海道開會嘅G8,可否令油價由7月3日145.85美元一桶回落,抑或只係畀面派對?ING認為,油價調整完成後,仍有能力衝上200美元,除非美國經濟出現衰退而非滯脹。油價會否响146美元附近見頂?今年2月至今油價响上升通道內升降,喺未低於130美元前未能肯定【圖】。不過,石油及天然氣鑽探行業股價已走下坡,即業內人士認為見頂機會極大。再睇Peabody Energy亦考驗50天線支持,此乃我老曹响上周叫各位遠離石油項目嘅理由。

周一IndyMac Bancorp獲美國監管局通知,由於唔符合資本充足比率,不能再依賴拋售資產去增加貸款,必須立即停止貸款。公司決定裁員至三千四百人(依家七千二百人)。由於該集團股價上月已跌至低於1美元,民主黨議員舒默致函畀信監管當局,要求調查該公司財政狀況;再加上房利美及房貸美响周一下跌16.2%及29%,引發周二環球股市大拋售(謠傳兩公司須集資750億美元)。根據Drudge Report响互聯網公布,全球次按債券中可能轉壞嘅數字達1.6萬億美元,已公布者只有4000億美元。周二英倫銀行急急注資,聯儲局答應將臨時貸款延長至2009年年中,美股才止跌回升……。但危機係咪過去?有問題嘅金融及地產機構如Lennar、Pulte、D. R. Horton甚至Standard Pacific等,擔心三水佬睇走馬燈(陸續有來)。美國聯儲局一再延遲加息(估計今年12月16日才會加息),以協助金融業及房地產。

穆廸投資者服務公司估計,企業呆壞賬到明年才開始減少,估計今年全球呆壞賬比率達6.1%、美國5.4%、歐洲2.7%。

周二貝南奇發表談話,指依家最重要係令借貸市場穩定下來,係咪代表唔穩定因素仍大量存在?!

作為投資者,必須先天下之憂而憂(例如去年10月),後天下之樂而樂(例如今年7月)。

能源、鋼鐵、農產品等今年上半年強勢項目,踏入下半年除能源外,其他都在轉弱中,我老曹因此唔認同羅傑斯嘅睇法。何況今天能源及食品項目對OECD國家通脹嘅壓力已唔似七十年代,關心程度不比當年,家吓最感受通脹壓力嘅國家係新興市場。

惠譽對主要先進經濟國如美國、歐羅區、日本及英國今年下半年保持悲觀,明年上半年展望負面。通脹率、失業率及利率皆向上,因為140美元以上油價可引發一次經濟衰退,並相信美國樓市未來十八個月仍將向下,因此對新興工業國產品需求增長率下降,情況一直伸延到2010年。英國係最令人擔心嘅國家,因過分依賴金融業及極受美國經濟影響。英國家庭負債比率較美國高,估計明年GDP增長率只有1.1%,為1992年以來最低。歐羅區一分為二,德國仍相當好,但西班牙、意大利、愛爾蘭甚至法國就唔多掂。日本亦唔見得好,估計GDP只上升1.3%,美國今年下半年或明年上半年相信最少有一季GDP係負增長,估計今年全年GDP升幅只有1%。

德國今年GDP可上升2.4%,明年回落到1.7%;法國估計今年GDP上升1.4%,明年升1.5%;意大利今年GDP只升0.6%,西班牙更加令人擔心。

四金磚國中,巴西今年GDP升4.6%,明年升4.1%;俄羅斯GDP升7.7%,明年升6.7%;印度今年仍有8%,明年則升8.5%;中國今年上升10%,明年亦一樣。

今天房利美及房貸美對美國經濟嘅影響,有如昔日東印度公司之於十九世紀大英帝國或Louisiana之於十八世紀法國。呢兩個1970年起由美國政府支持嘅兩大樓按公司,曾令美國樓價大幅上升;今天兩隻股份股價已跌至1995年水平,因為佢地亟需750億美元新資金,卻唔易籌集;咁會加快美國樓價回落。

戰後美國經濟力量漸漸由底特律(Detroit)及特倫頓(Trenton)移向曼哈頓(Manhattan),冇人再有興趣做工業家,人人想做金融專家或者房地產經紀。通用汽車股價已失去75%,去年10月起金融業亦好唔得幾多。Bridgewater估計,去年至今金融業已失去1.6萬億美元,令信貸市場收縮12萬億美元(每1元資金可借出8元借貸),情況有D似1990至2003年嘅日本,因股市及樓價回落而引發銀行呆壞賬,令銀行失去貸款能力,導致信貸萎縮。去年有賴主權基金去填補,而主權基金亦只有3萬億美元資本,今年又如何?

上一次美股熊市長達十六年(1966至1982年),日股長達十四年(1990至2003年),呢個熊市又點樣?如以納指計,熊市2000年已開始;以房地產計,2006年8月已開始;以道指計,去年10月才開始。2006年美國地產泡沫爆破,去年10月股市泡沫爆破,信貸危機開始;2001年起聯儲局已行動,至2003年中,喺十八個月內將利率由6.5厘降至1厘,刺激美國人借錢引發樓市泡沫,以抵銷科網股泡沫爆破。2001年1月樓按貸款由1285億美元到2003年夏季每月貸款額已上升一倍,由金融機構一手炮製出嚟嘅次按債券極富創意,依家五千萬個樓按貸款戶中,有75%資金來自次按債券,但去年第二季次按利率已較一年前高出3.12厘,引發問題,聯儲局去年9月急急減息,今年白宮急急退稅。2001年減息及每人退稅300美元,並無法阻止當年GDP負增長出現,點解今次又得呢?

美金融股將繼續拖低大市

次按危機對大金融機構本來影響唔大,只係佢地為咗賺取費用(fee)而提供CDO(Collateralized Debt Obligations),即係話次按債券出事,佢地有責任提供擔保。結果出事後,銀行或大金融機構發現自己必須承受大量次按債券,而呢批債券市值已急跌而須大量撥備,估計需要四年時間才能完成清理。有D銀行及大金融機構因此陷入資本不足問題而須集資。以今年6月止,金融股股價已大跌,但仍佔標普五百加權指數17.7%市值!如金融股繼續回落,仍可拖低大市指數。過去CDO令大銀行及金融機構共撥備4000億美元,大銀行及金融機構受CDO影響,估計今年上半年進入高潮,但中、小型銀行及金融機構又點?類似貝爾斯登事件下半年會否大量出現?

2008年7月9日 星期三

2008-07-08

全球最大超級都市圈

7月7日,周一。恒指升489.24,收21913.06;成交598.5億元。7月期指升373點,收21888點,低水。

滬深A股出現近三周來最大漲幅,招商銀行及中信銀行發出盈喜,估計半年獲利可能升一倍,令招行出現兩個月內最大漲幅,中信銀行連升四天。北辰實業亦上升,因7月北京奧運會將吸引更多遊客,北京城建升10%漲停。東方航空亦大升,因出售三架空中巴士後再租回,中國石化、中國中鐵皆上升。

港澳珠深連成一體

國家副主席習近平响廣東考察工作時,強調推動粵港澳互利合作,不但可促進粵、港、澳經濟發展,突顯一國兩制嘅成功實踐,發揮中國統一大業作用,同時可成為中國境內最強大嘅「超級都市圈」。據了解,有關「深化粵港澳合作的調研報告」快將出台,希望進一步深化CEPA,建立粵港澳特別合作區,力促三地人流、物流、資金流自由往來,邁開擴大開放嘅步伐。中央將向呢個「合作區」下放更多經濟管理許可權及金融創新方面試驗權,消除制度上及行政區劃上嘅藩籬。未來粵港澳合作區將以香港、澳門、深圳及珠海連成一體,組成全球最大嘅超級都市圈,成為中國經濟合作嘅「先行區」,對台灣起示範效應。

第一步係將粵港、粵澳嘅雙邊協商機制改為中央主導嘅多邊協商機制,建立國家級區域協調機構,以香港作為國際經濟中心、金融中心和貿易中心,廣東省成為全球性產品生產、集散及銷售中心,澳門成為世界性博彩旅遊中心。

去年廣東GDP超過3萬億元,已超過整個台灣,可望喺2012年超過南韓。未來廣東必須引入台灣、南韓及日本高端製造業,實現廣東省由加工區到高端產品服務區,並以南韓經濟轉型和產業升級為藍本。

過去一國兩制嘅目的係「井水與河水」之分,以免港、澳嘅資本主義被中國社會主義吃掉;中國社會主義被港、澳資本主義染污。三十年改革開放政策下,證明誰也不能吃掉誰,未來政策再唔係河水不犯井水,而係响「一國」之下,如何令「兩制」互補,並以粵、港、澳為試點,透過實踐指導,為中國提供理論支撑,全面融合「兩制」。此事將由習近平完全負責,一個類似歐盟成員國之間高度開放及全流通嘅大市場將喺粵、港、澳區形成,成為「兩制」經濟合作嘅先河區,透過實踐建立理論,然後全國施行。上述才係習近平嘅「重任」!

珠三角低勞力成本不再,轉型為資本密集嘅高新科技;响轉型過程中有一定痛苦。估計有10%廠商可能倒閉,37.3%外移或內移,其他相信可轉型成功,帶領粵港澳進入另一經濟繁榮期。今天粵港澳有如美猴王被太上老君困响火爐內,用五昧真火去燒,七七四十九日後美猴王不但冇死去,反而煉成金剛不壞之身及金精火眼。粵、港、澳同胞請撑下去,只要捱得過,未來日子更美好。

由6月份開始嘅滬深三百指數A股RSI背馳,終於引發7月3日開始嘅反彈。滬深A股由去年10月17日5891點回落到今年7月3日,响短短八個月內回落55%,只有香港1973至74年股市暴跌才可媲美。熊市係全球股市由新興走向成熟嘅必經階段(例如1991年5月9日台灣股市指數由6305點回落到1993年1月7日3135點,跌幅50.27%),類似滬深A股嘅情況亦喺越南、印度上演。請唔好把經濟同股市混為一談,雖然股市有經濟晴雨計之稱。一如香港由七十年代到1997年,大方向係向上,股市卻已起落數番。去年10月17日起A股調整嘅理由係偏高(鐘擺理論),由一個極端走向另一極端。今年7月3日反彈,由新華社署名嘅評論文章引發,技術上睇只係另一次熊市反彈。

仍有撈貨衝動證明未見底

末日博士認為滬深三百A股回落55%後,引發人們買入嘅衝動,因此只係一次短期反彈。泡沫爆破後,投資者一定由失望走向絕望,只有大部分人感到絕望之時,股市才見底,依家距離見底之日仍遠。上一次內地熊市2001年6月開始,需時四年才完成;呢次熊市只有八個月,已公布純利計P/E二十點九倍,難以用「便宜」兩字去形容。佢認為,A股可能反彈20%到30%,然後又再回落。佢話1989年12月日經平均指數開始下跌,响兩年半內下跌60%;1992年8月19日見14194點後,亦曾反彈到1993年5月11日21224點,事後證明1992年8月19日唔係日經平均指數嘅底,真正嘅底要到2003年4月,即十四年之後。

八十年代開始,美國消費者購買中國產品,令中國製造業獲利甚豐;中國政府又將賺番嚟嘅1萬億美元用作購買美國政府債券,令美元利率回落……。可惜呢個遊戲漸漸再玩唔落去。美國面對次按危機,大量資產值蒸發;美國GDP每下跌1%,可令中國出口升幅減少6%。結果中國廠商受害大於美國本身,引發滬深三百A股大幅回落,跌幅大於標普五百指數。由於中國廠商競價出口,大大傷害本身邊際利潤,甚至引發倒閉潮。

上周總理溫家寶要求美國國務卿賴斯去刺激美國經濟、穩定美元滙價。至於點樣挽救美國經濟?睇嚟賴斯亦乏良策,佢反過來建議中國進一步開放市場,帶動美國經濟復甦!

未來二十年中國將增加三億五千萬中產階級人口,相等於整個美國人口;估計2025年中國將有二百二十一個城市嘅人口超過一百萬(歐洲今天只有三十五個大城市)、2030年中國將有三分二人口住响市區(約十億人),中國因此需要興建一百七十個集體運輸系統、四百億平方米樓面(或五百萬幢大廈,其中五萬幢係摩天大廈)。中國一如香港,花咗三十年時間由貧窮走向小康,未來三十年將由小康走向富裕。不過眼前須克服困難如能源危機、資源短缺等,因此中期仍睇淡(短期睇反彈),但長期則睇好。過完三十年,中國經濟只完成第一波(由貧窮走向小康),依家進入青黃不接期,或遲或早進入第二波(從小康走向富裕)。假如你喺1974年12月投資港股,至今獲利一百四十倍。2003年起,中國進入中產階級冒起期,估計長達三十年(即到2030年左右)。

滬深三百A股指數狂升暴跌,主因係大小非現象。大量非流通股令供求關係緊張,令去年10月之前滬深A股P/E炒至接近六十倍。隨着大小非變成流通股,P/E漸漸同世界接軌,引發拋售。未來大小非問題仍須擾攘一段日子,因此7月3日起滬深三百指數回升應係反彈而非見底。

恒生指數P/E十三倍,全球平均P/E十五倍(香港P/E較低嘅理由,係唔少企業純利來自物業重估)。滬深A股P/E二十點九二倍,仍然略為偏高;至於會否回落到十五倍P/E同全球接軌?機會會大。

大摩認為,透過干預無法阻止南韓圜(今年已下跌10.5%)、印度盧比(今年跌8.7%)、越南盾(今年跌5%)回落,估計下半年最少會再跌5%。因南韓利率只有5厘,仍低於通脹率5.5%;越南14厘(CPI升幅26.8%);印度8.5厘,而批發物價指數升幅11.63%。除非各國再加息,不然無法阻止滙價回落。

標普五百第二季純利或會回落11%(第一季回落16%),因金融機構仍須大幅撥備;如唔包括金融機構業績則上升7.1%,其中能源股純利更升25%。

雖然索羅斯估計經濟會熔毀(Meltdown),不過已非新聞。第一次佢作上述預測係1987年股災之後,第二次係1998年亞洲金融危機之後,呢次係第三次。冇人相信1930年代式美國經濟响現代社會可重演。

債王則認為,銀行業仍面對rocky嘅環境,呢點嘅可信性則甚高,未來銀行業繼續面對大量挑戰,膽小D都應付唔嚟。

治物價宜疏不宜堵

今年6月底美國眾議院通過「2008年能源市場應急法案」,能否將呢隻跳出牢籠嘅「油老虎」重新關番入籠?2001年至今全球經濟由高增長、低通脹走向低增長、高通脹,幕後黑手係邊個?答案係美元滙率政策及利率政策。當美國向全球投放大量美元,加上低利率鼓勵下,供需矛盾、信用膨脹、流動性過剩喺各國累積,尤其係香港及中國呢D貨幣同美元掛鈎嘅國家。通貨膨脹係乜嘢嚟?1970年我老曹响當年嘅《明報晚報》用咗三個月時間向讀者解釋。通脹係指流通貨幣增加,而唔係物價上升。CPI上升係通脹嘅果而唔係因。換言之,如果冇2001年至今美國濫發美元,全球物價只會此起彼伏反映供求,而唔可能集體升值。集體升值嘅理由係美國政府濫發美元嘅果,一如1966至76年美國濫發美元去支付越戰軍費,引發全球通脹;到1980年美國停止濫發美元後,CPI升幅才大幅回落。反之,中國係流動性過剩下嘅受害者,流動性過剩喺香港亦造成豪宅售價比天高,較1997年高出50%(普通住宅樓價仍低30%)。

換言之,唔係油價同食物價格上升引發通脹,而係流通貨幣增加刺激油價同食物價格上升,呢回真係「賊喊捉賊」!中國面對輸入性通脹,卻用愚蠢嘅行為去阻止,就係管制物價、禁止糧食出口,咁搞法更加刺激外國食物價格及油價上升,乃典型「油上加火」行為。夏禹治水必須疏通河道,而非築堤防洪;築堤防洪只治標,疏通河道才係治本之道。中國嘅「堤」愈築愈高,一旦缺堤,你說怎麼辦?

中小台商死亡率高

兩岸三通,大台商叫好,小台商叫苦。今年5月台商向大陸投資11.57億美元,較去年同期升145%,既響應馬蕭嘅三通政策,亦反映大台商加快向大陸二線及三線城市進發。中國經濟正由低端產品走向中端產品,製鞋、紡織、玩具、消費性電子產品面對好大壓力;反而大台商過去生產嘅中端產品依家正向山東、北京、重慶、四川、湖南、江西、河南等地擴散。去年大台商喺大陸獲利1445億元新台幣,較2006年上升70%!唔似八、九十年代大陸經濟係大、中、小共生嘅局面,當時係大有大做、小有小做。踏入2003年政策上改變,形成大者愈大、強者愈強,中、小型工廠難逃被整合命運。大台商都係台灣上市公司,財雄勢大,有一定經濟規模,正好利用呢次兩岸三通加強進軍中國大陸;但中、小型台商嘅命運則同港商接近。根據中華徵信所推出排行榜,一千名台商中排名五百或以下者,每年有40%淘汰,即中、小型台商近年在內地死亡率接近四成!唔少中小型台商慨嘆奮鬥咗十幾年,佢地改變咗東莞歷史,估唔到今天卻被人連根拔起,未來命運將被嗰三位一體嘅大台商完全取代!佢地不禁問:低端加工及代工業仲有前途咩?

巴郡為大股東嘅美國運通,上周二被瑞銀提升評級,由「沽售」變為「中性」,因股價由去年8月65美元回落到最近38美元,跌幅41.5%。該公司主力係信用卡業務,今年1月該公司CFO Daniel Henry估計今年全年壞賬率達5.1%,但今年3月該公司壞賬率已達5.3%,睇嚟將進一步轉壞!面對汽油價上升、房價回落、失業率上升、收入下跌,美國信用卡壞賬率今年下半年將進一步惡化。每股38美元嘅美國運通,係咪值得吸納?見仁見智。惠譽分析員Christopher Wolfe相信,信用卡賺大錢嘅時代已一去不返,因壞賬率正在迅速上升;估計年底將高達7%。美國運通卡唔同Visa或Master Card,後兩者皆由銀行提供信用,佢地只收取服務費;美國運通則自己提供信用。投資者唔應該因Visa股價上升而睇好美國運通。

2008-07-09

美國陷衰退而非滯脹

  7月8日,周二。恒指跌692.25,收21220.81;成交637億元。7月期指跌627點,收21261點。富士康(2038)跌10.3%,見6.71元;東亞銀行(023)跌5.9%,收36.95元;工商銀行(1398)跌3.2%,收5.14元;港交所(388)跌5.9%,收101元;中國鋁業(2600)跌5.6%,見8.4元。

  今天人民幣升0.26%,見6.851兌1美元。

有冇趙雲咁好身手?

  歐洲股市方面,瑞銀跌4.5%,成19.08瑞郎;德銀跌3.5%,成52.65歐羅。此外,南韓國民銀行跌8.6%;日本三菱UFJ跌3.4%;愛爾蘭銀行跌12%;美國房利美跌16.2%、房貸美跌29%。全球銀行股同金融股進入第二輪下跌。

  今天台股亦急跌3.94%,收7051.85。證明兩岸三通政策亦救唔到台灣經濟。

  花旗推介中海油田(2883),估計今年每股獲利66.5仙,升22.8%,O十七點七倍,目標價16.9元。公司宣布以25億美元收購Awilco,作為向海外擴展,估計可令明年每股獲利81.3仙人民幣,較今年再升22.1%,明年O可降至十四點五倍。

  花旗亦推介恒地(012),估計今年度每股獲利3元,較2007年度減少3.7%,O十五點四倍,目標價52.89元。根據中原資料,香港十大屋苑上周末只有十八單成交(7月5日及6日),較一星期前跌33%,係近二年半內最低,估計7月份成交額較6月減少20%,只有七千單。利嘉閣估計,7月份屋主更願意割價出售,對地產發展商而言有@定壓力。不過,恒地股價已回落唔少,應物有所值。

  熊市中買中逆市上升股份,必須有趙子龍咁身手(百萬軍中藏阿斗)。上周我老曹購入瑞銀,本周股價已冇13%,好彩只係牛刀小試,無傷大雅;由此可見殺戮戰場上戰況幾咁慘烈。熊市中,anything that can go wrong will go wrong!要接住下跌中刀係十分困難。好股份唔少已進入有吸引力水平,但淡市莫估底。皇家蘇格蘭銀行估計低潮今年9月,標普五百指數應由去年10月高點回落33%(家已回落20%),即由現水平計仍有13%跌幅。今天房利美及房貸美又再大跌,因美國房地產價格仍須再跌10%到20%,到時又有另一批新呆壞賬出現……。哈佛大學研究報告指出,美國人未來十年每年房屋新需求一百四十萬間,另有五十萬間被拆掉重建,即一年需求一百九十萬間;依家存貨三百萬間,即使減慢建屋速度,亦需要兩年或以上才能完成消化,即美國樓市復甦期最快2010年以後。

英鎊唔會加息以免催化衰退  英國第二季服務業及製造業需求大幅回落,指數已跌至「負2」(上一季仍係17);上一次係2001年,由12跌至負3。睇7月10日英鎊亦唔會加息,以免加快經濟衰退來臨。

  G8領袖日本北海道要求人民幣加快升值,雖然2005年7月人民幣兌美元已上升,但兌歐羅仍下跌7.2%。去年中國收支盈餘升49%,至3718億美元(2006年為2500億美元)。隨美國同歐洲GDP陷入低增長,中國面對壓力在上升中。

  美國第二季GDP為14.3萬億美元,較一年前多5720億美元,其中3590億美元來自通脹,即仍有2130億美元係實質增長。反之,Wilshire 5000指數失去2.1萬億美元市值,Case-Schiller住宅指數跌15%,即美國住宅跌價3.1萬億美元。去年至今美國人股票及住宅市場減值5.2萬億美元(上述未計美元價回落)。大量財富失去,加上信貸萎縮,甚至金錢流速亦下降;美國同歐洲面對通縮壓力大於通脹。美國今年財赤較列根總統上台時大大大大好多,即2009年無論邊個做總統都唔可能大幅減稅,美國又再面對2001年同樣威脅(通縮),只係呢次既不能減稅亦不能再減息。L增長率已由第一季9.8%下降至第二季6%,金錢流速由第一季1932下降至第二季1866;第二季商業銀行信貸(借貸、投資加商業票據)減少7.2%。上述一切皆反映美國正步入通縮期(而非通脹)。CPI呢個落後指數幾時才止升回落?相信最遲係今年第四季。由於原材料價格及油價只佔美國生產成本10-15%,對CPI影響唔大,但需求疲弱,擔心第四季美國出現減價促銷現象而令CPI下降。美國製造業使用率只有77.5%(平均81.1%),已經出現使用率不足;失業率5.5%係2004年10月以來最高,證明美國經濟唔係陷入滯脹,而係日式衰退(需求下降引致賤物鬥窮人)【圖一】。

歐盟進入半身不遂期

  高油價對新興工業國,例如越南、印尼、印度甚至中國CPI影響好大。以1973至74年為例,油價上升四倍,1974年年底美國CPI升幅係12.34%,對當年新興工業國如西德、日本、香港經濟打擊甚大;1979至81年油價上升兩倍所帶打擊仍然好大【圖二】。呢次油價上升十二倍(由11美元一桶升上145美元),可以冇打擊?真係癡人說夢。西班牙收支赤字已佔GDP 10.5%,希臘收支赤字佔GDP 14%,葡萄牙收支赤字佔GDP 10%,仲有愛爾蘭、意大利等,估計半個歐盟經濟已陷入不景氣,即歐盟進入「半身不遂」期,情況甚至較美國嚴重(美國收支赤字只佔GDP 4.9%)。

  1973年美國由股市回落到經濟完全復甦需要十四季(三年半),1981年要十七季(四又四分一年),1990年次要十三季(三又四分一年)。由2007年10月股市回落至今只有三季,未來需要走路仍十分長。

  美國剛度過二百三十二年國慶,額上已有三條縐紋,老態漸現。一如二十世紀初期英國,雖然仲係「英旗無落日」,但亦到西山夕陽。二次世界大戰後,英國雄霸全球日子結束。今天中國同印度冒起,二十一世紀應係中國同印度,一如二十世紀美國取代英國一樣。美國有如老將,大小戰役無數,但已垂垂老矣;中國同印度雖然少不懂事,但自古英雄出少年。英國人聰明地方,就係二十世紀初已知大英帝國日子無多而交棒畀美國。美國崛起係兩次世界大戰後事(第一次世界大戰令資金及人才流向美國,第二次世界大戰美國到後期才參戰而雄霸天下)。中國希望和平崛起,美國願否幫一把?順勢者昌,逆勢者亡。美國會否一如二十世紀英國交棒畀中國同印度?不然未來世界都幾動盪(此起彼伏)。

  中國有一億四千六百萬股票投資者剛剛嘗透熊市滋味,但唔代表中國經濟高峰已過。2008年外資對四金磚國策略係棄中國同印度,將資金轉投巴西同俄羅斯,理由係睇好資源股、睇淡製造業,形成內地股市同印度股市今年受壓。上述策略係咪正確,見仁見智。

  7月4日廣東省情調研中心發布「廣東民營經濟發展態勢及問題分析報告」顯示,民營經濟發展不平衡,企業規模小,缺乏品牌意識,融資困難,管理體制落後。多達60%企業家因部門效率低、辦事拖拖拉拉、程式繁複,而喪失發展新項目機遇;44%民營企業家經常同政府職能部門拉關係、做公關而耗費精力……。呢批民營企業家必須一改舊時工作和單純來料加工或三來一補模式,必須投身高附加價值、技術含量高產業,由依家勞動密集型企業走向科技企業,才能贏得呢場淘汰賽。

  經濟發展初階,勞動密集型產品進入門檻低,令港、澳、台呢類產業迅速向中國大陸轉移。開放政策至今,企業已迅速積累資金及經營企業經驗,必須逐步向科技型企業轉變才能壯大,而不應再停留小規模經營階段,汰弱留強實屬必要。冇將產業結構升級者或傳統產業將面對淘汰,又或轉移到落後地區再經營。東莞家仍有三萬家企業,其中台資佔八千家,去年已有20%台資企業消失了,今年估計更多。特別係從事人員文化水平低,存在許多制度漏洞,大部分係自己人管財務、跑業務、拉關係者。佢地「家」、「企」不分,所有權、經營權、決策權、執行權、監督權合而為一,亦冇進行市場調查,只憑老闆個人經驗喜好便決定企業發展。中國知識產權保護制度不健全時期、官員行為不檢點時期,法律、法規未上軌道前,上述企業仍可生存,到今天恐怕唔易捱落去。

中國環保部門權力擴大

  國家環保部本月公布「上市公司環保檢查行業分類管理名錄」,明確指定火電、鋼鐵、水泥、電解鋁、煤炭、冶金、建材、採礦、化工、石化、製藥、輕工、紡織和製革等十四行業列入「管理名錄」,必須獲環保部門批准才可融資,必須環保部門驗收合格才能營運,不然由環保部門叫停。中國環保部門權力大幅擴大,意味中央政府環保方面將認真辦事。

  A股市場成立至今不過十八年,但A股市場已經歷五輪熊市與牛市輪迴。將A股歷史走勢與美國、香港股市比較,可清楚地睇到A股作為新興市場,相對成熟市場波動劇烈得多。

  第一輪牛熊輪迴發生1990年底至92年11月,上證指數從100點起步,迅速暴漲到最高1429點,好快又跌至386點。

  第二輪牛熊輪迴發生1992年底至94年7月,上證指數從400點上攻至1536點,又跌回最低325點。

  第三輪牛熊輪迴發生1994年8月至96年1月,上證指數曾快速上漲至1053點,最低跌回512點。

  迄今為止,第四輪牛熊輪迴持續時間最長,從1996年2月持續到2005年6月。期間上證指數2001年6月到2245點高點後轉而下行,2005年6月跌至最低998點。

  依家可視為第五輪牛熊輪迴。上證指數從2005年6月開始重新啟動,2006年6月加速上行,2007年10月創下6124點歷史最高位,旋即持續下跌,回歸價值投資水平,家仲尋緊底。

2008年7月7日 星期一

2008-07-07

內地股蟻未心死

7月6日,周日。英國《周日時報》報道,全球信貸危機繼續擴大,包括美林、花旗、瑞銀在內,資產減值與虧損不絕,可能要繼續拋售旗下資產以進行融資。

五窮、六絕、七翻身。自去年10月至今,道指進入熊市已唔使爭拗,因道指由高峰回落超過20%,確認熊市。1940年至今美股熊市平均跌幅30.4%,平均日子三百八十六天。由於家吓已回落20%,估計熊市已完成75%,未來仲有一百一十八天或(由現水平計)14%跌幅。雖然分析界對今年純利估計已由年初上升15%改為只升5.8%,我老曹擔心此估計仍然偏高,預計今年純利升幅不足3%機會甚大。從呢點睇,美股熊市應喺明年而非今年結束。另一方面,道指响2002年10月及03年3月兩次接近120個月移動平均線後回升,依家120個月平均線喺10545點。換言之,今時今日才睇淡美股已太遲,但睇好又太早。

棄買轉租美國租金上升

美國6月份出租住宅空置率5.9%;租金上升1%,至平均1047美元一間,係連續第二十五個月上升。愈來愈多人棄買轉租,因五年樓價上升周期响2006年年中結束。三藩市第二季租金較去年同期升9.4%、紐約升7.7%、西雅圖升7.4%、加州聖地牙哥升7.3%、鹽湖城升6.1%;紐約為2847美元、三藩市1825美元、波士頓1640美元、橙郡1520美元、聖地牙哥1504美元、新澤西1460美元、洛杉磯1408美元。紐約空置率只有2.2%、新澤西3%,從呢點睇,美國未來樓價下跌幅度亦唔會太大。

未來商品價格會點?銅價5月5日見4.26美元一磅後,需求回落。6月10日中國宣布5月份入口跌19%。瑞銀分析員指出,3月17日金價見1033.9美元後,黃金需求亦回落,今年第一季黃金需求係近五年內新低。汽油價格升上4美元一加侖後,7月4日美國車人士亦減少,係近十年內首次。六十一位分析員認為未來十二個月美國進入衰退機會已超過50%(2001年美國只出現一季GDP負增長,CRB指數响2001年下跌16%)。二十六種商品價格今年上半年平均升幅31%,踏入下半年商品價格會否進入強弩之末?油價阻力應响145.53至151.2美元出現,即上升空間亦極之有限。

中國2004年起大量投資鐵路,未來五年呢方面投資高達3000億美元,十年內將令中國鐵路網絡增加33%;加上火車提速,鐵路將佔交通重要地位。估計中國中鐵(390)及中國鐵建(1186)將可受惠,仲有中國交通建設(1800),都係中國大舉投資鐵路下受惠企業,各位可留意。三隻股份現價唔便宜,但考慮未來前景後仍制得過。

滬深三百指數由2005年6月6日807.78,一直上升至去年10月17日5891.72,用咗兩年幾時間升幅達629%;上周五2741.85,較去年10月17日下跌53.46%。股票市場由熱鬧及喧囂到冷清及低迷。調查結果顯示,內地股民中有62.8%已經虧本、9.1%持平,只有28.1%股民仍有盈利,但八成股民決定苦守落去!上周五滬深指數2741.85,仍較2005年6月6日807.78高出239%。點解虧本人咁多、賺錢股民咁少?主因係大部分股民都喺高價時才追入。依家仲有84.3%股票投資者決定死守落去,代表內地A股市場仍未見底。所謂哀莫大於心死,仍有84.3%股民未心死,代表投資者對A股只係失望,仍未進入絕望;熊市第三期則係投資者心死時期!

內地工廠老闆慘上加慘

6月份中國建設部、國家發改委、中國人民銀行及相關部委,頻頻約見地產界人士,了解房地產市場運行情況。房價一旦下跌,好容易出現需求萎縮,不但影響房地產發展,同時影響內地銀行業。大部分人士睇法係,7月將係一個關鍵月份。開發商認為,資金困難情況已好嚴重,去年實行第二套房貸款提高首付比例以來,銷售已持續低迷,希望銀行响資金融通方面提供支持。6月28日海南博鰲房地產論壇上,全國住宅商會會長聶梅生發表咗2008年房地產迷局探路,認為房地產已調整咗四年,依家已接近臨界點,如再緊縮就會出問題。佢建議如果銀行開放貸款仍有難度,能否通過其他渠道,去解決地產開發商融資問題?

由人力資源和社會保障處起草《企業工資條例》草案,新加入一個條款:如企業老闆不與員工集體協商確定每年工資,就唔准工資好像以往咁列入成本、稅前抵扣,而將列入利潤須交納企業所有稅25%。並傳《企業工資條例》可能响奧運之後或年底出台,令工人獲得更佳保障。明年企業老闆將面臨百上加斤,係繼《新勞動法》後又一條對企業老闆造成傷害法例。上述條例讓工資集體談判者獲得很大權力,令明年喺要求加薪方面談判地位大大提升;反之,企業老闆面對集體工資談判時將招架無力。估計內地工人工資將因上述法例落實而大幅上升,內地工廠老闆明年更慘!

一位內地基金經理花咗210萬美元(1640萬港元)作為同畢非德共晉午餐代價,去年Mohnish Pabrai只花65萬美元(507萬港元)。係咪物有所值?見仁見智。吃完一頓午餐後,會否成為畢非德好朋友?响內地基金經理未加入競投前,喺紐約曼哈頓牛排屋Smith & Wollensky同七十二歲畢非德午餐三小時只需7.71萬美元。當內地基金經理加入競投後,價格迅速升到200萬美元以上,最後以210萬美元成交(2003年只值3.2萬美元)。

不應將畢非德神化

要知道畢非德點睇大市,上網便可知曉,毋須花210萬美元同佢食晏(雖然係做善事,我老曹認為四川地震更需要中國人自己捐助)。畢非德認為美國經濟將受滯脹(stagflation)影響,今年下半年甚至明年都擺脫唔到滯脹。我老曹睇法係,美國正陷入日式經濟衰退,一場由樓價回落、帶動信貸萎縮所引發經濟衰退,而非滯脹,中國同印度才係進入滯脹期。

畢非德過去係一位極成功投資者,值得我地學習地方好多。但畢非德亦係人一個,我地唔好崇拜偶像。今年上半年我老曹投資組合虧損10%,而佢巴郡股份卻回落20%,同期恒生指數跌幅係24%,道指跌幅只有15%。即我老曹跑贏大市,而畢非德卻跑輸大市。面對成功人士,我地應虛心學習,吸收別人長處去改善自己,但不宜崇拜。我地唔應該將畢非德神化,畢非德只係一位值得投資界尊敬及學習對象。

我老曹唔認同畢非德滯脹論理由有:一、雖然再唔敢分析油價去向(因為已進入非理性亢奮),但認為依家油價短期或可再升,中長期一定回落。油價如長期維持現水平,OECD 國家財富將迅速轉移到OPEC,因而引發全球經濟大衰退,情況有如1973至74年或1981至82年。因此美國經濟唔可能長期處於滯脹期(有如1960年、70年代),好可能陷入日式衰退。KB Home創辦人Eli Borad 响5月份認為,美國樓價最少仲要跌10%。另一美國豪宅建築公司Toll Brothers CEO Robert Toll認為,樓價仲未見到隧道盡頭,認為未來美國樓價最少仍須回落20%。

愛爾蘭或成歐盟首個衰退國

上周歐羅加息,英國股市已由高峰回落20%,英國消費信心跌至十八年內最低,英倫銀行副行長Charlie Bean認為英國正面對1990年代以來最嚴重衰退(上次英國樓價由1990年一直回落到1995年)。不但英國係咁,丹麥、瑞士、西班牙、愛爾蘭等國家亦面對樓價下跌壓力,歐洲情況唔見得較美國好。

國際三大評級機構之一惠譽7月4日發表報告,今年GDP全球增速為2.6%、明年2.7%。油價上升令發達石油消費國實際收入下降,加上信貸緊縮問題,令美國下半年仍有衰退可能。英國經濟面臨較大風險,因房地產及金融業佔英國經濟比重較大,而且英國經濟與美國經濟關係緊密。日本亦因消費信心下降,下半年經濟出現疲軟。歐羅區德國仍在上升,但西班牙、愛爾蘭、意大利已急劇放緩,法國經濟受房地產同消費支出減少拖累,亦出現疲態。惠譽相信,明年美元才開始加息。

1997年亞洲金風暴後,油價响1998年見11美元一桶。1999年3月《經濟學人》雜誌話,油價由1981年44美元回落到1998年接近10美元後,擔心情況進一步惡化,估計十年後油價可能見5美元一桶。今年油價喺140美元之上,今天市場又估計油價幾時見200美元?咁樣係咪犯咗1999年3月《經濟學人》相同錯誤?各位應知道《經濟學人》雜誌一樣冇預測能力。歐羅加息後,西班牙同愛爾蘭相信好快陷入衰退(愛爾蘭今年首季GDP已出現負增長,西班牙今年首季GDP升幅係十三年內最低,而且仲有意大利)。愛爾蘭第一季新屋建造減少60%、西班牙減少70%;愛爾蘭建築工人已自動減薪10%去保住份工。如愛爾蘭第二季GDP仲係負增長,愛爾蘭將成為首個歐盟國經濟陷入衰退。

中國捐款監管可借鑑外國

菲律賓情況亦令人擔心,披索回落至45.445兌1美元;馬來西亞林吉特見3.266兌1美元;新台幣30.4兌1美元;泰銖成33.49兌1美元。東南亞情況同樣令人擔心。越南盾黑市價較官價低7%,今年官價已回落5%,成16846.5兌1美元,12個月期貨成20500兌1美元低18%。越南已進入貨幣危機時代,情況有如1997年泰銖。黑市越南盾成18000兌1美元(一度見19500兌1美元),喺可見將來無法扭轉。印度6月份通脹率11.63%,自2月起逐步加速,情況幾令人擔心。繼越南之後,印度有可能成為第二個陷入貨幣危機國家。

响「5.12大地震」,中國民間團體慷慨捐贈,備受矚目;災後重建在在需財,社會名流、善長人翁乃至普遍老百姓紛紛解囊,正好反映中國人善良、博愛一面。隨之而來係對呢筆善款監管問題,包括如何管理、如何分配,以免剛興起慈善熱潮因此而冷卻下來。其次要搞清楚慈善事業目的係協助社會上最不幸人,有如細水長流,同時必須日後監管呢筆款項點樣運用才正確。捐款對於實行社會主義中國仲係近年新事物,值得向外國慈善機構學習地方十分多。

2008年7月4日 星期五

2008-07-05

心中富貴

7月4日,周五。恒生指數升181.04,收21423.82,成交501億元;7月期指升248點,收21515點,高水;工商銀行(1398)升2%,收5.11元,因發盈喜;中國建設銀行(939)升1.4%,收5.92元;交通銀行(3328)升1.1%,收8.66元;平安保險(2318)升3.8%,收50.75元;山水水泥(691)首日掛牌升7.1%,收3元(招股價2.8元)。
台灣股市指數卻以今年最低價收市,跌165.69,收7228.41,並已跌穿今年1月低點,出現一浪低於一浪走勢,確認係熊市(台灣牛市喺2007年10月30日9858.65結束)。今天開始直航班機對台灣經濟幫助有幾大?台股由馬英九獲選至今已回落咗22.35%。證明大氣候與小氣候唔會因人主觀願望而轉移。台灣出口業以電子高科技項目為主,主要市場係美國,上述至係主導台灣經濟。依家高科技項目前景睇淡,台股又可以好得去邊吖?

投資四大謬論

依家內地汽油及柴油價格唔及日本同德國一半;米價唔及泰國四分一。用管制物價而令內地CPI升幅下降,只係自欺欺人遊戲。其他如小麥及玉米平均每噸收購價1582元,較去年上升7.5%(但國際小麥價格上升咗197%,玉米上升咗70%)。食物危機及燃料危機已喺全球出現,中國政府卻採取駝鳥政策,咁到底可維持幾耐?以及中國公布CPI可信性又有幾多?

通脹係債券死敵,股票同CPI關係卻糾纏不清,通脹初期對股市係有利,但後期就不利。滙豐策略研究員Kevin Gardiner研究美股喺1973至81年高通脹期,平均每年回報係負1.3%。黃金反而係對抗通脹有效工具,1966至81年平均每年上升10.9%;相反,1982至2000年通脹回落期美股表現出色,黃金表現就好失色;2003至07年美股同黃金表現都好出色。滙豐策略員結論係CPI喺2%到4%對股市有利,一旦高過4%股市就大幅回落。1973至81年工資大幅上升,食咗企業利潤增長率,係對股市不利理由;2003至07年上述情況冇出現而企業純利升幅很大。忽然間成個形勢又較為對股市不利。油價及食物價格上升壓力下,消費者能夠用其他項目錢減少,企業純利又再走下坡;次按危機令銀行唔肯借貸又係另一個理由。擔心最終引發經濟衰退。技術上睇,美股未見底只係進入超賣區。

雖然技術指標指出股市係極度超賣,短期出現反彈,但唔代表熊市已結束。極有可能只係出現夏日戀情(即無花果)。喺熊市中大部分投資者皆做出錯誤決定,唔理你係高學歷或大人物,一樣犯相同錯誤。例如喺升市中有過高期望;喺跌市中又怕得要死。好多人誤會大戶係股市贏家,喺2007年10月至今股市最大輸家係服務大戶大金融機構,例如UBS、美林、花旗、雷曼兄弟及貝爾斯登等。證明股市內無大戶或散戶之分,只有贏家同輸家。點解股市咁多輸家?因為太多謬論。

一、P/E係反映過去業績結果而唔係預測未來工具。P/E四十倍股份應睇好定睇淡?如未來一年純利可上升100%,P/E四十倍點解唔買?相反.P/E十倍股份係唔係抵買?如果未來一年公司出現虧損,咁P/E十倍股份一D吸引力都冇。P/E高低由G(增長率)所管轄,投資者應買增長股份(Growth Stocks),而唔係低P/E股份。只講P/E唔講G者,係唔懂P/E理論,人云亦云,可能佢連P/E理論亦未睇過。其次係行業周期,例如2001年資源股P/E雖然高但唔怕買,因為資源業正進入上升周期(由1980年起,一直衰到2000年,衰足二十年)。相反,今年資源股低P/E都唔好買,因為佢地可能見頂。

二、太早止賺可令你破產。2007年上半年,唔少人呱呱叫泡沫經濟,喺恒生指數22000點前早已放晒貨止賺。點知恒指去年8月只回落到20000點就止跌回升,9月份便到處問人好唔好高追?人地叫佢睇睇,佢就唔敢入貨。到咗10月份,股市實在太燦爛,人地叫佢唔好高追,佢亦聽唔入耳(心諗9月份你地叫我唔好高追,累我賺唔到錢)。喺10月份入飽貨後,股市卻大幅回落,由於喺30000點水平先入貨,自然唔肯止蝕。到今年3月嚇死先止蝕(50天線跌穿250天線)。4月時又心大心細,5月又再高追……。請記住投資市場只有止蝕唔止賺,從來冇止賺呢回事。相信止賺盤者永遠唔會係股市內大贏家!甚至10%到15%止蝕盤亦不宜機械式運用,例如一旦確認行業進入上升周期,或確認牛市已開始時,買入後甚至股價回落10%到15%亦唔駛止蝕。只係一般人唔知咩叫當頭起。因此,對幾時應放棄止蝕盤並唔係容易掌握。

三、投資宜集中,不宜分散。專業投資者最多亦只可持有十隻股票,一般投資者最多只可住五隻股票。超過上述數目係自找麻煩;五隻股票中總有一、二隻跑出,嗰時更應該進一步集中(因溝上唔溝落),請賣晒蝕本貨,增持賺錢貨,而唔係賣晒賺錢貨而去買蝕本貨(平嘢冇好,好嘢冇平)。投資同生仔一樣,貴精唔貴多。

四、名氣無用論。今年上半年巴郡股價跌咗19%(同期標普五百只跌14%),連畢非德都跑輸大市。證明過去成功,唔保證未來成功;名氣愈大,未來成功機會愈小。

《信報》三十五周年酒會上,到賀的嘉賓絕大部分都係成功人士。回望我老曹,過去一直追求成功人生,到底咩係成功人生?有朋友話擁有靚車就代表成功。因此,佢車房內有六、七架名貴房車,喜歡揸邊架就揸邊架;亦有女性朋友話擁有珠寶就代表成功,近年一位逝世離婚婦人,佢擁有珠寶足夠開一間珠寶店,但佢丈夫卻瞞住佢搞婚外情,經常成為周刊小道新聞,最後決定離婚,自己亦搞男女關係,請問佢快樂咩?有人話擁有五、六個睡房豪宅,代表成功,以自住物業市值過億而感到自豪,真係咩?但佢D仔女話畀我老曹知,唔知爹哋飛去邊處傾生意,媽咪又去咗舞會;幾千呎豪宅內得一個菲傭,自己感到好孤獨。

好多時我地為咗擁有上述東西而努力一生,但真係好享受咩?好多時因此而搞到夫妻不和同朋友反面,而我地仔女卻喺幾千呎豪宅內問Where is Dad? Where is Ma?生命好短暫,回頭一望我老曹已六十歲了,過去花咗四十年時間去賺錢,以為自己喺度追求成功人生,到底我老曹人生係成功定係失敗?朗月清風晚上,我老曹做緊乜?良辰美景我老曹又錯過幾多次?去年同詹瑞文兄做舞台劇,有一場係自己扮大師,其中一句What's Money?(錢到底係咩?)答案係一堆數字,每天喺度不停地變動。

成功的各種定義

以我老曹為例,每天返工及放工,中午如冇應酬,便落街食碟碟頭飯費用30元……。袋裏只需100元已可應付一天開支,至於其餘錢變成每天喺度不停變動數字,但個人喜怒哀樂,卻受呢D數字所牽制。漸漸認為所謂成功,就係每天能夠笑得比人地多,如能贏到別人對你尊重及小朋友鍾意你,其實你已成功。學習欣賞周圍事物美,搵出別人優點。如有能力令呢個世界好一D。例如助養一名兒童或做一天義工,甚至喺環保方面盡一點力,其實你已成功!唔係財富,更加唔係權力,而係個人修養、對文化追求,以及對社會盡一分力量所帶嚟喜悅。金錢最大用途只係解決生活所需,之後效用就遞減。至於留畀後代;好後代因為需要努力不斷地令財富增長,成為佢地一生無形壓力;唔好後代,因而養成奢華陋習,日後落得敗家仔惡名。兒孫自有兒孫福,莫為兒孫作馬牛。

年紀漸大,我老曹對成功二字有更深入了解。何謂成功?就係以你自己方法,過你自己想過生活,就係成功。只要自己喜歡可華衣美食,亦可樸素勤儉,兩者都係成功,因為成功係冇格式,但求從心所欲就得。有人話日忙夜忙係成功;有人話落得清閒係成功。其實兩者都係成功,只要上述都係自己選擇就得。

事業成功帶畀你自由去做你想做事、想去地方或想提供乜嘢畀家人?甚至係協助人地能力及對社會提供服務能力。成功可能係辛勤工作後代價;亦可能係投資成功後回報。不過,但有一點十分肯定係,人生目標唔係為積聚財富,而係點樣運用財富以達到利己同利人目標。財富分兩類,即物質上財富及精神方面(二十年前影星麥嘉同我老曹講心中富貴)。物質財富可用金錢衡量,但精神財富冇法衡量。愛你家人、朋友、社會及國家,只有咁樣你先獲得真正快樂。2003至07年前,本欄較強調點樣獲得物質財富。2008年踏入熊市後,相信精神財富來得更重要。例如修養、文化同愛心,相信只有兩者兼得,才有快樂人生。

2008年7月3日 星期四

2008-07-04

捉熊腳

  7月3日,周四。是日報慶。恒生指數跌461.67,收21242.78;成交758.1億元。恒指漸漸接近3月份低點20500點,估計呢個水平有反彈。7月期指跌507點,收21267點,仍然微微高水。

  今天滬深A股回升2.26%,收2760點。但印度Sensex 30則冇咁好彩,再跌4.18%,收13094點。滬深三百A股全面反彈,漲停個股近七十家,漲幅5%以上近八百家,係近半年內少見壯觀走勢。主要係新華社發表股市評論文章,代表中央政府支持股市。內地專家估計,6月份CPI升幅將回落至7.1%至7.5%之間,令下半年加息壓力稍減。

德法反對歐央行加息

  歐洲央行一如主席6月份宣布咁加息四分一厘,至4.25厘,因6月份歐羅區CPI升幅接近4%,較央行目標通脹2%高出一倍。瑞典央行亦加息至4.5厘,並揚言再加息;冰島保持利率不變,仍係15.5厘。至於7月10日英倫銀行會否加息?估計機會唔大。呢次係歐洲央行十三個月內首次加息,法國總統薩爾科齊已電視上反對,連德國財長施泰因布呂克亦加入反對行列,歐洲央行主席特里謝呢次面對壓力都幾大。加息後歐羅反而回落到1.5766美元(4月22日1.6019美元)。估計今年歐洲GDP升幅1.8%,明年只有1.5%;8月期油升上145.85美元,未見轉弱。

  英國股市由去年高位回落至今下跌20.4%,係繼美股之後另一確認進入熊市股市。油價見創新高,德銀降低法航評級,令法國航空股價跌3%。全球最大鋼鐵廠阿賽洛米塔爾跌4.7%,全球最大礦產公司澳洲必和必拓股價亦跌3.4%。花旗調降瑞銀評級,令瑞銀股價跌2.6%,過去三季瑞銀已撥備380億美元,不過仍住830億美元較大風險債券,8月12日業績公布時估計仍須撥備70億瑞郎。英國最大零售商馬沙百貨跌3.7%,係連續第六天回落,因估計2008╱09年度獲利減少39%、2009╱2010年減少47%。

  「五窮、六絕、七翻身」係咪Beacons in the Storm(大風雨中的指示燈)?恒生指數已進入極之嚴重超賣區,另一隻「熊腳」應7月份內出現,雖然長期策略繼續睇淡(熊市去年11月已開始),中期策略係反彈隨時出現。熊市二期中應有唔少隻腳,唔似熊市一期同熊市三期(只跌不升)。博反彈乃極之專業行為,散戶不宜。

  內地《新聞晨報》輕鬆理財作家張翼軫叫內地人自由行來港時,記得買森池兄著作,並形容佢係身家過億投資類作家。據我老曹所知,1994年森池兄身家已過億(唔計自住豪宅),過去十四年繼續以每年15%至20%速度上升,大家篤計算機,應大概知道今時今日森池兄身家幾多。唔好睇小每年15%到20%增長率,持之以恒,成果可以好驚人,此乃小數怕長計。

  今天金融機構股價所受到懲罰,有如2000年後科網股。貝爾斯登已名存實亡,至於房利美及房貸美則仍在抵受考驗。次按危機過去前,所造成創傷有幾多?依家仲未到計算時候。認清大趨勢,分辨邊D只係中期反彈,追隨趨勢,直到它結束為止。唔好將中期反彈當作趨勢結束(例如今年3月)。牛市結束快,因此而形成尖頂,熊市結束時極少出現V形反彈,因此靜候它結束,唔使尋底。

  道指由5月19日13170點至今已回落15%,六星期內出現上述跌幅在歷史上亦少見。但VIX指數仍只有23.88(通常要低於20反彈才出現)。捉住跌下來刀從來唔容易。

  投資者應分清小氣候、大氣候。大氣候係去年11月起港股進入熊市,小氣候係熊市二期中有十隻八隻熊腳,如果捉得到每次反彈幅20%或以上,都幾和味(例如今年3月至5月)。但上述係小氣候,不應因此忘記大氣候。

  瑞銀分析員Glenn Schorr將美林同花旗降級,睇金融股仍面對很大壓力。熊市中獵熊十分困難,能夠空手入白刃只屬極少數武林高手,大部分欲捉住下跌中刀結果係損手爛腳。連畢非德管理巴郡今年上半年股價亦跌20%,咁你想點?Oppenheimer分析員Meredith Whitney(2007年7月開始睇淡美股)則警告大家,唔好信「最惡劣日子已過去」。佢認為,呢次次按危機會一直伸延到明年。過去牛市中「超級明星」一個接一個倒下。佢甚至認為,今年5月後連牛熊共舞都唔可能(即跌市中逆流而上行業),因為我地正進入冇Garden Variety危機,甚至石油股同煤礦股亦無法避免下跌命運!股市之內,除淡友外冇贏家,只有大輸家同小輸家之分(去年11月至今,我老曹亦係小輸家)。佢忠告大家,熊市中千萬不要借錢做孖展。太早入市者如Abu Dhahi、中國主權基金、新加坡主權基金、美國華平投資等亦面對唔同程度損失,對股市最大影響力唔係呢D投資公司,而係經濟大方向。即使聯儲局大幅減息,亦無法改變美國經濟大方向!

  1990年首先日本經濟泡沫爆破,1994年墨西哥金融危機、1997年亞洲金融風暴、2000年科網股泡沫破裂、2007年次按危機……一個接一個危機出現,似乎只令個別國家或地區經濟出現衰退,全球經濟仍然保持增長。2002或03年開始全球股市上升趨勢,大部分上升軌已失守,但美元利率只有2厘,甚至中國同印度股市亦跌到七個一皮。根據「Peak Oil」理論,到2012年全球石油每天產量將減少七百萬到一千萬桶,到時才係真正能源危機。聽落都幾得人驚!

  中國政府透過人民幣升值、取消或減少出口退稅,將出口增長率局限10%左右。為減少對入口石油依賴,煤需求急升,令煤價過去一年上升一倍。印度為迅速工業化而大建發電廠,在建工程已達五萬百萬瓦特,即未來印度每年需要額外煤一百七十五萬至二百萬噸。印尼亦建造一萬百萬瓦特發電廠,刺激新需求。去年全球煤產量約六十億噸,但國際市場上可供貿易煤只有五億二千五百萬噸,上述煤售價決定其他煤售價。全球發電廠未來一、兩年將面對發電用煤短缺。今年煤價已係170美元一噸,最近澳洲暴雨天氣令澳洲出口每月減少七十萬到一百萬噸。南非亦決定限制煤出口,以應付國內電廠需要。一噸煤只能提供同樣重量石油五分一能源,加上嚴重染污空氣,唔係清潔能源,人類因石油供應不足才用煤。但到2010年連煤亦供應不足,你說怎麼辦?

通用汽車時光倒流五十年

  油價上升令通用汽車股價跌至10.57美元,整間公司市值60億美元(470億港元),相等於1954年時市值。時光倒流五十年?呢間一度係全球最大市值上市公司,今天總市值甚至唔及香港一間中型地產股!五十年前有人想過咩?

  能源價格同食物價格繼續推高全球CPI升幅,新興國家所面對壓力較OECD國家大。越南CPI升幅已超過26%,但GDP仍可升7.5%;中國CPI升幅8%以上,但GDP仍可保持雙位數上升。成功控制CPI升幅代價係GDP升幅同時回落,令越南同中國股市同時暴跌。

  依家全球已超過三十個國家開始限制糧食出口,仍維持大宗出口國家只有美國、加拿大、澳洲、泰國同巴西。中國對糧食出口抽5-10%出口稅及取消其製品出口退稅。今年前五個月中國穀物出口一百一十六萬噸,較2007年減少77%;入口九十一萬噸,升14.5%。

  6月20日起內地油價上升16%,令每輛車每月油費上升100至200元人民幣。不過,內地油價仍較其他國家低50%以上,如果日後內地油價同國際接軌,對內地汽車股打擊有幾大?

  7月1日起鐵路貨運運費每噸決定上調3分至7分,集裝箱一噸上調3.69分或每呎1.0374元,四十呎箱每呎上調1.6374元。2004年中國國務院要求「引進先進技術,聯合設計生產,打造中國品牌,啟動鐵路動車組項目」,引入無砟軌道技術。首次採五百米長鋼軌工地焊接施工工藝,跨區進行長大無縫線路鋪設,採用高性態混凝土,建成世界一流城際鐵路網及火車提速行動。利用8月8日北京奧運,向世界顯示一個鐵路現代化下中國。家時速達三百公里及三百五十公里國產「和諧號」動車組,今年4月11日由唐山開出;今年8月1日第二組由北京開出,直達天津。鐵路運輸將成為中國另一重要交通項目。